Սիտնիի մէջ Արդարութեան Տողանցք 23 Ապրիլին

Հովնաւորութեամբ Ցեղասպանութեան 102րդ ամեակի ոգեկոչման կեդրոնական յանձնախումբին եւ կազմակերպութեամբ ՀՅԴ Աւստրալիոյ Կեդրոնական Կոմիտէի եւ անոր ուղեկից միութիւններուն՝ ՀՄԸՄ, Համազգային, ՀՕՄ, Աւստրալիոյ Հայ Դատի յանձնախումբի, ՀՅԴ Աւստրալիոյ Երիտասարդական Միութեան եւ Արմենիա Մետիա մամլոյ եւ տեղեկատուական ընկերակցութեան Կիրակի 23 Ապրիլ 2016ին տեղը պիտի ունենայ Արդարութեան Տողանցքը որ սկիզբ պիտի առնէ Սիտնիի նշանաւոր Hyde Park հանրային պարտէզէն եւ պիտի ուղղուի Botanical Grdens անցնելով Նիու Սաութ Ուէլզ նահանգի խորհրդարանին առջեւէն:

Botanical Gardensի մէջ տեղի պիտի ունենայ պատշաճ գեղարուեստական յայտագիր մը:

<<Արդարութեան տողանցքը, Հայոց Ցեղասպանութեան ուրացումը դատապարտող պայքարին շարունակման արտայայտութիւն պիտի ըլլայ,>> յայտարարած է ՀՅԴ Աւստրալիոյ Երիտասարդական Միութեան Կեդրոնական Վարչութեան ատենապետ ընկեր Արամ Թիւֆէնքճեան:

<<Լիայոյս ենք որ այս տարի եւս Աւստրալահայ գաղութը խուռներամ բազմութեամբ իր մասնակցութիւնը բերէ արդարութեան տողանցքին որուն մասին աւելի մանրամասնութիւններ շուտով պիտի փոխնցենք,>>  աւելցուց Թիւֆէնքճեան:

Յիշենք որ Ցեղասպանութեան 102րդ ամեակի ոգեկոչման Աւստրալիոյ կեդրոնական յանձնախումբին մէջ իրենց մասնակցութիւնը կը բերէն քաղաքական երեք կուսակցութիւնները՝ ՍԴՀԿ, ՌԱԿ եւ ՀՅԴ անոնց ուղեկից միութիւններով:

Սոնա Ֆունտուքեան Ընտրուած Է Մոնթեպելլոյի «Տարուան Կին»ը

ԱՍպարէզ-Քալիֆորնիոյ նահանգային խորհրդարանի անդամ Քրիսթինա Կարիսայի կողմէ, Սոնա Ֆունտուքեանը ընտրուած է Մոնթեպելլոյի «Տարուան Կին»ը։ Ան մէկն էր 58րդ ընտրատարածքը ներկայացնող Կարսիայի կազմակերպած եւ Մարտ 24ին կայացած «Տարուան Կիներ»ը ձեռնարկին ընթացքին մեծարուած 9 կիներէն, որոնք կու գային նոյնքան քաղաքներէ։

Սոնա Ֆունտուքեան ներկայիս ատենապետն է ՀՕՄի «Նայիրի» մասնաճիւղին, որուն հիմնադրութենէն ի վեր (1968), ան 10 առիթներով ստանձնած է այդ պաշտօնը։ Ան մեծապէս նպաստած է մասնաճիւղի Շաբաթօրեայ վարժարանին, կրթանպաստներու հիմնադրամին եւ մանկամսուրի ծրագիրին հաստատման ջանքերուն։ Ֆունտուքեան նաեւ 33 տարի ֆրանսերէն դասաւանդած է երկրորդական վարժարաններու մէջ։

Համազգայինի Միջդպրոցական Արուեստի Մրցոյթը Յաջողութեամբ Պսակուեցաւ

Համազգայինի Հովիտի «Պարոյր Սեւակ» մասնաճիւղը վերջերս կազմակերպած էր միջդպրոցական մրցոյթ մը՝ արուեստի բոլոր բնագաւառներուն մէջ, միջնակարգի 5րդ, 6րդ եւ 7րդ դասարաններու աշակերտութեան համար:

Համազգայինի առաքելութիւնն է քաջալերել հայ մշակոյթի բոլոր մարզերը, ինչպէս՝ շարադրութիւն (իբրեւ գրական արուեստ), գծագրութիւն, պար, երգ, նուագ եւ ասմունք (մենախօսութիւն կամ պատմասացութիւն), առիթ ընծայելով մեր նոր սերունդի թաքուն տաղանդները ի յայտ բերելու:

Մրցոյթը տեղի ունեցաւ Շաբաթ, Ապրիլ 1ին, առաւօտեան ժամը 9էն մինչեւ կ.ե. ժամը 1, Մոնթրոզի Հայ Քոյրերու վարժարանէն ներս: Հանդիսավար Մարալ Վարժապետեան իր բացման խօսքին մէջ շեշտեց հայ արուեստին կարեւորութիւնը, ապա գնահատեց աշակերտներուն հետաքրքրութիւնն ու սէրը՝ հանդէպ հայ արուեստին ու մշակոյթին։

Մրցոյթը սկսաւ ասմունքի բաժինով: Աշակերտները սքանչելի կերպով ներկայացուցին Հայաստանին, Ղարաբաղին եւ Սփիւռքին նուիրուած նոր գրուած կտորներ:

Դատական կազմի անդամ Կարօ Գամարեան, ոգեւորուած ասմունքողներու կատարումներով՝ սրտի խօսք արտայայտեց եւ շնորհակալութիւն յայտնեց մասնակիցներու ծնողներուն, որոնք ի գին մեծ զոհողութիւններու իրենց զաւակները հայկական դպրոց կ՛ուղարկեն, որպէսզի անոնք սորվին մեր ոսկեղնիկ լեզուն, ծանօթանան հայ բանաստեղծին ու կարենան իրենց յատուկ մեկնաբանութեամբ արտայայտել գրողի ապրումներն ու զգացումները։

Ասմունքին յաջորդեցին երգն ու նուագը: Այնքա՜ն հաճելի էր մատղաշ պատանի-պարմանուհիներուն բերնով լսել հայ երգը: Սրահին մթնոլորտը լեցուն էր հայկական մեղեդիներու թրթռացումներով, որոնք կը յուզէին բոլոր ներկաները։

Վերջապէս, պարի մասնակիցները բեմ հանդիսացան՝ զարդարելով բեմը իրենց նայիրեան հեզաճկուն շարժումներով ու հայկական գեղեցիկ տարազներով:

Մրցակիցները իրենց կատարումներով փաստեցին, որ Սփիւռքի մէջ տակաւին կան ու պիտի ըլլան հայ դպրոցներ, որոնք մեր մշակոյթն ու արուեստը կը ջամբեն հայ աշակերտին ու կը պատրաստեն վաղուան խոստմնալից մտաւորականը, ղեկավարն ու արուեստագէտը։

«Նոր Սերունդ» մրցոյթի յանձնախումբը, շնորհակալութիւն յայտնելէ ետք Հայ Քոյրերու վարժարանի տնօրէնութեան, անոր տրամադրած հիւրասիրութեան համար, հրաժեշտի խօսքով փակեց սոյն ձեռնարկը: Ներկաները, ըմբոշխնելէ ետք ներկայացումները՝ բարձր տրամադրութեամբ մեկնեցան սրահէն:

(Թղթակցութիւնը՝ Համազգայինի «Պարոյր Սեւակ» Մասնաճիւղէն)

0415hamazkayin1

Մոնթեպելլոյի Յուշարձանին Շուրջ Հայոց Ցեղասպանութեան Համագաղութային Ոգեկոչում՝ Ապրիլ 23ին

Նախապէս յայտնած էինք, որ այս տարի, Մոնթեպելլոյի Հայոց Ցեղասպանութեան յուշարձանին շուրջ ծրագրուած համագաղութային ոգեկոչումը տեղի պիտի ունենայ Կիրակի, 23 Ապրիլ 2017ին, կէսօրէն ետք ժամը 3էն սկսեալ: Այսու, կոչ կ՛ընենք շրջանի բոլոր հայորդիներուն, որ խուռներամ ներկայ գտնուին Հայոց Ցեղասպանութեան ոգեկոչման սոյն միջոցառման, յարգելու համար յիշատակը մեր 1.5 միլիոն անմեղ նահատակներուն:

Համագաղութային ոգեկոչման բացումէն ետք տեղի պիտի ունենայ կրօնական արարողութիւն, ապա զօրակցական ելոյթներ պիտի ներկայացուին քաղաքական դէմքերու կողմէ, ինչպէս՝ Քոնկրեսի անդամներ Լինտա Սանչեզ եւ Էտ Ռոյս, Քալիֆորնիոյ նահանգի պետական քարտուղար Ալեքս Փըտիէա, նահանգի ելեւմուտքի ընդհանուր վերահսկիչ Ճան Շիէնկ, Լոս Անճելըսի քաղաքապետական խորհուրդի անդամ Փօլ Գրիգորեան, Քալիֆորնիոյ նահանգային Ծերակոյտի նորընտիր անդամ Էնթընի Փորթանթինօ, Քալիֆորնիոյ նահանգային խորհրդարանի անդամ Ատրին Նազարեան, Հրանդ Տինքի փաստաբանուհի Ֆեթհիյէ Չեթին եւ ասորիներու ցեղասպանութեան մասնագէտ Սապրի Աթման:

Միջոցառման իր մասնակցութիւնը պիտի բերէ նաեւ Քալիֆորնիահայ երիտասարդաց միութեան երգչախումբը: Վերջաւորութեան, ծաղկեպսակներ պիտի զետեղուին Միացեալ մարմինի անդամ կազմակերպութիւններու եւ միութիւններու ներկայացուցիչներուն կողմէ:

Ոգեկոչման մասնակցելու համար, Լոս Անճելըսի Միացեալ մարմինը տրամադրած է հանրակառքեր, որոնք պիտի մեկնին Կլենտէյլի Ս. Աստուածածին եկեղեցւոյ շրջափակէն, Կիրակի օր, կ.ե. ժամը 2ին:

Հայոց Ցեղասպանութեան 102րդ տարին ոգեկոչելու նպատակով, Միացեալ մարմինս կը քաջալերէ իւրաքանչիւր հայորդի իր մասնակցութիւնը բերելու Ցեղասպանութեան նուիրուած բոլոր միջոցառումներուն:

ՀԱՅՈՑ ՑԵՂԱՍՊԱՆՈԻԹԵԱՆ ՈԳԵԿՈՉՄԱՆ ՄԻԱՑԵԱԼ ՄԱՐՄԻՆ

Լիբանանի ՄԷջ ՀՀ Դեսպանը, Դեսպանութեան Անձնակազմը Մասնակցեցան Սուրբ Յարութեան Տօնին Առիթով Մատուցուած Սուրբ Պատարագին

Ապրիլ 17-ին Լիբանանի մէջ ՀՀ դեսպան Սամուէլ Մկրտչեան, ՀՀ դեսպանութեան անձնակազմը մասնակցեցան Սուրբ Յարութեան տօնին առիթով Մեծի Տանն Կիլիկիոյ Կաթողիկոսութեան մայրավանքին մէջ Ն.Ս.Օ.Տ.Տ Արամ Ա Կաթողիկոսի ձեռամբ մատուցուած Սուրբ Պատարագին:

Ինչպէս կը տեղեկանեն դեսպանութեան ֆէյսպուքեան էջէն, այնուհետեւ դեսպան Մկրտչեան եւ դեսպանութեան անձնակազմը այցելեցին Լիբանանի Հայոց թեմի առաջնորդարան, Տանն Կիլիկիոյ Հայ Կաթողիկէ եկեղեցւոյ պատրիարքարան եւ Հայ Աւետարանական եկեղեցի` շնորհաւորելու հոգեւոր առաջնորդներն ու հաւատացեալ հայ համայնքը Սուրբ Զատiկի օրուան առիթով:

%d5%ac%d5%ab%d5%a2%d5%a1%d5%b6%d5%a1%d5%b61%d5%ac%d5%ab%d5%a2%d5%a1%d5%b6%d5%a1%d5%b62%d5%ac%d5%ab%d5%a2%d5%a1%d5%b6%d5%a1%d5%b63

Սահակ-Մեսրոպ Երգչախումբը Իր 40-Ամեայ Յոբելեանը Նշած Է Ծաղկազարդին

9 Ապրիլ 2017-ին՝ Ծաղկազարդի Կիրակին, Մարսէյի Մայր Եկեղեցւոյ Սահակ-Մեսրոպ երգչախումբը տօնակատարեց իր 40-րդ տարեդարձը։ Իր հիմնադիր տնօրէն Պրն. Խաչիկ Եըլմազեանի ղեկավարութեամբ երգչախումբը մասնակցեցաւ Ծաղկազարդի պատարագին, զոր մատուցեց Թեմակալ Առաջնորդ Գերշ. Տ. Վահան Եպս. Յովհաննէսեան, այս մասին Հայերն այսօր-ին կը տեղեկացնեն Ֆրանսայի Հայաստանեայց Առաքելական Եկեղեցւոյ առաջնորդարանէն:

Պատարագի աւարտին կատարուեցաւ յատուկ օրհնութիւն երգչախումբի անդամներուն եւ հոգեհանգիստ՝ մահացած անդամներու հոգիներուն համար։ Տ. Արամ Քհնյ. Ղազարեան կարդաց երգչախումբի նախագահներու, նուիրատուներու եւ օժանդակողներու անունները։ Պատարագէն ետք յատուկ ընդունելութիւն մը կազմակերպուած էր եկեղեցւոյ սրահին մէջ, ուր ներկայ էին Կ. Պոլսոյ Պատրիարքութեան Ընտրեալ Տեղապահ Գերշ. Տ. Գարեգին Արք. Պէքճեան, Ծխական Խորհուրդի նախագահ եւ Թեմական Խորհուրդի փոխ նախագահ Տօքթ. Ռոպէր Ազիլազեան եւ շուրջ հարիւր հաւատացեալներ ու երգչախումբի համակիրներ։ Երգչախումբի ղեկավար Խ. Եըլմազեան շնորհակալութեան եւ երախտագիտութեան խօսք ուղղեց անդամներուն եւ ներկաներուն, ապա Գարեգին Արք. Պէքճեան կարճ պատմականը ըրաւ երգչախումբին։ Ձեռնարկը վերջ գտաւ Առաջնորդ Սրբազան Հօր փակման խօսքով եւ օրհնութեամբ։

«Հայաստանը Իմ Ամբողջ Աշխարհս Է». Պարոյր Աղպաշեան

 Հայոց պատմութեան, գրականութեան, առհասարակ` մշակոյթի ու արուեստի իւրաքանչիւր ճիւղի մասին հրատարկուող գիրքերը մեր հարստութիւնն են` այն ակունքները, որոնք գալիք սերունդներուն ի պահ կու տան անանց արժէքներ: Այդօրինակ արժէքաւոր գիրքերէն մէկուն` «Երեւանի պետական համալսարան (95- ամեակ. երախտաւոր դասախօսներ (դիմաքանդակային հպումներ)» հեղինակին` Երեւանի պետական համալսարանի հայ բանասիրութեան մասնաճիւղի շրջանաւարտ, Պէյրութի մէջ լոյս տեսնող շարք մը թերթերու երկարամեայ աշխատող, խմբագիր, հրապարակախօս, գրականագէտ, Միջազգային լրագրողներու միութեան, Հայաստանի լրագրողներու միութեան անդամ, ազգային-հասարակական գործիչ, Լիբանանի մամլոյ սենտիքայի, Արաբ ընկերակցութեան, «Կարպիս Լ.Նազարեան» հրատարակչականի, Հայաստանի հայերէնի եզրաբանութեան խորհուրդի անդամ, Հայկազեան համալսարանի դասախօս Պարոյր Աղպաշեանի հետ «Հայերն այսօր»-ի համար ունեցած իմ զրոյցս աւելի շատ ծաւալեցաւ համալսարանական տարիներէն ունեցած յիշողութիւններուն ու տպաւորութիւններուն շուրջ, որ սիրով կը ներկայացնենք մեր ընթերցողներուն ուշադրութեան:

-Պարո՛ն Աղպաշեան, վերջերս Երեւանի պետական համալսարանին մէջ տեղի ունեցաւ Ձեր գիրքի շնորհանդէսը, որ, կարծեմ, 2016-ին  հրատարակուած է. ինչպէ՞ս ծնաւ գաղափարը:

-Այս գիրքի հրատարակութիւնը երկար տարիներու փափաքս  եղած է: Պատճառը՞… շատ յստակ է. Երեւանի պետական համալսարանի բանասիրական մասնաճիւղի հայոց լեզուի ու գրականութեան բաժինը կեանքիս անկիւնադարձային ամրակուռ հանգրուանը  դարձած է, եւ այդ ամէնը իմաստաւորող, կենսաւորող ու դրսեւորող ընտրահոյլը եղան իմ դասախօսներս` ամենահեղինակաւորէն մինչեւ համեստագոյնը, բազմավաստակէն` վաստակաւորը. անոնք իմ մէջ արմատաւորեցին ու զարգացուցին բանասիրութեան աշխարհի անսպառ աւանդութիւններն ու հարստութիւնները: Դիմաքանդակային փունջ եղած է ` դիտուած ու գնահատուած իմ տեսակէտովս, դիտարկումով ու դատումովս: Ի նկատի ունենալով, որ կը լրանար նաեւ Պետական համալսարանի 95-ամեակը, նաեւ` հայոց լեզուի ու գրականութեան բաժանմունքի, ամփոփ ակնարկով ներկայացուցած եմ անոնց անցած ուղին`  շարք մը վաւերագրական յիշեցումներով, ինչպէս նաեւ` սփիւռքահայ ուսանողներու Հայաստանի մէջ ուսանելու հնարաւորութեամբ:

-Պարո՛ն Աղպաշեան, Դուք, փաստօրէն, համալսարանական  եղած էք, ուսանած էք համալսարանին մէջ, որ այն ժամանակ միակն էր. եկաք Պէյրութէն, կրթութիւն ստացաք, յետո՞յ…

-Ուսումս աւարտելէ ետք վերադարձած եմ Պէյրութ, աշխատանք չկար, որովհետեւ վաստակաւորները դեռեւս ասպարէզի վրայ էին: Պէյրութ վերադառնալէ  քանի մը ամիս  ետք աշխատանքի անցայ ՀԲԸՄ-ի կեդրոնական գրասենեակին մէջ` որպէս սովորական քարտուղար, յետոյ դարձայ դիւանապետ, այնուհետեւ` կրթական յանձնախումբի վարիչ-քարտուղար: Ակամայէն շեղուեցայ բանասիրութենէն, սակայն Հայկական բարեգործականը ունէր «Երուանդ Հիւսիսեան» հայագիտական հիմնարկ, որուն տնօրէնը նշանաւոր բանաստեղծ, մանկավարժ, գրականագէտ Վահէ Վահեանն էր. ես ալ այնտեղ սկսայ մասանկիօրէն դասաւանդել գրաբար, մանկավարժութեան պատմութիւն, այսինքն` մօտեցայ իմ մասնագիտութեանս, յետոյ առիթ եղաւ, որ Հայկազեան համալսարանին մէջ ալ այս նիւթերը դասաւանդեմ: 1990-ին, երբ նախանշաններ կային, որ Հայաստան դէպի անկախութիւն կ’երթայ, Խորհրդային Միութիւնը կը փլուզուի, Ռամկավար ազատական կուսակցութեան պաշտօնական «Զարթօնք» օրաթերթը կը գործէր, որուն աշխատանքները կը կազմակերպէր Յակոբ Աւետիքեանը. ան ստիպուած եղաւ ժամանակաւորապէս այստեղ գալ, Լիբանանի մէջ պատերազմ էր, Աւետիքեանի հետ պայմնաւորուեցանք, որ ես կը փոխարինեմ զինք: Պատահեցաւ այնպէս, որ ինք այստեղ մնաց, ես ալ «Զարթօնք»-ի մէջ մնացի եւ մինչեւ 2007 պատասխանատու խմբագիրն էի, իսկ մինչ այդ, 17 տարի շարունակ, «Խօսնակ» ամսաթերթի խմբագիրը եղած եմ, «Շիրակ» գրական ամսագիրի խմբագրական անդամ…շատ թերթերու մէջ  աշխատած եմ: 2007-ին սահմանափակեցի աշխատանքներս եւ սկսայ ՀԲԸՄ-ի «Դարուհի Հովակիմեան» վարժարանին մէջ հայոց լեզու, հայ գրականութիւն եւ հայոց պատմութիւն դասաւանդել: Չհասցուցի ատենախօսութիւն պաշտպանել, որովհետեւ լրագրութիւնը, օրաթերթը կը կլանէ ամբողջ ժամանակս:

-Խօսինք Ձեր հրատարակած գիրքերուն եւ ատոնց մէջ ներկայացուած թեմաներուն մասին:

-2007-էն մինչ այժմ տարբեր թեմաներով 12 գիրք  հրատարակած եմ`«Ներխուժած Լիբանանի աննկուն կամքը», «Արեւմտահայ գրողներու լեզուամտածողութիւնն ու բառապաշարային շերտաւորումները», «Ապրուած հրապարակագրութիւն` յետադարձ հայեացքով» (3 հատորով), «Պատառիկներ` մեծերէն», «Մամլոյ ընտրանի գրութիւններ», «Հրապարակախօսական- բանախօսական-գրախօսական ընտրանի էջեր», «Հրապարակագրական բերքահաւաք», «Ռամկավար ազատական կուսակցութեան ազգային գաղափարաբանական հաւատամքը», «Յակոբ Պարոնեանի լեզուաբառապաշարային առանձնայատկութիւնները» եւ այս վերջին գիրքս…

– Պարո՛ն Աղպաշեան, համոզուած եմ, որ Դուք դեռ գիրքեր ունիք գրելու, հրատարակելու. ըսէք, խնդրեմ, ի՞նչ պիտի ըլլայ Ձեր յաջորդ գիրքը:

-Այո՛, պէտք է շարունակեմ. ընելիքներ դեռ շատ կան, ասոնցմէ բացի` հրապարակախօսական նիւթերու  գիրք մըն ալ հրատարակած եմ, այժմ կը հաւաքեմ հօրս` խմբագիր, գրող Յովհաննէս Աղպաշեանի բոլոր նիւթերը` զետեղելու մէկ գիրքի մէջ: Հայրս հայրենասէր մարդ էր, նաեւ լաւ արաբագէտ էր, այդ լեզուն սորված էր բանտին մէջ եղած ժամանակ: Հայրս երգիծական շնորհ ալ ունէր եւ իր նիւթերուն տակ կը ստորագրէր` «Խիկար»: 1970-ին Օտեանի «Ընկեր Փանջունի»-ն տպագրեց արաբերէնով. արաբ ընթերցողները զարմացած էին, չէին գիտեր, որ այդպիսի քաղաքական երգիծաբան ունինք: Յաջորդ գիրքս ՀԲԸՄ-ի նախագահ Պերճ Սեդրակեանի հօրեղբօր ` Հրաչեայ Սեդրակեանի մասին է, որ ազգային մեծ գործիչ է. անոր արխիւը ժողվեցի` ելոյթները, նամակները, գրուածքները, բանախօսութիւնները: Ան եղած է նաեւ Ներգաղթի կոմիտէի պատասխանատու, Լիբանանի երեսփոխանական թեկնածու:

Հայ գրողներէն` արեւելահայ, արեւմտահայ, ո՞վ  ամէնէն շատ հարստացուցած է Ձեր ներաշխարհը:

-Եղիշէ Չարենցը, Վահան Տէրեանը, Պարոյր Սեւակը, Յովհաննէս Շիրազը, արեւմտահայ գրողներէն` Դուրեանը, Դանիէլ Վարուժանը, Մեծարենցը, Սիամանթոն, օտարագիր գրողներէն շատ տպաւորուած եմ Ուիլեամ Սարոյեանի գործերով, յատկապէս` «Իմ սիրտս լեռներուն մէջ է» ստեղծագործութեամբ, որուն բեմադրութեան մէջ հրաշալի դերակատարում ունէր անուանի դերասանուհի Վարդուհի Վարդերեսեանը:

-Սփիւռքի նախարարութեան բարեկամն էք, անշու՛շտ, ուստի կը խնդրեմ Ձեր տեսանկիւնէն բնութագրէք նախարարութեան ծրագիրները, աշխատանքները:

-Առաջ, երբ կու գայի Հայաստան, կ’այցելէի Սփիւռքահայութեան հետ մշակութային կապի կոմիտէ, որ Խորհրդային շրջանին մեծ դեր կը կատարէր, այն կարծես կամուրջ էր Հայաստանի եւ Սփիւռքի միջեւ, այսօր այդ դերը կը կատարէ Սփիւռքի նախարարութիւնը. մեծ ներուժ ունի տիկին Յակոբեանը, դիտողութիւնները կ’ընդունի բարեկամաբար, լայնախոհ մտածելակերպ ունի:

-Ին՞չ է Ձեզի համար Հայաստանը, Հայրենիքը:

-Շատ յաճախ կ’ըսեն ինծի` գնայ Հայաստա՛ն ապրիր, որ այդքան հայրենասէր ես, իսկ ես կը պատասխանեմ` Հայաստանը իմ մէջս է: Հայ մարդը, ուր ալ ապրի, փոքրիկ Հայաստան մը կը ստեղծէ: Լիբանանի մէջ հայերը շատ շատոնց հաստատուած են, հոգեւոր մեծ արժէքներ ստեղծած, լիբանանահայ գաղութը այդ տեսանկիւնէն հարուստ է: Հայաստանը իմ ամբողջ աշխարհս է:

-Շնորհակալութիւ՛ն, հայրենակից, բարի՛ երկունք Ձեր յաջորդ բոլոր ձեռնարկումներուն:

Հարցազրոյցը` Կարինէ Աւագեանի

 

Մոսկուաբնակ Գործարարը Տաւուշի ՄԷջ 1500 Աշխատատեղ կը Հիմնէ

«Տաւուշ տեքստիլ» ընկերութիւնը շուտով շահագործման կը յանձնէ Բերդի գործարանը: Քառորդ դար անց սահմանամերձ քաղաքին մէջ կը լսուի գործարանային աղմուկը: Ձեռնոցներու արտադրութիւնը կը նախատեսուի սկսիլ մայիսի սկիզբը: Բերդի նախկին գործարանին մէջ այժմ հիմնանորոգման աշախատանքներ կ’իրականացուին: Ձեռնարկութիւնը պիտի արտադրէ բանուորական ձեռնոցներ: Ծնունդով արծուաբերդցի մոսկուաբնակ գործարար Սուրէն Երիցեան սահմանամերձ մարզին մէջ ներդրումներ  կ’իրականացնէ արդէն երկուքուկէս տարի: Նախ հիմնած է Չորաթանի, ապա Արծուաբերդի ձեռնոցի գործարանները:

Անոր ներդրումներուն շնորհիւ աշխատանքի խնդիր լուծած է մօտ հազար տաւուշցիի, նոր գործարանը գործարկելու արդիւնքով աշխատատեղերու թիւը պիտի հասնի հազար հինգ հարիւրի: Ընկերութեան տնօրէն Միքայէլ Եզեկեանի խօսքով, ապրիլի վերջը պիտի տեղադրուին հաստոցներու առաջին խմբաքանակները, եւս կը սկսին աշխատակիցներու արտադրական գործընթացքի ուսուցման աշխատանքները:

Արտադրանքի իննսուն տոկոսէն աւելին կ’արտահանուի Ռուսաստանի դաշնութիւն: Ըստ տնօրէնին, իրացման խնդիր չունին: Գործարարը ներդրումային ծրագիրները հասցուցած է սահման, առաջնագիծին` Մովսէս գիւղին մէջ եւս, մինչեւ յիսուն աշխատատեղով եզրակարող գործարան պիտի բացուի, Արծուաբերդի մէջ ալ պիտի ընդլայնուի արտադրութիւնը:

Նշենք, որ Բերդի գործարանի նորոգման աշխատանքներուն ներգրաւուած է նաեւ զինծառայող Նուէր Բաբայեանը, որ մեծ դեր ունեցած է նախորդ տարուան դեկտեմբերին Չինարի սահմանին ատրպէյճանական նախայարձակման խումբին պատժիչ հարուած հասցնելուն: Սահմանը պահող Նուէրը կը նշէ, որ այդպիսով, իր պարտքը կը համարէ նաեւ ամրացնել հիւսիսարեւելեան դարպասի թիկունքը: Սպիտակ եւ նարնջագոյն ձեռնոցներու Բերդի արտադրութիւնը ամբողջ ծաւալով կ’իրականացուի մինչեւ տարուան վերջը, կը գրէ Ankakh.com-ը:

 

Հայոց Ցեղասպանութեան 102-րդ Տարելիցին Ընդառաջ Բողոքի Ցոյց Հաագայի ՄԷջ. ուղիղ

Այս պահուն Հաագայի Het Plein հրապարակին վրայ` Հոլանտայի խորհրդարանին մօտ, մեկնարկած է Համագործակցող հոլանտահայ կազմակերպութիւններու Հայոց ցեղասպանութեան 102-րդ տարելիցին առիթով կազմակերպուած ձեռնարկներու առաջինը: «Նիտերլանտական օրագիրի» ֆէյսպուքեան էջին փոխանցմամբ` բողոքի հանրահաւաք-ցոյցին նախատեսուած է նաեւ Նիտերլանտներու  քանի մը պատգամաւորներու ելոյթները:

Քիչ առաջ Համագործակցող հոլանտահայ կազմակերպութիւններու պատուիրակութեան անդամներէն  քանի մը հոգի մտան խորհրդարանի շէնք’ փոխանցելու պահանջագիր, ուր յորդոր կ’ըլլայ յստակ կիրառել խորհրդարանին կողմէ Ցեղասպանութեան վերաբերող դրոյթները: Այնուհետեւ անոնք կրկին միացան Հաագայի Het Plein հրապարակին վրայ կազմակերպուած բողոքի ցոյցին:

 

 

The Washington Post-ի Անդրադարձը Ցեղասպանութեան Մասին Պատմող «Խոստումը» Ֆիլմին

The Washington Post  ամերիկեան պարբերականը եւս մէկ անդրադարձած  է Հայոց ցեղասպանութեան մասին պատմող «Խոստումը» ֆիլմին` նշելով, որ «առաջին համաշխարհայինի տարիներուն հայերու զանգուածային ջարդերու մասին պատմող առաջին խոշոր հոլիվուտեան ֆիլմը` «Խոստումը», կինոֆիլմերու համացանցային կեդրոնին մէջ (IMDb) գնահատած է 111,300 մարդ, սակայն ֆիլմը ցուցադրուած է ընդամէնը քանի մը անգամ»:

Պարբերականը կը նշէ` նման բուռն արձագանգի պատճառն այն է, որ ֆիլմը բարկացուցած է մարդոց, որոնք կը հերքեն, որ 1915-1923 թուականներու ընթացքին 1 միլլիոն հայեր սպաննուած են Օսմանեան կայսրութեան կողմէ կամ, որ սպանութիւնները կատարուած են ցեղասպան քաղաքականութեան հետեւանքով:

Աղբիւրը կը նշէ, որ հազարաւոր մարդիկ, մեծամասամբ Թուրքիոյ բնակիչներ, IMDb-ի մէջ ամենացած վարկանիշը տուած են ֆիլմին. Հակառակ ատոր, որ շատ երկիրներ եւ պատմաբաններ հայերու զանգուածային կոտորածները կը կոչեն ցեղասպանութիւն, Թուրքիան բուռն կերպով կը մերժէ այդ եզրոյթը:

Նաեւ կը նշուի, որ Մարտ ամսուն «Խոստումը» ֆիլմի ցուցադրութենէն մէկ շաբաթ առաջ, նմանատիպ մէկ այլ ֆիլմ յայտնուած է «Օսմանեան հարիւրապետ» անուամբ: Ֆիլմը, որ նկարահանուած է թուրք բեմադրիչի մը կողմէ, կրկին կը ներկայացնէ սիրային պատմութիւն  մը՝ նոյն ժամանակաշրջանին մէջ, միայն ժխտելով ցեղասպանութիւնը:

Համերգ Հայոց Ցեղասպանութեան Տարելիցին Առիթով

Ն.Ս.Օ.Տ.Տ. Գարեգին Բ Ծայրագոյն Պատրիարք եւ Ամենայն Հայոց Կաթողիկոսի օրհնութեամբ ապրիլ 21-ին` ժամը 18:00-ին, Երեւանի Ս. Գրիգոր Լուսաւորիչ մայր եկեղեցւոյ մէջ տեղի պիտի ունենայ Հայոց ցեղասպանութեան տարելիցին նուիրուած համերգ:

Հայաստանի պետական ակադեմական երգչախումբի (խմբավար` Յովհաննէս Չէքիջեան) կատարմամբ պիտի հնչէ Վոլֆկանկ Մոցարտի «Ռեքուիէմ»-ը, ինչպէս նաեւ հայ հոգեւոր երգեր:

Պատերազմէն Վեց Տարի Անց Հալէպի Ազգային Գերեզմանատան Մէջ Մեռելոցի Առիթով Պատարագ Մատուցուած է

Ապրիլ 17ին առաւօտուն, ի յիշատակ մեռելոցի, Հալէպի Ազգային գերեզմանատան մէջ, 6 տարուան ընդմիջումէն ետք, Բերիոյ Հայոց Թեմի Առաջնորդ Տէր Շահան Սրբ. Արք. Սարգիսեան Սուրբ եւ Անմահ պատարագ մատուցեց՝ հոծ բազմութեան եւ հիւրերու ներկայութեան, կը հաղորդէ “Գանձասար”-ը:

Ապա սրբազան հայրը ներկայացուց օրուան պատգամը, որմէ ետք հանդիսաւոր թափօրը շրջագայեցաւ մատրան շրջափակին մէջ ու խաչաձեւ ուղղութեամբ հոգեհանգստեան արարողութիւն տեղի ունեցաւ՝ հալէպահայ ննջեցեալներու հոգիներուն խաղաղութեան համար:

Image may contain: 8 people, people standing and outdoor

Image may contain: 6 people, people standing

Image may contain: 12 people, people standing, wedding and outdoor

Image may contain: 9 people, people standing, suit and wedding

Image may contain: 8 people, people standing

Image may contain: 18 people, people standing, wedding and outdoor

Ապրիլ 20-ին Երեւանի Մէջ Տեղի Պիտի Ունենայ «Ազգ-բանակ» Համաժողովը

ՀՀ պաշտպանութեան նախարարութիւնը` կրթութեան եւ գիտութեան նախարարութեան հետ համատեղ, կը կազմակերպէ «Ազգ-բանակ-2017» համաժողովը` նուիրուած ռազմակրթական ոլորտի հիմնախնդիրներուն:

Համաժողովը տեղի պիտի ունենայ Ապրիլ 20-ին Երեւանի Կ. Դէմիրճեանի անուան մարզահամերգային համալիրին մէջ:

Համաժողովի ծիրէն ներս Մարզահամերգային համալիրի տարածքին Ապրիլ 21-23-ը պիտի գործէ ցուցահանդէս, ուր կրթական ոլորտի առաջատար հաստատութիւնները պիտի ծանօթացնեն իրենց ուսումնական պայմանները, արձանագրած յաջողութիւններն ու կրթական ծրագիրները:

Առանձին հարթակներու եւ տաղաւարներու մէջ պիտի ներկայացուին սպառազինութեան եւ ռազմական սարքերու նմուշներ, ՀՀ ռազմարդիւնաբերական համալիրի արտադրատեսակներ:

Նախատեսուած է մրցութային ծրագիր, սահմանուած են յատուկ մրցանակներ յաղթողներուն համար: Պիտի կազմակերպուին նաեւ հանդիպումներ Արցախեան ազատամարտի վետերաններու ու ապրիլեան մարտական գործողութիւններու մասնակիցներուն հետ:

Համաժողովը պիտի մեկնարկէ Ապրիլ 20-ին` ժամը 10:00-ին:

Ցուցահանդէսը պիտի գործէ Ապրիլ 21-ին եւ 22-ին` ժամը 11:00-էն 18:00, եւ Ապրիլ 23-ին` ժամը 10:00-էն 15:00:

ՀՀ Սփիւռքի Նախարարութեան ՄԷջ Իրականացուեցաւ Խորհրդակցութիւն

Ապրիլ 18-ին ՀՀ սփիւռքի նախարարութեան մէջ նախարար Հրանոյշ Յակոբեանի ղեկավարութեամբ տեղի ունեցաւ խորհրդակցութիւն:

Կառուցուածքային ստորաբաժանումներու ղեկավարները ներկայացուցին անցած շաբթուան կատարուած աշխատանքները եւ իրականցուած ձեռնարկները, նշեցին յառաջիկայ ընելիքները, հանդէս եկան նոր առաջարկներով:

Նախարարը կարեւոր համարեց յառաջիկայ` յիշողութեան եւ ոգեկոչման շաբթուան ծիրէն ներս  նախատեսուած ձեռնարկներուն ժամանակին, ճշգրիտ կատարումը:

Տրուեցան յանձնարարականներ, նշանակուեցան պատասխանատուներն ու համակարգողները:

18-04