Դասախօսութիւն Սփիւռքի Նախարարութեան ՄԷջ`«Հայազգի Զօրավարները, Մարշալները» Թեմայով

Մայիս 17-ին ՀՀ սփիւռքի նախարարութեան մէջ «Սարդարապատի հերոսամարտի եւ առաջին հանրապետութեան ականաւոր գործիչներու մեծարման օրեր» ծրագիրի ծիրէն ներս պատմաբան, ՀՀ բանակի փոխգնդապետ Տիգրան Պետրոսեանց հանդէս եկաւ հայազգի զօրավարներու, մարշալներու մասին դասախօսութեամբ:

Հայ ժողովուրդի համար յաղթանակ խորհրդանշող ամսուն` մայիսին կազմակերպուած դասախօսութեան մասնակցեցան սփիւռքահայ մտաւորականներ, ուսանողներ եւ նախարարութեան աշխատակիցներ:

Տիգրան Պետրոսեանց խօսեցաւ համաշխարհային երկու պատերազմներուն հայազգի զօրավարներու, մարշալներու դերին մասին: «Տարիներ շարունակ իմ խնդիրս  համարած եմ Հայոց պատմութեան ընթացքին աչքի ինկած հայազգի հերոսներուն գտնելն ու հասարակութեան ներկայացնելը: Եւ վերջապէս 2002թ. Հայկ Խաչատրեանի հետ տպագրեցինք մեր առաջին «Հայկազունք» աշխատութիւնը, ուր ներկայացուցինք ազգութեամբ հայ 406 զօրավարներու»:

Տիգրան Պետրոսեանց ներկայացուց նաեւ Սարդարապատի եւ Բաշ-Ապարանի ճակատամարտերուն հայերու ինքնակազմակերպման պատմութիւնը եւ այդ յաղթանակներուն զինուորական բարձրագոյն կոչումներ ունեցող հայերու ներդրումը:

Այնուհետեւ բանախօսն անդրադարձաւ Հայաստանի 3-րդ Հանրապետութեան ժամանակաշրջանին, Արցախեան ազատամարտի ընթացին իրենց մեծ ներդրումը բերած բարձրաստիճան զինուորականներուն: «Միքայէլ Յարութիւնեան, Նորատ Տէր-Գրիգորեանց, Մուրադ Սարգսեան, Քոմանտոս եւ այլք. անոնք կանգնած են մեր յաղթանակներու եւ բանակի ձեւաւորման ակունքներուն», – նշեց Տիգրան Պետրոսեանց:

Շնորհակալութիւն յայտնելով Տիգրան Պետրոսեանցին ուշագրաւ փաստերով յագեցած դասախօսութեան համար` Սփիւռքի նախարարի տեղակալ Սերժ Սրապիոնեան նշեց. «Դուք ներկայացուցիք հայ զօրավարներու ու մարշալներու 3 սերունդի պատմութիւնը: Այսօրուան սերունդը պէտք է ճանչնայ մեր հերոսներուն, դաստիարակուի անոնց օրինակով, իմանայ սեփական ժողովուրդի ռազմական պատմութիւնն ու հպարտանայ  անով»:

img_5011img_5024 img_5029img_4998

 

Ֆրանսայի Մէջ կը Մեկնարկէ Կաննի 70-րդ Յոբելինական Փառատօնը

Կաննի մէջ` Ֆրանսայի Լազուր ափին, 70-րդ անգամ ըլլալով կը մեկնարկէ միջազգային փառատօնը, որ պիտի շարունակուի մինչեւ Մայիս 27։ Այս մասին կը հաղորդէ Artsakhpress.am-ը՝ վկայակոչելով TASS-ը։

Այս անգամ փառատօնի յանձնախումբը հիմնական մրցոյթին համար ընտրած է 19 աշխատանք՝ գրեթէ 2000 երկարաժամ ֆիլմերէ: Անոնցմէ պաշտօնական ծրագիրին ներառուած է 49 շարժանկար:

Կաննի փառատօնի ժիւրին պիտի գլխաւորէ սպանացի յայտնի բեմադրիչ Փետրօ Ալմոտովարը: Դափնեկիրներուն ցուցակը պիտի հրապարակուի Մայիս 28-ին կայանալիք փակման արարողութեան ժամանակ, որմէ ետք տեղի պիտի ունենայ այն շարժանկարին ցուցադրութիւնը, որ պիտի ստանայ «Ոսկէ արմաւենի»-ի ճիւղը:

Կաննի փառատօնը Ֆրանսայի կրթութեան եւ արուեստի գործերու նախարար Ժան Զէի նախաձեռնութեամբ հիմնուած Է 1930-ական թուականներու վերջը, իբրեւ Վենետիկի փառատօնի այլընտրանք: 1952 թուականէն անիկա ամէն տարուան Մայիսին կ՝իրականացուի Փառատօններու եւ քոնկրէսներու պալատին մէջ։

Արփինէ Յովհաննիսեան Ազատուած Է Պաշտօնէն

Արդարադատութեան նախարար Արփինէ Յովհաննիսեան ազատուած է իր պաշտօնէն: Այս մասին այսօր հրամանագիր ստորագրած է ՀՀ նախագահ Սերժ Սարգսեան:

Յիշեցնենք, որ ան ընտրուած է ԱԺ պատգամաւոր: Կառավարութեան վերջին նիստին վարչապետ Կարէն Կարապետեան շնորհակալութիւն  յայտնած էր անոր աշխատանքի համար:

 

Հայաստանի Քաղաքացիները Հնարաւորութիւն Կը Ստանան Անվճար Ուսանելու Վրաստանի Մէջ

Պաշտօնական այցով Հայաստան կը գտնուի Վրաստանի փոխվարչապետ, կրթութեան եւ գիտութեան նախարար Ալեքսանդրէ Ջեջելաւայի գլխաւորած պատուիրակութիւնը: Այցի ընթացքին պատուիրակութիւնը հանդիպում ունեցած է  ՀՀ կրթութեան եւ գիտութեան նախարար Լեւոն Մկրտչեանի եւ նախարարի տեղակալներուն հետ։ Քննարկուած են կրթութեան եւ գիտութեան ոլորտներու մէջ երկու երկիրներու միջեւ համագործակցութեան զարգացման ուղիները:

Այնուհետեւ ՀՀ կրթութեան եւ գիտութեան նախարարութեան եւ Վրաստանի կրթութեան եւ գիտութեան նախարարութեան միջեւ ստորագրուած է յուշագիր` ի դէմս ՀՀ ԿԳ նախարար Լեւոն Մկրտչեանի եւ Վրաստանի փոխվարչապետ, ԿԳ նախարար Ալեքսանդրէ Ջեջելաւայի:

Վրաստանի ԿԳ նախարարը շնորհակալութիւն յայտնած է Լեւոն Մկրտչեանին հիւրընկալութեան համար` կարեւորելով երկկողմ յարաբերութիւններու զարգացումը:

Ըստ յուշագիրին` կողմերը հանրակրթութեան, միջին մասնագիտական եւ բարձրագոյն կրթութեան, գիտութեան եւ հետազօտութեան ոլորտներու մէջ պիտի ստեղծեն աշխատանքային խումբեր: Կը նախատեսուի փոխադարձ հիմունքներով տրամադրել բարձրագոյն ուսումնական հաստատութիւններու մէջ մագիստրոսական աստիճանի առաւելագոյնը 10 կրթաթոշակ:

