Տեղի Ունեցաւ Սուրիահայերու Հիմնախնդիրները Համակարգող Միջգերատեսչական Յանձնաժողովի Հերթական Նիստը

Ապրիլի 5-ին ՀՀ սփիւռքի նախարարութեան մէջ` նախարար Հրանոյշ Յակոբեանի գլխաւորութեամբ տեղի ունեցաւ սուրիահայերու հիմնախնդիրները համակարգող միջգերատեսչական յանձնաժողովի հերթական նիստը, որուն մասնակցեցան գերատեսչութիւններու, սուրիահայերու խնդիրներով զբաղուող հասարակական եւ միջազգային կազմակերպութիւններու ներկայացուցիչներ:

Սուրիահայերու բուժօգնութեան կազմակերպման ուղղութեամբ կատարուած աշխատանքներուն եւ  յետագայ ընելիքներուն մասին զեկուցումով հանդէս եկաւ ՀՀ առողջապահութեան նախարարութեան աշխատակազմի հիւանդանոցային բուժօգնութեան քաղաքականութեան բաժինի պետ Վարդան Վարդազարեան: Զեկուցողը նշեց, որ ընդհանուր առմամբ բուժօգնութիւն  ցուցաբերուած է 1686 սուրիահայու: Բուժօգնութեան, ինչպէս նաեւ` սուրիահայ բժիշկներու աշխատանքի տեղաւորման հարցերը լուծուած են ժամանակին եւ բացթողումներ չեն արձանագրուած:

Սուրիահայ գործարարներու վերապատաստման եւ անոնց գործարարութեան կայացման ուղղուած ծրագիրներուն մասին զեկուցեց ՀՀ տնտեսական զարգացման եւ ներդրումներու նախարարի տեղակալ Տիգրան Խաչատրեան: Զեկուցողը նշեց նախարարութեան կողմէ սուրիահայ գործարարներուն աջակցելու հինգ ուղղութիւններուն մասին, ներառեալ` գործարար ծրագիրներու ֆինանսաւորման, գործուածքներու եւ կաշեգործական արտադրութեան կեդրոն ստեղծելու, վարչապետին կից փոքր եւ միջին ձեռնարկատիրութեան խորհուրդի կազմին մէջ սուրիահայերու տնտեսական շահերը ներկայացնող մասնակից ընդգրկելու անհրաժեշտութեան վերաբերեալ:

Սուրիահայերու տնտեսական ընդելուզման թեման շարունակեց Գերմանիոյ միջազգային համագործակցութեան ընկերութիւն (GIZ) ծրագիրի ղեկավար Հանս Եոհաքիմ Զիննկան: Ան զեկուցեց սուրիահայերու տնտեսական ընդելուզման ուղղութեամբ իրականացուած եւ նախատեսուած ծրագիրներուն, ինչպէս նաեւ տնտեսական ման աշխատանքային խումբին գործունէութեան մասին: Համապարփակ բազմակողմանի զեկուցման մէջ GIZ ծրագիրին ղեկավարը նշեց, որ ստեղծուած է տուեալներու շտեմարան, աշխատանքային խումբ, ուր ընդգրկուած է սուրիահայերու տնտեսական ընդելուզման հարցերով զբաղուող 22 կազմակերպութեան ներկայացուցիչ:

Սուրիահայերուն ցուցաբերուած աջակցութեան եւ նախատեսուող ծրագիրները ներկայացուց Ամերիկայի հայ օգնութեան ֆոնտի Հայաստանի մասնաճիւղի ծրագիրի համակարգող Մանէ Խաչատրեան: Զեկուցողն անդրադարձաւ սուրիահայերուն ցուցաբերուած կրթական, տնտեսական, հումանիտար օգնութեան, որն ընդհանուր առմամբ կազմած է 67 հազար տոլար:

Ամփոփելով նիստը` սփիւռքի նախարարը շնորհակալութիւն յայտնեց բոլոր պետական, հասարակական, միջազգային կազմակերպութիւններուն եւ կառոյցներուն կատարած աշխատանքի համար: Ան կարեւոր համարեց սուրիահայերու տնտեսական ընդելուզումը, խնդրեց բոլոր կազմակերպութիւններուն իրենց ծրագիրներուն որոշակի բաղադրիչ յատկացնել սուրիահայերու գործարար աջակցութեան: Նախարարը մասնաւորապէս նշեց. «Պէտք է անենք հնարաւոր ամէն ինչ, որպէսզի սիրիահայերի խնդիրները արագ եւ համակարգուած լուծում ստանան, եւ եւ նրանք հաստատուեն Հայաստանում»:

1 2 3

11 12

Քոլքաթայի Հայոց Մարդասիրական Ակադեմիան Կը Յայտարարէ Ընդունելութիւն

Յարգելի՛ հայրենակիցներ,

Քոլքաթայի մէջ (Հնդկաստան, Արեւմտեան Պենկալ նահանգ) այսօր ալ կը գործէ 1821թ.  հիմնադրուած Հայոց մարդասիրական ակադեմիան:

Մինչեւ Հնդկաստանի անկախութեան ձեռքբերումը վերոնշեալ հաստատութիւնը եղած է հարաւասիական տարածաշրջանի հայկական համայնքներու հիմնական միջնակարգ ուսուցման կրթօճախը, ուր ուսանած է շուրջ 280 աշակերտ: Դպրոցը ֆինանսաւորուած է հնդկահայ բարերարներուն կողմէ: Դպրոցին գործունէութիւնը կ’իրականացուի աւելի քան մէկ դար առաջ հնդկահայ համայնքին կողմէ ստեղծուած բարեգործական հիմնադրամին հաշուին:

Սակայն 20-րդ դարու կէսերէն Հնդկաստանի հայ համայնքի շարունակական նուազման հետեւանքով այժմ կտրուկ պակսած է կրթօճախին մէջ ուսանող աշակերտներու թիւը: Թէեւ առկայ ֆինանսական միջոցները թոյլ կու տան ընդունիլ մինչեւ 250 աշակերտ, ներկայիս դպրոցին մէջ կ’ուսանի շուրջ 70 աշակերտ, որոնց գերակշիռ մասը ՀՀ քաղաքացիներ են:

Կը տեղեկացնենք, որ այստեղ կրնան յաճախել հայ երեխաներ որեւէ երկրէ: Յառաջարկին  դիտարկած ենք նաեւ մանկատուներէն, ինչպէս նաեւ սոցիալապէս անապահով ընտանիքներէն համապատասխան տարիքի երեխաներու` տուեալ կրթօճախ ընդունման նպատակայարմարութեան, ուր անոնք հնարաւորութիւն կը ստանան ձեռք բերելու առաւել որակեալ կրթութիւն:

Կից կը ներկայացնենք դպրոցի ղեկավարութեան հետ մշակուած տեղեկատուական հակիրճ նիւթը: Անհրաժեշտութեան պարագային Հնդկաստանի մէջ ՀՀ դեսպանութիւնը եւ Սփիւռքի նախարարութիւնը պատրաստ են տրամադրելու լրացուցիչ տեղեկատուութիւն:

***

Քոլքաթայի հայոց Մարդասիրական ակադեմիա

Քոլքաթայի Հայոց մարդասիրական ակադեմիան[1] հիմնադրուած է 1821թ. հնդկահայ համայնքի նախաձեռնութեամբ եւ մինչեւ 1870թ. ունեցած է իր ինքնուրոյն կրթական ծրագիրը, որ յետագային համապատասխանեցուած է նահանգի կրթական համակարգի պահանջներուն:

1999թ. Քոլքաթայի Գերագոյն դատարանի որոշմամբ կրթօճախը յանձնուած է Մայր Աթոռ Սուրբ Էջմիածինի խնամակալութեան: Նոյն որոշմամբ Ամենայն Հայոց Կաթողիկոսին  վերապահուած է ճեմարանի գործունէութեան կառավարման հետ կապուած բոլոր լիազօրութիւններու իրականացումը:

Կրթօճախն ունի բուժարան, մարզասենեակ, լողաւազան, տղաներու եւ աղջիկներու համար նախատեսուած առանձին կացարաններ: Այնտեղ կը գործէ 1828թ. հիմնադրուած «Արարատեան» գրադարանը:

Ներկայիս հաստատութեան մէջ կ’ուսանին աշակերտներ առաւելապէս Հայաստանէն:

Ընդունելութեան պայմանները

Կրթօճախ կրնան ընդունուիլ 8-է 11 տարեկան պատանիներ: Ընդունելութիւնը կը կատարուի հարցազրոյցի հիման վրայ, որ տեղի կ’ունենայ Մայր Աթոռ Սուրբ Էջմիածինի մէջ` Քրիստոնէական դաստիարակութեան կեդրոնի անմիջական ղեկավարութեամբ: Հնդկաստանի մուտքի արտօնագիրի տրամադրման վճարը եւ ճանապարհածախսը կը հոգայ կրթօճախը` Մայր Աթոռ Սուրբ Էջմիածինի համապատասխան ծառայութեան միջոցով:

Դպրոցը երեք տարին անգամ մը կը հոգայ աշակերտներու` ամառնային արձակուրդներուն Հայաստան մեկնելու եւ վերադառնալու ճանապարհածախսը, իսկ միջանկեալ ժամանակահատուածին անոնք կրնան այցելել Հայաստան սեփական միջոցներով:

Դպրոցի ղեկավարութիւնը, որպէս օրինական խնամակալ, պատասխանատու է ՀՀ քաղաքացի հանդիսացող արական սեռի շրջանաւարտներուն` պարտադիր ժամկէտային զինծառայութիւնը անցնելու նպատակով Հայաստան վերադարձի համար:

Կրթութիւնը

Քոլքաթայի Հայոց մարդասիրական ակադեմիան հայկական թեքումով անգլիալեզու միջնակարգ դպրոց է, ուր աշակերտները կը սորվին նաեւ հինտի: Հայաստանէն գործուղուած մասնագէտներուն կողմէ հայերէնով կը դասաւանդուին Հայոց լեզու, Հայ գրականութիւն, Հայոց պատմութիւն, Հայ եկեղեցւոյ պատմութիւն եւ Հայ երգ-երաժշտութիւն առարկաները: Մանկավարժներու ընտրութիւնը եւ Քոլքաթա գործուղումը կ’իրականացնէ Մայր Աթոռ Սուրբ Էջմիածինի կողմէ: 10-ամեայ միջնակարգ կրթութիւնը բարեյաջող աւարտած եւ համապատասխան վարքագիծ դրսեւորած սաներուն հնարաւորութիւն կը տրուի կրթութիւնը շարունակել Քոլքաթայի լաւագոյն աւագ դպրոցներուն մէջ:

Սաներու կեցութեան, ուսման, հագուստի եւ գրենական պիտոյքներու ծախսերն ամբողջովին կը հոգայ կրթօճախը:

Բժշկական ապահովումը

 ճեմարանը ունի բժիշկ, որ շաբաթը երկու անգամ կ’այցելէ աշակերտներուն: Առողջական գանգատներու պարագային  աշակերտի զննումէն ետք կը նշանակուի համապատասխան բուժում, իսկ անհրաժեշտութեան պարագային ան կը տեղափոխուի հիւանդանոց: Առկայ է նաեւ շուրջօրեայ բուժքրոջ հաստիք, որն այժմ ժամանակաւորապէս թափուր է (ընդունելութեան համար տրուած է յայտարարութիւն): Բժշկական բոլոր ծախսերը կը հոգայ կթրօճախը:

Սննդակարգը

Ճեմարանը ունի ճաշարան, ուր աշակերտները կը սնուին օրը երեք անգամ: Անոնք նաեւ թեթեւ ուտեստներ կը ստանան երկար դասամիջոցին եւ կէսoրէ յետոյ ազատ ժամանցին: Յաճախ աշակերտներուն կը տրուի անհրաժեշտ մթերքներ, որպէսզի անոնք պատրաստեն թխուածքներ կամ ազգային ուտեստներ:

Առողջապահական  պայմանները

Դպրոցը ունի լուացքատուն, ուր կը լուացուի եւ կ’արդուկուի աշակերտներուն հագուստը: Իւրաքանչիւր շաբաթ անոնք կը ստանան մաքուր անկողին: Ննջասենեակներու, սանհանգոյցներու, դասարաններու մաքրութիւնը կ’ապահովեն հաւաքարարները: Տարածքի մաքրութիւնն ու այգիին խնամքը կը կատարուին բակային աշխատողներուն կողմէ: Աշակերտները կը ստանան համազգեստ, կօշիկ, մարզական հագուստ, ներքնաշորեր եւ անձնական առողջապահական բոլոր պարագաները:

Շրջագայութիւնները եւ ուխտագնացութիւնները

Դպրոցի տեսչութիւնը ուսուցչական կազմին հետ միասին յաճախակի կը կազմակերպէ բազմապիսի կրթադաստիարակչական եւ ճանաչողական շրջագայութիւններ Քոլքաթայի զանազան թանգարաններ, տեսարժան վայրեր, իսկ ամառնային արձակուրդներուն` նաեւ այցեր զբօսայգիներ ու ժամանցի վայրեր:

Իւրաքանչիւր կիրակի աշակերտները կը մասնակցին Քոլքաթայի մէջ կամ Հնդկաստանի Արեւմտեան Պենկալ նահանգի այլ քաղաքներուն մէջ գոյութիւն ունեցող հայկական եկեղեցիներէն որեւէ մէկուն մէջ մատուցուող սուրբ պատարագին, որուն ընթացքին տղաներուն մէկ մասն ըստ ցանկութեան կը սպասաւորէ սուրբ խորանը, իսկ աղջիկները որպէս դպրաց դաս կ’երգեն երգչախումբին մէջ:

 Կապը հարազատներու հետ

Շաբաթը մէկ օր աշակերտներուն կը տրուի հնարաւորութիւն գրադարանէն «Skype» ծրագիրին միջոցով զրուցել հարազատներուն հետ (արձակուրդներուն աւելի յաճախ): Աշակերտներու ննջարանին մէջ առկայ է քաղաքային հեռախօս,  սահմանուած ժամերուն հարազատները կրնան զանգահարել:

Ուսումնական տարուան ընթացքին սաներուն կ’արգելուի օգտագործել  բջջային հեռախօս կամ փլանշետ: Առկայութեան պարագային  ատոնք կը պահուին ղեկավարութեան մօտ եւ արձակուրդներուն կը վերադարձուին:

Դպրոցի տարածքին տեղադրուած տեսախցիկներու միջոցով հնարաւոր է առցանց հետեւիլ բակին ու մարզադաշտին մէջ աշակերտներու երեկոյեան ժամանցին:

Հարազատներուն այցելութիւնները

Աշակերտներու հարազատները, նախապէս տեղեկացնելով, կրնան այցելել երեխաներուն: Դպրոցի ղեկավարութիւնը անոնց կը տրամադրէ ժամանակաւոր կացարան: Յաճախ աշակերտներուն այցելած ծնողները կամաւոր կ’աշխատին խոհանոցին մէջ` օգնելով հնդիկ խոհարարներուն պատրաստելու հայկական ուտեստներ

Դպրոցի տարածքը

Կրթօճախն ունի մօտ հինգ հազար քառակուսի մեթր խնամուած տարածք, ուր աշակերտներուն համար առկայ են կրթութեան, կեցութեան եւ ժամանցային գրեթէ բոլոր պայմանները` ներառեալ համակարգչային, հեռուստացոյցի, արուեստի, երաժշտութեան սենեակներ, գրադարան, ընդարձակ դահլիճ, մարզադաշտ, մարզասրահ, լողաւազան (այն կը գտնուի վերանորոգման փուլին մէջ), ինչպէս նաեւ լուացքատունը` կարելու եւ արդուկելու համար նախատեսուած կից բաժիններով:

Անվտանգութիւնը

Դպրոցի ողջ տարածքը շրջապատուած է բարձր, ամուր ու անանցանելի պարիսպով: Գոյութիւն ունի մէկ հիմնական մուտք` կրկնակի դարպասներով, ուր 24-ժամեայ ծառայութիւն կ’իրականացնեն անվտանգութեան աշխատակիցները: Ակադեմիայի ողջ տարածքը կը վերահսկուի տեսախցիկներով:

Առանձին պարագաներու մէջ աշակերտները տարածքէն կրնան դուրս գալ միայն վերակացուի թոյլտուութեամբ ու անցաթուղթով` աւագ ուսանողներէն մէկուն ուղեկցութեամբ: Իսկ աւագ դպրոցներու կամ համալսարաններու ուսանողները պէտք է վերադառնան սահմանուած ժամէն ոչ ուշ:

Աշակերտներու քանակը

Այժմ կրթօճախին մէջ ընդհանուր առմամբ կը բնակի 73 հոգի, որոնցմէ 61-ը ճեմարանի աշակերտներն են, իսկ միւսները կ’ուսանին քաղաքի աւագ դպրոցներուն կամ բարձրագոյն ուսումնական հաստատութիւններուն մէջ:

Կրթօճախը հնարաւորութիւն ունի ընդունելու մինչեւ 250 աշակերտ:

[1]  Պաշտօնական կայքը. http://www.armeniancollege.edu.in/

 

Զախոյի ՄԷջ Հոգեհանգստեան Պաշտօն Քառօրեայ Պատերազմի Հերոս Նահատակներուն Համար

Կիրակի Ապրիլ 2-ին, Զախոյի Ս. Աստուածածին եկեղեցւոյ մէջ մատուցուած է Ս. պատարագ եւ հոգեհանսգստեան պաշտօն քառօրեայ պատերազմի հերոս նահատակներուն համար:

Հայերն այսօր-ին կը յայտնէ Զախոյի հոգեւոր հովիւ Տ. Մամբրէ քհնյ. Հմայեակեան, որ եկեղեցւոյ մուտքին տեղադրած են նահատակներու անուններու ցանկը, որ ժողովուրդը անուններով ճանչնայ իր նահատակ հերոսները:

Տէր հայրը քարոզին մէջ նշած է, որ հայ ժողովուրդը միշտ ալ յաղթած է,  երբ միասնական եղած է, նաեւ խօսած է այն տեսակէտին մասին, որ երկրի  սոցեալ-տնտեսական վիճակին պատճառով մէկ օր ալ չենք դիմանար պատերազմին սուտ է, հայու սիրտը առիւծի սիրտ է, որ կը յիշէ թուրքերու արարքները իր նախնիներուն նկատմամբ, եւ այդ սիրտը ոչ թէ փախչիլ կը նախընտրէ, այլ ինքզինքը նռնակով կը պայթեցնէ  զինք շրջապատող թուրքերուն հետ միասին:

2 3  4444

 

Հայ Թեկնածուներուն Բացառիկ Յաղթանակը Կլենտէլի ՄԷջ Կայացած Ընտրութիւններուն

Ապրիլի 4-ին Ամերիկայի Միացեալ Նահանգներուն մէջ տեղի  ունեցած են Կլենտէլի Քաղաքային խորհուրդի, Միացեալ կրթական խորհուրդի եւ Համայնքային քոլեճի խորհուրդի ընտրութիւնները:

«Հայերն այսօր»-ի փոխանցմամբ` Քաղաքային խորհուրդի երեք թափուր տեղերուն համար պայքարած են 10 թեկնածուներ, որոնցմէ 4-ը հայ` Արա Նաճարեան, Զարեհ Սինանեան, Վրէժ Աղաճանեան, Օննիկ Մեհրապեան (ՀՅԴ Հայ դատի յանձնախումբը պատշտանած է Արա Նաճարեանի եւ Զարեհ Սինանեանի թեկնածութիւնը): Նախնական տուեալներով ամենաշատ ձայները հաւաքած են հայ թեկնածուները`

Արա Նաճարեան` 8305 ձայն,

Զարեհ Սինանեան` 7892 ձայն,

Վրէժ Աղաճանեան` 7885 ձայն:

Այսպիսով, Քաղաքային խորհուրդի 5 անդամներէն 4-ը հայ են, ամենայն հաւանականութեամբ 2017-2018թթ. Կլենտէլի քաղաքապետի պաշտօնը կը ստանձնէ Քաղաքային խորհուրդի անդամ Վարդան Կարապետեան:

Քաղաքի քարտուղարի պաշտօնին վերընտրուած է Արտաշէս Քասախեան` հաւաքելով 12,630 ձայն, իսկ Քաղաքի գանձապետի պաշտօնին` Րաֆֆի Մանուկեան` 12,123 ձայնով:

Կլենտէլի Միացեալ կրթական խորհուրդի երեք թափուր տեղի համար պայքարած են 5 թեկնածուներ, որոնցմէ 4-ը` հայ (ՀՅԴ Հայ դատի յանձնախումբը պատշտպանած է Կրէկ Գրիգորեանի, Արմինէ Կարապետեանի եւ Շանթ Սահակեանի թեկնածութիւնը):   Յաղթող  ճանչցուած են`

Արմինէ Կարապետեան` 3165 ձայն,

Կրեկ Գրիգորեան` 3030 ձայն,

Շանթ Սահակեան` 1891 ձայն:

Այսպիսով, Կրթական խորհուրդի 6 անդամներէն 4-ը հայ են:

Կլենտէլի համայնքային քոլեճի խորհուրդի ընտրութիւններուն երեք թափուր տեղի համար պայքարած են հինգ թեկնածուներ, որուն երկուքը` հայ (ՀՅԴ Հայ դատի յանձնախումբը պաշտպանած է ընտրութեան հայ մասնակիցներու թեկնածութիւնները): Յաղթող  ճանչցուած են`

Արմինէ Յակոբեան` 3075 ձայն,

Իվեթա Վարդանեան Տէյվիս` 1685 ձայն:

Այսպիսով` Կլենտէլի համայնքային քոլեճի խորհուրդի 6 անդամներէն 3-ը հայ են, իսկ նախագահը ազգութեամբ մեքսիքացի:

 

Չցանկալով Բանակցութիւններու Միջոցով Լուծել Հակամարտութիւնը` Ատրպէյճան Կը Սպառնայ Սանձազերծելով Հերթական Պատերազմ. ԼՂՀ ԱԳՆ

Արցախի Հանրապետութեան արտաքին գործոց նախարարութիւնը յայտարարութիւն տարածած է Ապրիլեան պատերազմի վերաբերեալ: Յայտարարութեան մէջ կ՛ըսուի.

Այսօր կը լրանայ ուղիղ մէկ տարին, երբ աւարտեցաւ ատրպէյճանա-ղարաբաղեան հակամարտութեան ուժային լուծման նպատակով Ատրպէյճանի կողմէ Արցախի դէմ սանձազերծուած յարձակումը: 2016-ի Ապրիլ 1-ի լոյս 2-ի գիշերը, կոպտօրէն խախտելով հրադադարը, ատրպէյճանական զինուած ուժերը սահմանի ողջ երկայնքով նախաձեռնեցին լայնածաւալ յարձակում` օգտագործելով ծանր ռազմամթերք, հրետանի եւ ռազմական օդուժ: Միայն կենդանի ուժի ու ռազմամաթերքի զգալի կորուստներ կրելէ ետք Ատրպէյճան ստիպուած եղաւ 2016-ի  Ապրիլ 5-ին Ռուսիոյ միջնորդութեամբ խնդրել ռազմական գործողութիւններու դադրեցում:

Միջազգային մարդասիրական իրաւունքի բազմաթիւ խախտումներով ու ռազմական յանցագործութիւններով ուղեկցուած ատրպէյճանական յարձակումը լուրջ մարտահրաւէր դարձաւ տարածաշրջանային խաղաղութեան ու անվտանգութեան եւ մեծ վնաս հասցուց ԵԱՀԿ Մինսկի խումբի համանախագահներու միջնորդական ջանքերով ընթացող ատրպէյճանա-ղարաբաղեան հակամարտութեան կարգաւորման գործընթացին:

Ռազմական գործողութիւններու աւարտէն ետք անցած մէկ տարուան ընթացքին ԵԱՀԿ Մինսկի խումբի համանախագահները ջանքեր կը գործադրէին բանակցային գործընթացի լիարժէք վերականգնման համար պայմաններ ստեղծման ուղղութեամբ:

Արցախի Հանրապետութիւնը հետեւողականօրէն աջակցութիւն կը յայտնէ ԵԱՀԿ Մինսկի խումբի համանախագահներու յայտարարութիւններուն, որոնք կը վերաբերին 1994-ի Մայիս 12-ի հրադադարի մասին համաձայնագրի լիակատար պահպանման, 1995-ի Փետրուար 6-ի հրադադարի ամրապնդման մասին համաձայնագրի դրոյթներու գործնական կիրառման, ինչպէս նաեւ միջադէպերու հետաքննութեան մեքանիզմներու ներդրման եւ ԵԱՀԿ Գործող նախագահի անձնական ներկայացուցիչի գրասենեակի կարողութիւններու ընդլայնման վերաբերեալ Վիեննայի մէջ (2016-ի Մայիս 16)  եւ Ս․Փեթերսպուկի մէջ (2016-ի Յունիս 20) ձեռք բերուած համաձայնութիւններու իրագործման անհրաժեշտութեան:

Ատրպէյճան ոչ միայն կը մերժէ այդ առաջարկները, այլեւ կը տապալէ որեւէ նախաձեռնութիւն, որ ուղղուած է ռազմական գործողութիւններու վերսկսման հնարաւորութեան բացառման: Աւելին, այս ողջ ժամանակահատուածին Ատրպէյճան չի հրաժարիր փորձերէ` տեղափոխել առճակատման տրամաբանութիւնը տնտեսութեան, մշակոյթի եւ նոյնիսկ մարդկային շփումներու բնագաւառներ:

Ցուցադրելով բանակցութիւններու միջոցով հակամարտութեան խաղաղ կարգաւորման հասնելու ցանկութեան լիակատար բացակայութիւն` ատրպէյճանական իշխանութիւնները հերթական պատերազմ սանձազերծելով կը սպառնան: Հետեւողականօրէն բարձրացնելով լարուածութեան աստիճանը Արցախի եւ Ատրպէյճանի զինուած ուժերու շփման գիծին վրայ եւ շարունակելով առճակատման ու թշնամանքի քաղաքականութիւնը` Պաքուն նպատակաուղղուած կերպով կը խորացնէ կողմերուն միջեւ անվստահութիւնը եւ կը ձգտի ատրպէյճանա-ղարաբաղեան հակամարտութեան խաղաղ կարգաւորման գործընթացը դարձնել սեփական ապակառուցողական քաղաքականութեան ու առաւելագոյն պահանջներու պատանդը:

Գնդ. Պալիքեան Նշանակուած է Լիբանանի Պետ. Անվտանգութեան Հսկողութեան Տնօրէն

Լիբանանի Պետական անվտանգութեան ընդհանուր տնօրէն հազարապետ-զօրավար Թոնի Սալիպա հրապարակեց Պետական անվտանգութեան սպասարկութեան հրամանատարութեան մէջ նոր նշանակումներու ցանկը:

«Ազդակ» օրաթերթին տեղեկութիւններով՝ հրապարակուած հրամանագիրին համաձայն, գնդ. Ժորժ Պալիքեան նշանակուած է Պետական անվտանգութեան հսկողութեան եւ ընդհանուր քննչական տեսչութեան տնօրէն:

Գնդ. Պալիքեան վերջին ժամանակաշրջանին ստանձնած էր նախ Ժիպէյլի, ապա Պաթրունի անվտանգութեան սպասարկութեան տնօրէնի պաշտօնը, ապա փոխադրուած կեդրոն` իբրեւ Պետական անվտանգութեան սպասարկութեան նախկին ընդհանուր տնօրէնի օգնական:

Օդեսայի ՄԷջ Յարգեցին Ապրիլեան Քառօրեային Զոհուածներուն Անթառամ Յիշատակը

՜Օ, գարնան ամիս, ապրելու՜ ապրիլ,
Դու, որ բերում ես ծաղիկներ ու կեանք,
Ինչու՞ դու դարձար մահուան տարելից…
Սիլվա Կապուտիկեան

Ցաւօք, Ամենայն Հայոց բանաստեղծուհիին այս տողերը մեր օրերուն նոր հնչեղութիւն, նոր թարմութիւն ստացան…
Ապրիլ 2-ին Օդեսայի Կակարինեան բարձունքին վրայ վեր յառնած հայկական եկեղեցւոյ մէջ, Գալստեան Կիրակին նուիրուած Սուրբ պատարագի աւարտէն յետոյ, ձեռամբ Տէր Աբգար քահանայ Գըլըճեանի կատարուեցաւ հոգեհանգստեան արարողութիւն ` ի յիշատակ ապրիլեան քառօրեայ մարտերուն զոհուած հայորդաց:
Խօսելով մեր ժողովուրդի քաջագործ որդիներու անձնազոհութեան մասին, որոնք արդէն մէկ տարի է, որ զրկուած են կեանքի քաղցրութիւնը վայելելու, իսկ անոնց ծնողները, հարազատները` հանգիստ ապրելու բերկրանքէն, քահանան նաեւ միասնականութեան ու գթասրտութեան կոչ ըրաւ, քանզի միայն հայ մարդը կը զգայ հայու ցաւն ու մորմոքը.
«Շնորհիւ անոնց սխրագործութեան թշնամին չկրցաւ իրագործել իր չարագործ ծրագիրները եւ արժանի հակահարուած ստացաւ… Ամենակարող Աստուած թո՛ղ լուսաւորէ զոհուածներու հոգիները, իսկ մենք պարտաւոր ենք աղօթելու անոնց հոգիներու հանգստութեան համար եւ սատարել անոնց ընտանիքները :
Սիրելի՛ հայրենակիցներ, հաւատաւո՛ր հայորդիներ, աղօթք բարձրացնենք առ Աստուած, որ օրհնէ մեր Հայրենիքը եւ խաղաղ ու ապահով պահպանէ մեր ժողովուրդը` ի սփիւռս աշխարհի: Թո՛ղ խաղաղութեան Աստուածը ըլլայ զօրավիգ աշխարհի բոլո՛ր ժողովուրդներուն»:
Ապրիլեան զոհերու յիշատակի օրը շարունակուեցաւ մշակոյթի տան մեծ սրահին մէջ:
Տէրունական աղօթքէն ետք  ներկաները յոտնկայս` մէկ վայրկեան լռութեամբ  յարգեցին մարտերուն մէջ զոհուածներու սուրբ յիշատակը: Խոնարհումի ու երախտիքի սիրալիր խօսքերով հանդէս եկան համայնքի նախագահ Սամուէլ Տիգրանեան եւ կիրակնօրեայ դպրոցի տնօրէն Էլեն Պօղոսեան:
Այնուհետեւ ռազմահայրենասիրական երգի հնչիւններու ներքոյ բեմ բարձրացան Սուրբ Մաշտոցի անունը կրող դպրոցի սաները` փոքրիկ մաշտոցականները: Դպրոցին մէջ իրականացուած էր «Նամակ զինուորին» խորագիրով մրցոյթ, եւ լաւագոյն աշխատանքները վարժ ու գեղեցիկ հայերէնով ընթերցուեցան հեղինակներուն կողմէ: Նամակներուն մէջ արտացոլուած էր երեխաներու սէրն ու համակրանքը սահմանին վրայ կանգնած զինուորին հանդէպ. «Թո՛ղ Աստուած պահէ ու պահպանէ հայ զինուորները, որոնք գիշերուզօր աչալուրջ կը պաշտպանեն մեզ ու մեր հայրենիքի սահմանները»:
Դահլիճին մէջ խայտացին «Փոքրիկ զինուորիկ» երգի խրոխտ հնչիւնները.

Ունինք պարզ երկինք` արեւոտ ու ջինջ,
թող օրը գալիք բերի մեզ բարիք:
Զինուորիկ ենք մենք պատրաստ ու խիզախ,
Քաջ ենք, քաջ ենք ու անվախ:

Օդեսահայ երիտասարդներու «Արմիր» միութիւնը, յանձինս նախագահ Ազգանոյշ Վարդանեանի` կազմակերպած էր «Նուիրեալները» փաստավաւերագրական ֆիլմի ցուցադրումը:  Ֆիլմի դիտումէն ետք քննարկուեցաւ, որ հեղինակները յաջողած են վերծանել ճշմարտութիւնը. կան ազգային յատկանիշներ, որոնք սերունդէ սերունդ կը փոխանցուին արեան աւիշներով` հող ու ջուրի կանչով:

Ձեռնարկի իւրօրինակ   ամփոփումը եղաւ հայոց պատմութեան ուսուցիչ Ալեքսանտր Մկրտչեանի խօսքը․ «Հպարտութեամբ ըսեմ` ապրիլեան քառօրեան ցոյց տուաւ, թէ ինչքան ուժեղ ենք մենք, երբ համախմբուած ենք: Ապրիլը մեզի յիշեցուց միասնականութեան խորհուրդը, որ ըլլանք միահամուռ ու ամուր»:

Ինքս աւելցնեմ` յանուն հայրենեաց ինկան մեր ժողովուրդի հերոս զաւակները` դառնալով սերունդներուն հայրենասիրութեան անշէջ ու վառ օրինակ: Անոնց անունները յա՜ր կը մնան հայ ժողովուրդի յիշողութեան մէջ, անոնց յիշատակը` բարի: Անոնց անմահ ոգիները պիտի  յարատեւեն հերոսներ ծնող մայր ժողովուրդին հետ, քանզի քաջին մա՛ հ չկայ:
Յաւերժ փա՜ռք հայոց քաջերուն:

Նարինէ Մուրադեան

ք.Օդեսա, «Հայերն այսօր»-ի արտահաստիքային թղթակից

 

%d6%85%d5%a4%d5%a5%d5%bd%d5%a15%d6%85%d5%a4%d5%a5%d5%bd%d5%a14%d6%85%d5%a4%d5%a5%d5%bd%d5%a13%d6%85%d5%a4%d5%a5%d5%bd%d5%a12%d6%85%d5%a4%d5%a5%d5%bd%d5%a11

Ապրիլեան Քառօրեայ Պատերազմի Զոհերուն Յիշատակին Նուիրուած Երթ-Ձեռնարկ Ֆրանսայի Մէջ

Ֆրանսայի Տիժոն քաղաքի «Մաշտոցեան տառեր» հայկական դպրոցը Ապրիլ 2-ին կազմակերպեց  երթ-ձեռնարկ` նուիրուած 2016 թուականի Ապրիլեան քառօրեայ պատերազմի զոհերու յիշատակին:

Ինչպէս «Հայերն այսօր»-ին կը յայտնեն կազմակերպիչները, քաղաքապետարանին առջեւ հնչեց Հայաստանի հիմնը, այնուհետեւ աշակերտները հերոսներուն նուիրուած երգ ու բանաստեղծութիւններով իրենց երախտագիտութիւնը յայտնեցին հերոս տղաներուն` իրենց կեանքի գինով մեր երկիրը խաղաղ պահելու համար:

Երեկոյեան Սուրբ Միշել եկեղեցւոյ մէջ տեղի ունեցաւ Պատարագ` ի յիշատակ մեր հերոսներուն, ինչպէս նաեւ միասնական մոմավառութեան եւ խնկարկման արարողութիւն` անոնց  հոգիներու խաղաղութեան եւ հանգստութեան  համար:

%d5%a4%d5%ab%d5%aa%d5%b8%d5%b6%d5%a4%d5%ab%d5%aa%d5%b8%d5%b6%d5%a4%d5%ab%d5%aa%d5%b8%d5%b6-2%d5%a4%d5%ab%d5%aa%d5%b8%d5%b6

 

Արցախցի Պլը Պուղին Եւ Գիւմրեցի Պոլոզ Մուկուչը Կը Վերակենդանան Նոր Անիմացիոն Ֆիլմաշարով

ՓԻԱՐ-ի Զարգացման Հայկական կենդրոնը հանդէս պիտի գայ նոր նախագիծով, որուն ծիրէն ներս կը նախատեսուի պատրաստել կարճամեթրաժ մանկական ֆիլմաշար նշանաւոր հայ զուարճախօս-կատակաբաններ Պըլը Պուղի եւ Պոլոզ Մուկուչի մասին: Անոնք եղած են իրենց ժամանակի ամենավառ անհատականութիւններէն, որոնք համարձակած են ճշմարտութիւնը երբեմն կատակի, երբեմն ալ սուրխօսքի միջոցով հասցնել ամենատարբեր մեծամեծներուն: Արեւելքի մէջ այս կերպարներուն համարժէք է նշանաւոր Խօճա Նասրեդին, որուն մասին արդէն նկարահանուած են բազմաթիւ ֆիլմեր եւ մուլտֆիլմեր: Այս մասին «Հայերն այսօր»-ին կը յայտնեն ՓԻԱՐ-ի Զարգացման Հայկական կեդրոնի հանրային կապերու բաժինէն:

Այսօր` ե՛ւ մշակութային, ե՛ւ կրթական իմաստով չափազանց մեծ է մեր սրամիտ առակախօսներուն լաւագոյնս հանրութեան ներկայացնելու կարեւորութիւնը: ՓԻԱՐ-ի Զարգացման Հայկական կեդրոնին կողմէ արդէն մշակուած է այս կերպարներէն մեր օրեր հասած անգին ժառանգութիւնը, պատրաստ են թեմաները եւ ֆիլմաշարի ողջ հայեցակարգը: Նախագիծը հաւանութեան  արժանացած է շարք մը կազմակերպութիւններու կողմէ, արդէն կայ որոշակի աջակցութիւն սփիւռքէն: Ֆիլմաշարը բացի հայերէն տարբերակէն պիտի ունենայ նաեւ անգլերէն, ռուսերէն եւ արաբերէն թարգմանութիւններ: Շուտով համապատասխան առաջարկը կը ներակայացուի նաեւ ՀՀ մշակոյթի նախարարութեան եւ այլ շահագրգիռ կառոյցներու: ՓԻԱՐ-ի Զարգացման Հայկական կեդրոնը պատրաստ է համագործակցելու նախագիծին կեանքի կոչմամբ հետաքրքրուած անձանց եւ կազմակերպութիւններուն հետ:

%d5%a1%d5%b6%d5%ab%d5%b4%d5%a1%d6%81%d5%ab%d5%a1%d5%a1%d5%b6%d5%ab%d5%b4%d5%a1%d6%81%d5%ab%d5%a12%d5%a1%d5%b6%d5%ab%d5%b4%d5%a1%d6%81%d5%ab%d5%a13

 

Արցախցի Երեք Ուսուցիչներու Վերապատրաստման Ծրագիր Ս. Խաչ-Հարպոյեան Վարժարանին Մէջ

Հայաստանի Հանրապետութեան սփիւռքի նախարարութեան «Դուն ի՞նչ կ’ընես Արցախի համար» համահայկական շարժման ծիրէն ներս, Ս. Խաչ-Հարպոյեան վարժարանի իրականացնելիք ծրագիրով Պէյրութ ժամանեցին Մարտակերտի Վարդան Մինասեանի անուան թիւ 2 հիմնական դպրոցի տնօրէն Մելսիդա Քարդումեանը, ուսուցիչներ Լուսինէ Սաիյեանը եւ Ռուզաննա Աւետիսեանը, մասնակցելու ներառական կրթութեան մէկշաբաթեայ դասընթացքին: Այս մասին Հայերն այսօր-ին կը յայտնեն Ս.Խաչ-Հարպոյեան վարժարանէն:

Արդէն 3 տարիէ ի վեր Ս. Խաչ-Հարպոյեան Վարժարանին մէջ ընթացք առած է ուսումնական դժուարութիւններ ունեցող աշակերտներու բաժանմունքը, հետեւաբար, մեր ծրագիրը կ’ընդգրկէ մեր վարժարանէն ներս գործող մասնագէտներու՝ ուղղախօսական (speech therapy), հոգեշարժական (psychomotor therapy), հոգեբանական եւ խորհրդատուական բնագաւառներու մէջ փորձառութիւնը փոխանցել մեր արցախցի հայրենակիցներուն:

Արդարեւ, Երեքշաբթի, 4 Ապրիլի 2017-ի յետմիջօրէին արցախցի հիւրերը հասան Ս. Խաչ-Հարպոյեան Վարժարան, ուր իրենց դիմաւորեց դպրոցի տնօրէնուհի Տիկ. Ռիթա Պոյաճեանը, Տանն Կիլիկիոյ Կաթողիկէ հայոց ամենապատիւ եւ գերերջանիկ Տէր Գրիգոր-Պետրոս Ի. կաթողիկոս պատրիարքի օգնական եպիսկոպոս արհիապատիւ Հայր Գէորգ Ասատուրեանը, Ս. Խաչ եկեղեցւոյ ժողովրդապետ գերյարգելի Հայր Եղիա Ծ. Վրդ. Եղիայեանը, եւ Պատրիարքութեան վարժարաններու Ուսումնական Խորհուրդի ներկայացուցիչ Պրն. Գրիգոր Թերզեանը:

Տնօրէնութեան գրասենեակին մէջ պաշտօնական ընդունելութեան ընթացքին, Տիկ. Պոյաճեան բարի գալուստ մաղթեց հիւրերուն եւ յոյս յայտնեց, որ վերապատրաստման այս ծրագիրը լաւագոյն կերպով հասնի իր նպատակին: Այնուհետեւ, բարձրացան սրան, ուր ներկայ էին վարժարանի անձնակազմէն խմբակ մը: Տնօրէնուհի Տիկ. Պոյաճեան ներկայացուց 30-ամեայ Ս. Խաչ-Հարպոյեան վարժարանին պատմականը, ապա ծանօթացուց ուսումնական դժուարութիւններ ունեցող աշակերտներու բաժանմունքի անդամները, գլխաւորութեամբ՝ բաժնի պատասխանատու Պրն. Սեւակ Յակոբեանի: Վերջինս սահիկներու ցուցադրութեամբ ներկայացուց վերոնշեալ բաժանմունքին աշխատանքներն ու գործելակերպը:

 Հանդիպման աւարտին, Ասատուրեան եպիսկոպոսը իր օրհնութիւնը փոխանցեց, որպէսզի այս ծրագիրը ընթանայ հեզասահ եւ ըլլայ յաջողակ երկու կողմերուն համար, «որովհետեւ մենք երկուքս՝ հայրենիքի թէ սփիւռքի մէջ իրար կ’ամբողջացնենք», ըսաւ ան:

Տիկ. Քարդումեան իր կարգին ողջոյններ փոխանցեց հայրենիքէն, հերոսութիւն որակեց սփիւռքի ափերուն այսքա՛ն հայաշունչ դարբնոց մը պահպանելը, ինչպէս նաեւ Արցախէն իրենց հետ նուէր բերած նռնենիներ տրամադրեց, զայն ցանելու համար մեր վարժարանի շրջափակին մէջ: Ան նաեւ ձեռքի գործով տախտակէ շինուած ժամացոյց մը նուիրեց տնօրէնութեան:

Նշենք, որ Արցախէն ժամանած երեք ուսուցիչներու Լիբանան կեցութեան առնչութեամբ իր մեծ ու շնորհակալ ներդրումը ունի վարժարանիս ծնողական յանձնախումբի անդամուհիներէն Տիկ. Լիզա Հատտաճեանը:

%d5%b8%d6%82%d5%bd%d5%b8%d6%82%d6%81%d5%ab%d5%b9%d5%b8%d6%82%d5%bd%d5%b8%d6%82%d6%81%d5%ab%d5%b91%d5%b8%d6%82%d5%bd%d5%b8%d6%82%d6%81%d5%ab%d5%b92%d5%b8%d6%82%d5%bd%d5%b8%d6%82%d6%81%d5%ab%d5%b93%d5%b8%d6%82%d5%bd%d5%b8%d6%82%d6%81%d5%ab%d5%b94 %d5%b8%d6%82%d5%bd%d5%b8%d6%82%d6%81%d5%ab%d5%b95

 

«Աւրորա»-ի Առաջին Դափնեկիրը Պիտի Յայտնուի Հայկական Նամականիշի Վրայ

Հայփոստ»-ը Մայիսին պիտի թողարկէ նոր նամականիշ` «Աւրորա» մարդասիրական նախաձեռնութեան հետ համագործակցութեամբ:

Նամականիշին  վրայ պատկերուած պիտի ըլլայ Մարգարիտ Պարանկիցէն` «Աւրորա» մրցանակի առաջին դափնեկիրը: Նամականիշին թողարկման հաւանութիւնը տուած է Հայաստանի փոխադրամիջոցներու, կապի եւ տեղեկատուական արհեստագիտութիւններու նախարարութիւնը:

Նամականիշին թողարկումը եւ մարումը տեղի պիտի ունենայ 2017-ին՝ «Աւրորա» մրցանակի ձեռնարկներու ծիրէն ներս:

Նամականիշին հետ միասին «Հայփոստ»-ը պիտի թողարկէ 150 ՀՀ դրամ արժողութեամբ նուիրատուութեան կտրօններ, որոնց վաճառքէն գոյացած հասոյթը պիտի ուղղուի  «Աւրորա» մարդասիրական նախաձեռնութեան միջոցով իրականացուող նախագիծերուն:

«Մենք հիմնադրած ենք «Աւրորա» նախաձեռնութիւնը` ի երախտագիտութիւն յատկապէս անոնց, որոնք վտանգի կ՛ենթարկէին իրենք-զիրենք`  փրկելու Հայոց ցեղասպանութիւնը վերապրածները: Եւ մենք  կ՛ուզենք երախտագիտութիւն արտայայտել` շարունակելով բարին գործել, աջակցելով մերօրեայ հերոսներուն, որպէսզի անոնք նոյնպէս կարենան յուսադրել եւ ձեռք մեկնել մարդասիրական օգնութեան խիստ կարիք ունեցողներուն: Այսպիսով, մենք կ՛ըսենք, որ այդ վերապրողները այսօրուան փրկողներն են: Սա ոչ միայն կարեւոր կը դարձնէ յիշողութիւնը, այլեւ երախտագիտութիւնը գործի կը վերածէ: «Աւրորա»-ի իւրաքանչիւր նախագիծ` ներառեալ Մէգիի նամականիշը եւ նուիրատուութեան կտրօնը, հնարաւորութիւն կու տան ընդլայնելու «Աւրորա»-ի համայնքը` երախտագիտութիւն յայտնելով եւ շարունակելով նուիրատուութեան շղթան», – ըսած է «Աւրորա» մարդասիրական նախաձեռնութեան համահիմնադիր Ռուբէն Վարդանեան։

Մարգարիտ Պարանկիցէն, որ Maison Shalom խնամքի տան եւ REMA հիւանդանոցի հիմնադիրն է, «Աւրորա» մրցանակի արժանացած է այն բացառիկ ազդեցութեան համար, որ ունեցած է Պուրունտիի մէջ քաղաքացիական պատերազմի տարիներուն: Ան փրկած է 30 հազար երեխայ` անոնց տալով օթեւան եւ խնամք:

«Ինծի համար մեծ պատիւ է այսպիսի ճանաչման արժանանալը, բայց նաեւ ոգեւորիչ է գիտակցիլ, որ սէրը միշտ պիտի յաղթէ ատելութեան եւ չարիքին: Ես կը հաւատամ, որ այս նամականիշը պիտի նպաստէ «Աւրորա» մրցանակի առաքելութեան տարածման` ճանչման արժանացնելով այն կիներն ու տղամարդիկ, որոնք բացառիկ ազդեցութիւն ունեցած են մարդասիրական խնդիրներու լուծման համար», – ըսած է Մարգարիտ Պարանկիցէն:

Նամականիշը ունի 350 ՀՀ դրամ անուանական արժէք: Նամականիշին ձեւաւորողը  Ալլա Մինգալեօւան է` «Աւրորա»  նախաձեռնութենէն: Նամականիշը պիտի թողարկուի 40 հազար օրինակով:

Նամականիշին մարման արարողութիւնը տեղի պիտի ունենայ 2017-ի Մայիսին` Մարգարիտ Պարանկիցէի ներկայութեամբ, որ Երեւան պիտի ժամանէ` մասնակցելու 2017-ի «Աւրորա» մրցանակի  ձեռնարկներուն:

«Աւրորա» մրցանակի յաւակնորդներուն անունները պիտի յայտարարուին Ապրիլ 24-ին` Հայոց ցեղասպանութեան նահատակներու յիշատակի օրը: Յաւակնորդներէն մէկը Մայիս 28-ին Երեւանի մէջ պիտի ճանչցուի 2017-ի «Աւրորա» մրցանակի դափնեկիր: Ապրիլ 24-էն Մայիս 28 «Աւրորա» մարդասիրական նախաձեռնութիւնը աշխարհով մէկ պիտի  կազմակերպէ շարք մը ձեռնարկներ` ներկայացնելով մրցանակի 2017 թուականի յաւակնորդները ոգեշնչող պատմութիւնները, ինչպէս նաեւ մարդասիրական գործունէութիւնը աշխարհի մէջ:

Թուրքիոյ Բանակին Մէջ Սպաննուած Հայ Սեւակ Պալըքչըի Գործը Կը Քննէ Քաղաքացիական Դատարանը

Թրքական բանակին մէջ ծառայող, 2011 թուականի Ապրիլ 24-­ին սպաննուած հայ զինծառայող Սեւակ Պալըքչըի դատական գործը տեղափոխուած է քաղաքացիական դատարան: Այս մասին 168.am-ի փոխանցմամբ` կը յայտնէ թրքական «Հուրիէթ» պարբերականը:
Սեւակ Շահին Պալըքչըն թրքական բանակին մէջ սպաննուած է 2011 թ.Ապրիլ 24-­ին, երբ անոր զօրացրման մնացած էր ընդամէնը 23 օր: Զօրամասի հրամանատարութիւնը սպանութենէն անմիջապէս յետոյ յայտարարած էր, որ այն տեղի ունեցած է «Ծառայակից ընկերոջ հետ կատակելու ժամանակ` պատահաբար արձակուած գնդակէն»:

Սեւակի  ծնողները, սակայն, կը պնդեն, որ անոր սպաննած են հայ ըլլալուն համար:
Տիարպեքիրի ռազմաօդային ուժերու ռազմական դատարանը 2013 թուականի Մարտի 26-­ին որոշում  կայացուցած էր, համաձայն որուն` Սեւակի վրայ կրակած Քըւանչ Աղաօղլուն «մտադրուած մարդ սպաննելու»  մեղադրանքով դատապարտուած էր 4 տարի 5 ամիս 10 օր ազատազրկման, իսկ ենթասպայ Սետրեթթին Էրսեօզը «պաշտօնը չարաշահելու» հիմնաւորմամբ դատապարտուած էր 5 ամիս ազատազրկման: Որոշման հրապարակումէն յետոյ պատասխանող կողմի իրաւաբանները դիմած էին վերաքննիչ դատարան` վիճարկելով կայացուցած որոշումը:

Ռազմական գլխաւոր դատախազութիւնը 2014 թուականին վճիռ  արձակած էր այն մասին, որ սպանութեան կատարման մէջ դիտաւորութիւն չէ արձանագրուած, անբաւարար են փաստերը, որոնք կ´ապացուցեն սպանութեան դիտաւորութիւնը: Ուստի դատախազութիւնը չեղեալ  համարած էր Տիարպեքիրի դատարանի որոշումը:

Դատարան վերադարձած դատական գործը սկսած էր վերանայուիլ սկիզբէն: 2016 թուականի Յուլիս 15-­ի ռազմական յեղաշրջման փորձէն ետք  ընդունուած էր նոր հրամանագիր ռազմական դատարաններու վերացման մասին, ուստի Սեւակ Պալըքչըի դատական գործը փոխանցուած է Քոզլուքի քրէական դատարան:

 

Ցեղասպանութենէն Փրկուած Հայ Ընտանիքներուն Նուիրուած Շարք` Թրքական Թերթին Կողմէ

Թրքական «Karınca» թերթի կայքը ուշագրաւ նախաձեռնութեամբ հանդէս եկած է: Կայքին մէջ  պարբերաբար կը հրապարակուին Հայոց ցեղասպանութենէն մազապուրծ հայ ընտանիքներու պատմութիւններ` «Հայկական դիմանկարներ` 1915-էն մինչեւ այսօր» խորագիրով:

Ըստ «Արմենիհապեր»-ի՝ այս շարքի հերթական յօդուածը նուիրուած է նկարիչ, բեմադրիչ, գրող եւ երգիծաբան Վահէ Պէրպէրեանին: Յօդուածին հեղինակը Ուիլիըմ Պայրամեանն է, թրքերէն թարգմանած է Էզկի Կիւլը:

Շատերուն կողմէ առաւելապէս stand-up երգիծական ժանրի ելոյթներով յայտնի 61-ամեայ Վահէ Պէրպէրեան իր պատմութիւնները կը ներկայացն է նաեւ ֆիլմերու, թուղթի, կտաւի ու բեմի վրայ:

«Անոր ժպիտը շատ անկեղծ է: Խօսքը յաճախակի կ՛ընդմիջուի հայերէն «հոգիս» ջերմ բառով, բայց, ցաւօք, այդ շռայլ հմայքը կը հակադրուի ընտանիքի դժբախտ անցեալին»,- կը գրէ Պայրամեան` ներկայացնելով Վահէի ընտանիքին պատմութիւնը:

Վահէին հայրը` Րաֆֆին, դեռ մէկ տարեկան էր, երբ իր տատիկին հետ աքսորուեցաւ դէպի Սուրիոյ Տէր Զօրի (Տէր Զօր) անապատները` մահուան քայլերթի: Պէյրութ տեղափոխուելէն առաջ անոնք` երկուքով, հաստատած են Վահէի ծննդավայր Հալէպ:  Իսկ մօր ամբողջ ընտանիքը սպաննուած է Ցեղասպանութեան ժամանակ:

Պէրպէրեաններուն ընտանիքը, ի տարբերութիւն ցեղասպանութենէն փրկուած բազմաթիւ այլ ընտանիքներու, սերունդներէն չէ թաքցուցած իր գլխուն եկածը:

Վահէին տատիկը մահուան երթի ուղարկուելէ ետք երեք անգամ փորձած է սպաննել իր հայրը, սակայն Եփրատը այնքան լեցուն եղած է դիերով, որ ան ուղղակի չէ յաջողած խեղդել երեխան:

«Ինծի պատմած ու ըսած են` ահա, թէ իրականութեան մէջ ինչ տեղի ունեցած է: Եթէ չյիշես, մեզի դաւաճանած կ՛ըլլաս: Ատկէ ետք շատ երկար ժամանակ ես զիս մեղաւոր կը զգային, թէեւ ոչ մէկ այնպիսի բան ըրած էի, որուն համար պէտք է զիս մեղաւոր զգայի», – կը պատմէ Պէրպէրեան:

Անոր խօսքով` երգիծաբանութեամբ զբաղուելու անհրաժեշտութիւնը ծագած է նոյն այն պատճառով, որ իր վրայ կը կրէ հաւաքական ցաւի հետեւանքները, յաճախ ընկճուած ու մտահոգ կ՛ըլլայ։ «Եթէ երջանիկ ըլլայի, ալ ինչո՛ւ պիտի երգիծանքի կարիք զգայի», – կ՛աւելցնէ Վահէն:

17 տարեկանին Վահէ Պէրպէրեան կը լքէ Պէյրութը եւ կը մեկնի Եւրոպա: Որոշ ժամանակ անց ան կը վերադառնայ Լիբանան: Այստեղ ծագած քաղաքացիական պատերազմի առաջին տարիներուն ականատես կ՛ըլլայ, այնուհետեւ կը տեղափոխուի Լոս Անճելըս: Սակայն այստեղ ալ ապահովութեան զգացումը երկար չ՛ուղեկցիր անոր` կարճ ժամանակ անց բացայայտուած հիւանդութեան պատճառով:

«Կը յիշեմ, որ երեխայ ժամանակ ալ կը նկարէի, բայց այն ժամանակ հիմնականօրէն գանգեր կը պատկերէի` Տէր Զօրի մէջ մահացածներու գանգեր»,-  կը պատմէ արուեստագէտը:

Վահէին խօսքով` մինչեւ 1980 թուականը անոր որեւէ գործունէութեան մէջ գրեթէ միշտ առկայ է իւրատեսակ հետաքրքրութիւն մահով: Յետոյ ան գրեթէ կը գիտակցի այդ բնազդային հակումը եւ կը հասկնայ, որ թէեւ Ցեղասպանութիւնը իր կեանքին մէջ որոշ դեր  խաղցած է, բայց ատիկա չի նշանակեր, որ ինք կուրօրէն պէտք է կապուած ըլլայ Ցեղասպանութեան հետ, չուսումնասիրէ հայ մշակոյթի արմատները:

«Միտքիս մէջ լոյս մը ծագեցաւ. պէտք է փոխել այս մօտեցումը: Հայ ըլլալը անպայման չի նշանակեր կենաց պայքար մղել: Հայ ըլլալը սեռային է, հայ ըլլալը հրաշալի է, հայ ըլլալը զուարճալի է, հայ ըլլալը հաճելի է», – կ՛ըսէ Պէրպէրեան:

Այսպէս հայ մշակոյթը կը սկսի նաեւ ապրեցնելու ու առաջ երթալու ուժ տալուՊէրպէրեանին: Սակայն ան կը գիտակցի, թէ, այնուամենայնիւ, որքան դժուար է անցեալի բեռը ուսին առաջ շարժուիլը.  «1.5 միլիոն կեանք նստած է մեր ուսերուն եւ մենք կը փորձենք առաջ երթալ: Ատիկա , ի հարկէ, շատ դժուար է»:

Վահէն 5 գիրքի, 13 ներկայացման, 5 երգիծական ստեղծագործութեան եւ հարիւրաւոր արուեստի գործերու հեղինակ է:

«Հայ ըլլալը ինծի համար միշտ պարգեւ եղած է: Առանց բացառութեան միշտ հայ ըլլալուս հանգամանքը ինծի օգնած է», -կ՛ըսէ ան:

Վահէ Պերպերեան կը հաւատայ, որ հայ ազգի լաւագոյն օրերը դեռ առջեւ են: Ան կարեւոր կը համարէ այն, որ հայը հասկցած է. արուեստով զբաղուելու, ֆիլմ նկարահանելու համար պայման չէ դիմել ցեղասպանութեան թեմային:

Իսկ Ուիլիըմ  Պայրամեան իր յօդուածը կ՛եզրափակէ հետեւեալ տողերով. «Պերպերեան կը շարունակէ մէկ անձով մշակութային յեղափոխութիւն իրականացնել` ընդարձակ հայկական հողի ընդերքին մէջ  թաքնուած գեղեցկութիւններն ու արուեստը վեր հանելու եւ ատոր շուրջ շուրջպար բռնելու համար»:

Նոր Նամականիշ` Նուիրուած Ալեքսանտր Մանթաշեանի Ծննդեան 175-Ամեակին

2017 թուականի Մարտ 3-ին «Հայփոստ» ՓԲԸ-ի կողմէ շրջանառութեան մէջ դրուեցաւ  նամականիշ մը` նուիրուած «Ալեքսանտր Մանթաշեանի ծննդեան 175-ամեակը» թեմային: Այս մասին «Հայերն այսօր»-ին կը յայտնեն «Հայփոստ»-ի մամուլի ծառայութենէն:

Փոստային նամականիշը ձեւաւորուած է հին թղթադրամի տեսքով: Նամականիշին վրայ պատկերուած է հայ նշանաւոր գործարար, բարեգործ եւ 20-րդ դարասկիզբի խոշոր նաւթարդիւնաբերող Ալեքսանտր Մանթաշեան:

Նամականիշի խորապատկերին ներկայացուած են Ա. Մանթաշեանի միջոցներով կառուցուած Փարիզի Ելիսէյեան դաշտերուն մէջ գտնուող հայկական Սուրբ Յովհաննէս Մկրտիչ եկեղեցին եւ Թիֆլիսի հայ արուեստագէտներու միութեան շէնքի ճակատային մասը, որ այսօր Թիֆլիսի Ակադեմական Թատրոնի շէնքը կը  կրէ Ռուստաւելի անունը:

Փոստային նամականիշը ունի 380 դրամ անուանական արժէք: Նամականիշի հեղինակն է «Հայփոստ» ՓԲԸ-ի ձեւաւորող Վահագն Մկրտչեան:

Նամականիշի պաշտօնական մարումն իրականացուցին Հայաստանի Հանրապետութեան փոխադրութեան, կապի եւ տեղեկատուական արհեստաբանութիւններու նախարար Վահան Մարտիրոսեան, Հայաստանի արդիւնաբերողներու եւ գործարարներու միութեան նախագահ Արսէն Ղազարեան, Հայաստանի ֆիլաթելիսթներու միութեան նախագահ Յովիկ Մուսայէլեան եւ “Հայփոստ” ՓԲԸ-ի գլխաւոր գործադիր տնօրէնի պաշտօնակատար Հայկ Աւագեան:

1 2