20-ամեայ Ճամբայ Կտրած «Կարկաչ»-ի Յաղթական Համերգը

«Կարկաչ» մանկական եւ պատանեկան երգչախումբի հիմնադրութեան 20-ամեակի համերգը կայացաւ շաբաթ, 6 մայիս 2017-ին, երեկոյեան ժամը 7:00-ին, Պէյրութի ամերիկեան համալսարանի «Էսեմպլի Հոլ»-ին մէջ` խմբավարութեամբ Զաքար Քէշիշեանի եւ ընկերակցութեամբ դաշնակահար Լիանա Յարութիւնեանի: Համերգը տեղի ունեցաւ Լիբանանի հայոց թեմի առաջնորդ Շահէ եպս. Փանոսեանի հովանաւորութեամբ եւ Համազգայինի Լիբանանի Շրջանային վարչութեան կազմակերպութեամբ: Բազմաթիւ հիւրերու եւ մշակութասէր հանդիսականներու կողքին ձեռնարկին ներկայ էին նաեւ «Կարկաչ» երգչախումբի իրերայաջորդ նախկին վարչութիւններէն անդամներ եւ նախկին կարկաչականներ:

Բացման խօսքով հանդէս եկաւ Սթեֆանի Պալթայեան: Ան ըսաւ, որ անցնող 20 տարիներուն երգչախումբը կարեւոր ներդրում ունեցած է նոր սերունդի երաժշտական դաստիարակութեան մարզին մէջ` պատրաստելով եւ ներկայացնելով 30 համերգներ: Ան յայտնեց, որ «Կարկաչ»-ի տարազով առնուազն մէկ անգամ բեմ բարձրացած են 800 պատանիներ, յատկապէս «Կարկաչ»-ի եւ Շուշիի «Վարանդա» երգչախումբին համար ծնած են շուրջ 100 նոր երգեր: Տարեկան, Ամանորի եւ Ս. Ծննդեան համերգներուն, ինչպէս նաեւ ընթացիկ ձեռնարկներու ժամանակ երգչախումբը կատարած է մօտաւորապէս 600-ի հասնող երգեր եւ ելոյթներ տուած է Հայաստանի, Արցախի եւ Կիպրոսի մէջ: Միշտ հրաւիրուած է մասնակցելու «Պէյրութ Չենց» փառատօնին եւ Լիբանանի միջազգային երգչախմբային փառատօնին` դառնալով Լիբանանի օտար երաժշտական շրջանակներուն մէջ ալ հայութիւնը ներկայացնող երգչախումբ: Իր խօսքի աւարտին Պալթայեան նշեց, որ 20-ամեայ աշխատանքը իրականացած է շնորհիւ մշակութային գործին ու առաքելութեան հաւատացող համազգայնականներուն, բարեկամներուն, բարերարներուն, ծնողներուն, դաշնակահարներուն եւ հիմնադիր գեղարուեստական խմբավար, ղեկավար մայեսթրօ Զաքար Քէշիշեանին: 20 տարի անընդմէջ «Կարկաչ»-ը մնացած է եւ պիտի շարունակէ մնալ պատնէշի վրայ սփիւռքի սիրտը հանդիսացող Լիբանանի մէջ:

Յայտագիրի առաջին բաժինով պատանեկան երգչախումբը ներկայացուց «Ծիլն արեւի», «Պէյրութ», «Միլի եա ժաննաթ պլատի», «Ելէք հայեր ելէք քաջեր»,  եւ «Բարձրիկ Շուշի» երգերը: Յայտագիրի երկրորդ մասով հանդէս եկաւ մանկական երգչախումբը եւ ներկայացուց «Ծնկըլը-մնկըլը», «Թզուկների երգը», «Գճուճն ու ճուտը», «Կատուն կաթնատանը», «Ճանճը կարագում», «Խոզուկին գանգատը», «Կենդանիներու ժողովը», իսկ երրորդ բաժինով պատանեկան երգչախումբը ներկայացուց «Ծաղրածու եւ ծաղրաձու», «Գիտունիկ եւ քիթունիկ», «Խրտուիլակը այգում», «Իմ ուսուցիչ», «Ապրիլ կրկին», «Հայկական ժողովրդական երգեր», ապա մանկական երգչախումբը միացաւ պատանեկանին եւ միասնաբար կատարեցին «Կարկաչ» երգը: Իւրաքանչիւր երգի ընթացքին ներկաները պաստառներու վրայ դիտեցին երգի առաջին կատարումներէն փոքրիկ հատուած մը` ունենալու համար յիշողութեան գեղեցիկ պահ մը:

Ձեռնարկի ընթացքին ծաղկեփունջով պատւուեցան «Կարկաչ»-ի դաշնակահարներէն Սիրվարդ Պոյաճեան-Սապունճեան, Կամիլիա Երկանեան-Քէշիշեան, Արմինէ Ապաճեան-Պասմաճեան, Արեգ Տաղլեան եւ Լիանա Յարութիւնեան:

Այնուհետեւ Զաքար Քէշիշեան շնորհակալութիւն յայտնեց սփիւռքի նախարարութեան, ապա ըսաւ, որ  շքանշանը կը պատկանի նաեւ Համազգայինի մեծ ընտանիքին, «Կարկաչ»-ի փոքրիկներուն եւ բոլոր անոնց, որոնք սատար կանգնած են ու կը կանգնին մշակոյթի գործին:

Ձեռնարկի ընթացքին Զաքար Քէշիշեան  խորին շնորհակալութիւն յայտնեց «Էսեմպլի Հոլ»-ի վարչութեան, ապա յուշանուէր մը յանձնեց վարչութեան ներկայացուցիչին. վերջինս իր կարգին ծաղկեպսակով մը շնորհաւորեց Զաքար Քէշիշեանը, որմէ ետք Սթեֆանի Պալթայեան կարդաց Արցախի Հանրապետութեան մշակոյթի եւ երիտասարդութեան հարցերու նախարար Նարինէ Աղապալեանի շնորհաւորական ուղերձը Լիբանանի «Կարկաչ» եւ Շուշիի «Վարանդա» երգչախումբերու հիմնադիր ու խմբավար Զաքար Քէշիշեանին:

Այնուհետեւ Լիբանանի մէջ Հայաստանի Հանրապետութեան դեսպանութեան դիւանագիտական կցորդ Վլատիմիր Պօղոսեան կարդաց Հայաստանի Հանրապետութեան սփիւռքի նախարար Հրանուշ Յակոբեանի շնորհաւորական ուղերձը մայեսթրօ Զաքար Քէշիշեանին, ապա սփիւռքի նախարարի հրամանով անոր յանձնեց սփիւռքի նախարարութեան Կոմիտասի անուան մետալը:

Խօսք առաւ Լիբանանի հայոց թեմի առաջնորդ Շահէ եպս. Փանոսեան: Ան գեղեցիկ երեկոյթին համար սրտագին շնորհակալութիւն յայտնեց մանուկներուն եւ պատանիներուն, որոնք կարկաչելով մշակութային գեղեցիկ երեկոյթ մը պարգեւեցին, ապա մաղթեց, որ լիբանանահայ համայնքի բոլոր մանուկները եւս արուեստի ճամբով մեր ազգին եւ երաժշտութեան մօտենալու առիթ ունենան: Ան շնորհաւորեց նաեւ Համազգայինի Լիբանանի Շրջանային վարչութիւնը, որ իր անուան վայել դերակատարութեամբ եւ պատասխանատուութեամբ այս երգչախումբերը կը պահէ, որ մեր ժողովուրդը առաւել մօտենայ մեր մշակոյթին եւ հարուստ ու հպարտ զգայ շարունակաբար: Սրբազան հայրը մեծապէս գնահատեց մայեսթրօ Զաքար Քէշիշեանը իր կատարած հսկայ ու գովելի աշխատանքին համար:

Այնուհետեւ Համազգայինի Լիբանանի Շրջանային վարչութեան ատենապետ Պետիկ Ծառուկեան յուշանուէրով մը պարգեւատրեց «Կարկաչ»-ի հիմնադիր, գեղարուեստական ղեկավար եւ խմբավար Զաքար Քէշիշեանը:

«Կարկաչ»-ի 20-ամեայ համերգը եզրափակուեցաւ  աւանդութիւն դարձած «Երազ իմ երկիր» երգով, որուն կատարման ընթացքին ներկաները մեծ յուզմունքով դիտեցին նաեւ Շուշիի մէջ «Վարանդա» եւ «Կարկաչ» երգչախումբերուն միացեալ հանդիպումը:

Պէտք է ըսել, որ շուրջ երկու ժամ «Կարկաչ» երգչախումբը իր բարձրորակ կատարումներով հմայեց ու ոգեշնչեց հանդիսատեսը: Ոչինչ կը գերազանցէր բեմին վրայ տեսնել հայ մանուկներուն եւ պատանիներուն հայ երգի բարձրարուեստ ու խանդավառ կատարումները:

Երկար հնչեցին ծափահարութիւնները եւ ապրիքները… Բեմին վրայ յաղթական կանգնած էր 20-ամեայ ճամբայ կտրած «Կարկաչ»-ը` իր խմբավար Զաքար Քէշիշեանին հետ:

Այս մասին կը յայտնէ Ազդակ:

Շուշիի Ազատագրութեան 25-Ամեակի Հանդիսաւոր Նշում

Կազմակերպութեամբ ՀՅԴ «Շուշի» կոմիտէին, երէկ` կիրակի, 7 մայիսի երեկոյեան ժամը 7:00-ին, Ռաուտայի դաշտին մէջ տեղի ունեցաւ Շուշիի ազատագրութեան 25-ամեակին նուիրուած ձեռնարկ:

Լիբանանի, Հայաստանի եւ Արցախի քայլերգներուն ունկնդրութենէն ետք բացման խօսքով հանդէս եկաւ ՀՅԴ ԼԵՄ-ի «Բեկոր» մասնաճիւղէն Սեւան Պասմաճեան: Ան ըսաւ, որ 8-9 մայիս 1992-ը պատմական նշանակալի թուական մը դարձաւ, երբ Շուշին ազատագրուեցաւ հայ ժողովուրդի հերոսական զաւակներուն սխրանքով` աւելցնելով, որ Շուշիի ազատագրութիւնը կարեւոր էր ռազմավարական առումով` նախ վերջ դնելու ազրպէյճանական վայրագ յարձակումներուն, ապա վերականգնելու հայկական հողերուն վրայ հայերուն ազատ ապրելու իրաւունքը եւ ամրապնդելու սահմանային շրջաններու ապահովութիւնը: Սեւան Պասմաճեան հաստատեց, որ սոյն հաւաքը կազմակերպուած է ո՛չ միայն նշելու յաղթանակը, այլեւ շարունակելու մեր պայքարը եւ լուսաւորելու մեր մէջ պահանջատիրութեան ոգին, մինչեւ որ հասնինք ազատ, անկախ եւ միացեալ Հայաստանին:

ՀՅԴ «Շուշի» կոմիտէին անունով խօսք առաւ Վազգէն Յակոբեան: Ան յայտնեց, որ շնորհիւ մեր ազատամարտիկներուն հզօր կամքին ու քաջաբար կռուելուն, 25 տարի առաջ  Շուշիի ազատագրումը ամբողջ հայ ժողովուրդին ներկան եւ ապագան կերտող իրադարձութիւն մը եղաւ: Ան շեշտեց, որ հայութիւնը, ապաւինելով իր ռազմագէտ, քաջ եւ խելացի հրամանատարներուն,  եւ գիտակցելով պահու լրջութեան, հակառակ Արցախի ապրած դժուար պայմաններուն, որոշեց վերադարձնել Արցախի բերդաքաղաք Շուշի. համայն հայութիւնը այս օրը կը նշէ իբրեւ  յաղթանակի օր: Վազգէն Յակոբեան հաստատեց, որ շրջանի կոմիտէն կը նախաձեռնէ նման ձեռնարկներ, որովհետեւ քաջ կը հաւատայ, որ իրերայաջորդ սերունդներ կրնան հայ մնալ ու դաստիարակուիլ, երբ ծանօթ ըլլան իրենց հերոսական պատմութեան եւ արժանապատիւ հերոսներու քաջագործութիւններուն` աւելցնելով, որ 25 տարի առաջ կամ 2016-ի քառօրեայ պատերազմին ընթացքին հայրենիքի պաշտպանութեան համար իրենց արիւնը նուիրած 20-ամեայ երիտասարդ զինուորներուն օրինակը բաւարար է հաստատելու, որ ի՛նչ պայմաններու մէջ ալ գտնուինք` հայութեան ծոցէն պիտի ծնին նոր հերոսներ:

Այնուհետեւ Դրօ Միրզայեան ասմունքեց Վահագն Դաւթեանի «Եռագոյնը Շուշուայ բերդին» քերթուածը, իսկ Համազգայինի գեղարուեստի դպրոցներու տհոլահարներու խումբը նուագեց երաժշտական կտոր մը:

Օրուան բանախօսն էր Այնճարի քաղաքապետ Վարդգէս Խոշեան: Ան նկատել տուաւ, որ հայ ժողովուրդին նկատմամբ շղթայազերծուած բոլոր հալածանքները նպատակ ունեցած են կտրատել ու տկարացնել մեզ, Մեծն Տիգրանի օրերէն մինչեւ Վարդանանց պատերազմ, Մեծ եղեռն ու Սարդարապատի ճակատամարտ` աւելցնելով, որ մենք ազգովին պատմութեան ընթացքին ունեցած ենք ելեւէջներով յատկանշուած շարունակական ու անհատնում գոյամարտ: «Ուզեցին քանդել եւ յաջողեցան քանդել մեր բիւրաւոր եկեղեցիները, բայց ոչ մէկ ատեն կրցան քանդել քրիստոնէական հաւատքը մեր հոգիներուն մէջ: Ուզեցին աւերել եւ աւերեցին մեր երկիրը, բայց մեր ձգտումներուն մէջ չկրցան հրկիզել շինարար հայու ոգին ու ճիգը: Ուզեցին թալանել մեր կալուածները եւ կողոպտեցին մեր հարստութիւնները: Փորձեցին թշուառացնել ու աղքատացնել մեզ, բայց իրենք առյաւէտ մնացին աղքատ, թշուառ եւ աւազակ», ըսաւ Խոշեան` հաստատելով, որ ոչ մէկ ուժ եւ ոչ մէկ պետութիւն յաջողեցաւ խափանել մեր ապրելու եւ յաղթանակ կերտելու հզօր կամքն ու մարմաջը:  Մենք գոյատեւեցինք, որովհետեւ գիտենք դէպքերու հոլովոյթը ուղիղ ձեւով ընկալել եւ որեւէ պարագայի տուեալ դէպքին նայիլ համապատասխան եղանակով ու կշռոյթով:

Շարունակելով իր խօսքը` Խոշեան նկատել տուաւ, որ մեր ազգային իրականութեան մէջ համաժողովրդային կերպարանք ստացաւ Արցախն ու գրաւուած բոլոր տարածքները ազատագրելու գաղափարը, որ հանդիսացաւ մեր բոլոր հարցերուն հիմնահարցը, եւ որոշեցինք մեր հայրենական սրբազան հողերը ամէն գնով պաշտպանել` աւելցնելով, որ մեր ժողովուրդի մատղաշ սերունդի ընտրանին յանձն առաւ երթալ Արցախ եւ թշնամիին դէմ պատուաբեր ու հերոսավայել կերպով մարտնչելու ճամբով մարտիրոսացաւ: Բանախօսը շեշտեց, որ պիտի շարունակենք պաշտպանել մեր գոյութեան միջնաբերդը հանդիսացող Ղարաբաղը` մեր կեանքով, արեամբ ու հաւատքով, պիտի շարունակենք զոհել մեր թանկագինն ու արժէքաւորը` մեր կեանքը, պահպանելու համար աւելի թանկագինն ու սրբազանը` հայու պատիւն ու արժանապատուութիւնը: Խոշեան նկատել տուաւ, որ լիբանանահայ գաղութը ունի պատմական ու ազգային մեծ նշանակութիւն եւ անոր հայեցի դիմագիծը անաղարտ պահպանելը անհրաժեշտութիւն է եւ հրամայական ե՛ւ մեզի, ե՛ւ սփիւռքի, ե՛ւ մանաւանդ Հայաստանի Հանրապետութեան համար: Ան կոչ ուղղեց ապստամբելու` մեր իղձերն ու փափաքները իրականացնելու կամքով, յոռի երեւոյթները սրբագրելու ցանկութեամբ, վերադառնալու մեր խիղճին, վերականգնելու մեր անկեղծութիւնը, վերահաստատելու մեր արժանապատուութիւնը, վերականգնելու մեր փառքը: «Շուշիի ազատագրման 25-ամեակը լրացաւ, բայց տակաւին պատերազմը չէ աւարտած: Մենք մեր հաւաքական ուժերու լարումով պիտի շարունակենք պահպանել Արցախի հողային ամբողջականութիւնը եւ յաւերժօրէն պիտի յիշենք ու անմահացնենք մեր հերոսները», եզրափակեց Վարդգէս Խոշեան:

Այնուհետեւ ելոյթ ունեցաւ Համազգայինի գեղարուեստի դպրոցներու «Գայեանէ» պարախումբը:

Լիբանանի մէջ Հայաստանի դեսպան Սամուէլ Մկրտչեան ելոյթ ունենալով կարեւոր նկատեց ձեռնարկին բնոյթը` բացատրելով, որ 2016-ին նշուեցան Հայաստանի Հանրապետութեան վերանկախացման եւ Արցախի անկախացման 25-ամեակները, իսկ այս տարի` Շուշիի ազատագրման 25-ամեակը, եւ երեքն ալ սերտօրէն իրար շաղկապուած իրադարձութիւններ են, որովհետեւ անկախութեան հռչակումէն ետք   ռազմադաշտին վրայ ձեռք բերած մեր յաղթանակները ծառայեցին այդ անկախութեան ամրապնդման եւ մեր երկու պետականութիւններու կայացման: Դեսպանը հաստատեց, որ Շուշին հայ ժողովուրդի պատմութեան ընթացքին միշտ ունեցած է խորհրդանշական տեղ` աւելցնելով, որ 17-րդ դարուն ան եղած է կրթական-մշակութային հարուստ կեդրոն եւ իր բնակչութեամբ հանդիսացած Կովկասի երկրորդ քաղաքը` Թիֆլիսէն ետք, սակայն մեզ շրջապատող թշնամիները միշտ փորձած են իրենց տիրապետութիւնը հաստատել Շուշիի վրայ` սկսեալ 1920 թուականէն երբ թուրք-ազրպէյճանական զօրքերը Շուշիի մէջ ջարդ կազմակերպեցին` հասնելով ղարաբաղեան կռիւներուն, որոնց ընթացքին ուզեցին Շուշին բնակեցնել ազրպէյճանցիներով: Դեսպանը ըսաւ, որ Շուշիի ազատագրումէն ետք, այսինքն` 25 տարիէ ի վեր զայն վերականգնելու փորձեր կը կատարուին, վերադարձնելու համար իր նախկին համբաւին` իբրեւ կրթական-մշակութային կեդրոն եւ կոչ ուղղեց բոլորին այդ ուղղութեամբ աշխատանք տանելու: «Շուշիի ազատագրումը հայ ժողովուրդի վերջին շրջանի պատմութեան մեծագոյն յաղթանակներէն է, սակայն մենք իրաւունք չունինք հանգստանալու, թուլանալու, որովհետեւ մեր պայքարը տակաւին աւարտած չէ, այլ` կը շարունակուի», եզրափակեց Սամուէլ Մկրտչեան:

Աւարտին ազգային-յեղափոխական երգերով ելոյթ ունեցաւ Վիգէն Տիշչէքէնեան` ընկերակցութեամբ Շանթ Տիշչէքէնեանի:

Ռազմավարական, Ռազմագիտական, Բայց Նաեւ Մշակութային (Շուշիի Ազատագրութեան 25-ամեակին Առիթով)

«Ազդակ» օրաթերթի գլխաւոր խմբագիր Շահան Գանտահարեան կը գրէ.

Շուշիի ազատագրութեան 25-ամեակի նշումը կը համընկնի ապրիլեան յանկարծակի պատերազմի առաջին տարուան ամբողջացման: Հայրենական պատերազմին, Շուշիի ազատագրութեան եւ Արցախի պաշտպանութեան բանակի ստեղծման  եռատօնին հազիւ ամիսով մը կը կանխէ ապրիլեան պատերազմի յաղթանակը:

Ռազմագիտական վերլուծումները, տարուան մը կտրուածքի հեռաւորութեամբ համընդհանուր կերպով կը խօսին այն համոզումին մասին, որ պարտադրուած զինադադարը արգելակեց հայկական կողմի նոր կարեւոր յառաջխաղացքը:

Մինչ այդ սակայն, նման պատերազմ սանձազերծելու ազրպէյճանական կողմի բուն նպատակը չէր կրնար ըլլալ միայն ռազմական ընդունակութեան, կարողականութեան ստուգումը. կար յստակ ճեղքումներով ամբողջ Արցախի ուղղութեամբ սանձազերծելու աւելի լայնածաւալ պատերազմի ծրագիր` կարճ ժամանակի վրայ ազրպէյճանական բանակի ներխուժում իրականացնելու համար:

Պատերազմական ծրագիրի այս տեսութեան համոզումը աւելիով կ՛ամրակայէ ապրիլեան յաղթանակի իրողութիւնը: Հայկական զինեալ ուժերը ո՛չ միայն ետ մղեցին յարձակումը, այլ նաեւ ձախողեցուցին Պաքուի մեծ ծրագիրը:

Այս ընկալումով ալ եռատօնին վրայ ամսուան մը հեռաւորութեամբ պէտք է աւելցնել նաեւ ապրիլեան յաղթանակը` իբրեւ մուտք եռատօն յաղթանակներու:

Եւ ինչպէս որ Շուշիի ազատագրումը շատ կարեւոր ու ռազմավարական նշանակութիւն ունէր Արցախի ազատագրման եւ Արցախի պետականութեան կերտման աշխատանքներուն մէջ, այնպէս նաեւ ապրիլեան յաղթանակը Արցախի դէմ սանձազերծուած պատերազմական ծրագիրը ձախողեցնելու, Թալիշի մէջ պատահածներու տարածումը չէզոքացնելու եւ ընդհանրապէս սանձազերծող կողմին հրադադար խնդրելու վիճակին մէջ դնելու առումով ռազմավարական նշանակութեան ժամանակակից իմաստ կը ստանայ:

Ապրիլը փաստեց, որ Շուշիով ազատագրուած Արցախն ու անոր պետականութիւնը ժամանակաւոր բնոյթ չունին: Ազատագրումէն 25 տարի ետք վերագրաւումի փորձերը սանձազերծման յանկարծակիութեան եւ արագութեան նման եւ գուցէ անոնցմէ աւելի արագ զսպուեցան, չէզոքացուեցան:

Ապրիլը ուրեմն այս իմաստով դարձաւ անհրաժեշտ հանգրուան` վերաամրագրելու համար Արցախի ինքնորոշումն ու կերտուած պետականութիւնը:

Շուշին միայն ռազմավարական եւ ռազմագիտական առումներով չէ որ կը ներկայանայ համայն հայութեան: Շուշին նաեւ մշակութային քաղաք է. եւ եթէ առաջին երկու յատկանիշներու լիարժէք կատարում եւ օգտագործում կայացած է, ապա երրորդի պարագային տակաւին ընելիք կայ:

Այստեղ` սփիւռքի մէջ գործող մշակութային խումբերու եւ Արցախի Հանրապետութեան մշակոյթի նախարարութեան միջեւ առաջադրելի համակարգումը կրնայ զգացնել Շուշիի մշակոյթի մայրաքաղաք ըլլալու հանգամանքը:

Սփիւռքը ընելիք ունի. Արցախի համապատասխան մարմինները անպայման կը ստեղծեն համապատասխան միջոցներն ու դիւրութիւնները: Պարզ է առաջադրանքը. եթէ սփիւռքեան իւրաքանչիւր համայնքի մէջ գործող երգչախումբը, պարախումբը կամ մշակոյթի եւ արուեստի մարզին մէջ դերակատար եղող որեւէ գեղարուեստական միաւոր տարին մէկ ելոյթ, համերգ, թատրոն, ցուցահանդէս կամ մշակութային որեւէ ձեռնարկ իրականացնէ Շուշիի մէջ, հանրագումարին մասին կրնաք պատկերացում կազմել:

Նման եռուզեռ մը եւ անոնց առընթեր կազմակերպելի համահայկական մշակութային փառատօները կրնան ապահովել Շուշիի մշակութային երբեմնի դիմագիծին ժամանակակից տեսքն ու էութիւնը:

Եռատօն-յաղթանակներու ժամանակահատուածի մէջ ենք: Մշակութային եռուզեռներու ապահովումը կրնայ ձեւ ու մարմին տալ այդ յաղթանակներուն, միայն դրական արդիւնքներ ապահովելու փաստերու ամրագրումով:

25 Տարի Առաջ Ազատագրուեցաւ Շուշին

Մայիս 8-ը հայ ժողովուրդին համար առանձնայատուկ նշանակութիւն ունի: 1992 թուականի հէնց այս օրը ազատագրուեցաւ Շուշին: Շուշիի ազատագրումը բեկումնային դարձաւ Ղարաբաղեան պատերազմին եւ նախանշեց յետագայ յաղթանակներու ուղին: Այս տարի կը լրանայ Շուշիի ազատագրման 25-րդ տարին:

Ատրպէյճանի կողմէ սկսած պատերազմի շրջանին Շուշին վերածուած էր ատրպէյճանական զինուորական յենակէտի: Հակառակորդը, օգտագործելով քաղաքի բարձրադիր դիրքը, արդէն 1991 թուականի աւարտին սկսած էր գնդակոծել ԼՂՀ մայրաքաղաք Ստեփանակերտը: Իրավիճակը կտրուկ վատացած էր 1992 թուականի փետրուարին: Հակառակորդը սկսած է գնդակոծել յատկապէս բնակելի թաղամասերը: Նոյն թուականի ապրիլի վերջը  ընդունուած է որոշում` գրոհելով ազատագրել Շուշին ատրպէյճանցիներու զինուած խմբաւորումներէն:

1992 թուականի մայիս 8-ի գիշերը Շուշիի ազատագրման մասնակցած է 3800 կամաւոր` Արցախի ինքնապաշտպանական ուժերու հրամանատար Արկադի Տէր-Թադեւոսեանի (Քոմանտոս) գլխաւորութեամբ: Ճակատը եղած է 45 քմ: Յարձակումն իրականացուած է քանի մը ուղղութիւններով:

Արդէն մայիս 9-ի առաւօտեան` 04:00-ին, Արկադի Տէր-Թադեւոսեան յայտարարած է, որ հակառակորդի բոլոր խմբաւորումները լքած են Շուշին եւ այն այլեւս ազատագրուած է:

Շուշիի ազատագրման գործողութիւնը կը կոչուի «Հարսանիք լեռներում»: Այս մասին հարցազրոյցներէն մէկուն Արկադի Տէր-Թադեւոսեան պատմած է. «Ռազմական տեսանկիւնէն մենք պատրաստ չէինք Շուշին ազատագրելու: Վազգէն Սարգսեան (այդ ժամանակ պաշտպանութեան նախարար) ըսաւ, որ շտապել պէտք չէ, բայց Շուշին պէտք էր ազատագրել: Այդ ժամանակ ես խոստացայ զինք, որ եթէ մենք գրաւենք Շուշին, ապա լեռներուն մէջ կը կազմակերպենք անոր հարսանիքը: Այդպէս յառաջացաւ գործողութեան «Հարսանիք լեռներում» անուանումը»:

Աւելցնենք, որ Շուշի անուանումը յառաջացած է «Շոշ» բառէն, որ Արցախի բարբառով կը նշանակէ ծառի այն նորաբոյս ճիւղը, որ ամենաբարձրն է բոլոր մնացածներէն: Այս անուանումը Շուշին ստացած է իր աշխարհագրական բարձրադիր դիրքին համար:

 

Յունաստանի Քաղաքական Կուսակցութիւնները Զօրակցած Են Հայկական Պահանջատիրական Պայքարին

Կիրակի, մայիս 7-ին, Աթէնքի Նիքիոյ քաղաքապետարանի սրահին մէջ Հայկական Հարցին նուիրուած ՌԱԿ Հայ իրաւանց յանձնախումբը ձեռնարկ մը կազմակերպած էր:

Ինչպէս «Հայերն այսօր»-ին կը յայտնեն յունահայ համայնքի «Հայաստան կեդրոն»-էն, ձեռնարկին իրենց զօրակցութիւնը յայտնելու  եկած էին Յունաստանի խորհրդարանի քաղաքական կուսակցութիւնները եւ հայկական հայրենասիրական ճակատի ուժերը:

Յունաստանի խորհրդարանի անունէն ողջոյնի խօսք յղեց խորհրդարանի պատգամաւոր Էվանկելիա Քարաքոստան, իսկ ՀՀ իշխանութեան անունէն` լիազօր դեսպան Ֆատէյ Չարչողլեան:

Ողջոյնի խօսքերով հանդէս եկան նաեւ Սոցեալ Դեմոկրատ Հնչակեան կուսացութիւնը, Հայկական Ժողովրդային Շարժումը, Յունահայոց թեմական խորհուրդը, Հայ Բարեգործական Ընդհանուր Միութիւնը, Յունահայ Երիտասրադութեան ներկայացուցիչը:

Օրուան հիմնական բանախօսներն էին համալսարանի դասախօս, Յունաստանի խորհրդարանի պատգամաւոր Կոնստանտինոս Արուանիտոպուլոսը, որ խօսեցաւ Հայոց ցեղասպանութեան քաղաքական տարողութեան մասին, իսկ լրագրող, Յունաստանի խորհրդարանի պատգամաւոր Լիանա Քանելին բանախօսեց Հայոց ցեղասպանութեան մարդկային տարողութեան թեմայով:

Հանդիսութեան հնչեց հայկական մեղեդի` Տիգրան Սարգսեանի (տուտուկ), Քրիստինէ Էլեֆտերովայի (շուի) եւ Մարգար Էլեֆտերիադիսի (տհոլ) կատարմամբ: Ասմունքեց նաեւ Սոնա Գալստեան:
Գեղարուեստական բաժինին յաջորդեցին Յունաստանի խորհրդարանի նախկին նախագահ, Ափոստոլիս Գակլամանիսի զօրակցութեան ուղերձը եւ յաջորդեցին Յունաստանի խորհրդարանական կուսակցութիւններու զօրակցութեան խօսքերը:

«Սուգը յաւերժ է, առանց պայքարի» նշանաբանով ձեռնարկը խորհրդանշեց յունահայ համայնքէն ներս հայրենասիրական ուժերու միասնութիւնը եւ համատեղ աշխատանքի կամքը:

unnamed-2unnamed-3unnamed-4unnamed-5unnamed-6 unnamed-7 unnamed-8 unnamed-9 unnamed-10 unnamed

Արցախի «Նոր Կիլիկիա»ի տուները կը տրուին Արցախի նահատակներու ընտանիքներուն

Ինչպէս ծանօթ է մեր ժողովուրդին, Մեծի Տանն Կիլիկիոյ Կաթողիկոսութեան նախաձեռնութեամբ, Արցախի մէջ «Նոր Կիլիկիա» անունով գիւղ մը հաստատուեցաւ իր նորակառոյց բնակարաններով եւ անհրաժեշտ կառոյցներով ու յարմարութիւններով։

Ն.Ս.Օ.Տ.Տ. Արամ Ա. Կաթողիկոսի եւ Արցախի իշխանութեան յատուկ կարգադրութեամբ «Նոր Կիլիկիա»ի տուները առաջնահերթութեան կարգով պիտի յատկացուին Արցախի նահատակներու ընտանիքներուն։

Յայտնենք, որ «Նոր Կիլիկիա» գիւղի բնակարաններու շինութեան երկրորդ հանգրուանը աւարտած է եւ պաշտօնական բացումը տեղի պիտի ունենայ 8 Մայիսին։ Պաշտօնական բացումին, յանուն Մեծի Տանն Կիլիկիոյ Կաթողիկոսութեան պիտի մասնակցի Ազգային Կեդրոնական Վարչութեան Կրօնական ու Քաղաքական ժողովները ներկայացնող պատուիրակութիւն մը։