Վրացական կողմը կը պարտաւորուի Հայաստանի քաղաքացիները ազատել Վրաստանի պետական բարձրագոյն կրթական հաստատութիւններու մէջ ուսման վճարէն, եթէ անիկա չի գերազանցեր 2250 վրացական դրամական միաւոր: Հայկական կողմը կը պարտաւորուի Վրաստանի քաղաքացիները ազատել Հայաստանի պետական բարձրագոյն կրթական հաստատութիւններու մէջ  ուսման վճարէն, եթէ վերջինս չի գերազանցեր 1.000.000 դրամը:

Երկու կողմերէն առաջադրուած ուսանողները կը պարտաւորուի հաւաստել դասաւանդման լեզուներու որոշակի մասնագիտացման մակարդակ (անգլերէն եւ ռուսերէն), հակառակ պարագային` ուսանողները կը պարտաւորուին յանձնել որոշ ներքին քննութիւններ` կազմակերպուած տուեալ բարձրագոյն կրթական հաստատութեան կողմէ:

Բակօ Սահակեան Ընդունած է Ամերիկահայ Գրող եւ Հրատարակիչ Յովսէփ Նալպանտեանը

Արցախի Հանրապետութեան Նախագահ Բակօ Սահակեան Մայիս 17-ին ընդունած է ամերիկահայ գրող եւ հրատարակիչ Յովսէփ Նալպանտեանը:

Արցախի Հանրապետութեան Նախագահի աշխատակազմի տեղեկատւութեան գլխաւոր վարչութեան հաղորդած տեղեկութիւններով` հանդիպման, որուն կը մասնակցէր Արցախի գրողներու միութեան նախագահ Վարդան Յակոբեանը, քննարկուած են գրականութեան ասպարէզի մէջ Արցախ-Սփիւռք փոխգործակցութեան վերաբերող շարք մը հարցեր:

Բակօ Սահակեանը արժեւորած է նման կապերու ամրապնդումը` անոնց համարելով Հայրենիք-Սփիւռք միասնականութեան կարեւոր բաղադրամասերէն:

Ուաշինկթընի Մէջ Խաղաղ Ցուցարարներուն Վրայ Յարձակողները Էրտողանի Անվտանգութեան Աշխատակիցները Եղած Են

Ուաշինկթընի մէջ Թուրքիոյ նախագահ Ռեճեփ Թայիփ Էրտողանի դէմ հայկական համայնքի կազմակերպած խաղաղ ցոյցի մասնակցողներուն վրայ յարձակում գործողները  Էրտողանի անվտանգութեան աշխատակիցները եղած են: Ինչպէս կը հաղորդէ «Արմենփրես»-­ը, այս մասին կը գրէ The Guardian-­ը:

 Պարբերականին հետ զրոյցի ընթացքին ականատեսներէն մէկը ըսած է, թէ Էրտողանի անվտանգութեան աշխատակիցները ծեծկռտուք սկսած են այն ժամանակ, երբ ցոյցին մասնակցողներէն մէկը կը կրէր քրտական «Ժողովրդավարական միութիւն» կուսակցութեան (PYD) դրօշը:

Դէպքին անդրադարձած են նաեւ հեղինակաւոր շարք մը այլ լրատուամիջոցներ եւս: CNN յայտնած է, որ Ուաշինկթընի մէջ Թուրքիոյ դեսպանի կեցավայրին դիմաց իրականացուած յարձակումին հետեւանքով տուժած է ինը մարդ:

 New York Post եւս գրած է, որ ցուցարարներուն վրայ յարձակած են Էրտողանի անվտանգութեան աշխատակիցները: Տեղադրուած տեսանիւթին մէջ կ՛երեւի նաեւ, թէ ինչպէս անոնք կը հայհոյեն խաղաղ ցուցարարներուն: Լրատուամիջոցը կը յայտնէ, որ վիրաւորներէն երկուքին վիճակը ծանր է:

Ոստիկանական բաժնի խօսնակ Տասթին Սթերնպըք տեղեկացուցած է, որ կատարուածի առնչութեամբ երկու մարդ ձերբակալուած է: Անոնցմէ մէկը կը մեղադրուի բախումի ժամանակ ոստիկանի մը վրայ յարձակուելու մէջ:

«Նման յարձակումներ չենք ակնկալեր տեսնել Ամերիկայի մայրաքաղաքին մէջ, հակառակ անոր որ անոնք սովորական են Էրտողանի Թուրքիոյ եւ այլ բռնատիրական երկիրներու մէջ։ Թուրքիա կը փորձէ իր անհանդուրժողութիւնը Միացեալ Նահանգներ փոխադրել»,- այս առթիւ յայտարարած է Ամերիկայի Հայ Դատի յանձնախումբի գործադիր վարիչ Արամ Համբարեան։

Ցոյցը կազմակերպուած էր Ամերիկայի Հայ Դատի յանձնախումբին, Ամերիկայի Հելէնական խորհուրդին եւ շարք մը այլ քրտական, ասորական եւ յունական կազմակերպութիւններու կողմէ։

Աւարտեց ՀՀ Եւ Արցախի Հանրակրթական Դպրոցներու 4-7-րդ Դասարաններու Աշակերտներու Միջեւ Իրականացուող «Մարզական Մրցոյթը»

Մայիս 16-ին, «Խուլերու հայկական մարզական կոմիտէ» հասարակական կազմակերպութեան մարզադահլիճին մէջ կայացաւ Հայաստանի Հանրապետութեան մարզերու, Երեւան քաղաքի եւ Արցախի Հանրապետութեան հանրակրթական դպրոցներու 4-7-րդ դասարաններու աշակերտներու միջեւ իրականացուող «Սպորտլանդիա» մարզական ձեռնարկին եզրափակիչ փուլը: Այս մասին «Հայերն այսօր»-ին կը  յայտնեն ՀՀ մարմնակրթութեան  եւ երիտասարդութեան հարցերու նախարարութենէն:

Ուժերը  չափած են Հայաստանի Հանրապետութեան բոլոր մարզերը, Երեւան քաղաքը եւ Արցախի Հանրապետութիւնը ներկայացնող խումբերը:

Մարզական մրցոյթին յաղթող  ճանչցուած է ՀՀ Կոտայքի մարզի Եղուարդ քաղաքի № 3 հիմնական դպրոցի խումբը: Երկրորդ տեղը գրաւած է ՀՀ Արարատի մարզի Վանաշէն գիւղի միջնակարգ դպրոցի խումբը, իսկ երրորդ տեղը` ՀՀ Լոռիի մարզի Գուգարքի հիմնական դպրոցի խումբը:

Մրցումին մասնակցած դպրոցներուն յանձնուած է մարզագոյք, իսկ բոլոր խումբերու անդամներուն` խրախուսական նուէրներ:

Առաջին տեղը գրաւած խումբը  արժանացած է յաղթողի գաւաթի եւ 450.000 ՀՀ դրամ պարգեւավճարի: Երկրորդ տեղը գրաւած խումբը պարգեւատրուած է 350.000 ՀՀ դրամով, իսկ երրորդ տեղը գրաւած խումբը` 250.000 ՀՀ դրամով:

Նշենք, որ դրամական պարգեւները դպրոցներուն կողմէ պէտք է օգտագործուին բացառապէս մարզագոյք ձեռք բերելու նպատակով:

%d5%bd%d5%ba%d5%b8%d6%80%d5%bf1 %d5%bd%d5%ba%d5%b8%d6%80%d5%bf2 %d5%bd%d5%ba%d5%b8%d6%80%d5%bf3

Պաշտպանութեան Բանակի Կանխարգելիչ Գործողութիւններու Արդիւնքով Ատրպէյճանական Կողմն Ունի Կորուստներ. Տեսանիւթ

