Բարեգործական նպատակաւ արտերկրէն Հայաստան բեռներ ներածելու ուղեցոյց
26.03.2021
Հարկային արտօնութիւններ ստանալու նպատակաւ արտերկրէն Հայաստանի Հանրապետութիւն բեռներու ներածումը բարեգործական որակելու համար՝ անհրաժեշտ է յայտ ներկայացնել փոխվարչապետ Տիգրան Աւինեանին։ Յայտը հնարաւոր է ուղարկել թղթային տարբերակով կամ «e-request.am» ելեկտրոնային հարթակի միջոցաւ։ Յայտը պէտք է ներկայացուի նախապէս՝ ծրագրի իրականացումէն առնուազն 30 օր առաջ:
Ծրագիրը բարեգործական չի կրնար որակուիլ, եթէ՝
-կ’ենթադրէ շահ կամ շահոյթ,
-կը ներառէ դրամական կամ այլ միջոցներու յատկացում՝ կուսակցութիւններու եւ առեւտրային կազմակերպութիւններու,
-ուղղուած է սեփական աշխատողներու սպառողական պահանջմունքները բաւարարելու,
-կը ներառէ ապրանքներու առք ու վաճառքի գործարք:
Հարկային արտօնութիւններ ստանալու նպատակաւ բարեգործական կրնայ որակուիլ միայն ոչ առեւտրային կազմակերպութիւններու եւ անհատներու կողմէ ոչ առեւտրային կազմակերպութեան հասցէին ուղարկուող բեռներու ներածումը:
Յայտը կը ներկայացուի ստացող կազմակերպութեան կողմէ՝ ազատ շարադրանքով: Ուղարկուող յայտին մէջ պէտք է նկարագրել բեռը ստանալուն նպատակը եւ նախատեսուող միջոցառումները, նախատեսուող մուտքերու եւ ծախսերու նախահաշիւը, իրականացման փուլերն ու ժամկէտները, ինչպէս նաեւ յստակօրէն նշել կատարողներուն ու ստացողներուն տուեալները:
Յայտին կից անհրաժեշտ է ներկայացնել՝
1. բեռին հաշիւ-ապրանքագիրը (invoice),
2. բեռնափոխադրման առկայ փաստաթուղթերը,
3. նուիրատուութեան պարագային՝ նուիրատուութեան նամակը (donation letter),
4. բեռին մէջ ներառուած ապրանքներուն մանրամասն ցանկը,
5. շահառուներուն ցուցակը՝ ըստ բաշխուող ապրանքներու քանակին եւ համապատասխան արժէքին:
Հարցերու պարագային կրնաք դիմել ՀՀ փոխվարչապետ Տիգրան Աւինեանի գրասենեակի Մարդասիրական օգնութեան ծրագիրներու վարչութիւն։