Մեծ Վանեցիի` Մանկավարժ-Հոգեբան Համբարձում Երամեանի Նուիրումը

Հայ մանկավարժութեան պատմութեան էջերը շատ հարուստ են անուանի մանկավարժներու անուններով. հայ ժողովուրդը բոլոր ժամանակներուն մէջ  միշտ կարեւոր համարած է կրթութիւնը` դեռեւս վաղ` Մաշտոցեան ժամանակներէն հիմնելով դպրոցներ, նախակրթարաններ,երկրորդական վարժարաններ, համալսարաններ, գիտութեան ու մտքի կաճառներ:

…Մայիս 5-ին Յովհաննէս Թումանեանի տուն–թանգարանին մէջ հայ անուանի յուշարձանագէտ, պատմաբան, բանահաւաք, բազմաթիւ արժէքաւոր գիրքերու հեղինակ Սամուէլ Կարապետեան դասախօսութիւն կարդաց վանեցի ճանչցուած մանկավարժ, հրաշալի մտաւորական Համբարձում Երամեանի մասին: Ներկաները` մանկավարժներ, ծնողներ, աշակերտներ, մտաւորականներ ու լրագրողներ, համակ ուշադրութեամբ կը լսէին մեծ մանկավարժի կենսագրութեան ու անոր ծաւալած հայրենանուէր գործունէութեան հետաքրքիր դրուագներու պատմութիւնները: Մեր հասարակութեան  ստուար մաս մը, ներառեալ` նաեւ աշակերտութիւնը, գրեթէ տեղեակ չեն Վան ծնած, յետագային Եգիպտոս` Ալեքսանդրիա, Պոր Սայիտի մէջ աշխատած մեծ մանկավարժի ծաւալած կրթական, բարեսիրական գործունէութեան, որուն մասին Սամուէլ Կարապետեան ներկայացուց հանգամանալից` առանձնակի շեշտադրելով անոր կազմակերպչական ջիղն ու մարդասէր էութիւնը: Հարիւրաւոր շրջանաւարտներ տուած Հ. Երամեան յայտնի է նաեւ Վանի մէջ հիմնած իր` «Երամեան» ուսումնարանով, «Յուշարձան Վան-վասպուրականի» աշխատութեամբ, ուր գրած է Վասպուրականի պատմութեան մասին, լուսաբանած 1915թ. Ցեղասպանութեան հետ կապուած իրադարձութիւնները: Երամեան իր ողջ կեանքին մէջ սիրահարուած  մնացած է հարազատ ծննդավայրին եւ իր ընտրած` մանկավարժական աշխատանքին: Ան շատ  կարեւոր համարած է  ընթերցանութիւնը եւ այդ առիթով գրած. «Անյագ ընթերցասէր մը եղած էի…»: Անոր ուշադրութեան կեդրոնին մէջ  միշտ եղած են որբ ու աղքատ մանուկները, անոնց կրթութեան հարցերը: Սամուէլ Կարապետեանի հեղինակութեամբ մանկավարժ-մտաւորական եւ գրող Համբարձում Երամեանին նուիրուած գիրքը մօտ ապագային կ’ըլլայ ընթերցողներու սեղաններուն: Մեծ Վանեցիի ազգասէր նուիրումը կրթութեան ու բարեսիրութեան հրաշալի դաս է բոլոր մանկավարժներուն համար:

 …ժամանակի մոռացութեան փոշով երբեք չեն կրնար պատուիլ մեծ արժէքները, ատոնք պարզապէս նորովի եւ առաւել ուսումնասիրուած են ներկայիս մեր ժողովուրդին: Համբարձում Երամեանին դեռ շատերը կ’անդրադառնան, կը սորվին անկէ, յետադարձ հայեացք կը  նետեն մեծ վանեցիի հիմնած կրթական մեթոտներուն եւ իսկական մանկավարժին ու հոգեբանին հարիր լայնախոհ, բարեսէր, ազգասէր էութեան անցած բազմաբեղուն ճանապարհին:

Կարինէ Աւագեան

«Հայերն այսօր»

18336548_1451591828227145_213250443_n

 

Հայրենադարձ Գինեգործի Երազանքը Իրականութիւն Դարձուցին Թոռնիկները

Մայիս 5-ին ՀՀ սփիւռքի նախարարութեան նախաձեռնութեամբ, Երեւանի քաղաքապետարանի եւ Հայաստանի զարգացման հիմնադրամի աջակցութեամբ «Երեւան Էքսպօ» կեդրոնին մէջ տեղի ունեցած Հայաստանի մէջ արդիւնաբերութեան ոլորտին մէջ սփիւռքահայ ներդրողներու արտադրանքներու ցուցահանդէս-վաճառքին կը մասնակցէր ՀՀ Արմաւիրի մարզի Արաքս գիւղի «Ոսկենի» գինեգործական ընկերութիւնը:

«Հայերն այսօր»-ի հետ զրոյցին գործարանի գինեգործ Արեգ Խոճոյեան նշեց, որ  «Ոսկենի» գինեգործական ընկերութեան ստեղծումը շատ հետաքրքիր պատմութիւն ունի: Իրենց արտադրած գինիներու շիշին վրայ գործարանի տնօրէն Սուսաննա Դաւոյեանի մեծ պապիկի` Սմբատ Մաթեւոսեանի լուսանկարն է, որ տարիներ առաջ ցանկութիւն  ունեցած է Հայաստանի մէջ խաղողի այգիներ ունենալ, զարգացնել հայկական գինեգործութիւնը, հայկական գինին յայտնի դարձնել ամբողջ աշխարհով: Վերջինս 1920-ական թուականներուն, 20 տարի Պոսթընի մէջ ապրելէ ետք, վաճառած է ունեցուածքը եւ վերադարձած Հայաստան: Արմաւիրի շրջանին մէջ հիմնած է խաղողի այգիներ, բայց չէ հասցուցած գինի պատրաստել: 1936 թուականին անոր աքսորած են եւ ամէն ինչ ձեռքէն վերցուցած:

2008 թուականին Սմբատ Մաթեւոսեանի թոռներն ու ծոռները իմանալով այգիներ ունենալու մասին` ՌԴ-էն եկած են Հայաստան, վերագնած են այգիներն ու ընկերութիւն հիմնած` այդպիսով կատարելով իրենց մեծհօր երազանքը:

Գինեգործը ըսաւ նաեւ, որ սպիտակ գինին կը պատրաստուի խաղողի երկու` Ոսկեհատ, Գառան Դմակ, իսկ կարմիր գինին` Արէնի եւ Խնդողնի տեսակներէն: Գինիները կ´արտահանեն ՌԴ, Եւրոպա, այժմ բանակցութիւներ կը վարեն ԱՄՆ-ի մէջ շուկայ դուրս գալու համար:

Գէորգ Չիչեան

7 77

ՀՀ Համալսարաններու Դասախօսական Անձակազմի Այցը Լիբանան

Ապրիլ 25-28 Լիբանանի մէջ ՀՀ դեսպանութեան նախաձեռնութեամբ եւ հովանաւորութեամբ տեղի ունեցաւ ՀՀ բարձրագոյն ուսումնական հաստատութիւններու փրոֆէսորա-դասախօսական անձակազմի այցը Լիբանան: «Հայերն այսօր»-ի փոխանցմամբ` մասնագէտներու այցին ընթացքին տեղի ունեցան  չորս հանդիպումներ, որոնց ընթացքին անոնք հանդիպեցան 14 հայկական վարժարաններու ու քոլեջներու աշակերտներու, ուսուցչական կազմի եւ տնօրէններու հետ: Ընդհանուր առմամբ հանդիպումներուն մասնակցեցան  10-րդ, 11-րդ, 12-րդ դասարաններու թիւով 500-600 աշակերտներ: Այցելութեան նպատակն էր համապարփակ տեղեկատուութիւն տրամադրել լիբանանահայ աշակերտներուն եւ խրախուսել անոնց ուսանիլ ՀՀ համալսարաններուն մէջ:

Ապրիլ 25-ին, ժամը` 14:00-ին, Այնճար աւանին մէջ մասնագէտները հանդիպեցան Այնճարի Հայ առաքելական եւ հայ աւետարանական համայնքներու երկու վարժարաններու աշակերտներու հետ: Հանդիպումներուն մասնակցեցան շուրջ 100 համապատասխան դասարաններու աշակերտներ:

Ապրիլ 26-ին, ժամը` 11:00-ին, Լիբանանի Հայոց թեմի Սրբոց Վարդանանց եկեղեցւոյ «Երջօ Սամուէլեան» սրահին մէջ մասնագէտները հանդիպեցան առաքելական չորս ազգային վարժարաններու եւ Ազգային ճեմարանի, Սահակեան֊ Լեւոնեան, Դարուհի֊ Յովակիմեան վարժարաններու 250 աշակերտներու հետ:

Ապրիլ 27-ին, ժամը` 11:00-ին, Հայ կաթողիկէ Մեսրոպեան Բարձրագոյն արուեստէն վարժարանին մէջ մասնագէտները հանդիպեցան Հայ կաթողիկէ երեք վարժարաններու շուրջ 150 աշակերտներու հետ:

Ապրիլ 27-ին, ժամը` 13:00-ին, Հայ աւետարանական Շամլեան քոլեջին մէջ մասնագէտները հանդիպեցան Հայ աւետարանական երկու վարժարաններու 80-90 աշակերտներու հետ:

Մասնագէտներու այցի ընթացքին հնարաւոր եղաւ իրականացնել ծրագիրի գլխաւոր նպատակը` ստեղծել անմիջական ու անձնական կապեր ՀՀ համալսարաններու փրոֆէսորա-դասախօսական կազմի ներկայացուցիչներու եւ Լիբանանի մէջ գործող վարժարաններու տնօրէններուն հետ, որ պէտք է այսույետ ըլլայ շարունակական եւ աւելի դիւրացնէ յետագայ համագործակցութիւնը:

libananlibanan1libanan3libanan4

Վաչէ Ծատուրեան Անդամ` Հեծելարշաւի Արաբական Ֆետերասիոնին

Կիրակի, 30 Ապրիլ 2017-ին, Քազապլանքայի մէջ (Մարոք) տեղի ունեցաւ Հեծելարշաւի արաբական ֆետերասիոնի ընդհանուր ժողովը, որուն աւարտին ընտրուեցաւ յառաջիկայ 4 տարիներու (2017-2021) գործադիր մարմինը` նախագահութեամբ շէյխ Ֆայսալ Պըն Հըմէյտ Ալ Քասիմիի (Արաբական Միացեալ  էմիրութիւններ), որ կը պահէ իր պաշտօնը 1997-էն ի վեր: Արաբական ֆետերասիոնի առաջին փոխնախագահ ընտրուեցաւ Ափրիկեան ֆետերասիոնի նախագահ եւ Միջազգային ֆետերասիոնի փոխնախագահ տոքթ. Մոհամետ Ուաժիհ Ազզամ (Եգիպտոս), իսկ երկրորդ փոխնախագահ ընտրուեցաւ Ահմետ Զահեր Ֆատլի (Քուէյթ): Խորհրդականներ ընտրուեցան Մոհամետ Պըլմահի (Մարոք), Նաուֆալ Մրրշաուի (Թունուզ), Խալետ Պաշիր (Սուտան), Մապրուք Քարպուհ (Ալճերիա) Ժամալ Ֆահուրի (Յորդանան) եւ Վաչէ Ծատուրեան (Լիբանան), 7-րդ խորհրդական նշանակուեցաւ (առանց ընտրութեան) Պաղեստինի ներկայացուցիչ Քարիմ Սամեր Ապտել Հատի, իսկ կանացի աթոռը վիճակուեցաւ մարոքցի Քարիմա Սալահէտտինի:

Լիբանանի «Ազդակ» օրաթերթին հաղորդած տեղեկութիւններով՝ հեծելարշաւի արաբական ֆետերասիոնի գործադիր մարմինի Լիբանանի ներկայացուցիչ Վաչէ Ծատուրեանի ընտրութիւնը արաբական մարզական աշխարհի վարչական եւ կազմակերպական ոլորտին մէջ արձանագրուած նոր նուաճում մըն է Լիբանանի համար: Նշենք, որ Լիբանանի Հեծելարշաւի Ֆետերասիոնի նախագահ եւ Լիբանանի Ողիմպիական կոմիտէի անդամ Վաչէ Ծատուրեան շուրջ ամիս մը առաջ ընտրուած էր Հեծելարշաւի ասիական ֆետերասիոնի գործադիր մարմինի անդամ: Ան այս օրերուն Փարիզի մէջ կը մասնակցի նիստերուն Հեծելարշաւի ֆրանսախօս երկիրներու ֆետերասիոնի Գործադիր մարմինին, որուն անդամ է նաեւ 2014-էն ի վեր:

Վանաձորի Պետական Տրամաթիկական Թատրոնը Հիւրախաղերու Կը Մեկնի ՌԴ Հայաշատ Քաղաքներ

Վանաձորի Յովհաննէս Աբէլեանի անուան պետական տրամաթիկական թատրոնը ՀՀ սփիւռքի նախարարութեան հետ համագործակցութեամբ մայիս 22-էն մինչեւ յունիս 1 հիւրախաղերու  պիտի մեկնի Ռուսաստանի Դաշնութեան Անապա, Նովոռոսիյսկ, Տոնի-Ռոստով, Գրասնոտար քաղաքներու հայկական համայնքներ:

«Երբ արդէն պատրաստած էի ծրագիրը, նպատակայարմար գտայ այն ՀՀ սփիւռքի նախարարութեան հետ իրականացնել: Դիմեցի ՀՀ սփիւռքի նախարար Հրանոյշ Յակոբեանին, եւ ինչպէս սպասելի էր, համագործակցութեան առաջարկը մեծ սիրով ընդունեց, որուն համար շատ շնորհակալ եմ: ՌԴ հայաշատ այնպիսի քաղաքներ  ընտրած ենք, ուր հայկական թատերախումբեր կամ քիչ կ´այցելեն, կամ մինչեւ օրս չեն այցելած»,–«Հայերն այսօր»-ի հետ զրոյցին ըսաւ Վանաձորի Յովհաննէս Աբէլեանի անուան պետական տրամաթիկական թատրոնի գեղարուեստական ղեկավար Վահէ Շահուերդեան` աւելցնելով, որ հիւրախաղերու միջոցով կը ցանկան օտարութեան մէջ ապրող հայերուն մօտ տարածել հայկական մշակոյթը, որպէսզի անոնք չկտրուին իրենց արմատներէն եւ պահպանեն ազգային ինքնութիւնը:

Հիւրախաղերու պիտի մեկնին թատրոնի 26 յառաջատար դերասաններէ կազմուած խումբ մը, որ հանդէս պիտի գայ «Լիր արքայ» եւ «Խնայեցէ՛ք տղամարդոց» ներկայացումները: Ի դէպ, Անապայի հայերը առաջարկած են 1981 թուականին ռուսերէնով բեմադրուող եւ մեծ պահանջ ունեցող «Խնայեցէ՛ք տղամարդոց» կատակերգութիւնը ներկայացնել, որ կը փաստէ, թէ  առ այսօր հանդիսատեսը տպաւորուած է այդ ներկայացմամբ: «Լիր արքայ»-ն զուգահեռաբար ռուսերէն պիտի  թարգմանուի, որպէսզի ռուս հանդիսատեսին ներկայացումը նոյնպէս հասանելի ըլլայ:

Հարցին, թէ սփիւռքեան որ հատուածներուն մէջ են հայերն առաւել հետաքրքրուած հայկական թատերարուեստով, Վահէ Շահուերդեան ըսաւ. «Դեռեւս Գաբրիէլ Սունդուկեանի անուան ազգային ակադեմական թատրոնին մէջ աշխատելու տարիներուն, Սփիւռքի տարբեր` Վրաստանի, Ռուսաստանի Դաշնութեան, Ուքրանիոյ, Պելառուսի, Իրանի, Փորթուկալիոյ, Ֆրանսայի եւ հայկական այլ համայնքներու մէջ հիւրախաղերու մեկնելով` նկատած եմ, որ յատկապէս Իրանի հայկական համայնքը այս հարցով աշխուժութիւն կը ցուցաբերէ, Ռուսաստանի, Ֆրանսայի հայերը նոյնպէս հայկական մշակոյթին հանդէպ մեծ հետաքրքրութիւն ունին: Պէտք է շեշտեմ, որ միշտ եւ ամէնուր աշխարհասփիւռ մեր հայրենակիցներուն կողմէ ջերմ ընդունելութեան, բուռն ծափողջիւններու  արժանացած ենք»:

Գէորգ Չիչեան

%d5%a9%d5%a1%d5%bf%d6%80%d5%b8%d5%b6 %d5%a9%d5%a1%d5%bf%d6%80%d5%b8%d5%b61 %d5%a9%d5%a1%d5%bf%d6%80%d5%b8%d5%b62 %d5%a9%d5%a1%d5%bf%d6%80%d5%b8%d5%b63

Տեղի Ունեցաւ Հայաստանի ՄԷջ Արդիւնաբերութեան Ոլորտին ՄԷջ Սփիւռքահայ Ներդրողներու Արտադրանքներու Ցուցահանդէս-Վաճառքը

Մայիս 5-ին Հայաստանի Հանրապետութեան սփիւռքի նախարարութեան նախաձեռնութեամբ, Երեւանի քաղաքապետարանի եւ Հայաստանի զարգացման հիմնադրամի աջակցութեամբ «Երեւան Էքսպօ» կեդրոնին մէջ տեղի ունեցաւ Հայաստանի մէջ արդիւնաբերութեան ոլորտին մէջ սփիւռքահայ ներդրողներու արտադրանքներու ցուցահանդէս-վաճառքի բացումը:

Ցուցահանդէս-վաճառքի բացման ներկայ էր ՀՀ սփիւռքի նախարար Հրանոյշ Յակոբեան:

Նախարարը շրջեցաւ տաղաւարներով, ծանօթացաւ արդիւնաբերութեան ոլորտին մէջ սփիւռքահայ ներդրողներու գործունէութեան, հետաքրքրուեցաւ արտադրական գործընթացքի նորարութիւններով եւ խնդիրներով, դիտեց «Աշխարհի կեդրոնէն տիեզերքներէն մէկուն մասնիկը»  հայկական առաջին 360  աստիճան ֆիլմը, պատասխանեց լրագրողներու հարցերուն: Հրանոյշ Յակոբեան մասնաւորապէս նշեց.««Պատրաստուած է Հայաստանում» ապրանքանիշը կրող արտադրանքները միջազգային շուկայում գնալով դառնում են աւելի ընդունուած, պահանջուած եւ տարածուած: Նման ցուցահանդէսներով մենք պէտք է խրախուսենք  սփիւռքահայ ներդրողներին եւ աշխատենք օրինակ վերցնել հայրենադարձուած մեր հայրենակիցներից, ովքեր աշխատանքի եւ արտանդրանքի որակի  հանդէպ  պատասխանատուութեան իւրայատուկ մօտեցում ունեն: Այս առումով նրանց արտադրանքները մրցունակ են եւ նորարարական: Հայրենիքում սփիւռքահայ արտադրողների համար պայմաններ են ստեղծւում, նրանց գործունէութիւնը դիւրացնելու նպատակով  որոշակի քայլեր են իրականացւում: Վերջին ժամանակաշրջանում, մասնաւորապէս տնտեսական ոլորտում կառավարութիւնը հարկային արտօնութիւններ է սահմանւում սփիւռքահայ ներդրողների եւ արտադրողների համար: Մեր ուշադրութեան կենտրոնում շարունակում են մնալ փոքր եւ միջին ձեռնարկութիւնները, որոնցով յատկապէս զբաղւում են Հայաստանում հաստատուած սիրիահայերը»: Նախարարը նշեց, որ ցուցահանդէս-վաճառքին ներկայ սփիւռքահայ ներդրողները եւ արտադրողները Հայրենիք վերադարձած են տարբեր երկիրներէ` ԱՄՆ, Ռուսաստան, Սուրիա, Լիբանան եւ այլն:

Ցուցահանդէսի բացման ընթացքին սուրիահայ գործարար Ալեքսան Գարատանայեան, որ Հայաստանի մէջ հիմնած է “Alexan Art” եւ “Sona Print” ընկերութիւնները, շնորհակալութիւն յայտնեց ՀՀ սփիւռքի նախարարութեան ցուցաբերած աջակցութեան համար: «2012 թուականի հոկտեմբեր 24-ին Սփիւռքի նախարարութեան մէջ փոքր եւ միջին գործարարութեան սուրիահայ ներկայացուցիչները հանդիպում ունեցան հայաստանեան  գործուածքներու  ոլորտի արտադրողներուն հետ: Նախարար Հրանոյշ Յակոբեան ներկայացուց մեզի եւ ամուր գործակցութեան հիմք դրաւ: Մեծ է նախարարութեան դերակատարութիւնը մեր գործարարութեան կայացման գործին մէջ, քանի որ առաջին համագործակցութեան առաջարկները ստացած ենք հէնց Սփիւռքի նախարարութեան մէջ»,-ըսաւ Ալեքսան Գարատանայեան:

Նշենք, որ ցուցահանդէսը պիտի գործէ մինչեւ  ժամը 20.00:

%d6%81%d5%b8%d6%82%d6%81%d5%a1%d5%b0%d5%a1%d5%b6%d5%a4%d5%a5%d5%bd1 %d6%81%d5%b8%d6%82%d6%81%d5%a1%d5%b0%d5%a1%d5%b6%d5%a4%d5%a5%d5%bd3 %d6%81%d5%b8%d6%82%d6%81%d5%a1%d5%b0%d5%a1%d5%b6%d5%a4%d5%a5%d5%bd4

Հայ Զինուոր, Քեզմէ Կը Սորվինք Հայրենասէր Ըլլալ Եւ Հայութեամբ Պարծենալ. Կը Գրեն Սփիւռքահայ Աշակերտները

Սփիւռքի տարբեր ջաղթօճախներու հայկական դպրոցներու աշակերտներ նամակներ  յղած են հայ զինուորին: Այդ նամակներուն մէջ  անոնք իրենց սրտառուչ ցանկութիւնները կը  յայտնեն սահմանին կանգնած զինուորներուն, կը նկարագրեն իրենց պատկերացումները հայրենասիրութեան, հայրենի սահմաններն անառիկ պահելու վերաբերեալ:

 ինչպէս «Հայերն այսօր»-ին կը  յայտնեն Հայաստանի երիտասարդական հիմնադրամի հասարակայնութեան հետ կապերու ծառայութենէն, ծրագիրը նախաձեռնած է «Հայ օգնութեան միութիւն» բարեգործական հասարակական կազմակերպութիւնը ՀՀ Նախագահի աշխատակազմի կողմէն ՀԿ-ներուն յատկացուող դրամաշնորհի եւ Հայաստանի երիտասարդական հիմնադրամի յայտարարած մրցոյթի ծիրէն ներս: «Մենք ուժեղ ենք, երբ միասին ենք» խորագիրով ծրագիրը բաղկացած է քանի մը փուլէ. յաջորդ փուլերուն նախատեսուած են այցելութիւններ Հայաստանի եւ Արցախի զօրամասեր, մարդասիրական աջակցութիւն կը ցուցաբերուի զինուորներուն, հանդիպումներ տեղի կ’ունենան դպրոցներու, համալսարաններու մէջ, ուր մասնագիտական կողմնորոշման ծիրէն ներս կը խօսուի զինուորականի մասնագիտութեան մասին, հանդիպումներ կ´ըլլան քառօրեայ պատերազմի հերոսներուն հետ:

Նշենք, որ նամակներ ստացուած են ԱՄՆ Արեւմտեան շրջանի Ֆերահեան ազգային վարժարանի, ԱՄՆ Արեւելեան շրջանի Յովնանեան հայկական, Քուէյթի ազգային, Լիբանանի Համազգայինի Մելքոնեան վարժարաններու, Լիբանանի Հայկ Արսլանեան ճեմարանի, Գանատայի Թորոնթօ քաղաքի ՀՕՄ-ի ամէնօրեայ վարժարանի, Հալէպի «Զաւարեան» վարժարանի, Հալէպի Ազգային «Քարեն Եփփէ» ճեմարանի, Սուրիոյ Ազգային միացեալ վարժարանի, Գանատայի ՀՕՄ-ի Քեմպրիճի «Մեղրի» մասնաճիւղի «Մեսրոպ Թիթիզեան» շաբաթօրեայ, Գանատայի ՀՕՄ-ի Վանքւվըրի «Արազ» շաբաթօրեայ վարժարաններու, Գանատայի Սուրբ Յակոբ Ազգային վարժարանի «Սարաֆեան» նախակրթարանի, Գանատայի ՀՕՄ-ի Համիլթընի «Արեւ» դպրոցի, Աւստրալիոյ Համազգայինի Սիտնէյի «Թարգմանչաց» շաբաթօրեայ վարժարանի աշակերտներէն: Հալէպի Ազգային «Քարեն Եփփէ» ճեմարանի սան Սեմ Պարմաքզեան նամակին մէջ կը նշէ, որ կը փափաքի` երբ մեծնայ, այսօրուան զինուորին պէս  պաշտպան դառնայ` անառիկ պահելով Հայաստանն ու Ղարաբաղը:

Նոյն կրթօճախէն Սարին Պերթիզլեանի համար զինուորն ապահովութեան զգացում է. «Հայ զինուոր, դուն կը յոգնիս, որ մենք հանգստութիւն վայելենք: Բարոյական պարտականութիւն է քեզի յիշելը: Քեզմէ կը  սորվինք հայրենասէր ըլլալ, ազատութեան արժէքն իմանալ եւ հայութեամբ պարծենալ: Կը ցանկամ`  օր մը անձամբ տեսնել քեզ քու մարտական գործողութիւններուն ընթացքին: Այդ պահը նուիրական է ինծի համար, ուժ ստանալու առիթ»: Իսկ Մարինա Մանուկեանն ալ իր նամակին մէջ կը պատմէ, որ մեր նահատակ զինուորներուն ինք կը փորձէ փնտռել մեր օրերու մարդոց մէջ, տեսնել անոնց հայեացքը, աչքերը, հագուստը: Ի դէպ, «Քարեն Եփփէ» ճեմարանի սաներու հայոց լեզուի ուսուցչուհին Հայաստանի հանրային հեռուստաընկերութեան թղթակից Մարիա Գաբրիէլեանն է, որ իր նուիրական աշխատանքով երեխաներուն կը փոխանցէ հայրենիքի շունչը: Յառաջիկային ստացուած նամակները պիտի փոխանցուին հասցէատէրերուն:

%d5%b6%d5%a1%d5%b4%d5%a1%d5%af1 %d5%b6%d5%a1%d5%b4%d5%a1%d5%af2

 

Սուրիահայերը Հայրենիք Կը Վերադարձնեն Արհեստագործութեան Աւանդոյթները. տեսանիւթ

Կառավարութեան հետ համատեղ ներդրումով` Ղամշլի քաղաքի յայտնի Կարապետեաններու ընտանիքը մետաղական իրերու արտադրութիւն պիտի սկսի Աշտարակի մէջ: Վստահ են` պիտի ստեղծեն  որակեալ իրեր, որ առողջապահական համակարգը չներմուծէ:

Մանրամասնութիւնները` հանրային հեռուստաընկերութեան տեսանիւթին մէջ.

 

 

Հոլանտայի ՄԷջ Հանգանակութիւն` Ի Նպաստ Հալէպահայութեան

ՀՅԴ Արեւմտեան Եւրոպայի կեդրոնական կոմիտէի հրաւէրով Հոլանտայի մէջ կը գտնուին սուրիահայութեան հոգեւոր առաջնորդ Շահան արքեպիսկոպոս Սարգսեան եւ համայնքի ղեկավարներէն ՀՅԴ կառոյցի ներկայացուցիչ Կարօ Եուզշպաշեան:

ՀՅԴ Հոլանտայի Հայ դատի յանձնախումբը պաշտօնական ընդունելութիւն կազմակերպած է Հոլանտայի խորհրդարանին մէջ, որպէսզի օրէնսդիրի ներկայացուցիչներն անմիջական կապի միջոցով ծանօթանան սուրիահայութեան խնդիրներուն:

Ինչպէս Արմէնփրեսին տեղեկացուց ՀՅԴ Հոլանտայի Հայ դատի յանձնախումբի նախագահ Մասիս Աբրահամեան, Հոլանտայի ՀՅԴ Հայ դատի յանձնախումբի անդամներու, ինչպէս նաեւ Ալմելոյի Հայ առաքելական եկեղեցւոյ ծխական խորհուրդի ատենապետի ուղեկցութեամբ Սուրիայէն ժամանած հիւրերուն ընդունեցին Հոլանտայի մէջ այս պահուն կառավարութեան դաշնութիւն ձեւաւորող կուսակցութիւններու ներկայացուցիչները:

Պաշտօնական ընդունելութեան նիստը կը վարէր պարոն Հան Թեն Պրուկը ազատական VVD կուսակցութենէն, Փիթր Օմտզիխտ եւ Ռայմոնտ Քնոպսը ներկայ էին Քրիստոնէա-ժողովրդավարական կուսակցութենէն, իսկ Կանաչներու կուսակցութիւնը կը ներկայացնէր Պրամ վան Օյիկը:

«Հանդիպումն անցաւ չափազանց ջերմ մթնոլորտի մէջ: Շահան սրբազանը եւ պարոն Եուզպաշեանը հանգամանալից տեղեկութիւններ տուին եւ տեսաժապաւէն ցուցադրեցին պատերազմի ժամանակ սուրիահայութեան կորուստներուն մասին: Մօտաւորապէս մէկ ժամ տեւած հանդիպման ընթացքին պատգամաւորներուն կողմէ հնչեցին հարցեր, որոնց հիւրերն ամբողջական պատասխաններ տուին: Պատգամաւորները խորին շնորհակալութիւն յայտնեցին Հոլանտայի Հայ դատի յանձնախումբին` այս այցելութիւնը կազմակերպելու համար: Անոնք շատ կարեւոր համարեցին այս անմիջական կապը, որուն շնորհիւ իրենք ամբողջական տեղեկութիւններ ստացան»,-ըսաւ Մասիս Աբրահամեան:

Անոր փոխանցմամբ, պայմանաւորուածութիւն ձեռք բերուեցաւ մշտական հաղորդակցութեան վերաբերեալ, որպէսզի ջանքեր գործադրուին, որ սուրիահայութեան հնարաւոր բոլոր միջոցներով օգնութիւն ցուցաբերուի: Պատգամաւորները խոստացան նաեւ յաջորդ օրերուն առանձին հանդիպումներու ժամանակ ալ աւելի ծանօթանալ հանգամանքներուն:

Մասիս Աբրահամեան տեղեկացուց, որ սուրիահայութեան ներկայացուցիչներու օրակարգը խիստ յագեցած է: Երէկ խորհրդարանէն ետք անոնք հանդիպեցան Ամսթըրտամի հայ համայնքի ներկայացուցիչներուն հետ: Այսօր անոնք պիտի հանդիպին Հոլանտայի մէջ գործող քրիստոնեայ տարբեր եկեղեցիներու պատուիրակներուն հետ: Մայիս 6-ին պիտի այցելեն ՀՅԴ «Գարեգին Նժդեհ» երիտասարդական միութեան բանակումին, որ տեղի պիտի ունենայ Ռոթերտամի մատոյցներուն մէջ: Հանդիպումներ կազմակերպուած են Մասթրիխթ եւ Առնհեմ քաղաքներու հայկական համայնքներուն հետ, եւ այցելութեան վերջին հանգրուանը պիտի ըլլայ Ալմելօ քաղաքին մէջ` մայիս 7-ին, ուր պիտի մատուցուի սուրբ պատարագ եւ կատարուի հանգանակութիւն` ի նպաստ հալէպահայութեան:

Յիշատակի Հանդիսութիւն` Նուիրուած Խրիմեան Հայրիկի Կաթողիկոսական Ընտրութեան 125-ամեակին Եւ Վախճանման 110-ամեակին

Կազմակերպութեամբ Լիբանանի Հայոց թեմի Ազգային առաջնորդարանին, չորեքշաբթի, 3 մայիս 2017-ի երեկոյեան ժամը 8:00-ին, Ազգային առաջնորդարանի «Երջօ Սամուէլեան-Եռագոյն» սրահին մէջ տեղի ունեցաւ յիշատակի հանդիսութիւն` նուիրուած Խրիմեան Հայրիկի կաթողիկոս ընտրութեան 125-ամեակին եւ անոր վախճանման 110-ամեակին առիթով:

Լիբանանեան եւ հայկական քայլերգներու յոտնկայս ունկնդրութենէն ետք ցուցադրուեցաւ կարճատեւ տեսերիզ մը, որուն ընդմէջէն ներկայացուեցան ժողովրդային եւ մտաւորական դէմքերու վկայակոչութիւններ Խրիմեան Հայրիկի մասին:

Տեսերիզը պատրաստուած էր Առաջնորդարանի տեղեկատուական բաժանմունքին կողմէ:

Օրուան բանախօսն էր Ազգային Լեւոն եւ Սոֆիա Յակոբեան քոլեճի տնօրէն Վիգէն Աւագեան, որ անդրադարձաւ Խրիմեան Հայրիկի նկարագրային գիծերուն, կեանքին, գործունէութեան ու վարկին յաչս հայ ժողովուրդին, որ իրաւամբ զինք կոչած էր «Հայրիկ»:

«Ամէն մարդ երկու հայր ունի` իրը եւ Ամենայն Հայոց Հայրիկը», Աւագեան մէջբերեց Ամենայն հայոց Վազգէն Ա. կաթողիկոսի մէկ վկայութիւնը Խրիմեան հայրիկի մասին: «Հայրիկ կոչումը մոռցնել տուաւ Խրիմեանի եկեղեցական բոլոր տիտղոսները, մինչեւ իսկ Ամենայն հայոց կաթողիկոսի անոր հանգամանքը, նշեց պատգամախօսը եւ աւելցուց: «Կոչում մը, որ անցնող տասնամեակներուն անպայման բան մը ըսաւ մեզի, բան մը ըսաւ հայութեան մէջ ծնած, հայութենէն ամբողջովին չկտրուած ամէն հայու»:

«Խրիմեան մեր մէջ եղաւ ազգային տոհմիկ արժէքները անմահացնող մեծագոյն դէմքը, դպրոցի եւ մամուլի ճամբով հայութեան մէջ ազգային գիտակցութիւն սերմանողը եւ մեր նորագոյն պատմութեան գաղափարի եւ ազատութեան ջահակիրը», ընդգծեց Աւագեան` մաղթելով, որ նորահաս սերունդները Խրիմեանով ճանչնան մեր ազգի պատմութիւնը, Խրիմեանով պեղեն հայ կեանքը եւ Խրիմեանով ծանօթանան հայ մարդու առաքինութիւններուն եւ բարոյական հիմերուն: Ան հաստատեց, որ Խրիմեան Հայրիկ հայութեան կեանքին մէջ նոր էջ բացող ռահվիրայ մը եղաւ:

Անդրադառնալով օրուան մեծարեալի կեանքին պատմական տուեալներուն` Աւագեան յիշեցուց, որ հայոց Մկրտիչ Խրիմեան հայրապետի ամբողջ ճիգը հայը իր հայրենիքի մէջ պահելն ու անոր նիւթական վիճակի բարելաւումն էր: «Իր մտածումներով Խրիմեան մեր ժամանակակիցն է, ան կը հաւատայ, որ հայութեան հոգեւոր եւ նիւթական բոլոր ուժերը պէտք է կեդրոնացնել Հայաստանի մէջ եւ ստեղծել այնպիսի պայմաններ, որպէսզի հայը չլքէ հայրենի հողը, չարտագաղթէ հայրենիքէն», շեշտեց Վիգէն Աւագեան:

Արտայայտուելով Խրիմեան Հայրիկի ազգային համոզումներուն մասին` օրուան բանախօսը անհրաժեշտ նկատեց «Հայութեան առաջին հերթին հաց եւ լոյս տալ, որովհետեւ միայն այս երկուքը ունեցողը կրնայ հետապնդել աւելի մեծ նպատակ` քաղաքական ազատութիւն», մէջբերելով խօսքերը Հայրիկին, որուն համար տգիտութիւնն ու աղքատութիւնը յեղափոխութեան մեծագոյն խոչընդոտներն են:

Աւագեան խօսեցաւ նաեւ Խրիմեան Հայրիկի գրական վաստակին մասին` դիտել տալով, որ Խրիմեան Հայրիկը իր գրականութեան ընդմէջէն Հայաստա՛նն է, որ կը ներկայացնէ: Խրիմեան Հայրիկի համոզումով, ազգերը միայն հացով չեն ապրիր, թագաւորութեամբ եւ ազատութեամբ չեն բարձրանար, այլ նաեւ բարոյական կեանքով, եւ այդ կեանքը տուողը տունն ու ընտանիքն են: Ընտանիքն է, որ կ՛ապահովէ ազգին ուժն ու կեանքը, ընդգծեց Աւագեան:

Բանախօսը անդրադարձաւ Խրիմեան Հայրիկի «Երկաթէ շերեփ»-ի պատգամի պատմական թելադրականութեան` դիտել տալով, որ հայութիւնը թէեւ բան չշահեցաւ Պերլինի վեհաժողովէն, սակայն վերագտաւ Հայաստանը, հայրենիքը: «Մարդիկ ի վերջոյ կը համոզուին, որ հայկական հարցին լուծումը եւրոպական դիւանագիտութեան գրասենեակներէն անդին` հայ գիւղերուն եւ քաղաքներուն մէջ, «Դէպի երկիր»-ի եւ «Յարատեւ կռիւ»-ի ուղեցոյցներուն մէջ է», ընդգծեց Աւագեան:

Ապա բանախօսը անդրադարձաւ Խրիմեան Հայրիկի կաթողիկոսութեան շրջանի (1892-1907) պայմաններուն եւ անոր դիմագրաւած դժուարութիւններուն, ուր ան մեծ ճիգեր ի գործ կը դնէ Համիտեան կոտորածներէն ճողոպրած գաղթականները Էջմիածինի մէջ տեղաւորելու համար: Նմանապէս ան խիզախօրէն կը դիմակալէ ռուսահայութեան սպառնացող վտանգը եւ անզիջող կեցուածքով կ՛ընդդիմանայ հայ եկեղեցական կալուածներու գրաւման ցարական որոշումին: «Խրիմեան կը դառնայ ազգային կամքի, դիմադրական կորովի խորհրդանիշ, դիտել տուաւ Աւագեան եւ աւելցուց. «Խրիմեան եղաւ մնայուն գործի եւ սկզբունքի մարդ, իր բոլոր ասպարէզներուն մէջ, Վարագայ վանքի վանահայրութենէն մինչեւ Ամենայն հայոց կաթողիկոսութիւն ու մինչեւ իր վերջին շունչը` 29 հոկտեմբեր 1907»:

Եզրակացնելով, բանախօսը ըսաւ, որ 5 մայիս 1892-ին, Խրիմեանի կաթողիկոսական ընտրութեան մասնակից 72 թեմերու շարքին կը նշուի նաեւ Պէյրութը` իբրեւ 48-րդ թեմ, որ օրին մաս կը կազմէր Երուսաղէմի պատրիարքութեան: Պէյրութը առանձին պատգամաւոր չէ ունեցած, այլ` Երուսաղէմի պատրիարքութեան ներկայացուցիչ Սահակ եպս. Խապայեան ներկայացուցած է Պէյրութի թեմը` «Այո» քուէարկելով ի նպաստ Խրիմեան Հայրիկի ընտրութեան:

«125 տարի ետք, այսօր, յիշատակի այս հանդիսութեամբ, ո՛չ միայն Պէյրութի, այլեւ` ամբողջ Լիբանանի հայութիւնը, իր ներկայացուցիչներով, Խրիմեանի շնորհուած այդ «Այո»-ն կը վերանորոգէ, կը վերահաստատէ եւ կ՛ըսէ.

«Ո՛ւր որ ալ լինես, ո՛ւր որ ալ երթաս,
Քու փայլուն ջահէդ, Հայրիկ ջան,
Մեզի լոյս կու տաս», եզրափակեց Վիգէն Աւագեան:

Այս առիթով ներկայացուեցաւ գեղարուեստական յայտագիր, ուր մերթ ընդ մերթ ելոյթ ունեցան ջութակահար Յովիկ Գարախանեան եւ Համազգայինի «Այգ» երգչախումբը` խմբավարութեամբ Զաքար Քէշիշեանին:

Այս մասին կը յայտնէ Ազդակ:

Հայ Արշաւորդուհի Թելմա Ալթուն Հայաստանէն Ոտքով Կ´երթայ Արցախ

Հայ լեռնագնաց, արշաւորդուհի Թելմա Ալթուն կը պատրաստուի Հայաստանէն ոտքով մօտ 280 քիլոմեթր անցնիլ դէպի Արցախ: Երկու երեխայի մայր, 42-ամեայ Թելմա Ղազարեան Ալթուն  անցեալին բազմիցս մասնակցած է արշաւներու` հայկական եռագոյնը ձեռքին, մինչդեռ առաջին անգամ  ճանապարհ պիտի կտրէ հայրենիքի մէջ:

Թելմայի արշաւը պիտի մեկնարկէ յունիսին Վարդենիս քաղաքէն, ուրկէ ան «Ճանապարհ» կոչուող արշաւային երթուղով պիտի անցնի Արցախի Հանրապետութեան Հադրութ քաղաք: Կը նշուի, որ արշաւին ընթացքին նախատեսուած են կանգառներ  քանի մը քաղաքներու ու գիւղերու մէջ, ուր ան մտադիր է ծանօթանալու  տեղաբնակներու հետ, իսկ ամբողջ եթուղին Ալթուն մտադիր է աւարտել երեք օրէն, կը հաղորդէ Panorama.am-ը Asbarez.com-ին յղումով:

«Ժամանակն է, որպէսզի պարտքս տամ հայրենիքիս», – ըսած է Թելման ու աւելցուցած. «Բազմաթիւ երթուղիներ  անցած եմ ամբողջ աշխարհով, բացի հայրենիքէս: Ժամանակն է վերջապէս քրտինք ու արցունք թափել նաեւ հայրենի հողին համար»:

Հայազգի արշաւորդուհիի նախաձեռնութեան հիմնական առաքելութիւնը դրամահաւաքի կազմակերպումն է «Համահայկական Արշաւային Երթուղի» նախագիծին համար, որուն գլխաւոր նպատակն է Հայաստանի մէջ զարգացնել արկածային, արշաւային զբօսաշրջութեան  ենթակառուցուածքները, գծանշել, քարտէզագրել Հայաստանի բոլոր արշաւային երթուղիներն ու ստեղծել ատոնք պատկերող օնլայն քարտէզ:

 

Տոքթ. Դերձակեանի Միջնորդութեամբ՝ Արդիական Բժշկական Սարք Կը Նուիրուի Երեւանի Հիւանդանոցին

Ապրիլ 27-ին, բժշկական սարքաւորումներ արտադրող իտալական «Քուանթա» ընկերութիւնը «Լիթօ» տիպի արդիական սարք մը նուիրած է Երեւանի «Իզմիրլեան» բժշկական կեդրոնի միզաբանական բաժանմունքին, շնորհիւ Քալիֆորնիայէն յայտնի միզաբան տոքթ. Կարօ Դերձակեանի միջնորդութեան։

0000Tertsagian3Յանձնումի արարողութեան ներկայ եղած է Գարեգին Բ. կաթողիկոս, այդ օրերուն Հայաստան գտնուող Յորդանանի իշխանուհի Տինա Միրատ, հիւանդանոցի պատասխանատուները եւ «Քուանթա» ընկերութեան պաշտօնատարներ։

Քաղցկեղի վերահսկման միջազգային միութեան նորընտիր նախագահի իր հանգամանքով Երեւան գտնուող իշխանուհի Միրատ դրուատած է իտալական ընկերութեան նուիրատուութիւնը։

Իսկ «Քուանթա» ընկերութեան տնօրէն Փաուլօ Սալվատէօ յայտնած է, թէ այս սարքը նուիրելու գաղափարը ծագած էր անցեալ տարի, Երեւանի մէջ տոքթ. Կարօ Դերձակեանի հետ խորհրդակցութիւններու ընթացքին։

0000Tertsagian1

Լիբանանի ՀՀ Դեսպանատան Մէջ Բացումը Կատարուեցաւ Արուեստագէտ Գօգօ Կարապետի Ցուցահանդէսին

Լիբանանի մէջ Հայաստանի Հանրապետութեան եւ Իտալիոյ դեսպանատուներուն հովանաւորութեամբ, երէկ` Հինգշաբթի, 4 Մայիս 2017-ին, երեկոյեան ժամը 7:30-ին, Հայաստանի դեսպանատան մէջ տեղի ունեցաւ արուեստագէտ Գօգօ Կարապետի ցուցահանդէսին բացումը` ներկայութեամբ արուեստագէտներու, արուեստասէրներու եւ հիւրերու: Այս մասին կը հաղորդէ Լիբանանի «Ազդակ» օրաթերթը։

Ողջոյնի խօսքով հանդէս եկաւ Միրա Եարտըմեան: Ան Լիբանան-Հայաստան բարեկամութեան ընկերակցութեան անունով ողջունեց բոլոր ներկաները արուեստագէտ Գօգօ Կարապետի ցուցահանդէսին բացման առիթով, ապա շնորհակալութիւն յայտնեց Հայաստանի Հանրապետութեան դեսպանատան հիւրընկալութեան եւ Իտալիոյ դեսպանատան գործակցութեան համար` յանուն ձեռնարկի յաջողութեան:

Այնուհետեւ Լիբանան-Հայաստան բարեկամութեան ընկերակցութեան անունով խօսք առաւ. Պօղոս Քիւրտեան, որ շնորհակալութիւն յայտնեց, բոլոր ներկաներուն իրենց քաջալերանքին համար, ապա նշեց, որ ձեռնարկը լաւագոյն առիթն է արժեւորելու ժողովուրդներու մշակութային առողջ յարաբերութիւնը:

Խօսք առաւ նաեւ Լիբանանի մէջ Հայաստանի Հանրապետութեան դեսպան Սամուէլ Մկրտչեան: Ան ըսաւ, որ արուեստագէտ Գօգօ Կարապետ մշակոյթներու փոխադարձ յարաբերութեան լաւագոյն օրինակը եւ կրողը կը հանդիսանայ ծնած ըլլալով հայկական գիւղի մը մէջ եւ ուսանելով արուեստի երկիր Իտալիոյ մէջ: Դեսպանը խօսելով արուեստագէտին գործերուն մասին ըսաւ, որ անոնք մէկ միջավայրի, մէկ տարածքի եւ մշակոյթի չեն պատկանիր, անոնցմէ իւրաքանչիւրը  կը կրէ իւրայատուկ ոճ ու ձեւ: Ան ըսաւ, որ արուեստագէտը իր գործերով դուրս կու գայ դէպի համաշխարհայինը եւ համամարդկայինը` հաղորդակից  դարձնելով տարբեր քաղաքակրթութիւններու եւ մշակոյթներու:

Նոյն առիթով խօսք առաւ Լիբանանի մէջ Իտալիոյ դեսպան Մասսիմօ Մարոթթի: Ան  գոհունակութիւն եւ ուրախութիւն յայտնեց ցուցահանդէսի բացման առիթով, ապա իր խօսքին մէջ ըսաւ, որ Գօգօ Կարապետի գործերը արտացոլումն են տարբեր մշակոյթներու, որոնք հարստութիւն եւ արժէք կը հաղորդեն արուեստին: Դեսպանը յայտնեց նաեւ, որ արուեստներու երկիր Իտալիոյ մէջ մասնագիտացած ու Իտալիոյ մշակոյթով հաղորդուած արուեստագէտը կամուրջ կը հանդիսանայ երեք տարբեր ժողովուրդներու եւ մշակոյթներու միջեւ:

Սրտի խօսքով հանդէս եկաւ արուեստագէտ Գօգօ Կարապետ: Ան նշեց, որ ցուցահանդէսը կը միտի մէկտեղել հայ, լիբանանեան ու իտալական ինքնութիւնները եւ երեք երկիրներու մշակոյթները : Գ. Կարապետ ըսաւ, որ երեք տարբեր մշակոյթներու միացումը կը զօրացնէ, առաւել արժէքներով եւ գեղեկցութեամբ կը հարստացնէ անոնցմէ իւրաքանչիւրը: Մշակոյթներու միութիւնը մարդկային մտքի ձեռքբերման ամէնէն գեղեցիկ երեւոյթն է: Ան յայտնեց նաեւ, որ ուր ալ գտնուած է աշխարհի տարածքին, լիբանանեան ինքնութիւնը  հպարտութեամբ զարդարած է իր կեանքը: Իր խօսքի աւարտին  ան շնորհակալութիւն յայտնեց  Հայաստանի եւ Իտալիոյ դեսպանատուներուն ցուցահանդէսին հովանաւորութեան համար:

Ցուցահանդէսին ներկայացուած էին Գօգօ Կարապետի 37 գործերը իրենց գոյներու եւ խորքային իւրայատկութեամբ: Իւրաքանչիւր պատկեր իւրայատուկ  խորհրդաւորութիւն մը կը ներշնչէր դիտողին:

Նշենք, որ ցուցահանդէսը բաց պիտի ըլլայ Ուրբաթ, 5 Մայիսին, եւ Շաբաթ, 6 Մայիսին առաւօտեան ժամը 10:00-էն մինչեւ երեկոյեան ժամը 4:00:

Երաժշտական Համերգ` Հայոց Ցեղասպանութեան 102-Ամեակին Առիթով

Հայոց Ցեղասպանութեան 102-ամեակին առիթով երէկ` 4 Մայիս 2017-ին, երեկոյեան ժամը 8:00-ին, Քասլիքի Ս. Հոգի համալսարանի երաժշտութեան բաժանմունքին նախաձեռնութեամբ տեղի ունեցաւ երաժշտական տպաւորիչ համերգ: Այս մասին կը հաղորդէ «Ազդակ»-ը։

Յովհաննէս Քարախանեան ջութակի, Պեթի Սալխանեան-Քուրթեան դաշնակի, Հրաչ Իսահակեան սրինգի եւ Նայիրի Ղազարեան թաւջութակի վրայ մեկնաբանեցին Ալեքսանտր Յարութիւնեանի եւ Արամ Խաչատուրեանի ստեղծագործութիւններէն:

Չորս երաժիշտները մեծ վարպետութեամբ եւ տպաւորիչ կերպով հայկական շունչով լեցուցին սրահը` երաժշտասէրներուն պարգեւելով բարձրորակ երաժշտութիւն ըմբոշխնելու իւրայատուկ առիթ: Տարբեր առիթներով ներկաները բուռն ծափողջոյններով արտայայտեցին իրենց գնահատանքն ու գոհունակութիւնը: