Սփիւռքի Նախարարութեան ՄԷջ Մեծարեցին Սփիւռքահայ Արուեստագէտները

Ապրիլ 13-ին ՀՀ սփիւռքի նախարար Հրանոյշ Յակոբեան ընդունեց ֆրանսաբնակ երաժիշտ-երգահան, դերասանուհի Ժաննա Բլբուլեանը, պերճիգաբնակ երգչուհի Նարա Նոյեանը, գրող հրապարակախօս Լեւոն Բլբուլեանը:

ՀՀ սփիւռքի նախարարն արժեւորեց սփիւռքահայ արուեստագէտներու մեծ ներդումը Սփիւռքի մէջ հայ մշակոյթի պահպանման, տարածման, ինչպէս նաեւ ստեղծագործական գործունէութեամբ Հայաստան-Սփիւռք գործակցութեան զարգացման աջակցելու գործին մէջ:

Հայաստան-Սփիւռք գործակցութեան զարգացման տարբեր բնագաւառներու մէջ կատարած աշխատանքի, համազգային խնդիրներու լուծման արդիւնաւէտ մասնակցութիւն ունենալու համար` նախարարը Ժաննա Բլբուլեանին պարգեւատրեց ՀՀ սփիւռքի նախարարութեան «Երախտագիտութեան» մետալով:

Սփիւռքի մէջ հայկական արուեստը տարածելու, ստեղծագործական եւ կատարողական բարձր վարպետութեան, ինչպէս նաեւ Հայաստան-Սփիւռք գործակցութեան զարգացման գործին մէջ զգալի ներդրում ունենալու համար նախարար Հրանոյշ Յակոբեան Նարա Նոյեանին պարգեւատրեց ՀՀ սփիւռքի նախարարութեան «Կոմիտաս» մետալով:

Հիւրերը շնորհակալութիւն յայտնեցին ջերմ խօսքերու ու գնահատանքի համար, նշեցին, որ պարգեւները պարտաւորեցնող են ու ոգեւորող:

img_2046img_2077

 

 

«Դիտէք Այս Ֆիլմը Իւ Իմացէք Հայ Ժողովուրդի Պատմութիւնը». Քիմ Քարդաշեան` «Խոստում» Ֆիլմին մասին

Հոլիուտեան աստղերու շարքին միացած է Քիմ Քարտաշեան, որ Twitter-ի իր էջին վրայ գրառում մը ըրած է Հայոց ցեղասպանութեան մասին «Խոստում» ֆիլմին վերաբերեալ:

«Ես այնքան կը հպարտանամ «Խոստում» ֆիլմով:  Կը խնդրեմ, դիտէք զայն եւ տեղեկացէք, վերջապէս, հայ ժողովուրդի պատմութեան»,-armradio.am-ի փոխանցմամբ` գրած է Քիմ իր  պլոկին վրայ:

#KeepThePromise հեշթեկն այս օրերուն կը գերիշխէ ընկերային ցանցերուն մէջ: Հայոց Ցեղասպանութեան մասին` «Խոստում» ֆիլմի համաշխարհային առաջին ցուցադրութենէն առաջ շարք մը աստղեր իրենց աջակցութիւնը  յայտնած են ատոր հանրայնացման:

 

 

Շամլեան Ազգ. Վարժարանի Աշակերտները Վերանորոգեցին Ապրիլեան Պահանջատիրական Ուխտը

Ասպարէզ-Ցեղասպանութեան 102ամեակին առիթով, Ազգային Վահան եւ Անոյշ Շամլեան վարժարանի աշակերտները Երեքշաբթի, Ապրիլ 4ի առաւօտուն, խումբ-խումբ Ազգային առաջնորդարան այցելեցին եւ Ցեղասպանութեան զոհ գացած մեր սուրբ նահատակներու յուշակոթողին առջեւ վերանորոգեցին իրենց պահանջատիրական ուխտը:

Վարժարանի տնօրէնութիւնը Երեքշաբթին յատկացուցած էր Ցեղասպանութեան յիշատակման: Առաւօտուն, բոլոր աշակերտները Ս. հաղորդութիւն ստացան, վարժարանի շրջափակը կատարեցին ծառատունկ եւ ծաղիկներու մատուցում, ապա, խումբերու բաժնուած՝ քալելով հասան առաջնորդարան: Անոնց կ՛ընկերանային վարժարանի տնօրէնուհի դոկտ. Թալին Քարկոտորեանը, փոխտնօրէնուհի Ռիթա Գաբրիէլեանը, նաեւ դաստիարակներ ու ծնողներ: Աշակերտ ու դաստիարակ զգեստաւորուած էին Ցեղասպանութեան 102ամեակին առիթով Արդարութեան քայլարշաւի խորհրդապատկերը կրող շապիկներով:

Առաջնորդ Մուշեղ արք. Մարտիրոսեան, կողքին ունենալով Թորգոմ Ծ. վրդ. Տօնոյեանը, Վաչէ վրդ. Պալըքճեանը, Վազգէն Ա. քհնյ. Աթմաճեանն ու Կոմիտաս Ա. քհնյ. Թորոսեանը, աշակերտները դիմաւորեց Նահատակաց յուշակոթողին առջեւ, լսեց անոնց խոստումը եւ իր պատգամը ուղղեց անոնց:

Առաջին խումբին մաս կը կազմէին վարժարանի 6էն 8րդ դասարաններու աշակերտները, որոնց հետեւեցան 3-5րդ կարգերու խումբը, վերջապէս հասան նաեւ դեռատի մանուկները՝ առաջին եւ երկրորդ կարգի աշակերտները: Բոլորն ալ ծաղիկներ դրին յուշակոթողին առջեւ, ապա ներկայ եղան Ս. նահատակաց բարեխօսութեան աղօթքի արարողութեան:

Վարժարանի հայկական ակումբի ներկայացուցիչները երեք խումբերուն անունով խօսքեր արտասանեցին, նշեցին, որ Ապրիլը մեր նահատակները յիշելու ամիս է եւ հաւաստեցին, թէ իրնեք պահանջատէր կը մնան մեր Դատին ու իրաւունքներուն, եւ մեր պայքարին մասնակից պիտի մնան, մինչեւ որ այսօրուան Թուրքիան ընդունի իր նախորդներուն յանցանքը եւ արդար հատուցում կատարէ հայութեան:

Առաջին խումբի աշակերտները կատարեցին խմբային արտասանութիւն մը: Խօսք առաւ առաջնորդարանի անձնակազմի անդամներէն Քրիստափոր սրկ. Միքայէլեան, որ հակիրճ կերպով խօսեցաւ Ցեղասպանութեան 50ամեակին արձանագրուած պատմական իրադարձութեանց մասին, որոնց խորհրդանիշները՝ Պիքֆէյայի ու Ծիծեռնակաբերդի յուշարձաններու մանրակերտները, տեղ գտած են յուշակոթողին վրայ: Ան անդրադարձաւ նաեւ Ցեղասպանութեան 100ամեակի հանգրուանին, որ նոր թափ եւ տարողութիւն տուած է մեր պահանջատիրութեան, եւ ընդգծեց, որ պահանջատիրութիւնը աշակերտին համար կ՛ըլլայ նաեւ հայոց լեզուի, հայոց պատմութեան ու մշակոյթի տիրութեամբ:

Ինչպէս առաջին խումբին, նոյնպէս եւ յաջորդող երկու խումբերուն իր պատգամը ուղղեց առաջնորդ սրբազանը: Ան դետել տուաւ, որ Ազգ. առաջնորդարանի այս յուշակոթողը յուշարար մըն է մեր պահանջատիրութեան, ինչպէս նաեւ՝ զոհաբերութեան մեր 1.5 միլիոն նահատակներուն, որոնք 100ամեակին առիթով սրբադասուեցան: Ան յիշեցուց, որ թուրքը աւելի քան 100 տարի առաջ փորձեց բնաջնջել մեզ, սակայն հայ ժողովուրդը վերապրեցաւ, եւ աշակերտները ապրող վկայութի՛ւնն են թուրքի ձախողութեան ու կը մարմնաւորեն հայութեան պահանջատիրութիւնը։

«Այսօր ունինք անկախ Հայաստան, սակայն գիտենք, որ մեր նահատակները մեզի կտակ թողած են ամբողջակա՛ն Հայաստանը, եւ մենք պայքարը պիտի շարունակենք՝ մինչեւ տիրանանք մեր բոլոր հողերուն ու իրաւունքներուն», ըսաւ առաջնորդը եւ գոհութիւն տուաւ Աստուծոյ, որ յարութիւն պարգեւած է մեր ժողովուրդին, եւ որ հայը, իր բոլոր սերունդներով, այսօր արթուն պահակն ու պահանջատէրն է իր իրաւունքներուն: Ան օրհնեց աշակերտները, դաստիարակներն ու ծնողները, որոնք միասնաբար հայկականութեամբ կը տոգորեն նորահաս սերունդները:

Հայր Թորգոմ երգեց 100ամեակին առիթով Ս. նահատակաց նուիրուած շարականը, իսկ հոգեւոր հայրերը միասնաբար կատարեցին բարեխօսութեան աղօթքի արարողութիւնը. ուխտի պահերը վերջ գտան «Պահպանի»չով ու «Հայր Մեր»ի հաւաքական երգեցողութեամբ:

Ակներեւ էր, որ աշակերտները, առանց տարիքի խտրութեան, կ՛ապրէին օրուան խորհուրդի ազդեցութիւնը. անոնք լրջութեամբ կը հետեւէին պատգամներուն ու արարողութեանց՝ մէկդի ձգած մանկական չարաճճիութիւնները…

Գարեգին Բ Կաթողիկոս Անդրադարձած է Եռակողմ Հանդիպման Եւ Շուշիի Մզկիթի Մասին Փաշազատէի Յայտարարութիւններուն

Գարեգին Բ․Ամենայն Հայոց Կաթողիկոսը պատասխանած «Արմենփրես»-ի հարցերուն` անդրադառնալով Կովկասի մահմետականներու վարչութեան նախագահ, Շէյխ ուլ իսլամ Ալլահշուքիւր Փաշազատէի` Ապրիլ 12-ի այն յայտարարութեան, ըստ որուն` կը ծրագրուի եռակողմ հանդիպում:

Կը ներկայացնենք հարցազրոյցը ամբողջութեամբ:

-Վեհափառ Տէր, Կովկասի մահմետականներու վարչութեան նախագահ, Շէյխ ուլ իսլամ Ալլահշուքիւր Փաշազատէն երէկ յայտնած է հնարաւոր հերթական եռակողմ հանդիպման մասին, այդ տեղեկատուութիւնը որքանո՞վ կը համապատասխանէ իրականութեան:

– Գիտէք, որ ղարաբաղեան հակամարտութեան սկզբնաւորման առաջին օրուընէ Մեր երջանկայիշատակ նախորդները, ապա եւ մենք, միջնորդութեամբ Մոսկուայի եւ Համայն Ռուսիոյ պատրիարքներու, պարբերաբար հանդիպումներ ունեցած ենք Ատրպէյճանի հոգեւոր առաջնորդ Ալլահշուքիւր Փաշազատէի հետ` համատեղ ջանքերով նպաստելու հակամարտութեան խաղաղ կարգաւորման: Մեր գահակալութեան շրջանին տեղի ունեցած են այդպիսի հինգ հանդիպումներ:

Ներկայիս, միջնորդութեամբ Կիրիլ Պատրիարքին, այո՛, կը ծրագրուի նման եռակողմ հանդիպում: Հանդիպման ժամկէտները դեռ յստակ չեն. հանդիպման թուականի եւ օրակարգի ձեւաւորման ուղղութեամբ կողմերուն միջեւ աշխատանքներ կը տարուին:

– Ձերդ Սրբութիւն, Ալլահշուքիւր Փաշազատէն նաեւ անդրադարձած է հայկական կողմի ջանքերով Շուշիի մզկիթի վերականգնման իրողութեան, նշած է, որ հայերը ատիկա կ՛ընեն սադրիչ նպատակներով: Ընդվզելով հայերու այս քայլին դէմ` շէյխ ուլ իսլամը տեղեկացուցած է, որ հարցը պիտի բարձրացնէ Մոսկուայի մէջ ԱՊՀ երկիրներու Միջկրօնական խորհուրդի նիստին: Հայ եկեղեցին ինչպէ՞ս կը վերաբերի այս մօտեցումին:

-Անշուշտ, Ալլահշուքիւր Փաշազադէն ազատ է բարձրացնելու որեւէ խնդիր, ինչ որ եւ յաճախ կ՛ընէ` տուրք տալով նաեւ ատրպէյճանական քարոզչամեքենայի պահանջներուն:

Պատմական փաստ է, որ, ի տարբերութիւն ատրպէյճանական կողմին, որ կ՛ոչնչացնէ հայկական հետք պարունակող երեւէ յուշարձան եւ սրբավայր, ինչպիս ճակատագիր ունեցան օրինակ` հայոց հաւատքի վկայ Ջուղայի հազարաւոր խաչքարերը, Պաքուի հայկական եկեղեցին` գրապահոցի վերածման, Նախիջեւանի մեր վանքերու եւ եկեղեցիներու աւերումը, Արցախի իշխանութիւնները կը պահպանեն ու կը վերականգնեն Արցախի հողին վրայ գտնուող իրենց պատմական ժառանգութիւնը, նաեւ այլ կրօններու պատկանող սրբավայրեր եւ յուշարձաններ:

Շուշիի մզկիթի վերականգնման վերաբերեալ գոհունակութիւն արտայայտելու փոխարէն Ատրպէյճանի հոգեւոր առաջնորդին կողմէ դրսեւորուած ընդվզումը եւ ատոր հիմնաւորումը մեզի համար անընկալելի է: Արդար եւ ազնիւ պիտի ըլլար զայն արտայայտել սեփական երկրի տարածքին գտնուող հայկական սրբավայրերու եւ յուշարձաններու նկատմամբ գործուող բարբարոսութիւններու առնչութեամբ:

Իրանի Դեսպանը Կանչած Են Ատրպէյճանի ԱԳՆ` Շուշիի Մզկիթին Պատճառով

Ատրպէյճանի մէջ Իրանի դեսպանը կանչուած է ԱԳՆ` Շուշիի մէջ իրանական պատմա-մշակութային յուշարձանի` «Վերին մզկիթի» շրջանին մէջ հնագիտական պեղումներուն իրանցի հնագէտներու խումբի մը մասնակցութեան առնչութեամբ:

Ատրպէյճանական ԱԳՆ ներկայացուցիչ Հիքմեթ Կաճիեւի խօսքերով` «Մզկիթի վերականգնման քօղի ներքոյ հայկական կողմը կը փորձէ ոչնչացնել ատոր ատրպէյճանական ծագման մասին վկայող բոլոր տարրերը»,  կը փոխանցէArmedia-ն:

Շուշիի մզկիթը մշտապէս բաց  եղած է պատմաբաններու, հնագէտներու եւ այլ մասնագէտներու համար: Իսկ մզկիթի իրանական մշակութային կոթող ըլլալուն հարցով կրնան  կասկածիլ միայն ատրպէյճանցի մասնագէտները, սակայն ատիկա Ատրպէյճանի եւ Իրանի պարզաբանելու թեման է…

Նշենք, որ Շուշիի մէջ գտնուող իրանական «Վերին մզկիթ» յուշարձանի տարածքին մէջ մարտ 21-էն կ’իրականացուին հնագիտական պեղումներ:

 

 

Արցախի ՄԷջ Աճեցուած Հաճարը Կ’արտահանուի Եւրոպա. «Արգրէյն» Ընկերութեան Հիմնադիր

Արցախի մէջ աճեցուած հաճարը կ’արտահանենք Իտալիա, Հոլանտա, Իսրայէլ, Ռուսաստան. վերջերս նաեւ ԱՄՆ-ի եւ Զուիցերիոյ մէջ կը հետաքրքրուին այդ մշակաբոյսով:

Այս մասին «Արցախփրէս»-ի թղթակիցին հետ զրոյցին ըսած  է Արցախէն հաճարի արտահանմամբ զբաղուող «Արգրէյն» ընկերութեան հիմնադիր Յարութիւն Մնացականեան:

«Արցախի մէջ սկսած ենք աշխատիլ 2013 թուականէն: Հումքի վերամշակումը կը կատարենք Հայաստանի մէջ եւ կ’արտահանենք նշուած երկիրներ, մասնաւորապէս Եւրոպա: Այն բարձր որակ ունի, որուն պարունակութեան մէջ չկան վնասակար նիւթեր: Հաճարէն ստացած օրկանական ալիւրէն պատրաստուած հացը օժտուած է մարմնին անհրաժեշտ բնական վիթամիններով: Յառաջիկային որոշած ենք այդպիսի հաց արտադրել նաեւ Արցախի մէջ»,- նշած է ընկերութեան հիմնադիրը:

Խօսելով Արցախի մէջ իրականացուելիք յառաջիկայ ծրագիրներուն մասին` Հ. Մնացականեան ըսած է, որ կը պատրաստուի Արցախի մէջ արտադրուող կտաւատի հումքի համար ձէթի արտադրամաս հիմնել:

«Այս տարի կը նախատեսեմ բանալ կտաւատի ձէթի արտադրամաս, ուր պիտի մշակենք Արցախ արտադրուող կտաւատի հումքը: Ոչ աւանդական բուսատեսակներէն քինուան, չիան եւ ֆիզիալիսը Եւրոպայի մէջ մեծ արժէք ունին. ցանկութիւն ունինք այս երեք մշակաբոյսերը եւս Արցախի մէջ աճեցնենք: Այդ մշակաբոյսերը կ’օգտագործուին հիւթերու, աղցաններու արտադրութեան մէջ»,- մանրամասնութեամբ պատմած  է Հ. Մնացականեան:

 

Բակօ Սահակեան Այցելած է Մատաղիս Գիւղ

Արցախի Հանրապետութեան նախագահ Բակօ Սահակեան Ապրիլ 13-ին այցելած է Մարտակերտի շրջանի Մատաղիս գիւղ եւ մասնակցած այնտեղ շաբաթօրեակի ծիրէն ներս կազմակերպուած ծառատունկին:

Արցախի նախագահի մամուլի գրասենեակէն կը յայտնեն, որ երկրի ղեկավարը հանդիպած է նաեւ տեղի բնակիչներու հետ եւ քննարկել համայնքի առջեւ ծառացած խնդիրները:

Նախագահ Սահակեան յանձնարարականներ տուած է շահագրգիռ մարմիններու ղեկավարներուն` քննարկուած հարցերու պատշաճ լուծման ուղղութեամբ:

ՀՄԸՄ-ի Գամիշլիի Մասնաճիւղը Յիշատակեց Սկաուտին Օրը

Կազմակերպութեամբ ՀՄԸՄ-ի Գամիշլիի Մասնաճիւղի Սկաուտ Խորհուրդին, Կիրակի, 2 Ապրիլ 2017-ի երեկոյեան ժամը 5:30-ին Գամիշլիի Կիւլպէնկեան սրահէն ներս տեղի ունեցաւ Սկաուտի Օրուան տօնակատարութիւն, ներկայութեամբ եւ բարձր հովանաւորութեամբ Բերիոյ Հայոց Թեմի Առաջնորդ Գերշ. Տ. Շահան Սրբ. Արք. Սարգիսեանի, կը հաղորդէ “Գանձասար”-ը:

Հանդիսութեան ներկայ գտնուեցան Տ. Պսակ Քհնյ. Պէրպէրեան, Սուրիոյ խորհրդարանի երեսփոխան եւ Ազգ. երեսփոխանական ժռղովի անդամ Ժիրայր Րէիսեան, ՀՄԸՄ-ի Սուրիոյ Շրջ. Վարչութեան անդամ Զաւէն Գասպարեան, պատկան մարմնի եւ ազգային մարմիններու եւ միութիւններու ներկայացուցիչներ, սկաուտներու ծնողներ եւ հոծ բազմութիւն:

ՀՄԸՄ-ի փողերախումբը ազգայնաշունչ երգեր նուագելով ողջունեց սրբազան հայրը եւ անոր ընկերակցող հիւրերը, որմէ ետք սրահին մէջ տողանցեց Սուրիոյ, Հայաստանի եւ ՀՄԸՄ-ի դրօշները բարձրացուցած գայլ-արծուիկներուն հետ՝ սրահէն ներս մեծ խանդավառութիւն ստեղծելով:

Հանդիսավարներ՝ Անդրանիկ Պոզոյեան եւ Ռիթա Կարապետեան ներկաները հրաւիրեցին մէկ վայրկեան յոտնկայս յարգելու մեզմէ առ յաւէտ բաժնուած ՀՄԸՄ-ականներուն յիշատակը, որուն յաջորդեց Սուրիոյ եւ Հայաստանի քայլերգներու երգեցողութիւնը՝ սկաուտական երգչախումբին կատարողութեամբ:

Հանդիսութեան բացման խօսքը արտասանեց սկաուտ խորհուրդի ատենադպրուհի Մարալ Սարգիսեան-Գասապեան, որ անդրադառնալով ՀՄԸՄ-ի առաքելութեան ըսաւ. «Մենք ՀՄԸՄ-ի մէջ տեսանք մեր ժողովուրդի գերագոյն ձգտումները։ ՀՄԸՄ-ը Սփիւռքի մէջ եղաւ այն կազմակերպութիւնը, որ տէր կանգնեցաւ եռագոյնին ու այսօր ան կը ծածանի Հայաստան աշխարհի երկնակամարին վրայ: ՀՄԸՄ-ը եւ սկաուտութիւնը միաձուլուած, տասնամեակներ շարունակ դաստիարակեցին, ոգեւորեցին եւ հայ ժողովուրդին նուիրեցին բազմահազար ՀՄԸՄ-ականներ, որոնք ազգին եւ հայրենիքին ծառայութիւնը սկաուտական իրենց երդումին արքասիքը համարեցին»:

Հանդիսութեան գեղարուեստական յայտագիրը ընդգրկեց չափական պար, հայկական պար, մեներգ, բուրգի կազմութիւն եւ թատերական ներկայացում՝ «Բարեկենդան» խորագրով։ Սկաուտները միջազգային եւ ազգային դէմքեր ներկայացնելէ ետք, լուսարձակի տակ առին Արցախի ազատագրական պայքարը հերոսութեամբ պսակող հայ զինուորին կերպարը։

Աստիճանաւորական կազմէն Մեղեդի Պալեան սկաուտին խօսքը արտասանեց: Ան շեշտեց, որ սկաուտութիւնը ՀՄԸՄ-ի շարժիչ ուժն է, ապա աւելցուց.  «ՀՄԸՄ-ը յաջողած է սկաուտական իր շարքերուն մէջ ամրապնդել երկաթեայ կամքի, կարգապահութեան եւ անձնազոհութեան առաքինութիւնները։ Այդ շարքերէն անցած ՀՄԸՄ-ականները գործուն ներկայութիւն դարձած են հայ կեանքի զանազան մարզերուն մէջ»:

Այնուհետեւ սկաուտական երգչախումբը եզրափակեց գեղարուեստական յայտագիրը փունջ մը ազգային երգերով՝ արժանանալով ներկաներու ծափողջոյններուն:

Յայտագիրի աւարտին բեմ հրաւիրուեցան սրբազան հայրը, Ժիրայր Րէիսեանը, քահանայ հայրը, եղբ. Զաւէն Գասպարեանը, օրուան կնքահայր եղբ. Միհրան Տիգրանը եւ մասնաճիւղի վարչութեան ատենապետը: Մասնաճիւղի խմբապետուհի քոյր Եւա Մանուկեան-Սելիմեան սկաուտական փողկապով պատուեց բեմ բարձրացող հրաւիրեալները:

Այնուհետեւ տեղի ունեցաւ երդման արարողութիւն-վայականաց բաշխում եւ աստիճանատուչութիւն:
Հուսկ սրբազան հայրը իր հայրական խօսքին մէջ նախ շնորհաւորեց սկաուտները եւ իրենց ծնողները՝ վկայականներուն առիթով, նշելով որ այս ձեռնարկը պիտի դառնայ նորանոր յաջողութիւններու խթան. ապա գնահատեց ՀՄԸՄ-ի Գամիշլիի Մասնաճիւղի Վարչութիւնն ու Սկաուտ Խորհուրդի կազմակերպած այս հանդիսութիւնը, ինչպէս նաեւ սկաուտներու կարգապահութիւնը եւ տպաւորիչ ելոյթը: Ան հաստատեց, որ ՀՄԸՄ-ը կը շարունակէ իր յաջող երթը այս դժուար պայմաններուն մէջ՝ հիմնուելով իր խորիմաստ «Բարձրացիր-բարձրացուր» նշանաբանին վրայ:
Հանդիսութեան փակումը կատարուեցաւ «Յառաջ Նահատակ» քայլերգով եւ սրբազան հօր «Պահպանիչ»ով:

Սուրբ Զատիկի, Սուրիահայերու Ու Գտնուած Հայրենիքի Մասին. Պատմութիւններ Ցուցահանդէս-Տօնավաճառի Տաղաւարներէն

«Սուրիահայ մշակոյթի շունչը Երեւանի մէջ» արդէն աւանդական դարձած բարեգործական ցուցահանդէս-տօնավաճառն այս անգամ նուիրուած էր Սուրբ Յարութեան տօնին:  Երեւանի մէջ բնակող շուրջ 50 սուրիահայեր այսօր այցելուներուն ներկայացուցին ձեռագործ աշխատանքներ, արծաթեայ իրեր, քաղցրաւենիք, արեւելեան ուտեստներ ու համեմունքներ:

Հալէպի մէջ ուսուցչուհի աշխատած Անի Շամլեան Panorama.am-ի հետ զրոյցին պատմեց, որ արդէն  չորս ու կէս տարի է Հայաստանի մէջ կ’ապրի:

«15 օրով  հայրենիք այցելած էի, բայց որ Հալէպի վիճակը վատացաւ, ստիպուած եղանք մնալ այստեղ ու գործ սկսիլ: Սկսայ թխուածքներ, քաղցրաւենիք պատրաստել: Դասընթացներու մասնակցեցայ, նոր գիտելիքներ ստացայ ու մինչեւ հիմա այս գործով կը զբաղիմ: Ցուցահանդէս-վաճառնքերէն իմ մասիս գիտեն արդէն ու յաճախ ինծի պատուէրներ կու տան»,-ըսաւ տիկին Շամլեան:

Ան նշեց, որ Հալէպի այն  դպրոցը, ուր ինք աշխատած է, հիմա կանոնաւոր կերպով կը գործէ, սակայն տունը, ուր բնակած է` շատ վատ վիճակի մէջ է:

«Ինչպէս կ’ըսեն` սկսանք այստեղ եոլա երթալ, ու վերադառնալ չենք ցանկար»,-աւելցուց հալէպահայ ուսուցչուհին:

Ցուցահանդէսին հանդիպեցանք նաեւ հալէպահայ ամուսիններ Ռաֆֆի եւ Եոլանտ Ռշտունիներուն,  որոնք ինչպէս արդէն մեր նախորդ հրապարակումներէն մէկուն մէջ տեղեկացուցած էինք,  կը զբաղին սուրիական անուշեղէնի, թխուածքներու փոքրիկ արտադրութեամբ:

Ռշտունիները իրենց տան մէջ կ’աշխատին, պատուէրներ կ’ընդունին ու ցուցահանդէս-վաճառքներու կը մասնակցին:

«Շուտով հինգ տարին կը լրանայ, որ Հայաստան եկած ենք: Կը փորձենք յարմարիլ, շուկային ծանօթանալ եւ ընդլայնել մեր գործը: Արդէն մեր հիմնական պատուիրատուներն ունինք: Մարդիկ կը սկսին ծանօթանալ ու համոզուիլ մեր արտադրանքի որակով»,- մեզի հետ զրոյցին ըսաւ Ռաֆֆի Ռշտունին:

Ձեռագործութեամբ զբաղուող Լենա Շամլեան պատմեց, որ հանգիստ կը զգայ  իր հայրենիքին մէջ եւ կը զբաղի իր սիրած գործով:

«Հալէպի մէջ ընտանեկան գործ ունէինք, հարսանեկան հագուստներու խանութ, որ հիմնուած էր 1985 թուականին, սակայն պատերազմի պատճառով այն 2012 թուականի յուլիս 23-էն փակ է: Միշտ կը հարցնեն` մտադրութիւն ունիք վերառադնալու եւ ես կը պատասխանեմ` այո ունինք, ինչպէ՞ս կրնանք չունենալ: Տունս այնտեղ եղած է, բնական է, որ կ’ուզեմ երթալ  ու տեսնել, բայց ալ կը վերադառնամ Հայաստան, մենք սորվեցանք այստեղի կեանքին, աւելին, սիրեցինք այն, մեզի այստեղ պահող բան կայ արդէն»:

Մասնագիտութեամբ ճարտարապետ Վաչէ Անաջօղլեանն ալ 2012-ին ընտանիքով արձակուրդներուն Հայաստան եկած էր, սակայն մնաց այստեղ մինչ օրս:

«Պատերազմը սկսաւ ու մնացինք: Որոշ ժամանակ անց տեսանք, որ վերադառնալ չենք կրնար, որոշեցինք մնալ ու գործ սկսիլ: Ամբողջ ընտանքիով  այստեղ ենք, աղջիկս արդէն համալսարանի առաջին դասարան է,- պատմեց Panorama.am-ի զրուցակիցը:

Ան նշեց, որ Հալէպի մէջ մասնագիտութեամբ քիչ  աշխատած է, այնուհետեւ տպագրական գործով զբաղած, տպարան ունեցած է:

«Ամէնէն արագ ձեռնարկուող գործը Հայաստանի մէջ սնունդի ոլորտի հետ կապուած է:  Տեսանք, որ արեւելեան սնունդի նկատմամբ Հայաստանի մէջ հետաքրքրութիւնը մեծցած է, սկսանք պատրաստել տարբեր արեւելեան համեմունքներ, մածուկներ: Այժմ խանութ ունինք ու կը զբաղինք մեր գործով»,- նշեց Վաչէ Անաջօղլեան:

Ցուցահանդէս-տօնավաճառ այցելած էր նաեւ ՀՀ սփիւռքի նախարար Հրանոյշ Յակոբեան, որ լրագրողներուն հետ զրոյցին նշեց, որ Զատկուան տօնին առթիւ ցուցահանդէս-վաճառքէն ինք եւս գնումներ  կատարած է` իշլի քիւֆթա, հումուս եւ այլ ուտեսներ:

Նախարարն ըսաւ, որ առաջարկած է, որ շաբաթ օրն ալ մնան եւ 3 օր շարունակեն ցուցահանդէսը, սակայն մերժած են` ըսելով, որ իրենք եւս պէտք է երթան ու պատրաստուին տօնին. «Սուրբ  Զատիկը անոնք իւրայատուկ  կը նշեն, մենք դեռ շատ բան ունինք սորվելու այդ  առումով»:

Հրանոյշ Յակոբեանի խօսքով` սուրիահայերը մեր երկրին մէջ ունին հարկային ատօնութիւններ, իսկ եթէ ինչ-որ  տեղ մը անհատ ձեռներէց  ներկայացած են, ապա ինչպէս կարգն է հարկ կը վճարեն:

«Պէտք է գործել ՀՀ օրէնքների սահմաններում, սակայն հէնց այսօր կառավարութեան հերթական նիստում մենք էլի մաքսային, հարկային շատ արտօնութիւններ սահմանեցինք: Մեր տնտեսական զարգացման եւ ներդրումների նախարարը մի շարք ձեռնարկութիւնների, այդ թւում նաեւ սիրիհայերի դեղագործութեամբ զբաղուող ձեռնարկութեանը մաքսատուրքի ազատելու հնարաւորութիւն տուեց: Եթէ կայ բիզնես, որը զարգացման հեռանկարներ ունի, մեր պետութիւնը պատրսատ է առանձին քննարկելու եւ առանձին լուծուներ գտնելու տուեալ բիզնեսի համար», – ըսաւ նախարարը:

Ան շեշտեց, որ անցնող հինգ տարիներուն ընթացքին երկրի ղեկավարի, կառավարութեան  ջանքերն ուղղուած են սուրիահայհերու հասարակութեան մէջ ընդելուզման եւ այս ցուցահանդէսը եւս ատոր ապացոյցն է. «մենք փորձում ենք տնտեսական ինտէգրումն արագացնել եւ անել ծրագրեր, որոնք կարող են մեծ օգուտ բերել փոքր եւ միջին բիզնեսը զարգացնելուն: Չկայ մի ոլորտ, որտեղ սիրիահայերի համար դռներ չեն բացւում: Մեր հայրենակիցները հիմնականում որոշել են հաստատուել հայրենիքում, ոչ լքել: Ժամանակաւոր դժուարութիւնները լուծելի են քայլ առ քայլ, ժամանակ է պէտք, իսկ այդ ժամանակն աշխատում էի օգուտ, այլ ոչ ի վնաս իրենց»:

Միշտ Ուրախութեամբ Կը Հետեւինք «Արի Տուն» Ծրագիրի Ընթացքին. Սարգիս Պետոյեան

Ապրիլի 10-ին ՀՀ սփիւռքի նախարարութեան մէջ  տեղի ունեցած Սփիւռքի երիտասարդներու հայրենաճանաչութեան «Արի տուն»-2017թ. ծրագիրի բացման հանդիսաւոր արարողութեան ժամանակ բարերար Սարգիս Պետոյեան, որուն մեկենասութեամբ Ալֆորվիլ քաղաքի «Ս. Մեսրոպ-Արապեան», Փարիզի «Դպրոցասէր» եւ Մարսէլի «Համազգային» վարժարաններու աշակերտները Հայաստան եկած են, ելոյթին ընթացքին նշեց, որ արդէն 11 տարի է, երբ ան դեռ «Ս. Մեսրոպ-Արապեան» վարժարանի պատուոյ ատենապետն էր, կ’իրականացնեն այս ծրագիրը: Տարիներ յետոյ աշակերտներու ծնողները  խանդավառուած միացած են` գիտակցելով օտարութեան մէջ ապրող իրենց երեխաներուն` Հայաստան այցելելու կարեւորութիւնը:

«Այս տարիներուն ընթացքին մեր ցանկութիւնը եղած է, որ սփիւռքահայ երիտասարդները Հայաստան այցելելով` կապուին իրենց արմատներուն, մօտէն ծանօթանան հայկական աւանդոյթներուն եւ Հայրենիքը հոգիներուն մէջ ունենալով` Ֆրանսա վերադառնան: Միշտ ուրախութեամբ կը հետեւինք «Արի տան» ընթացքին եւ համոզուած ենք, որ ծրագիրին ծիրէն ներս «Եռաբլուր» զինուորական պանթէոն, Ծիծեռնակաբերդի յուշահամալիր, Մայր Աթոռ Սուրբ էջմիածին եւ միւս վայրերը այցելելով` ֆրանսաբնակ տղաները հայրենասիրութեամբ կը տոգորուին, քանի որ անոնք գուցէ ապագային Հայոց բանակի քաջարի զինուորները դառնան եւ պաշտպանեն մեր սահմաններու անառիկութիւնը»,- «Հայերն այսօր»-ի փոխանցմամբ`ըսած է Սարգիս Պետոյեան:

Այնուհետեւ բարերարը պատանիներուն ու աղջիկներուն յիշեցուցած է, որ 8-10 միլիոն հայերով` ուժեղ, համախմբուած ժողովուրդ են, եւ յորդորած  հպարտանալ այդ ժողովուրդի զաւակները ըլլալու համար:

Աւարտին Սարգիս Պետոյեան շնորհակալութիւն  յայտնած է ՀՀ սփիւռքի նախարար Հրանոյշ Յակոբեանին ջերմ ընդունելութեան եւ համագործակցութեան պատրաստակամութեան համար` վստահեցնելով, որ յետագային պիտի շարունակեն աշխուժօրէն մասնակցիլ «Արի տուն» ծրագիրին:

Գէորգ Չիչեան

 

 

 

Բացուեցաւ «Սուրիահայ Մշակոյթի Շունչը Երեւանի ՄԷջ» Խորագիրով Բարեգործական Ցուցահանդէս-Տօնավաճառը

Ապրիլ 13-ին  ՀՀ սփիւռքի նախարար Հրանոյշ Յակոբեան այցելեց Սուրբ Յարութեան տօնին առթիւ ՀՀ սփիւռքի նախարարութեան եւ «Սուրիահայերու հիմնախնդիրները համակարգող կեդրոն» հասարակական կազմակերպութեան նախաձեռնութեամբ «Երեւան Մոլ» առեւտրի եւ զուարճանքի համալիրին մէջ բացուած «Սուրիահայ մշակոյթի շունչը Երեւանի մէջ» աւանդական դարձած բարեգործական ցուցահանդէս-տօնավաճառ:

Ինչպէս կը հաղորդէ «Հայերն այսօր»-ը,, նախարարը շրջեցաւ տաղաւարներով, ծանօթացաւ սուրիահայերու աշխատանքներուն, բարձր գնահատեց անոնց սպասարկման մշակոյթն ու մատուցման ոճը եւ հիացմունք յայտնեց յատկապէս ձեռագործ աշխատանքներուն վերաբերեալ:

Այնուհետեւ Սփիւռքի նախարարը պատասխանեց լրագրողներու հարցերուն: Ան մասնաւորապէս նշեց. «Անցնող հինգ տարիների ընթացքում երկրի ղեկավարութեան, կառավարութեան ծրագրերը ուղղուած են նրան, որ սիրիահայերը հաստատուեն, մնան ու արարեն իրենց Հայրենիքում` Հայաստանում, ինտէգրուեն հասարակութեանը: Այս ցուցահանդէս-տօնավաճառները դրա ապացոյցն են եւ նպատաուղղուած են նաեւ սիրիահայերի ինտէգրմանը: Յիսունից աւելի անհատ ձեռներէցնէր կամ մանր բիզնեսի ներկայացուցիչներ  այս պահին իրենց  արտադրանքը ցուցադրում են, վաճառում, գտնում գործընկերներ, ընդլայնում  բիզնեսը: Մենք, համագործակցելով ՄԱԿ-ի հայաստանեան գրասենեակի, ՄԱԿ-ի արդիւնաբերական զարգացման կազմակերպութեան եւ Գերմանիայի միջազգային համագործակցութեան ընկերութեան հետ, փորձում ենք արագացնել սիրիահայերի տնտեսական ինտէգրումը: Իսկ ահա կրթական եւ սոցիալական հիմնխնդիրները ամբողջութեամբ լուծուած են: Չկայ մի ոլորտ, որտեղ սիրիահայերի համար դռները բաց չեն, եւ չեն գտնւում ուղիներ նրանց օգնելու համար»:

%d5%bd%d5%ab%d6%80%d5%ab%d5%a1%d5%b0%d5%a1%d5%b51 %d5%bd%d5%ab%d6%80%d5%ab%d5%a1%d5%b0%d5%a1%d5%b52 %d5%bd%d5%ab%d6%80%d5%ab%d5%a1%d5%b0%d5%a1%d5%b53

%d5%bd%d5%ab%d6%80%d5%ab%d5%a1%d5%b0%d5%a1%d5%b54 %d5%bd%d5%ab%d6%80%d5%ab%d5%a1%d5%b0%d5%a1%d5%b55

«Ես Այնքա՜ն Վստահ Եմ, Որ Հայաստան Անպայման Պիտի Ծաղկի». Պետրոս Կիւրունլեան

Աշխարհի հնագոյն քաղաքակրթութեան բնօրաններէն մէկուն մէջ` Էկէյեան, Հոնիական եւ Միջերկրական ծովերու ջուրերով ողողուած ափերուն մօտ գտնուող Յունաստանի մէջ, հայերը հաստատուած են դեռեւս 5 –է 6-րդ դարերուն, հիմնած են քաղաքներ ու եկեղեցիներ, դպրոցներ ու մշակութային օճախներ, պարբերականներ, գործարաններ, նշանաւոր ընկերութիւններ, բացած զանազան արտադրութիւններ: Մերօրեայ հայ արտադրողներէն այս օրերուն ՀՀ Սփիւռքի նախարարութեան մէջ Աթէնքէն հիւրընկալուած գործարար Պետրոս Կիւրունլեանի հետ «Հայերն այսօր»-ի խմբագրութեան մէջ  ունեցած զրոյցին ընթացքին, այս ալ` որերորդ անգամ, առիթ  կ’ունենամ հիանալու հայու` դարերու խորքէն եկող, աւելին` ի վերուստ տրուած անքննելի բացառիկ տաղանդով, աշխատասիրութեամբ, մտքի թռիչքներով:

-Բարո՛վ  եկած էք, պարո՛ն Կիւրունլեան. տեղեկացուած եմ, որ Դուք գործարար-արտադրող էք, ըսէք, խնդրեմ, ի՞նչ արտադրութեան մասին է խօսքը:

-Իմ նախնիներուս ձգած գործը կը շարունակեմ, այսինքն` մսամթերքի արտադրութիւն ունինք, երկու տղաներուս հետ կ’աշխատիմ: Այդ արտադրութիւնը հիմնադրուած է մեծհօրս կողմէ` դեռեւս 1922 թուականին: Արտադրութիւնը անուանած ենք հօրս անունով` «Միրան» :

-Ուրկէ՞ են Ձեր արմատները:

-Մօրս արմատները Ատանայէն են, հօրս արմատները` Կապադովկիայէն են, Կեսարիայէն, ծնողներս Յունաստան ծնած են, մենք` եւս: Յունաստանի մէջ հայերը միշտ մեծ թիւ  կազմած են եւ իրենց շնորհքով աչքի ինկած բոլոր ոլորտներուն մէջ:

 -Եր՞բ առաջին անգամ եկած էք Հայաստան եւ ի՞նչ փոփոխութիւններ կը տեսնէք հիմա:

-1992-93 թիւերուն եկած եմ Հայաստան, երբ ջուր, լոյս չկար: Հիմա հսկայական տարբերութիւն կը տեսնեմ, կարծես  այլ աշխարհի մը յայտնուած եմ: Երեւանը որեւէ բանով պակաս չէ շատ մեծ ու հռչակ ունեցող քաղաքներէ. Աթէնքէ՛ն ալ ,Լոնտոնէ՛ն ալ պակաս բան չունի, եւ ունի այնպիսի առաւելութիւններ, որ չունին այլ քաղաքներ` ապահովութիւն եւ մարդկային ջերմութիւն, հիւրասիրութիւն: Աշխարհով մէկ սփռուած եւ Հայաստան ապրող բոլոր հայերը պէտք է սիրեն ու աշխատին Հայրենիքին համար: Ես այնքա՜ն վստահ եմ, որ Հայաստան անպայման պիտի  ծաղկի:

-Պարո՛ն Կիւրունլեան, Ձեր արտադրանքը միայն հայկական աւանդական տեսականի՞ է` պասթուրմա, սուճուխ, քիւֆթա …

– Կ’արտադրենք եւ՛ հայկական աւանդական տեսականի, եւ՛ եւրոպական, եւ այդ ամէնը կ’առաքենք Յունաստանի տարածքին մէջ գործող մեր ընկերութեան պատկանող խանութներուն:

-Յունաստանէն դուրս առաքում չունի՞ք…

-Ունի՛նք. մեր արտադրանքը կ’ուղարկենք նաեւ Ֆրանսա, Շուէտ, Աւստրիա…

-Նպատակ ունի՞ք արդեօք Հայաստանի հետ եւս համագործակցելու:

-Կը մտածենք այդ ուղղութեամբ, սակայն կան փոքր-ինչ դժուարութիւններ, որոնք, կը կարենանք յաղթահարել: Արդէն կապերը կան:

-ՀՀ սփիւռքի նախարարութեան հետ վաղու՞ց  բարեկամացած էք:

-Նախարարին հետ շատոնց ծանօթացած եմ. առաջին անգամ Հայաստանի մէջ հանդիպած եմ, յետոյ` Աթէնքի: Ապրիլ 12-ին իմ այցելութիւնս նախարարութիւն համընկաւ նախարարի ծննդեան տօնին, եւ ես հաճելի առիթ մը ունեցայ շնորհաւորելու զինք` մաղթելով, որ միշտ հրաշալի նախաձեռնութիւններու հեղինակ ըլլայ եւ շարունակէ այդ կարեւոր աշխատանքը` ի շահ Հայրենիքին, Սփիւռքին:

-Պարո՛ն Կիւրունլեան, ՀՀ սփիւռքի նախարարութիւնը ամիսներ առաջ սկսած է «Դուն ի՞նչ կ’ընես Արցախի համար»  համահայկական շարժումը. լսա՞ծ էք այդ մասին, միացա՞ծ էք այդ շարժումին:

-Շատոնց եւ շատ անգամ  օժանդակած ենք Արցախին. մենք բժշկական զանազան սարքաւորումներ  նուիրած ենք Ստեփանակերտի հիւանդանոցին, յաճախ գացած եմ  Արցախ` սկսած արցախեան գոյամարտի առաջին պատերազմի տարիներէն: Շա՜տ կը սիրեմ այդ չքնաղ բնաշխարհը: Ըսեմ նաեւ, որ իմ ընտանիքս նուիրատուութիւն  ըրած է . արդէն 14 տարի է, որ Յունաստանի մէջ Հայաստանի Հանրապետութեան դեսպանատան անհատոյց տուած եմ իմ բնակարանս, որ ներկայիս ալ այնտեղ կը գործէ:

-Շնորհակալութիւ՛ն, յարգելի՛ հայրենակից. յուսանք, որ մսամթերքի Ձեր տոհմական արտադրանքը  մօտ ապագային  կը գրաւէ նաեւ հայաստանեան շուկան:

Հարցազրոյցը` Կարինէ Աւագեանի

 

ՀՀ սփիւռքի նախարար Հրանոյշ Յակոբեանի շնորհակալական նամակը Գրիգոր Պետրոս Ի Կաթողիկոսին

ԱՄԵՆԱՊԱՏԻՒ ԵՒ ԳԵՐԵՐՋԱՆԻԿ ՏԷՐ

ԳՐԻԳՈՐ ՊԵՏՐՈՍ Ի ԿԱԹՈՂԻԿՈՍ ՊԱՏՐԻԱՐՔ

ՏԱՆՆ ԿԻԼԻԿԻՈՅ ԿԱԹՈՂԻԿԷ ՀԱՅՈՑ    

Ամենապատի՛ւ եւ Գերերջանի՛կ  Տէր,

Մեր խորին շնորհակալութիւնը կը յայտնենք Ձեզի` ՀՀ սփիւռքի նախարարութեան ծրագրերուն ցուցաբերած մասնակցութեան եւ Հայրենիք–Սփիւռք կապերու խորացման գործին մէջ Հայ Կաթողիկէ Եկեղեցւոյ համագործակցութեան բարի աւանդոյթները շարունակելու պատրաստակամութեան համար:

Ամենապատի՛ւ Տէր, երախտիքի խօսքս կ’ուղղեմ Ձեզի` օրերս ՀՀ սփիւռքի նախարարութեան «Դուն ի՛նչ կ’ընես Արցախի համար» նախաձեռնութեան ծիրէն ներս Արցախի Մարտակերտի շրջանի Վարդան Մինասեանի անուան թիւ 2 հիմնական դպրոցի ուսուցիչները Պէյրութի Հայ Կաթողիկէ Սուրբ Խաչ-Հարպոյեան վարժարան հիւրընկալելու եւ ներառական կրթութեան մէկշաբաթեայ դասընթացին անոնց մասնակցութիւնը հովանաւորելու համար:

Յիրաւի, ՀՀ սփիւռքի նախարարութեան եւ Կաթողիկէ Եկեղեցւոյ  համագործակցութեամբ իրականացուած այս նախաձեռնութիւնը կարեւոր խթան է Սփիւռքի եւ Արցախի կրթական ոլորտի մշակներու կապերը խորացնելու, փոխադարձ ճանաչողութեան եւ վստահութեան ձեռքբերման համար:

Ոգեւորիչ եւ պատուաբեր է, որ Լիբանանում Հայ Կաթողիկէ համայնքի հովանիի ներքոյ գործող Սուրբ Խաչ-Հարպոյեան վարժարանը, ունի ուսումնական յատուկ դժուարութիւններ ունեցող աշակերտներու բաժին. կառոյց, որ մեծապէս կը նպաստէ ոչ միայն Լիբանանի համապատասխան աշակերտներու կրթական ունակութիւններու զարգացման, այլեւ առիթ կը ստեղծէ աջակցելու Արցախի ուսուցիչներուն, որպէսզի անոնք ձեռք բերեն նոր հմտութիւններ եւ հաղորդակից ըլլան իրարու փորձառութեան:

Վստահ եմ, որ այս համագործակցութիւնը արդիւնաշատ պտուղներ պիտի ունենայ: Ուսուցիչները, որոնք իրենց շնորհակալ եւ ազգանուէր գործունէութեամբ մատաղ սերունդները կը դաստիարակեն հայեցի ապրելու ոգիով, հնարաւորութիւն կ’ունենան Հայրենիքի եւ Սփիւռքի միջեւ կրթական կամուրջներ ստեղծելու։

Արդարեւ, միայն գովեստի ու մեծարանքի է արժանի այս քայլը, զոր Ձեր ցուցումով եւ մեր համատեղ հովանաւորութեամբ կատարեց Պէյրութի Հայ Կաթողիկէ Սուրբ Խաչ-Հարպոյեան վարժարանը։ Նախաձեռնութիւն, որ մէկ անգամ եւս կը վկայէ, որ Սփիւռքը միշտ աջակից է Արցախին:

Լիայոյս ենք, որ Սուրբ Խաչ-Հարպոյեան վարժարանի կատարած գործը ուսանելի քայլ մը կ’ըլլայ Սփիւռքի մեր միւս կրթօջախներու համար:

Ձեզի կը մաղթեմ նորանոր յաջողութիւններ, ուժ եւ կորով Ձեր հայապահպան գործունէութիւնը նոյն ժրաջանութեամբ շարունակելու համար։

ԽՈՐԻՆ ՅԱՐԳԱՆՔՈՎ` 

ՀՐԱՆՈՅՇ ՅԱԿՈԲԵԱՆ

 

Մահացած Է Ատելայտա Հովէեանը

Մարտ 28-ին ԱՄՆ Պոսթըն քաղաքին մէջ իր մահկանացուն  կնքած է ՀՀ վաստակաւոր ուսուցչուհի, Քեմպրիճի Սբ. երրորդութիւն եկեղեցւոյ հայկական կիրակնօրեայ վարժարանի ուսուցչուհի Ատելայտա Հովէեանը, որ օտար ափերու վրայ մեծցող հայ մանուկներուն, պատանիներուն ու աղջիկներուն հայրենադարձութեան, մայրենի լեզուի հանդէպ սիրոյ ու ազգային  գիտակցութեան ձեւաւորման ուղղութեամբ մեծածաւալ աշխատանքներ  իրականացուցած է:

Կը ցաւակցինք Ատելայտա Հովէեանի ընտանիքի անդամներուն, հարազատներուն` մաղթելով համբերութիւն եւ հոգիի ամրութիւն:

Ատելայտա Հովէեան ծնած է 1941թ յունուարին` նոր Պայազետի մէջ, այժմ` Գաւառ:

Գերազանցութեամբ աւարտած   դպրոցը, ուսումնարանը, Երեւանի պետական համալսարանը: Աշխատած է Հր. Աճառեանի անուան դպրոցին մէջ` որպէս հայոց լեզուի եւ գրականութեան ուսուցչուհի: Այնուհետեւ տեղափոխուած է Ամերիկայի Միացեալ նահանգներ, շարունակած ուսուցիչի նուիրական գործը` աշխատելով Քեմպրիճի Սբ. երրորդութիւն եկեղեցւոյ հայկական կիրակնօրեայ վարժարանին մէջ:

Տիկին Հովէեան Հայաստանի Հանրապետութեան գերագոյն խորհուրդին կողմէ արժանացած է հանրապետութեան վաստակաւոր ուսուցիչի պատուաւոր կոչման:

***

Յ.Գ Ստորեւ կը ներկայացնենք Ատելայտա Հովէեանի գրած բանաստեղծութիւնը.

Արարատի գագաթից մի ափ ձիւն բերեցի,

Շատ էր այրող ափս, բայց ձիւնը չհալուեց,

Դրի իմ սենեակում` բուխարիիս կողքին,

Բայց ձիւնը չհալուեց, այլ ալիքուեց լոյսի ցնո՜րք մի հեղեղի,

Ես հանգցրի բոլոր կրակները իմ տան.

Անմեկնելի՜ հրաշք. լոյս էր տանս ու տաք,

Ու ծաղկունք էր տանս` տարին բոլոր:

Անգամ գիշերների բոլոր երազներս`գունաւոր ու շքեղ,

Ու ողջ կեանքս ասես սիրոյ, յարատեւման խորհրդով էր լցուել…

…Մի ասի ձիւնը այդպէս

Մի խենթ սիրտ էր պահում յաւերժօրէն,

Ինչպէս լեռն այն պայծառ գուրգուրել է, պահել

Մի ողջ ժողովրդի` անթիւ՜, անթիւ՜ դարեր …

Օրհնում եմ քեզ, անսու՛տ երազներիս հովիտ,

Մի բուռ նշխար, մի ափ ձիւն դու Արարատի,

Ապրի՛ր ինձ հետ ընդմիշտ, ապրի՛ր դու իմ կողքին,

Թող կարօտը սրտիս յորդի այսպէս ցնծուն

Քո տաք, քո կենարար յաւերժական սառցից

Ու դառնայ երգ հայկական,

Դառնայ սէր ու երազ,

Ու  լո՜յս  դառնայ…