Ի պատասխան արցախա-ատրպէյճանական հակամարտ զօրքերու սահմանագիծին Մայիս 16-ի լոյս 17-ի գիշերը հակառակորդի դրսեւորած աշխուժութեան, Պաշտպանութեան բանակի մարտական հերթապահութեան մէջ գտնուող ստորաբաժանումները ձեռնարկած են կանխարգելիչ գործողութիւններու, որուն արդիւնքում, ըստ ՊԲ համապատասխան ծառայութիւններու տրամադրութեան տակ եղած հաւաստի տուեալներու, Ատրպէյճանի բանակը կրած է կորուստներ:

Արցախի ՊԲ-ն կը ներկայացնէ գործողութեան տեսագրութիւնը:

Աստուածաշունչի առաջին հայերէն տպագրութեան 350ամեակի տօնակատարութիւն Սիտնիի մէջ

Համագործակցութեամբ Աւստրալիոյ եւ Նոր Զելանտայի Հայոց Թեմի Առաջնորդարանին եւ Համազգայինի Շրջանային Վարչութեան եւ անոր Գրական Գեղարուեստական Յանձնախումբին, Սիտնիի մէջ, Ապրիլ-Մայիս ամիսներուն նշուեցաւ Աստուածաշունչի առաջին Հայերէն տպագրութեան 350ամեակը: Այս յատուկ առիթով որպէս գլխաւոր բանախօս հրաւիրուած էր Հայաստանի Ազգային Գրադարանի Տնօրէն Դոկտ.. Տիգրան Զարգարեանը:

28 Ապրիլին, հովանաւորութեամբ Թեմի Առաջնորդ Գերշ. Տէր Հայկազուն Եպս Նաճարեանի եւ ի ներկայութեան Ազգային մարմիններու ներկայացուցիչներու եւ հարիւրէ աւելի հայորդիներու, տեղի ունեցաւ առաջին ձեռնարկը Րայտ արուարձանի Արուեստի Վարժարանի սրահին մէջ, հանդիսավարութեամբ Լիլիք Կոտոյեանի: Բացման եւ բարի գալուստի խօսք արտասանեց Համազգայինի Շրջանային վարչութեան Ատենապետ  Վիգէն Գալլօղլեան: ՀՀ Սփիւռքի նախարաի խորհրդատու Հանրիէթ Անդրիասեան կարդաց նախարարուհի Հրանուշ Յակոբեանի շնորհաւորանքի խօսքը: Ի գործ դրուեցաւ գեղարուեստական յայտագիր, ասմունք՝ Գօլստըն Ճեմարանի ուսանող Ճորճ Շիշոյեանի կողմէ, շարականներու երգեցողութիւն Ս. Յարութիւն Եկեղեցւոյ Քառասուն մանկանց Երգչախումբի անդամներու կողմէ (Լիլիթ Մինասեան, Գայանէ, Արգինա եւ Նանոր Մուրատեաններ, Մարինէ եւ Ասպետ Անուշեան, Պօղոս Քէլէշեան), ղեկավարութեամբ Վարդան Սրկ. Էլմասեանի: Ալէքս Սահակեանի դասաւորումով նուագուեցան Կոմիտասի ստեղծագործութիւններէն, Քանոն՝ Լուսիկ Թովմասեան,  Թաւջութակ՝ Նաթալի Մինասեան եւ Դաշնամուր՝ Ալէքս Սահակեան:

Իր բանախօսութեան մէջ Դոկտ.. Զարգարեան տուաւ ընդհանուր ծանօթութիւն Հայ տպագրութեան մասին եւ մասնաւորեց Աստուածաշունչի տպագրութիւնը որպէս կարեւոր ազգային եւ միջազգային իրադարձութիւն: Ուղղուած բազմաթիւ հարցումներուն դասախօսը տուաւ սպառիչ պատասխաններ եւ բաւարարեց ներկաները:

Փակման Խօսք եւ Աղօթքը կատարեց Գերաշնորհ Սրբազան Հայրը:

Կազմակերպիչներու կողմէ պատրաստուած էր հնատիպ գիրքերու ցուցահանդէս, որ մեծ հետաքրքրութիւն ստեղծեց ներկաներուն մօտ:

Մայիս 3-ի երեկոյեան տեղի ունեցաւ երկրորդ ձեռնարկը Նիւ Սաութ Ուէյլզ նահանգի խորհրդարանի սրահներէն մէկուն մէջ հիւրընկալութեամբ նահանգապետուհի Գլատիս Պէրէճիքլեանի: Ներկայ էին Հայկական կազմակերպութիւններու ներկայացուցիչները եւ աւելի քան վաթսուն ոչ հայ հիւրեր՝ բարձրաստիճան կղերականներ, քաղաքական անձեր, իրաւաբաններ եւ Հայ ու Աւստրալական մամուլի պատասխանատուներ: Հանդիսավարն էր Վիգէն Գալլօղլեան, որ իր բացման խօսքին մէջ   տուաւ հակիրճ տեղեկութիւն Հայկական տպագրական մշակոյթին մասին: Նահանգապետուհի Գլատիս Պէրէճիքլեան ողջունելէ ետք ներկաները հպարտանքով անդրադարձաւ 350ամեայ Հայ առաջին Աստուածաշունչին կարեւորութեան ապա ներկայացուց  բանախօս Դոկտ. Զարգարեանը: Դոկտ. Զարգարեան անգլերէն լեզուով իր բանախօսութեան ընթացքին շեշտը դրաւ 5000 օրինակով Ոսկան Երեւանցիի Ամսթերտամի մէջ տպած առաջին Հայերէն Աստուածաշունչի կարեւորութեան վրայ, վեր առաւ Երեւանցիի զոհողութիւնը եւ Ամսթերտամի խաղացած կարեւոր դերը  անոր յաջողութեան մէջ:

Եզրափակիչ խօսքերուն մէջ Սրբազան հայրը շնորհակալութիւն յայտնեց Նահանգապետուհիին եւ ներկաներուն, անոնց տուած կարեւորութեան այս պատմական իրադարձութեան:

Հանդիսութեան աւարտին Սրբազան Հայրն ու Դոկտ.. Զարգարեան պատուեցին Նահանգապետուհի Պէրէճիքլեանը «Յակոբ Մեղապարտ» շքանշանով եւ Խորհրդարանի գրադարանին նուիրեցին Հրայր Բազէի Խաչքար պատկերազարդ ծաւալուն գիրքը: Կողքի սրահին մէջ տեղի ունեցաւ ցուցահանդէս հնատիպ գիրքերուն եւ հիւրասիրութիւն, որուն ընթացքին ներկաները մօտէն ծանօթացան Ազգային Գրադարանի գործունէութեան ինչպէս նաեւ Հայ Առաքելական եկեղեցւոյ եւ Համազգայինի առաքելութեանց:

Այս առիթով հրատարակուեցաւ գրքոյկ մը Հայերէնով եւ Անգլերէնով, նուիրուած Հայ տպագրութեան ընդհանրապէս եւ Աստուածաշունչի տպագրութեան մասնաւորապէս որ ցրուուեցաւ երկու ձեռնարկներու մասնակից բոլոր ներկաներուն:

Մայիսի 7-ին, կազմակերպութեամբ Հայ համալսարանականներու Միութեան տեղի ունեցաւ «Երիտասարդութիւնը կը հանդիպի Դոկտ. Տիգրան Զարգարեանի Հետ» ձեռնարկը Ս. Յարութիւն եկեղեցւոյ Էտկարեան սրահին մէջ մասնակցութեամբ հայկական երիտասարդական չորս կազմակերպութիւններէ մօտ քառասուն անդամներու, հանդիսավարութեամբ Թամարա Կոտոյեանի: Դոկտ. Զարգարեան անգլերէն լեզուով ներկայացուց իր նիւթը, որուն մասին եղան բազմաթիւ հարցումներ: Քաջալերելի երեւոյթ էր Հայ ուսանող երիտասարդութեան ցուցաբերած հետաքրքրութիւնը Հայկական տպագրութեան արուեստին եւ պատմութեան: Սրբազան հայրը իր գոհունակութիւնը յայտնեց երիտասարդական այս համախմբման համար եւ դրուատեց ներկաներու մասնակցութիւնը այս կարեւոր ձեռնարկին:

Դոկտ. Զարգարեան իր Սիտնի կեցութեան ընթացքին այցելեց Աւստրալիոյ Ազգային Գրադարան, Քանպերա, ինչպէս նաեւ Նիւ Սաութ Ուէյլզի Գրադարան, ուր ծանօթացաւ այնտեղ պահուած հայերէն թէ օտար լեզուներով հրատարակութեանց եւ հրապարակուած թերթերուն: Դոկտ. Զարգարեան զոյգ գրադարաններուն մէջ ծանօթացաւ հնատիպ որոշ գիրքերու, որոնց օրինակները  Հայաստանի Ազգային Գրադարանին մէջ չկան: Երեք գրադարանապետները որոշեցին համագործակցիլ եւ զարգացնել գրադարաններու փոխ յարաբերութիւնը:

Դոկտ. Զարգարեան նաեւ կարողացաւ Սիտնիի Հայ համայնքի անդամներէն Ազգային Գրադարանին համար ապահովել Աւստրալիա թէ այլուր հրատարակուած գիրքեր ու հրապարակուած մամուլ:  Ան նաեւ այցելեց Հայկական ամէնօրեայ ՀԲԸՄ Ալեքսանտր Վարժարան եւ Համազգային Գօլստըն Ճեմարան, ինչպէս նաեւ՝ Թումանեան եւ Ալեք Մանուկեան Շաբաթօրեայ վարժարաններ, ուր տեղի ունեցան հանդիպումներ տնօրէններուն, ուսուցչական կազմերուն եւ աշակերտութեան հետ: Հիւր բանախօսը մանրամասն բացատրութիւն տուաւ Ազգային Գրադարանի ծաւալած գործունէութեան մասին, ստեղծելով մեծ հետաքրքրութիւն:

Դոկտ. Զարգարեան հարցազրոյցներով ելոյթ ունեցաւ Հայ Եկեղեցւոյ Ձայն եւ Արմէնիա Ռատիօկայաններէն:

350ամեակի նուիրուած բոլոր ձեռնարկները յաջողութեամբ պսակուեցան շնորհիւ տիրող համագործակցութեան ոգիին եւ ճշգրիտ կազմակերպութեան:

hamazkayin.com

«Այն Օրը, Երբ Մենք Կ՛ունենանք Հզօր Սփիւռք, Կ՛ունենանք Նաեւ Հզօր Հայրենիք». Լիբանանահայ Քաղաքական Երեք Օրաթերթերու Խմբագիրներուն Հետ Զրոյցի Ընթացքին Հաստատեց Ալեքքօ Պէզիքեան

Լիբանանահայ երեք օրաթերթերու գլխաւոր խմբագիրներ` Շահան Գանտահարեան` «Ազդակ», Անի Եփրեմեան` «Արարատ» եւ Սեւակ Յակոբեան` «Զարթօնք», երկուշաբթի,  8 մայիս 2017-ին, «Ազդակ»-ի խմբագրատան մէջ համացանցային զրոյց մը ունեցան ազգային բարերար, Հայոց ցեղասպանութեան որբերու «Արամ Պէզիքեան» թանգարանի հոգաբարձութեան նախագահ Ալեքքօ Պէզիքեանին հետ: Զրոյցի ընթացքին Ալեքքօ Պէզիքեան եւ հայկական երեք օրաթերթերու խմբագիրները արծարծեցին բազմաթիւ հարցեր:  Հայաստանի պարագային անոնք բնորոշեցին, որ պէտք է զարգացնել սահմանամերձ շրջանները, գիւղերը եւ մարզերը, իսկ սփիւռքի պարագային, պէտք է երիտասարդութիւնը կուսակցութիւններուն մօտեցնել, հայկական ծրագիրներուն հաղորդ դարձնել, համակարգուած ու միացեալ աշխատանք տանիլ եւ  վերականգնել համագործակցութեան աշխատելաձեւը: Ստորեւ կը ներկայացնենք տեղի ունեցած զրոյցին ընդհանուր պատկերը:

Հայոց ցեղասպանութեան 100-ամեակի աշխատանքներուն մէջ սփիւռքի մէջ ամէնէն կարեւոր իրագործումը Հայոց ցեղասպանութեան նահատակներու յիշատակին կառուցուած «Արամ Պէզիքեան» թանգարանն է Ժիպէյլի մէջ: Թանգարանի երկու տարուան  գործունէութեան ընդհանուր գնահատական մը տալու, այցելուներու թիւի, թանգարանի կարեւորութեան եւ գործնական տուեալներու իմաստով Ալեքքօ Պէզիքեան ըսաւ, որ թանգարանը իրեն համար երազ մը եղած է: Սփիւռքը եւ ընդհանրապէս հայութիւնը նման վայրի մը կարիքը ունեցած են, որպէսզի Հայոց ցեղասպանութեան նահատակներուն յիշատակը վառ պահուի եւ նաեւ` անոնց, որոնք ողջ մնացած ու այդ որբանոցին մէջ հաւաքուած ու հասակ առած են:

Ան ցաւով նշեց, որ Լիբանան այցելութեան ընթացքին հանդիպած է երիտասարդ ու միջին տարիքի մարդոց, որոնք Ժիպէյլի մէջ Հայոց ցեղասպանութեան յիշատակին կառուցուած «Արամ Պէզիքեան» թանգարանի գոյութեան մասին տեղեակ չեն: Ան իր վրդովմունքը յայտնեց այս երեւոյթին համար, ապա քննելով պատճառները, ընդգծեց Լիբանանի հայ մամուլին դերակատարութիւնը` պատմական մեծ արժէք ու նշանակութիւն ունեցող այս վայրը լուսարձակի տակ առնելու ու հասարակութիւնը իրազեկ դարձնելու:

Ան յայտնեց, որ թանգարանը երկու տարուան ընթացքին 9000 այցելու ունեցած է, բայց ըստ Պէզիքեանին, 9000 այցելու ունենալը չէ, որ կը գոհացնէ, այլ պէտք է երիտասարդութիւնը ներգրաւել ու մղել դէպի ազգային կեանք եւ արժէքներ. լաւ իմանալով ազգային կեանքին մէջ կամաւոր աշխատելու դժուարութեան մասին` ան կարեւորութեանբ նշեց, որ նոր սերունդի ներկայացուցիչները պարտաւոր են գէթ իրենց ներկայութեամբ, քաջալերանքով եւ կարողութեան սահմաններուն մէջ մասնակից ըլլալու հայ կեանքին:

Ալեքքօ Պէզիքեան յանձնարարեց, որ հայկական վարժարանները այցելութիւններ կազմակերպեն թանգարան, որպէսզի աշակերտները տեսնեն, ծանօթանան ու ապրին գիրքերու մէջ Հայոց ցեղասպանութեան մասին իրենց կարդացածը: Ան ըսաւ, որ հասարակութեան բարենորոգումը մանկապարտէզէն կը սկսի եւ ոչ թէ` համալսարանէն: Սերունդները մանկութեան տարիներուն պէտք է կրթել ու դաստիարակել, որպէսզի հետագային կերտուի իր պատմութեան ու ազգային արժէքներուն իսկական ու արժանի ժառանգորդը:

Անդրադառնալով Լիբանանի հայ գաղութի կարեւորութեան` Ա. Պէզիքեան ըսաւ. «Շատ բան կը պարտինք Լիբանանի: Եթէ Ժիպէյլը, Ղազիրը, Այնթուրան, Սայտան, Անթիլիասը չըլլային, այսօր սփիւռքը ի՞նչ պատկեր պիտի պարզէր, գոյութիւն պիտի ունենա՞ր: Որբանոցներուն մէջ ջարդէն ճողոպրած մեր հայրերը ոչ մէկ ճիգ խնայեցին  իրենց զաւակներուն լաւագոյն ուսումը տալու: Անոնք մեր մէջ կերտեցին հայկական զգացումը, հայ հոգին: Անոնց տարիներու զոհողութիւնները ձրիաբար անտեսելը արդար չէ, կարելի չէ: Ես մեծ յարգանք ունիմ բոլոր անոնց հանդէպ, որոնք հայկական որբանոցներէն դուրս եկած, ընտանիք կազմած, պահած ու լաւագոյնս դաստիարակած են իրենց զաւակները: Եթէ այսօր ճարտարապետներ, իրաւաբաններ, բժիշկներ ունինք, շատ մարզերու մէջ յաջողած եւ փայլուն հայեր ունինք, կը պարտինք որբանոցի սերունդներու զոհողութեան»:

Խմբագիրները իրենց կարգին յայտնեցին, որ «Արամ Պէզիքեան» թանգարանը միջազգային թանգարաններու ցանցին մէջ ներկայ է արդէն եւ ընդգրկուած` թանգարաններու բաց գիշեր ծրագրին մէջ, Անթիլիասի «Կիլիկիա» թանգարանին հետ: Այս իրականութիւնը առիթ կը հանդիսանայ, որ մանաւանդ օտարները ներկայ ըլլան, տեսնեն ու իրենց վկայութիւնը տան մեր պատմութեան մասին: Անոնք հարկ նկատեցին Լիբանանի մշակութային ծրագիրներու մէջ առաւելագոյն չափով  ընդգրկել «Արամ Պէզիքեան» թանգարանը: Խմբագիրները հաստատեցին նաեւ, որ թանգարանի բովանդակութեան հիմքը ամբողջ որբանոցն է: Ամբողջ սփիւռքը այսօր քաղաքական գործօնի վերածուած է` շնորհիւ այդ որբանոցներէն դուրս եկած ու դաստիարակուած եւ հայապահպանման աշխատանքներուն լծուած այդ սերունդին:

Իր կարգին, Ալեքքօ Պէզիքեան յայտնեց, որ աշխատանք տարուած է Ժիպէյլի քաղաքապետին միջոցով, որ թանգարանը զբօսաշրջութեան այցելութիւններուն մաս կազմէ: Ան ըսաւ, որ նախատեսուած է նաեւ թանգարանի վերի յարկը վերածել ուսումնասիրութիւններու կեդրոնի, գիտաժողովներու եւ դասախօսութեան յարմար վայրի: Ան ըսաւ, որ ծրագիրը պատրաստ է, մօտ ժամանակէն կ՛իրագործուի. հիմնական, բայց  յաղթահարելի դժուարութիւնը նիւթականն է:

Խմբագիրները առաջարկեցին, որ յառաջիկային Հայոց ցեղասպանութեան յիշատակին կազմակերպուած երիտասարդական հսկումը «Արամ Պէզիքեան» թանգարանին շուրջ տեղի ունենայ: Անոնք համաձայն գտնուեցան նաեւ միասնաբար գիտաժողով մը կազմակերպել «Արամ Պէզիքեան» թանգարանին մէջ:

Իսկ ինչ կը վերաբերի երիտասարդութիւնը ազգային մտահոգութիւններուն եւ արժէքներուն հաղորդ դարձնելու, ազգային կեանքին մէջ ներգրաւելու քայլին, զրուցակիցները համոզում յայտնեցին, որ պէտք է սովորական միջոցներէն դուրս գալ, իմանալ երիտասարդներուն հետաքրքրութիւնը, պահանջներն ու ակնկալիքները եւ ըստ այնմ պատրաստել դաշտեր, ուր աշխատելու եւ արդիւնաբերելու լայն հնարաւորութիւն ունենան անոնք: Այս առումով ալ տեղեկատուական եւ ընկերային հաղորդակցութեան ցանցերը պէտք է կարեւորութեամբ նկատի առնել, որովհետեւ երիտասարդները աւելի շատ համացանցի ընթերցողներ են:

Ա. Պէզիքեան հաստատեց, որ եկեղեցին, դպրոցները եւ յատկապէս ընտանիքները մեծ դերակատարութիւն ունին սերունդներու առողջ եւ հայեցի կրթութիւն ջամբելու վեհ ու ազնիւ գործին մէջ: Ան կարեւոր նկատեց նաեւ կազմակերպութիւններու եւ յատկապէս հայ քաղաքական կուսակցութիւններուն կարեւոր դերակատարութիւնը սփիւռքի կեանքին մէջ` ըսելով, որ անոնք հայապահպանման, ուղիղութեան, մաքրութեան, պարկեշտութեան օրինակ պէտք է դառնան երիտասարդութեան համար: Ան ըսաւ. «Մեր կազմակերպութիւնները պէտք է դուռ բանան երիտասարդութեան եւ ոչ թէ անոնց դիմաց դռները գոցեն»:

Խօսելով սփիւռքի մայրաքաղաք Լիբանանի մէջ Հայոց ցեղասպանութեան 102-ամեակին նուիրուած ձեռնարկներուն մասին իր ունեցած տպաւորութեան` Ա. Պէզիքեան իր ընդվզումը յայտնեց համայնքներու եւ կազմակերպութիւններուն միջեւ համագործակցութեան բացակայութեան համար: Ան կոչ ուղղեց` անպայման կեանքի կոչելու գործակցութիւնը բոլոր համայնքներու, կազմակերպութիւններու եւ կուսակցութիւններուն միջեւ: Ան ըսաւ. «Այն օրը, որ մենք կ՛ունենանք հզօր սփիւռք, կ՛ունենանք հզօր հայրենիք, եւ այն օրը, որ հզօր հայրենիք կ՛ունենանք, հզօր սփիւռք կ՛ունենանք: Կը տեսնեմ հրեաները` աշխարհով մէկ ինչպէ՜ս կը գուրգուրան իրենց թէ՛ սփիւռքին, թէ՛ հայրենիքին վրայ: Պէտք է համագործակցութիւնը ամէն գնով կրկին մէջտեղ բերել, այլապէս վտանգուած է սփիւռքի ապագան»:

Խօսելով Հայաստանի մէջ իրականացուցած ծրագիրներուն մասին` ան ըսաւ, որ «Անի Պէզիքեան երիտասարդական կեդրոն»-ի ստեղծման եւ կառուցման հիմնական նպատակը համալսարանական ուսման նպատակով շրջաններէն Երեւան հասած անապահով ընտանիքներու աղջիկներու կեցութեան եւ ապրելու կեդրոն մը, գուրգուրանքի վայր մը ապահովելը եղած է: Ուսանողուհիները իրենց ուսումը աւարտելէն ետք դուրս կու գան` նորերու տեղ յատկացնելով: Ան յայտնեց նաեւ, որ 1988-ի ահեղ երկրաշարժին պատճառով 17 տարուան ընթացքին ստանձնած է 350 մանուկներու խնամքը ու շատ մը ընտանիքներու օժանդակութիւնը: Ալեքքօ Պէզիքեան անդրադարձաւ նաեւ Ծաղկաձորի մէջ ամառնային ճամբարին, որուն շնորհիւ ամրան ամիսներուն հերթաբար 200-էն աւելի պատանիներ 15 օրով կը զուարճանան եւ հաճելի պահեր կ՛ունենան:

Զրոյցի աւարտին զրուցակիցները անդրադառնալով Ալեքքօ Պէզիքեանի` Հայաստանի մէջ իրականացուցած ծրագիրներուն, որոնք նուիրուած են Հայաստանի զարգացման, աղէտի գօտիի վերականգման, որբերու, երիտասարդութեան եւ անպատսպար ընտանիքներու օժանդակութեան, գնահատանքով մատնանշեցին, որ բոլոր աշխատանքներուն նիւթական նուիրատուութիւնը Ալեքքօ Պէզիքեան կատարած է լուռ, համեստօրէն եւ առանց մեծ քարոզչութեան, եւ այս բոլոր բարեսիրական ծրագիրներու իրականացման մէջ «Արամ Պէզիքեան» թանգարանը եկած է լրացնելու երկար շունչի վրայ Ալեքքօ Պէզիքեանին տարած աշխատանքները, որոնք տարուած են եւ կը շարունակուին:

Ալեքքօ Պէզիքեան իր երախտագիտութիւնը յայտնեց լիբանանահայ մամուլին տարած անդուլ աշխատանքին համար` շեշտելով լիբանանահայ մամուլին կարեւոր դերը սփիւռքի հայապահպանութեան ծիրին մէջ եւ կարեւոր նկատելով համագործակցելու եղանակը տարբեր առիթներով: Ան շնորհակալութիւնը յայտնեց անոնց օգտաշատ զրոյցին համար եւ մաղթեց, որ նման հանդիպումները յաճախակի ըլլան, որ կարելի ըլլայ տեսակէտներ եւ կարծիքներ փոխանակել:

Զրոյցը արտագրեց եւ համադրեց`
ՍԻԼՎԻ ԱԲԷԼԵԱՆ

Սփիւռքահայ Ուսանողները Եւ Սուրիահայ Հայրենադարձ Ընտանիքները Հանդիպեցան «Կեանք Ու Կռիւ 2. 25 Տարի Անց» Շարժապատկերի Բեմադրիչին Եւ Դերասաններուն Հետ

Մայիս 16-ին ՀՀ սփիւռքի նախարարութեան աջակցութեամբ «Շարմ Հոլդինգ» ընկերութիւնը կազմակերպեց «Կյանք ու կռիվ» շարժապատկերի դիտումը սփիւռքահայ ուսանողներու, սուրիահայ հայրենադարձ ընտանիքներու համար:

Ներկաներն առանձնակի յուզմունքով դիտեցին շարժապատկերը, որմէ ետք բեմադրիչ Մհեր Մկրտչեանն ու դերասանները զրուցեցին հանդիսատեսին հետ:

Սփիւռքահայ ուսանողներու խորհուրդի փոխնախագահ Սարգիս Ղազարեան ընդգծեց, որ հայ հանդիսատեսը միանգամէն սիրեց ու բարձր գնահատեց ֆիլմը` աւելցնելով. «Պարզապէս անհրաժեշտ է առեւտրային նպատակներով նկարահանուած ֆիլմերու կողքին ստեղծել ազգային գաղափարախօսութիւն, արժեհամակարգ  ձեւաւորող նման գործեր»:

Դերասանուհի Նարինէ Գրիգորեան նշեց, որ ինք եւ դերասանական ողջ կազմը հաճոյքով ու նուիրումով աշխատած են Մհեր Մկրտչեանի հետ` գիտակցելով, թէ որքան կարեւոր ըսելիք ունի ֆիլմը ինչպէս հայաստանցիներուն, այնպէս ալ Սփիւռքի հայութեան:

«Ֆիլմը հայութեան բոլոր շերտերուն, աշխարհի բոլոր ծայրերուն մէջ ապրող հայերուն համար է: «Կյանք ու կռիվ» ֆիլմի նկարահանումներուն ընթացքին  սկսաւ ապրիլեան պատերազմը, որ  մեզի մղեց ստեղծելու երկրորդ ֆիլմը», – նշեց բեմադրիչ Մհեր Մկրտչեան:

Հանդիսատեսն անդրադարձաւ նաեւ ֆիլմի երաժշտութեան` նշելով, որ երգահան Արմէն Մարտիրոսեանի երաժշտութիւնը կ´ամբողջացնէ եւ աւելի հոգեհարազատ կը դարձնէ ֆիլմը:

«Պատահական չէ, որ Սփիւռքի մէջ այդքան լաւ ընդունուեցաւ եւ այդպէս սիրուեցաւ առաջին ֆիլմը: Վստահ եմ, որ նոյն ճակատագրին կ’արժանանայ «Կեանք ու կռիւ 2. 25 տարի անց»-ը», -ըսաւ սուրիահայ հայրենադարձ տիկին Աշխէնը:

Հանդիպման աւարտին ներկաները շնորհակալութիւն յայտնեցին ստեղծագործական խումբին նման հնարաւորութիւն ընձեռելու համար եւ յոյս յայտնեցին, որ հայ իրականութեան մէջ կը շարունակեն ստեղծուիլ բարձրարժէք ֆիլմեր:

%d5%af%d5%b5%d5%a1%d5%b6%d6%84-%d5%b8%d6%82-%d5%af%d5%bc%d5%ab%d5%be1 %d5%af%d5%b5%d5%a1%d5%b6%d6%84-%d5%b8%d6%82-%d5%af%d5%bc%d5%ab%d5%be2 %d5%af%d5%b5%d5%a1%d5%b6%d6%84-%d5%b8%d6%82-%d5%af%d5%bc%d5%ab%d5%be3

 

Ուրուկուէյցի Փաստաբանին Պատասխանը Ատրպէյճանի “Սեւ Ցանկ”-ին

Օսգար Լօփէս Կօլտարասէնա, որ  մարդու իրաւունքներու մասնագէտ է, ինչպէս նաեւ հանրածանօթ փաստաբան և Ուրուկուէյի Ղարաբաղ Ֆորումի անդամ, ուրիշ Պոլիվիացի երեք պատգամաւորներու հետ, յայտնուած է Ատրպէյճանի արտաքին գործոց նախարարութեան “սեւ ցանկ”ին մէջ, որպէս անբաղձալի անձնաւորութիւն։

Յիշեցնենք, որ նշեալները որպէս միջազգային դիտորդներ, Արցախ մեկնած էին հետեւելու համար Փետրուարին կայացած Սահմանադրական փոփոխութիւններու առթիւ տեղի ունեցած  հանրաքուէին։

Ծանօթանալէ ետք թէ ինք մաս կը կազմէ  այդ ամօթալի “սև ցանկ”ին, Կօլտարասէնան անմիջապէս դիմած է երկրի ԱԳ նախարար Ռօտոլֆօ Նին Նօպոային եւ Մարդու Իրաւուքներու Ազգային Հիմնարկութեան,  անոնց բացատրութիւն տալով կը գրէ թէ   “Արցախը հայ բնակչութիւն ունեցող եւ 25 տարուան անկախութիւն ձեռք ձգած երկիր մըն է, պատմականօրէն եւ իր ժողովուրդի ընտրութեամբ, ուր ժողովրդավարութիւնը եւ մարդու իրաւունքները իրաւացի կերպով կը գործադրուին եւ օրինակելի երկիր է, որ Աշխարհը տակաւին չէ ճանչցած անոր անկախութիւնը, սակայն Արցախը գոյութիւն ունի։ Ատրպէյճանն է, որ նուաճողական կեցուածք կը ցուցաբերէ անոր նկատմամբ։

“Արցախի բնակչութիւնը վտանգի մէջ է եւ զոհ կ՛երթայ պատերազմական ոճիրներուն։ Հարիւրաւոր միջազգային դիտորդներ, որոնց մէջ նաեւ ես, փաստեցին իմ գրածս:

Որպէսզի Արցախ ճանաչում չստանայ իբրեւ անկախ պետութիւն, կը փորձեն մեզի սպառնալ “սեւ ցանկ”ով։ Մեծ եռանդով կը փափաքիմ, որ ի շահ խաղաղութեան եւ ազատութեան, Ուրուկուէյը նման”սեւ ցանկեր”կազմելը դատապարտէ եւ, որպէս ինքնիշխան պետութիւն, Արցախի Հանրապետութիւնը ճանչնայ” գրած է իր դիմատետրին մէջ Օսգար Լօփէս Կօլտարասէնան։

Կարօ Հէքիմեան

%d5%b8%d6%82%d6%80%d5%b8%d6%82%d5%a3%d5%be%d5%a1%d5%b51

«Ես Կ´ապրիմ Լոս Անճելըսի ՄԷջ, Սակայն Իմ սիրտս Հայրենիքի ՄԷջ Է, Եւ Ես Հայրենիքէն Կը Լիցքաւորուիմ, Այն Իմ Ողնասիւնս Է». Յովսէփ Նալպանտեան

«Հայերն այսօր»-ի խմբագրութեան մէջ հիւրընկալուած լոսանճլըսաբնակ մեր հայրենակից` գրող, հրապարակախօս-խմբագիր, հասարակական-քաղաքական-ազգային գործիչ, գրականագէտ-մատենագէտ Յովսէփ Նալպանտեանի հետ թէեւ առաջին չէ, որ կը զրուցեմ, սակայն կրկին ու կրկին կը հիանամ անոր բեղուն, բազմաբովանդակ գործունէութեամբ: Այս անգամ Յովսէփ Նալպանտեան հայորդիի կերպարն ինծի համար կը բացայայտուի տարբեր տեսանկիւններէ` այն, որ ան մասնակցած եւ  11 անգամ վիրաւորուած է սուրիական առաջին պատերազմի ժամանակ` դեռեւս իր զինուորական պարտքը 1980-82թթ. կատարելուն` որպէս Սուրիոյ քաղաքացի: Կը բացայայտէր նաեւ ինծի համար այն, որ Յովսէփ Նալպանտեան 4 օր աշխատած է Հայաստան ցնցած երկրաշարժի գօտիին մէջ…

Պարո՛ն  Նալպանտեան, Ձեզի նայելուս` ոեւէ մէկուն մտքով չանցնիր, որ Դուք այդքան դժուար ճանապարհ  անցած էք, սակայն մինչ օրս ժրաջան մեղուի պէս կ´աշխատիք եւ գիրքեր կը հրատարակէք. ուրկէ՞  կը տրուի այդքան աշխատասիրութիւնն ու նպատակասլացու­թիւնը:

– Ատիկա մարդու բնոյթն է, ինչպէս նաեւ` ի վերուստ տրուած պարգեւը… 18 տարուան մէջ ես հրատարակած եմ 38 գիրք, որոնցմէ 18-ը իմ գիրքերս են` 5840 էջով: Ատոնք հրատարակած եմ 28200 օրինակով, այդ գիրքերէն 9200-ը նուիրած եմ անհատներու, Հայաստանի, Արցախի բոլոր դպրոցներուն, Սփիւռքի 9 երկիրներուն մէջ գործող հայկական դպրոցներուն, քոլեջներուն, համալսարաններուն:

Եւայս ահռելի աշխատանքին զուգահեռ, որքանով տեղեակ եմ, նաեւ կը դասաւանդէք:

– Ես ծնած եմ Հալէպ, 1992-93թթ. եղած եմ Մեսրոպեան վարժարանի տնօրէն, շատ ծրագիրներ ունէի: Եղբայրս, որ կ´ապրի ԱՄՆ, հարցուց, թէ կ’ուզե՞մ արդեօք երթալ Միացեալ Նահանգներ, ես դրական պատասխան տուի եւ օրինական ճանապարհով տեղափոխուեցայ ԱՄՆ, ուր 4 տարի աշխատած եմ «Մասիս» շաբաթաթերթին մէջ: Հիմա  կ´աշխատիմ «Մաշտոց» քոլեջին մէջ, նաեւ հայերէն կը դասաւանդեմ «Պեւերլի հիլզ միջազգային լեզուաբանական հիմնարկ»-ին մէջ: Այդ հիմնարկին մէջ 20 լեզու կը դասաւանդուի, բայց, ցաւօք, հայերէն սորվելու ցանկութիւն ունեցողները շատ չեն: Գիները մատչելի են, սակայն, միեւնոյնն է, մերոնք կը ձգտին սորվիլ ուրիշ լեզուներ, օրինակ` չինարէնի դասարան յաճախողներու  թիւն աւելի շատ է: Մանկավարժութենէն զատ` ես ամբողջովին նուիրուած եմ գիրք ստեղծելու եւ հրատարակելու գործին: Ամիսներ յետոյ 4 ընկերներով լոյս կ’ընծայենք «Արդի առձեռն բառարան»-ը` դասական հայերէնի ուղղագրութեամբ. այն մօտաւորապէս կը պարունակէ 15-16 հազար բառ:

Պարո՛ն Նալպանտեան, խօսինք վերջերս Աւ. Իսահակեանի անուան գրադարանին մէջ կայացած Ձեր երեքհատորեայ եւ Աւետիս Ռազմիկի «Կեանքի կարուսել» (362 էջնոց) գիրքերուն մասին:

– Երեք գիրքերը կը կոչուին «Հայկական պատմուածքներ»` այբ, բեն, գիմ հատորներով, որոնց մէջ զետեղուած են արեւելահայ, արեւմտահայ, սփիւռքահայ գրողներու գործերէն (60 հեղինակ, 70 պատմուածք, որոնցմէ 2-ը իմս են): Աւ. Իսահակեանի անուան գրադարանին մէջ կայացած գիրքերու շնորհանդէսին հրաւիրած էի քանոնահարուհի Մարիանա Գրիգորեանը, թառահար Միքայէլ Ոսկանեանը, երգիչ Արսէն Համբարեանը: Ողջոյնի խօսքով հանդէս եկաւ ՀԳՄ նախագահ Էդուարդ Միլիտոնեան, ելոյթ ունեցան ՀՀ սփիւռքի նախարարի տեղակալ, գրականագէտ Սերժ Սրապիոնեան, բանասիրական գիտութիւններու փրոֆէսոր, մանկավարժական համալսարանի սփիւռքագիտութեան գիտաուսումնական կեդրոնի ղեկավար Սուրէն Դանիէլեան, ԵՊՀ-ի բանասիրութեան բաժանմունքի գրականութեան ամբիոնի վարիչ, փրոֆէսոր Սամուէլ Մուրադեան, գրականագէտ, թրքագէտ Էլինա Միրզոյեան: Ես իմ խորին շնորհակալութիւնս կը յայտնեմ բոլորին եւ գրադարանի տիրուհի Յասմիկ Կարապետեանին: Շնորհանդէսի երկրորդ բաժինին մէջ ելոյթ ունեցաւ պատմաբան, խմբագիր Գէորգ Եազիչեան, շնորհակալութեան խօսք ըսաւ ազգային գործիչ, հրապարակախօս Աւետիս Ռազմիկը, որ աւարտած է ԵՊՀ-ի պատմութեան բաժանմունքը: Աւարտին ելոյթ ունեցայ ես: Գիրքերու շնորհանդէսը մայիս 10-ին կայացած է նաեւ Արմաւիրի մարզային գրադարանին մէջ:

Իսկ ովքե՞ր կը  հովանաւորեն Ձեր գիրքերու հրատարակման գործը:

– Երեք հոգի կը հովանաւորեն… ես, Յովսէփը եւ Նալպանտեանը. հրատարակութեան ֆինանսական բոլոր գործերն ինքս կը կարգաւորեմ, իմ ուժերովս եւ իմ միջոցներովս կը լուծեմ այդ հարցերը:

Ինչը՞  Ձեզի  միշտ  կ´ուղղորդէ դէպի գրականութիւնն ու գիրքը. Ամերիկայի նման  երկրի մը մէջ Դուք կրնայիք նաեւ յաջողակ գործարար ըլլալ:

– Ազգային խենթութիւնը, պաշտամունքս լեզուի ու գրականութեան, գիրքի հանդէպ, հայրենասիրական զգացումներս: Ես երբեք չուզեցի շեղուիլ բանասիրութենէն: 30 տարի շարունակ բանասիրութեան բաժանմունքը ինծի   այնպիսի շրջանաւարտ չէ տուած, որ այսքան գիրքեր  հրատարակած է: Երկու տարի առաջ իմ գրական գործունէութեանս 35-ամեակին նուիրուած Արծրուն Ալեքսանեան գիրք հրատարակեց իմ մասիս` «Հայ մշակոյթի նուիրեալը» վերնագիրով: Ես ոտքէս գլուխ նուիրուած եմ հայ մշակոյթին:

Պարո՛ն  Նալպանտեան, ո՞ւր  կրնաք Ձեզի աւելի լաւ դրսեւորել` արձակի՞, հրապարակախօսութեա՞ն, թէ՞ գիտական հետազօտական աշխատանքներուն մէջ:

– Բոլոր այդ աշխատանքներուն մէջ.ըսեմ նաեւ, որ 16-18 տարեկանիս գրած եմ մօտ 50-52 բանաստեղծութիւններ, սակայն բանաստեղծութիւններուս տետրը կորսնցուցի:

Յարգելի՛ հայրենակից, շնորհաւորելով Ձեր գիրքերու ծնունդը` հիացմունքս ու զարմանքս կ´արտայայտեմ. Դուք երկար տարիներ շարունակ գիրքի ու գրականութեան հետ էք, ընտանիքի եւ ընկերներու համար ժամանակ կ´ունենա՞ք:

– Ես շատ կը սիրեմ շփուիլ մարդոց հետ: Քալիֆորնիոյ հայ գրողներու միութեան փոխնախագահն եմ, գործուն մասնակցութիւն ունիմ նաեւ ՀԲԸՄ-ի գործունէութեան մէջ: Հասարակական-բարեսիրական տարբեր միութիւններու խորհուրդի անդամ եմ եւ քարտուղար: Մշտապէս կը ծանօթանամ բոլորին հետ, իսկ ամէնէն շատ` գիրքերու:

Պարո՛ն Նալպանտեան, ի՞նչ են Ձեզի համար ծննդավայրն ու Հայրենիքը:

– Հալէպէն  24 տարի առաջ  հեռացած եմ, շատ կը կարօտնամ իմ ծննդավայրս. այդ բառը ինքնին կ´ըսէ ամէն ինչ: Կ’ուզէի վերադառնալ, սակայն, ցաւօք, 5000 տարուան պատմութիւն ունեցող Հալէպի 70 տոկոսն այսօր աւերուած է: … Հայրենիքը՜… Հայրենիքն ինծի համար ինքնութիւն է, հարազատ  երկիր մը, ուր ուսանած եւ աւարտած եմ ԵՊՀ-ի բանասիրութեան բաժինը: Երախտապարտ եմ Լոյսի այդ տաճարին, մեծանուն գիտնական-դասախօսներուս: Հայրենիքն իմ ողնասիւնս է: Ես կը բնակիմ Լոս Անճելըսի մէջ, սակայն յաճախ  կու գամ Հայրենիք, որովհետեւ սիրտս այստեղ է, եւ ես այստեղէն կը լիցքաւորուիմ:

Զրուցեց Կարինէ  Աւագեան

 

 

Գերագոյն Հոգեւոր Խորհուրդը Մոսկուայի Մէջ Կը Գումարէ Իր ժողովը

Երեքշաբթի, 16 Մայիսին, Ռուսիոյ եւ Նոր Նախիջեւանի հայոց թեմի առաջնորդարանին մէջ, Գարեգին Բ. Ամենայն Հայոց կաթողիկոսի նախագահութեամբ, Գերագոյն հոգեւոր խորհուրդը գումարեց Մոսկուայի մէջ ծրագրուած եռօրեայ ժողովի առաջին նիստը:

Ժողովի առաջին օրը, Հայոց եկեղեցւոյ գործառնութիւններու բարելաւման ծրագիրի ընթացքին վերաբերեալ զեկոյց ներկայացուց «Դաւիթեան» հիմնադրամի նախագահ եւ բարեգործ Ասօ Դաւիթեան:

Եռօրեայ ժողովին ընթացքին պիտի քննարկուին կանոնադրական, թեմական, ազգային եւ հասարակական բազմաբնոյթ հարցեր:

Գերագոյն հոգեւոր խորհուրդը, անդրադառնալով Մայիս 15-ին արցախա-ատրպէյճանական սահմանին արձանագրուած հերթական սադրանքին՝ հանդէս եկաւ յայտարարութեամբ, որուն մէջ կ՛ըսուի. «Տեղեկանալով Մայիս 15-ին Արցախա-ատրպէյճանական սահմանին ատրպէյճանական զինուժի կողմէ ձեռնարկուած սադրիչ գործողութիւններուն մասին՝ մեր մտահոգութիւնը կ՝արտայայտենք եւ խստօրէն կը դատապարտենք կատարուածը:

Ղարաբաղեան հակամարտութիւնը ռազմական ճանապարհով հանգուցալուծելու՝ Ատրպէյճանի կողմէ որդեգրուած քաղաքականութիւնը, իրավիճակի շարունակական սրացումը եւ անոնց հետեւանքով պատճառուող մարդկային կորուստները մեծապէս կը վտանգեն հակամարտութեան խաղաղ կարգաւորման ուղղուած քայլերը, նաեւ կը ձախողցնեն միջազգային հանրութեան ջանքերով սկզբնաւորուած բանակցային գործընթացը:

Հայաստանեայց առաքելական եկեղեցին, հաւատարիմ մնալով իր խաղաղարար առաքելութեան՝ պիտի շարունակէ ամենայն ջանք գործադրել յանուն հակամարտութեան խաղաղ կարգաւորման, արցախաբնակ մեր զաւակներու անվտանգ եւ ապահով կեանքի»: