Մեկնարկեցին Հայաստան-Սփիւռք 6-րդ Համահայկական Համաժողովի Նախապատրաստական Աշխատանքները

Ապրիլ 4-ին ՀՀ սփիւռքի նախարար Հրանոյշ Յակոբեանի գլխաւորութեամբ տեղի ունեցաւ 2017թ. Սեպտեմբերի 19-20 Երեւանի մէջ կայանալիք Հայաստան-Սփիւռք 6-րդ համահայկական համաժողովի նախապատրաստական աշխատանքներուն նուիրուած խորհրդակցութիւն:

«Հայերն այսօրի»-ի փոխանցմամբ` քննարկուեցան համաժողովի ձեւաչափին, թեմատիկ ընդգրկման, մասնակիցներու կազմին եւ կազմակերպչական խնդիրներուն առնչուող հարցեր:

Նախարարը նշեց, որ չափազանց կարեւոր է Հայաստանի, Արցախի եւ Սփիւռքի բոլոր կարող ուժերու, փորձագէտներու մասնակցութիւնը համահայկական նշանակութիւն ունեցող ձեռնարկին:

Կարեւոր համարուեցաւ Հայաստանի շահագրգիռ գերատեսչութիւններու ղեկավարներու աշխոյժ ներգրաւուածութիւնը համաժողովի աշխատանքներուն:

Կառուցուածքային ստորաբաժանումներու ղեկավարները ներկայացուցին իրենց առաջարկութիւններն ու նկատառումները, որոնք հաշուի առնելով` նախարար Հրանոյշ Յակոբեան ամբողջացուց համաժողովի թեմատիկ ուղղութիւնները, նշելով, որ աշխատանքները պէտք է ընթանան ներդրումներու ներգրաւման, հայապահպանութեան, Սփիւռքի երիտասարդութեան, մշակութային խնդիրներու լուծման, արցախեան հիմնախնդիրի եւ ժողովրդական դիւանագիտութեան, հակահայկական քարոզչութեան դէմ պայքարի ուղղութեամբ:

Յանձնարարուեցաւ սփիւռքեան կառոյցներուն հետ համագործակցելով` մշակել համաժողովի ծրագիրի նախագիծը եւ սկսիլ հերթականութեամբ իրականացնել անհրաժեշտ նախապատրաստական քայլեր:

Լուսաւորիչի Շնորհաբաշխ Աջը Անգամ Մը Եւս Օրհնեց, Սրբեց Ու Լուսաւորեց Ուխտաւորներու Բազմութիւնը

Տարիներու աւանդութեան համաձայն, Մեծի Տանն Կիլիկիոյ կաթողիկոսութիւնը նշեց հայ ժողովուրդի հաւատքի հօր` Ս. Գրիգոր Լուսաւորիչ հայրապետին չարչարանքներն ու Խոր վիրապ մուտքի յիշատակի օրը: Յատուկ նշանակութիւն ունի Կիլիկեան Ս. աթոռին համար այս տօնը, որ 86 տարիներ առաջ` 1931-ին, Սահակ Բ. Խապայեան կաթողիկոսի հայրապետական կոնդակով հաստատուած է իբրեւ «Անթիլիասի ուխտի օր»:

Արդարեւ, կիրակի, 2 ապրիլ 2017-ի առաւօտուն, նախագահութեամբ Արամ Ա. վեհափառ հայրապետին, վեհարանի դահլիճէն սկիզբ առաւ հայրապետական թափօրը, որուն առջեւէն կ՛ընթանար Մեծի Տանն Կիլիկիոյ կաթողիկոսութեան հոգեւոր հարստութիւնը նկատուող սրբազան մասունքներու արկղը: Օրուան պատարագը մատուցեց եւ յաւուր պատշաճի քարոզեց Լիբանանի հայոց թեմի առաջնորդ Շահէ եպս. Փանոսեան: Պատարագին ու թափօրին իրենց մասնակցութիւնը բերին միաբան հայրեր, դպրեվանեցիներ, Լիբանանի հայոց թեմի քահանայից դասը, կիրակնօրեայ դպրոցներու աշակերտներ եւ հաւատացեալներու հոծ բազմութիւն մը: Ս. պատարագի երգեցողութիւնը կատարեց Մեծի Տանն Կիլիկիոյ կաթողիկոսութեան «Շնորհալի» երգչախումբը` ղեկավարութեամբ Գարեգին վրդ. Շխրտըմեանի:

Պատարագի ընթացքին սրբազան հայրը իր քարոզին մէջ նախ եւ առաջ խօսեցաւ Ս. Գրիգոր Լուսաւորիչ հայրապետի նախավիրապեան կեանքին եւ ընդհանուր պատմական ակնարկ մը նետեց անոր կեանքին ու գործունէութեան մասին: Սրբազան հայրը իր խօսքին մէջ նշեց, որ «մեր եկեղեցին ծնունդ առաւ Խոր Վիրապի չարչարանքներէն ու պատմութեան ընթացքին բազմիցս մեր ժողովուրդը ինկաւ այդ Խոր Վիրապին մէջ, սակայն Լուսաւորիչի ծնունդ տուած հաւատքով ու լոյսով կրցաւ վեր բարձրանալ ու յաղթանակել: Հայ Ժողովուրդը իր պատմութեան ընթացքին կրցաւ այդ Խոր Վիրապն ու անոր չարչարանքները յաղթահարել` շնորհիւ Լուսաւորիչի փոխանցած Քրիստոսի հաւատքին»: Առաջնորդ սրբազանը շեշտեց նաեւ սրբութեան կարեւորութիւնը` յայտնելով, որ առանց սրբութեան ազգ մը կը դառնայ անդիմագիծ եւ նոյն այդ սկզբունքին հետեւելով է, որ հայ ժողովուրդը գիտցած է միշտ վառ պահել իր սուրբերուն յիշատակը եւ ընդգծեց այդ սրբութիւններու լոյսին տակ նոր սերունդը դաստիարակելու անհրաժեշտութիւնը:

Պատարագի աւարտին, հանդիսապետութեամբ Արամ Ա. վեհափառ հայրապետին, միաբան հայրերը, Լիբանանի հայոց թեմի քահանայից դասը, դպրեվանեցիներն ու հաւատացեալներու հոծ բազմութիւնը մասնակից դարձան հայ ժողովուրդի հաւատքի հօր` Ս. Գրիգոր Լուսաւորիչ հայրապետին լուսաւորող Աջով առաջնորդուող աւանդական թափօրին: Յայտնենք, որ Ս. Գրիգոր Լուսաւորիչ հայրապետի Ս. Աջին կողքին հաւատացեալ ժողովուրդը օրհնուեցաւ նաեւ եկեղեցւոյ մեծագոյն սուրբերէն` Ս. Սեղբեստրոս եւ Ս. Նիկողայոս հայրապետներու Աջերով, ինչպէս նաեւ Մեծի Տանն Կիլիկիոյ կաթողիկոսութեան «Կիլիկիա» թանգարանը ի պահ դրուած այլ սրբազան մասունքներով:

Հաւատացեալ ժողովուրդը երկիւղածութեամբ ու ջերմեռանդ հաւատքով համբուրեց վեհափառ հայրապետին ձեռամբ առաջնորդուող Ս. Լուսաւորչի Աջը` հայցելով բժշկութիւն, բարեխօսութիւն եւ լուսաւորութիւն:

Սրբազան թափօրի աւարտին, Արամ Ա. կաթողիկոս միաբան հայրերու ընկերակցութեամբ բարձրացաւ Ս. Խորան, ուր Ս. Գրիգոր Լուսաւորիչ հայրապետի սրբազան Աջով կատարեց ջրօրհնէքի արարողութիւնը, որմէ ետք մայր տաճարի խորանին վրայ դրուեցան Ս. Գրիգոր Լուսաւորիչ հայրապետին, Ս. Սեղբեստրոս եւ Ս. Նիկողայոս հայրապետներուն աջերը, որոնք միաբան հայրերու հսկողութեան տակ այդտեղ մնացին մինչեւ ուշ երեկոյ:

ՔԱՀԱՄի Եզրափակման Հանդիսութեան Կատարուեցաւ Նաւասարդեան 42րդ Մարզախաղերու Բացումը

Ասպարէզ-ՀՄԸՄի Արեւմտեան Ամերիկայի Շրջանային վարչութեան մարզական խորհուրդը, գեղեցիկ աւանդութեան մը համաձայն, ամէն տարի Նոյեմբերէն մինչեւ յաջորդ տարուան Մարտ ամիսներուն կը կազմակերպէ Քալիֆորնիոյ Հայ աշակերտական մարզախաղեր (ՔԱՀԱՄ)՝ պասքեթպոլի, ոտնագնդակի (սաքըր), փինկ-փոնկի, վոլիպոլի, թեթեւ աթլեթի եւ ճատրակի մարզաձեւերուն մէջ: Անկասկած, որ ՔԱՀԱՄը իբրեւ գլխաւոր նպատակ կը հետապնդէ հայկական վարժարաններու աշակերտութեան մէջ արմատացնել մրցակցութեան ոգին: Միաժամանակ, այս մրցումներուն մասնակցող հայ աշակերտութիւնը կը ծանօթանայ ՀՄԸՄին ու անոր առաքելութեան:

Ահաւասիկ, երկար ամիսներու գեղեցիկ մրցակցութեամբ շրջանը ոգեւորելէ ետք, Կիրակի, 19 Մարտ 2017ին, կէսօրէն ետք ժամը 4:30ին, «Պըրմինկհեմ Հայ Սքուլ»ի գլխաւոր մարզադաշտին վրայ, յատուկ հանդիսութեամբ մը եզրափակուեցաւ ՀՄԸՄի 33րդ ՔԱՀԱՄը՝ բազմաթիւ համակիրներու ներկայութեամբ:

Նոյն հանդիսութեան ընթացքին, նաեւ պաշտօնապէս բացումը կատարուեցաւ ՀՄԸՄի Նաւասարդեան 42րդ մարզախաղերուն, եւ հանրութեան ներկայացուեցան այս տարի անոնց պատուոյ նախագահութիւնը ստանձնած՝ շրջանէս ներս հանրածանօթ ՀՄԸՄականներ տէր եւ տիկ. Վիգէն եւ Նոնօ Աբէլեանները:

Օրուան խօսնակներն էին վաստակաւոր ՀՄԸՄականներ Թալին Աբանեանն ու Մուշեղ Պետեւեանը, որոնք բարի գալուստ մաղթեցին ներկաներուն եւ ներկայացուցին օրուան պաշտօնական հիւրերը, որոնց կարգին էին թեմի առաջնորդ Մուշեղ արք. Մարտիրոսեանի ներկայացուցիչ Վազգէն քհնյ. Աթմաճեան, ՀՄԸՄի Կեդրոնական վարչութեան անդամներ Վիգէն Դաւիթեան եւ Անդրանիկ Պահարեան, ՀՅԴ Կեդրոնական կոմիտէի ներկայացուցիչ եւ ՀՄԸՄական Կարօ Իսբէնճեան, Նաւասարդեան մարզախաղերու անցեալի պատուոյ նախագահ՝ տէր եւ տիկ. Սարգիս եւ Սիւզան Կիտցինեաններ եւ Ճորճ Ժամկոչեան, ինչպէս նաեւ քոյր կազմակերպութիւններու ներկայացուցիչներ, ՔԱՀԱՄի մասնակից վարժարաններու տնօրէններ, ուսուցիչ-ուսուցչուհիներ, բազմաթիւ ծնողներ, մարզասէր համակիրներ եւ ՀՄԸՄականներ:

Շրջանի ՀՄԸՄի հակիրճ պատմականը ներկայացնելէ ետք, ներկաները հրաւիրուեցան վայր-կեան մը յոտնկայս՝ յարգելու յիշատակը Հայոց Ցեղասպանութեան զոհ գացած մէկուկէս միլիոն սրբացած նահատակներուն: Հանդիսութիւնը սկիզբ առաւ դրօշակի արարողութեամբ. մարզադաշտ ներկայացաւ ՀՄԸՄի փողերախումբը, որ իր ազգայնաշունչ քայլեղանակներով մեծ ոգեւորութիւն ստեղծեց ներկաներուն մօտ: «Սիփան» մասնաճիւղի խմբապետուհի Դալար Գալստեանի գլխաւորութեամբ, դրօշակի տպաւորիչ արարողութիւնը կատարեցին ՀՄԸՄի Արեւմտեան շրջանի արի-արենուշները, որոնք ինքնավստահութեամբ ներկայացուցին Ամերիկայի, Հայաստանի, Արցախի, Քալիֆորնիոյ եւ ՀՄԸՄի դրօշները: Ամերիկայի, Հայաստանի եւ ՀՄԸՄի քայլերգները եւս նուագեց ՀՄԸՄի նուագախումբը:

Հիւսիսային Ամերիկայի Արեւմտեան թեմի առաջնորդ Մուշեղ արք. Մարտիրոսեանի հայրական բարեմաղթանքներն ու օրհնութիւնները փոխանցեց Կլենտէյլի Ս. Աստուածածին եկեղեցւոյ հոգեւոր հովիւներէն Վազգէն Ա. քհնյ. Աթմաճեան, որ ներկաները հրաւիրեց միասնաբար կատարելու Տէրունական աղօթքը, շնորհաւորեց ՔԱՀԱՄի մասնակիցները եւ յաջողութիւն մաղթեց բոլորին:

Յանուն ՔԱՀԱՄի մասնակցող վարժարաններու տնօրէններուն՝ խօսք առաւ Արի Կիրակոս Մինասեան Ազգ. վարժարանի տնօրէնուհի Սանան Շիրինեան, որ շնորհաւորեց ՔԱՀԱՄի 33րդ մարզախաղերը եւ շնորհակալութիւն յայտնեց ծնողներուն, որոնք իրենց զաւակները կը վստահին հայկական դպրոցներուն ու կազմակերպութիւններուն, ընգծելով անոնց կարեւորութիւնը. «Այնքա՛ն ատեն, որ իբրեւ հայ կ՛ապրինք եւ մանաւա՛նդ՝ որոշած ենք հայօրէ՛ն ապրիլ, ՀՄԸՄը եւ հայկական վարժարանները պիտի ապրին մեր մէջ, որովհետեւ հո՛ս է, ուր կը կրթենք եւ կը կերտենք երիտասարդութեան մէջ ազնիւ եւ հզօր նկարագիր», ըսաւ ան։

Շրջանային վարչութեան պատգամը փոխանցեց Մարզական խորհուրդին մօտ Շրջ. վարչութեան ներկայացուցիչ Արամ Թոմաս, որ բացատրելով ՔԱՀԱՄի կազմակերպման նպատակը՝ ըսաւ. «33 տարիներէ ի վեր, ՀՄԸՄը, շրջանի հայկական վարժարաններուն հետ միասին, յաջողութեամբ կը կազմակերպէ ՔԱՀԱՄի գեղեցիկ այս մարզախաղերը՝ համախմբելով բազմահարիւր աշակերտ-աշակերտուհիներ, մրցակցելու մեծ ոգեւորութեամբ տարբեր մարզաճիւղերու մէջ, եւ մարզական մաքուր ու առողջ միջավայր մը ստեղծելու հայ աշակերտութեան համար: Այսօրուան յաղթանակները արդար յաղթանակներ են, որոնց համար գնահատելի են ՔԱՀԱՄին մասնակցող աշակերտական բոլոր խումբերուն եւ անհատ աշակերտներուն ճիգերը, որոնք միշտ լաւագոյնին կը ձգտին: Կը հաւատանք, թէ «Բարձրացիր, Բարձրացուր» նշանաբանին կառչած մնալով՝ շարունակ պիտի յաջողինք կազմակերպել այսպիսի արարքներ, որոնք հայ աշակերտութեան կ՛ապահովեն մարզական առողջ միջավայր մը»: Ան յատուկ շնորհակալութիւն յայտնեց վարժարաններու մարզիչներուն, իրաւարարներուն եւ յատկապէս ծնողներուն, որոնց տրամադրած անսահման ժամանակին եւ քաջալերանքին շնորհիւ, իրականացան աշակերտական այս մարզախաղերը: Նաեւ, ան բարձր գնահատեց մեր սերունդները հայօրէն դաստիարակող եւ հայութիւնը պահպանող կրթական բոլո՛ր օճախները, անոնց տնօրէններն ու ուսուցչական կազմերը, եւ վստահեցուց, որ ՀՄԸՄը անոնց թիկունքին կը մնայ:

Այնուհետեւ, Շրջանային վարչութեան ատենապետ Մանուէլ Մարսէլեան ներկայացուց ՀՄԸՄի Նաւասարդեան 42րդ մարզախաղերու պատուոյ նախագահութիւնը ստանձնող ՀՄԸՄական զոյգը՝ տէր եւ տիկ. Վիգէն եւ Նոնօ Աբէլեանները, եւ հրաւիրէց զանոնք կատարելու պաշտօնական բացումը: Այսպէս, փողերախումբի թմբուկներու ոգեւորիչ հարուածներուն ներքոյ վեր բարձրացաւ Նաւասարդեանի խորհրդանիշը, իսկ եղբ. Վիգէն Աբէլեան պաշտօնապէս բացուած յայտարարեց ՀՄԸՄի Նաւասարդեան 42րդ մարզախաղերը՝ խլելով ներկաներուն երկարաշունչ ծափողջոյնները:

Ոգեւորիչ այս մթնոլորտին յաջորդեց այնքան անհամբերութեամբ սպասուած աշակերտական շքերթը, գլխաւորութեամբ՝ վարժարաններու տնօրէններուն եւ մարզիչներուն: ՀՄԸՄի փողերախումբի խրախուսիչ քայլեղանակներով եւ իրենց վարժարանին անունը կրող ցուցատախտակով տողանցելով՝ հպարտօրէն դաշտ մուտք գործեցին Ազգ. Ռոզ եւ Ալէք Փիլիպոս, Ազգ. Արի Կիրակոս Մինասեան, Հայ Քոյրերու, ՀԲԸՄի Մանուկեան-Տեմիրճեան», Ազգ. Մեսրոպեան, Մերտինեան, Ազգ. Շամլեան, Սահակ-Մեսրոպ եւ Ազգ. Սրբոց Նահատակաց Ֆերահեան վարժարաններու աշակերտութիւնը. ներկաներու երկարաշունչ ծափողջոյններուն արժանանալէ ետք, անոնք գրաւեցին իրենց տեղերը մարզադաշտին վրայ, ուր տեղի ունեցաւ ՔԱՀԱՄի մարզաճիւղերու ընդհանուր դասաւորման ախոյեանութեան բաժակներու յանձնումը:

Առաջնութեան տիրացած խումբերու ներկայացուցիչները հպարտութեամբ ստանձնեցին իրենց յաղթանակի բաժակները՝ արժանանալով ներկաներու քաջալերական բուռն ծափողջոյններուն: Ընթացքին, Շրջանային վարչութեան ատենապետ Մանուէլ Մարսէլեան ՔԱՀԱՄի մասնակցած իւրաքանչիւր վարժարանի տնօրէնին յանձնեց յուշատախտակ մը, առ ի գնահատանք ՔԱՀԱՄի 33րդ մարզախաղերու մասնակցութեան եւ հայ աշակերտութեան առողջ միջավայր մը ստեղծելու կարեւոր գործին աջակցած ըլլալուն համար:

Յայտագիրի վերջին բաժինով ելոյթ ունեցաւ ՀՄԸՄի Երիտասարդական բաժանմունքէն Վարանդ Աւանէսեան, որ հակիրճ կերպով ՀՄԸՄի Երիտասարդական բաժանմունքը ներկայացնելէ ետք՝ ժողովրդական երգերու փունջ մը հրամցուց, աննախընթաց մթնոլորտ մը ստեղծելով մարզադաշտին մէջ: Խանդավառ այս մթնոլորտին մէջ հանդիսութիւնը վերջ գտաւ երեկոյեան ժամը 5:30ին, գեղեցիկ յիշատակներ արձանագրելով աշակերտութեան ու զանոնք մարզող ղեկավարներու յիշողութեան մէջ:

Ստորեւ՝ մարզաճիւղերու ընդհանուր դասաւորման մէջ ախոյեան հանդիսացած վարժարանները. (ՔԱՀԱՄի ամբողջական արդիւնքները կարելի է գտնել ՀՄԸՄի www.homenetmen.net կայքին վրայ)

Պասքեթպոլ

Ա.- Շամլեան Ազգ. վարժարան

Բ.- Սրբոց Նահատակաց Ֆերահեան Ազգ. վարժարան

Գ.- Ռոզ եւ Ալէք Փիլիպոս Ազգ. Վարժարան

Ֆութպոլ

Ա.- ՀԲԸՄ Մանուկեան-Տեմիրճեան վարժարան

Բ.- Շամլեան Ազգ. վարժարան

Գ.- Ռոզ եւ Ալէք Փիլիպոս Ազգ. վարժարան եւ Սրբոց Նահատակաց Ֆերահեան Ազգ. վարժարան

Վոլիպոլ

Ա.- Շամլեան Ազգ. վարժարան

Բ.- Ռոզ եւ Ալէք Փիլիպոս Ազգ. վարժարան եւ Սրբոց Նահատակաց Ֆերահեան Ազգ. վարժարան

Գ.- ՀԲԸՄ Մանուկեան-Տեմիրճեան վարժարան

Թեթեւ Աթլեթ

Ա.- Սրբոց Նահատակաց Ֆերահեան Ազգ. վարժարան

Բ.- Շամլեան Ազգ. վարժարան

Գ.- ՀԲԸՄ Մանուկեան-Տեմիրճեան վարժարան

Փինկ-Փոնկ

Ա.- Սրբոց Նահատակաց Ֆերահեան Ազգ. վարժարան

Բ.- Ռոզ եւ Ալէք Փիլիպոս Ազգ. վարժարան

Գ.- ՀԲԸՄ Մանուկեան-Տեմիրճեան վարժարան

Ճատրակ

Ա.- Սրբոց Նահատակաց Ֆերահեան Ազգ. վարժարան

Բ.- Ռոզ եւ Ալէք Փիլիպոս եւ Շամլեան Ազգ. վարժարաններ

Գ.- ՀԲԸՄ Մանուկեան-Տեմիրճեան վարժարան

Դպրոցական ոգիի (Spirit Trophy) բաժակին արժանացաւ Սրբոց Նահատակաց Ֆերահեան Ազգ. վարժարանը, Մարզական ոգիի (Sportsmanship Trophy) բաժակին՝ Հայ Քոյրերու վարժարանը, իսկ

Նուաճման բաժակին (Achievement Trophy)՝ Մեսրոպեան Ազգ. վարժարանը։

Անաւարտ Երազներ. Նուիրուած՝ 12ամեայ Վաղինակ Գրիգորեանին, որ մահացաւ Արցախի Քառօրեայ պատերազմին

Նուիրուած՝ 12ամեայ Վաղինակ Գրիգորեանին, որ մահացաւ դպրոցի ճամբուն վրայ, Ատրպէյճանական վայրի յարձակման պատճառով, 2016ի Արցախի Քառօրեայ պատերազմին

Անհերքելի ճշմարտութիւն մըն է, որ մարդ կերտելու առաջին սանդխամատը կը հանդիսանայ պատանեկութիւնը: Այդ տարիներուն, ան կը սկսի սորվելու, թէ ինք մաս կը կազմէ իր նմաններէն բաղկացած ուրիշ անձերու խումբին, որ ան կը պատկանի ժողովուրդի մը, ազգի մը:

Այդ պատանեկան տարիներուն է, որ կը սկսի զարգանալու բարոյական, գաղափարական, մտային եւ ֆիզիքական ձեւերով ու ստանալու ազգային կրթութիւնն ու դաստիարակութիւնը:

12 տարեկան էի, երբ 7րդ դասարան էի: Շատ բան չեմ յիշեր այդ տարիներէն, սակայն գիտեմ, որ լաւ տարի մըն էր: Երբ կը նայիմ 7րդ դասարանի Ռոզ եւ Ալէք Փիլիպոս Ազգային վարժարանի աշակերտներուս, կը տեսնեմ կեանքով լեցուն, վառվռուն աչքերով, բարի սիրտով, անմեղ խաղերով եւ երբեմն չարաճճի պարման-պարմանուհիներ: Եւ անպայմանօրէն աշխարհի շուրջ բոլոր 12ամեայ պատանիներն ալ նոյնը պիտի ըլլային: Այդ տարիներուն է, որ պատանին կը սկսի մտածելու իր ապագային մասին: Արդեօք ըլլա՞լ բժիշկ թէ օդաչու, ըլլալ ուսուցիչ կամ քիմիագէտ: Կը յիշեմ ամէն օր նոր երազներու ցանկութեամբ ծնողքիս կը ներկայանայի նոր գաղափարով եւ մասնագիտութեամբ:

Աշխարհին քառորդը կ՛ապրի այս մանկութեան լաւագոյն օրերը, իսկ ժողովուրդին կէսը կը փնտռէ այդ անվերադարձ օրերը: Սակայն կայ մասնիկ մը, որ ունեցաւ ճմլուած մանկութիւն մը:

Գիշերները քունի չեն անցնիր «Օրոր բալա» երգի մեղեդիին տակ, այլ կրակոցներու ձայներուն տակ: Օրերը մէկ կողմէ տխրութիւն, եւ երբեմն ալ ուրախութիւն կը պատճառեն: Կը տեսնեն սիրելիներու կորուստները, տուներու քանդումը, եւ շրջաններու աւերումը, իսկ միւս կողմէ կը զգան յաղթանակի զգացումը, մահէն չվախնալու զգացումը, եւ միասնական ուժի կարեւորութիւնը:

Ինչպէ՞ս կրնանք սփոփել սիրտը այդ մօր, որ ապրեցաւ իր 12 տարեկան զաւակէն առաւել երկար տարիներ: Ի՞նչ կրնանք ըսել անոր հօր, որպէսզի փորձենք մխիթարել այդ վիրաւոր սիրտը, կամ ամոքել անոր եղբօր վիշտը: Ո՞ւր ես Վաղինակ: Ո՞ւր են քեզի նման այդ հազարաւոր մանչուկներն ու պատանիները, որոնք աշխարհի ամէնէն դժբախտ մարդիկը եղան, որովհետեւ չկրցան իրականացնել իրենց երազները: Ո՞վ գիտէ ինչ պիտի ըլլար քու ճակատագիրը: Արդեօք նախարար կամ ճարտարապետ, ատամնաբոյժ կամ ուսուցիչ: Կեանքդ քեզմէ խլեցին: Չունեցար իրաւունքը ապրելու, ճամբորդելու կամ սիրելու: Հայրենիքիդ բանակին մէջ ծառայելէ առաջ, արդէն թշնամին յափշտակեց նորահաս կեանքդ, կտրելով կեանքիդ երազներն ու փափաքները:

Գործը շատ էր, եւ դուն ընելիք պիտի ունենայիր, շա՜տ:

Ամէն սրբազան առիթով ազգովին կը խոնարհինք խորանի մը առջեւ: Այդ նոյն խորանը կրցած է տոկալ հազարամեակներ շարունակ: Այո, կրնայ ըլլալ ապառաժեայ խորան մը ըլլալ, բայց մինջեւ ե՞րբ պիտի կրնայ դիմանալ: Ա՞յս է մեր ճակատագիրը: Միշտ պէտք է ազգովին սուգի մէջ ըլլա՞նք: Պէտք է այլեւս պա՞րզ ըլլայ ամէն օր զինուոր կորսնցնելը:

Սիրելի երիտասարդ,

Դաշտը մեզի է. ոտքի ելլե՛նք, ոտքի հանե՛նք նաեւ մեր շրջապատը, մեր գաղափարական, կարգապահական եւ մարտական ոգիով խանդավառե՛նք երիտասարդութիւնը: Մենք պէ՛տք է տոգորենք, պէ՛տք է համոզենք եւ պէ՛տք է ուղղենք մեր շուրջիները՝ դէպի Հայաստան, Արցախ, æաւախք, Նախիջեւան եւ Արեւմտահայաստան: Վաղինակին անաւարտ երազները մենք պիտի շարունակենք:

Սիրելի Վաղինակ,

Դասընկերներդ կը փնտռեն բարի ժպիտդ, սրամիտ խօսքերդ, եւ համակ եռանդդ: Ես քեզ չեմ ճանչնար, բայց ես ալ կը փնտռեմ քեզ: Կը փնտռեմ, որովհետեւ աչքերուդ ընդմէջէն կը տեսնեմ

բարեսիրտ հոգիդ, վարակիչ հայրենասէր կեցուածքդ, ու աշխատասէր աշակերտն ու տիպար պատանին: Գիտեմ, որ երբեք պիտի չկարենանք սփոփել մեր սիրտերը, բայց երբ 12աեայ Հայ աշակերտի մը աչքերուն մէջ նայիմ, կը տեսնեմ քեզմէ փոքր մասնիկ մը, ազգային արժէքներու հանդէպ ցուցաբերած պաշտպամունքի կեցուածքը:

Վաղինակ, ափսոս որ ֆիզիքապէս ներկայ չես: Բայց դուն կ՛ապրիս մեր մէջ: Քու կարճատեւ կեանքը, մեր նահատակներուն կտակը, եւ մեր սրբազան խենթերու կանչը նոյն պատգամները կը փոխանցեն: Ըլլալ զգօն եւ տիպար, սիրել մեր ժողովուրդը, եւ կարելին ընել, որպէսզի ստեղծագործ ճիգերով ու նուաճումներով հզօրացնենք մեր հայրենիքը:

Վաղինակ, դուն չունեցար այդ իրաւունքը, բայց քեզի կը վստահեցնեմ որ հազարաւոր պատանիներ, «Փիլիպոս»էն մինջեւ Արցախի քու դպրոցը, յիշատակդ վառ պիտի պահեն ու քու կողմէդ ալ իրենց ուժերն ու ճիգերը պիտի բազմապատկեն՝ իրենց նուիրաբերելու կարողութիւնը եւ զօրացնեն մեր երկիրը:

Սիրելի՛ Վաղինակ, անվէրք ու առանց ցաւի սաւառնիր յաւերժութեանդ մէջ:

ՎԵՐԺԻՆԻ ԹՈՒԼՈՒՄԵԱՆ

Ասպարէզ

Հայ Գործարար Կին. Քերոլին Ռաֆայէլեան

Քերոլին Ռաֆայէլեանն ամենայաջողակ եւ հարուստ կին գործարարների շարքում 22րդն է ճանաչուել ԱՄՆում՝ ըստ «Ֆորբս»ի (Forbes) վարկանիշային ցուցակի: Ամերիկահայ դիզայներ Ռաֆայէլեանը, ում կարողութիւնը գնահատւում է 700 մլն. դոլար, ինքնուրոյն է հասել նման յաջողութեան:

2004թ.ին Քերոլին Ռաֆայէլեանն իր երկու դուստրերի անունով հիմնել է Ալեքս եւ Անի  (Alex&Ani) ոսկերչական ընկերութիւնը՝ ստանձնելով նաեւ Ռոդ Այլենդում գտնուող հօր ոսկերչական գործարանի զարգացմանն ուղղուած աշխատանքները: Հայազգի դիզայները սկսել է կենդանակերպի նշաններով թեւնոցներ արտադրել, որոնք դարձել են նրա ապրանքանիշի հիմնական արտադրանքը: Աստղակերպի նշանների պատկերներով ապարանջաններով յայտնի դարձած ընկերութիւնն ունի 65 խանութ: Ընկերութեան եկամուտը 2015թ. կազմել է շուրջ 500 միլիոն դոլար:

Alex&Ani ոսկերչական ընկերութեան գլխաւոր նշանաբաններից է երկրագնդի եւ իւրաքանչիւր բնակչի բարեկեցութեան մասին հոգատարութիւնը: Ընկերութիւնը հիմնականում օգտագործում է վերամշակուած նիւթեր, այդ թւում՝ մետաղի ջարդօնէ ստեղծելով էկոլոգիապէս մաքուր զարդեր:

Ռաֆայէլեանը նաեւ Ռոդ Այլենդի գինեգործական «Carolyn՛s Sakonnet Vineyard» ընկերութեան սեփականատէրն է, ունի սրճարան («Teas and Javas»): Հայազգի գործարար կինը Ռոդ Այլենդի Նիւպորտ քաղաքում գտնուող «Belcourt of Newport» պատմական թանգարանի սեփականատէրն է:

Այս մասին կը յայտնէ Ասպարէզ:

Լրագրող Վահէ Գրիգորեան՝ «Էյ.Փի.»ի Մրցանքի Լաւագոյն Տասնեակին Մէջ

Ամերիկեան «Էյ.Փի.» լրատու գործակալութեան մարզական լրատուութեան բաժանմունքի խմբագիրներուն արժեւորումով, Միացեալ Նահանգներու տարածքին մարզական առաջին 10 յօդուածագիրներու շարքին դասուած է նաեւ «Քենզըս Սիթի Սթար» օրաթերթի լրագրող Վահէ Գրիգորեանը։

Խմբագիրները նկատի առած են առնուազն 175,000 բաժանորդ ունեցող օրաթերթերուն լրագրողները։

Նշենք, որ Վահէ Գրիգորեան Պէյրութ ծնած է, իսկ անգլերէնի (պսակաւոր) եւ լրագրութեան (մագիստրոս) վկայականները ստացած է՝ յաջորդաբար Փենսիլվանիոյ եւ Միզուրիի համալսարաններէն։ 2000ին, ան «Փուլիցըր» մրցանակի թեկնածու եղած է։ Գրած է Ողիմպիական 10 խաղերու եւ Միացեալ Նահանգներու համալսարանական պասքեթպոլի «Ֆայնըլ Ֆոր» 20 մրցաշարքերու մասին՝ բազմաթիւ այլ մրցաշարքերու եւ շարք մը այլ մրցումներու կողքին։ Ան նաեւ հեղինակ է երկու հատորներու։

Այս մասին կը յայտնէ Ասպարէզ:

Մեծի Տանն Կիլիկիոյ Կաթողիկոսութիւնը Կ’առաջարկէ Եւրոպական Դատարանին Արագացնել Սիսի Դատին Ընթացքը

Յանուն Ն.Ս.Օ.Տ.Տ. Արամ Ա. Կաթողիկոսին, Եւրոպայի Մարդկային Իրաւանց Դատարանին գրաւոր հայց ներկայացնելով, Սիսի Կաթողիկոսարանի վերադարձի դատին Իրաւական Յանձնախումբը Եւրոպական Դատարանէն պահանջեց՝ Առաջին, 7 Դեկտեմբեր 2016-ին իրեն ներկայացուած Սիսի Կաթողիկոսարանի դատական թղթածրարը Թուրքիոյ դատարանին չյղել, նկատի ունենալով՝ Թուրքիայէն ներս պարզուած անորոշ վիճակը, դատական-իրաւական օրէնքներուն խախտումը, ապօրէն վերաբերումը դատաւորներու ու փաստաբաններու նկատմամբ, եւ ընդհանրապէս տիրող բռնատիրական կացութիւնը։ Արդարեւ, մտահոգիչ կացութիւն մը, որուն նկատմամբ, ինչպէս կը յիշեցնէ Իրաւական Յանձնախումբի հայցը, Եւրոպայի Խորհուրդի Մարդկային Իրաւանց Յանձնաժողովի ներկայացուցիչը, 15 Փետրուարին, եւ վենետիկի Յանձնաժողովը, 13 Մարտին, իրենց մտավախութիւնը յայտնած էին, բազմաթիւ այլ երկիրներու ու կազմակերպութիւններու շարքին։

 Երկրորդ, իրաւական յանձնախումբը նաեւ կ’առաջարկէ արագացնել Սիսի Կաթողիկոսարանի դատավարութիւնը Եւրոպական Դատարանի 61-րդ յօդուածին համաձայն. նկատի ունենալով Թուրքիոյ կողմէ անոր մերժումը, ինչպէս նաեւ դատին ներկայացուցած կարեւորութիւնը հայ եկեղեցւոյ ու հայ ժողովուրդին համար։

 Յայտնենք, որ Իրաւական Յանձնախումբը Վեհափառ Հայրապետին գլխաւորութեամբ մօտէն կը հետեւի Սիսի դատին առնչուած աշխատանքներուն։

Արամ Ա. Վեհափառ «Կիլիկեան Ասպետ»ի շքանշան կը շնորհէ Ս. Յակոբ Ազգային Վարժարանի բարերար Կարօ Տոնոյեանին

Շաբաթ, 1 Ապրիլ 2017-ին, Առաջնորդ Սրբազան Հայրը նախագահեց Մոնթրէալի Ս. Յակոբ Ազգային Վարժարանի տարեկան ճաշկերոյթին։

Ճաշկերոյթի աւարտին, Առաջնորդ Սրբազան Հայրը իր փակման խօսքին մէջ գնահատեց Վարժարանի բոլոր բարերարները, պատասխանատուները, կրթական մշակները եւ Ճաշկերոյթի կազմակերպիչ յանձնախումբը։ Շեշտեց Հայ Դպրոցի առաքելութեան կարեւորութիւնը եւ ան ըսաւ. «Հայ Դպրոցը այն առողջ մթնոլորտն է, ուր հայ պատանիին մէջ կ՚արթնցնէ այն գիտակցութիւնը, որ ինք հայ ազգի զաւակ է, ունի լեզու, պատմութիւն եւ մշակոյթ, որուն տէրը եւ պահապանը պիտի ըլլայ։ Մէկ խօսքով, Հայ Դպրոցը գրաւականն է վաղուան առողջ եւ գիտակից սերունդներու ապահովման»։

Իր խօսքի աւարտին Սրբազան Հայրը գնահատեց բոլոր նուիրատուները, որոնք տասնեակ տարիներէ ի վեր Հայ Դպրոցը կանգուն կը պահեն։

Այս առիթով, մասնաւորաբար գնահատեց Տէր եւ Տիկին Կարօ Տօնոյեանները, որոնք դպրոցի արդիականացման եւ վերանորոգման համար նուիրեցին $250,000։ Բաբգէն Արքեպիսկոպոս յայտարարեց, թէ ընդառաջելով իր խնդրանքին, Ն.Ս.Օ.Տ.Տ. Արամ Ա. Վեհափառ Հայրապետ «Կիլիկեան Ասպետ»ի շքանշան կը շնորհէ Պրն. Կարօ Տոնոյեանին։

arm_8787

Պէյրութի Մեսրոպեան Արուեստից Վարժարանը Կը Սկսի Վերապատրաստման Անվճար Դասընթացքներ Սուրիայէն Տեղահանուած Անձերու Համար – 04/04/2017

Ընթացիկ տարուան  Ապրիլի 3-էն սկսեալ, Հայ Կաթողիկէ Մեսրոպեան Արուեստից Վարժարանին մէջ կը սկսի քառամսեայ անվճար դասընթացք մը՝ Սուրիայէն տեղահանուած անձերու համար: Ծրագիրը կը գործադրուի աջակցութեամբը l’Oeuvre d’Orient բարեսիրական կազմակերպութեան:

Դասընթացքներու նպատակն է պատերազմի պատճառով Սուրիայէն Լիբանան տեղահանուած մեր հայրենակիցներուն օգնել, որ անոնք ձեռք բերեն լեզուական, արհեստագիտական եւ արհեստներու վերաբերեալ նոր գիտելիքներ կամ զարգացնեն իրենց ունեցած գիտելիքները՝ նշեալ մարզերուն մէջ:

Դասընթացքները ուղղուած են 16-էն վեր տարիք ունեցող՝ նշեալ խումբի երկսեռ անդամներուն: Դասանիւթերն են՝ լեզուներ, համակարգչային գիտութիւններ եւ արհեստներ:

Դասընթացքներու տեւողութիւնը կը կազմէ 16 շաբաթ. կը նպատակադրուի իւրաքանչիւր մասնակիցի համար ապահովել նուազագոյնը մէկ լեզուի, համակարգչային գիտութիւններու մէկ ճիւղի եւ մէկ արհեստի ուսուցում:

Դասընթացքները տեղի կ՛ունենան Մեսրոպեան Արուեստից Վարժարանին մէջ, շաբաթը 5 օր՝ Երկուշաբթիէն Ուրբաթ, երեկոյեան ժամը 5:00 – 8: 00:

Դասընթացքներու աւարտին մասնակիցներուն պիտի շնորհուի համապատասխան վկայագիր:

Դիմորդներու արձանագրութիւնները սկսած են: Յաւելեալ մանրամասնութիւններու համար կը խնդրուի դիմել Մեսրոպեան Արուեստից Վարժարանի քարտուղարութիւն, հասցէն՝ Պուրճ Համուտ, Արաքս փողոց, հեռ. 01260504:

Արիս Պապիկեան Օնթարիոյի Պահպանողական կուսակցութեան նահանգային ընտրութիւններու թեկնածու ընտրուեցաւ

Թորոնթոյի հայ համայնքի անդամ Արիս Պապիկեան ամիսներ առաջ հաստատած էր իր թեկնածութեան որոշումը՝ մասնակցելու Գանատայի Օնթարիօ նահանգի երեսփոխանական ընտրութիւններուն Յառաջդիմական-Պահպանողական կուսակցութեան Scarborough Agincourt ընտրատարածքէն ներս:

Ապրիլ 2-ին կայացած Յառաջդիմական-Պահպանողական կուակցութեան ին Scarborough-Agincourt ընտրատարածքի ներքին ընտրութիւններու արդիւնքով, Արիս յաղթական հանդիսացաւ։ Այս ընթացքով, ան Յունիս 2018-ի Օնթարիոյի նահանագային յառաջիկայ ընտրութիւններուն, պաշտօնական ներկայացուցիչը պիտի հանդիսանայ կուսակցութեան ու պիտի մրցի այլ կուսակցութիւններու թեկնածուներուն դէմ:

Արիս աչքառու ու հիմնական ներդրում ունեցած է հայկական գաղութային կեանքէն ներս: Գանատահայ համայնքին իր 32 տարուան անխոնջ ծառայութեան ընթացքին 4 տարի գործած է որպէս պատասխանատու վարիչ տնօրէն Գանտայի Հայ Դատի յանձնախումբի Օթթաուայի գրասենեակին մէջ: Ան հանդիսացած է ամենէն գործունեայ անձնաւորութիւններէն մէկը, որ աշխատեցաւ ի նպաստ Հայոց ցեղասպանութեան ճանաչման Գանատական ծերակաոյտին կողմէ եւ երեսփոխանական պալատէն ներս:

Արիսի առանցքային դերը ուշագրաւ է մանաւանդ Թորոնթոյի շրջանի Պետական Դպրոցներու Ուսումնական Խորհուրդի (TDSB) այն նախաձեռնութեան, ըստ որուն Հայոց ցեղասպանութիւնը, ի շարս այլ ցեղասպանութիւններու՝ Ռուանտայի եւ հրէական ողջակիզման, որպէս դասաւանդման նիւթ ուսուցանելու որոշում առնուեցաւ Թորոնթոյի պետական երկրորդական վարժարաններու աշակերտութեան համար: Ան գործնական մեծ ներդրում ունեցաւ յատկապէս երբ անդամ դարձաւ այն յանձնախումբին, որ մշակեց Հայոց ցեղասպանութեան դասաւանդման ծրագիրը:

Որպէս Օնթարիօ նահանգի քաղաքացիութեան դատաւոր, ան բանախօսած է մարդկային իրաւանց, քաղաքացիական ծառայութեան, հանդուրժողականութեան, գանատական արժէքներու եւ աւանդութեանց վերաբերեալ թեմաներու մասին:

Ան նաեւ որպէս սկաուտ, մարզիկ ու երիտասարդականի պատասխանատու, իր բաժինը բերած է սերունդի դաստիարակութեան առաքելութեան մէջ:

Գանատական կառավարութիւնը զինք նշանակած է Քաղաքացիութեան դատաւոր, որուն միջոցաւ ծառայած է գանատացի ժողովուրդին յաջորդական 6 տարիներ: Իսկ որպէս գնահատանք Գանատայի հայ գաղութին ի նպաստ իր տարած աշխատանքներուն՝ Հայաստանի Սփիւռքի նախարարութիւնը պարգեւատրած է զինք ոսկի մետալով:

Այս մասին կը յայտնէ Հորիզոն:

(Լուսանկարը՝ Օնթարիօ նահանգի Յառաջդիմական-Պահպանողական կուսակցութեան ղեկավար Փաթրիք Պրաուն)

«Հորիզոն»ի Սեպտեմբերի շրջապտոյտի նպատակն է զօրակցիլ Արցախի մեր եղբայրներուն եւ քոյրերուն

Ծ.Խ.- Օգոստոս 25 – ՍԵպտեմբեր 8, «Հորիզոն» շաբաթաթերթի կողմէ դէպի Հայաստան եւ Արցախ կազմակերպուած շրջապտոյտին մասին տեղեկութիւններ կը փոխանցէ «Հորիզոն»ի վարիչ խմբագիր Վահագն Գարագաշեան:

Հարց.- Ինչպէ՞ս կը տարբերի այս շրջապտոյտը այլ հայաստանագնացութիւններէ:

Պատ.- Ինչպէս տեղեակ էք, ՀՀ Սփիւռքի Նախարար Հրանոյշ Յակոբեանը անցեալ տարի յայտարարութիւն կատարեց, ուր 2017-ը թուականը Արցախի տարի կը հռչակէր։ Այս շրջապտոյտը «Հորիզոն»ի զօրակցութիւնն է Արցախի մեր քոյրերուն եւ եղբայրներուն, որ կը միտի ներդրում կատարել Արցախի զբօսաշրջութեան զարգացման գծով, ինչպէս նաեւ Սփիւռք-Արցախ կամուրջները ամրագրելու նոր նախաձեռնութիւն է։

Նշենք, որ «Հորիզոն»ի խմբագրութիւնը միշտ երբ առիթը ներկայացած է, իր աջակցութիւնը ցուցաբերած է Արցախին, յատկապէս համակարգիչներ նուիրելով Շուշիի եւ Մարտակերտի շրջանի կարգ մը գիւղերու կրթամշակութային հաստատութիւններու եւ դպրոցներու, ինչպէս նաեւ իբրեւ Հիւսիսային Ամերիկայի հայկական լրատուամիջոց լայն տեղ կը տրամադրէ Արցախի քաղաքական, Մշակութային եւ տնտեսական իրադարձութիւններուն, յատկապէս շեշտելով Արցախի մէջ իրականացուող վերաբնակեցման ծրագիրները։

Ի տարբերութիւն այլ շրջապտոյտներու, այս պտոյտին աւելի տեղ տրամադրուած է Արցախին: Ընդհանրապէս հայրենիք այցելող սփիւռքահայ զբօսաշրջիկներուն երբ Արցախին կը ծանօթացնեն, հայաստանեան կամ արտասահմանեան զբօսաշրջային ընկերութիւններ կը բաւական սփիւռքահայ զբօսաշրջիկներուն Ստեփանակերտը, Շուշին եւ Գանձասարը ծանօթացնելով եւ այս բոլորը՝ երկու օրուան նեղ ժամանակամիջոցի մը ընթացքին:

Մեր կարծիքով, երկու օրը բաւարար չէ Արցախի գեղեցիկ բնաշխարհին, մշակութային յուշարձաններուն ու պատմական վայրերը այցելելու ու անոնց պատմութեան ծանօթանալու: Այս շրջապտոյտով, ծրագրած ենք հինգ օրերու վրայ երկարող ժամանակահատուածը լաւագոյնս օգտագործել, մեր զբօսաշրջիկներուն Ծանօթացնելու Արցախ աշխարհը: Նշենք, որ դէպի Արցախ ճանապարհին, զբօսաշրջիկները առիթ պիտի ունենան Տաթեւի վանքին մօտ գտնուող աշխարհի ամենէն երկար ճոպանուղիով շրջագայելու:

Հարց.- Որո՞նք են Արցախի մէջ ձեր ընտրած շրջապտոյտի վայրերը:

Պատ.- Մեր «արշաւախումբ»ի նստավայրը պիտի ըլլայ: Սեպտեմբեր 2-ին, արշաւախումբը պիտի մասնակցի Ստեփանակերտի մէջ կայանալիք Արցախի անկախութեան տօնակատարութեան, որուն ընթացքին յատուկ համերգով ելոյթ պիտի ունեան հայ երգարուեստի աստղեր: Մենք համոզուած ենք, որ այդ օրը անջնջելի յիշատակ մը պիտի դրոշմէ բոլոր մասնակիցներու կեանքի յուշամատեաններուն մէջ: Նշենք, որ անկախութեան հանդիսութեանց կը մասնակցին Հայաստանի եւ Արցախի նախագահները: 2014-ի «Հորիզոն»ի շրջապտոյտի մասնակիցները շատ զգացուած էին այդ օրը։ Մեր շրջապտոյտի նշանաբանն է «Միասին տօնենք Արցախի անկախութեան տարեդարձը Արցախի մեր քոյրերուն եւ եղբայրներուն հետ»։

Արցախի մէջ մէկ օր տրամադրուած է հայ գիւղին: Այդ օրը, գանատահայերու խումբը առիթ պիտի ունենայ ծանօթանալու Արցախի գիւղական կեանքին, պիտի հանդիպի գիւղացիներու հետ եւ պիտի ծանօթանայ Արցախի խոհանոցին ու տոհմիկ ճաշատեսակներուն: Մէկ օր տրամադրուած է Ամարաս վանքին եւ Սխտորաշէնի 2000-ամեայ դարաւոր ծառին։

Արցախէն Հայաստան վերադարձի ճանապարհին, ազատագրուած Քարվաճառի տարածքին մէջ զբօսաշրջային խումբը պիտի այցելէ Դադի վանք, որ հայոց աշխարհի հնագոյն եկեղեցիներէն է: Վանքը կը Գտնուի Մռաւ լերան անտառապատ լանջերուն, Թարթառ գետի ձախ ափին։ 2007-ին, Դադի վանքի վերանորոգման պեղումներուն ընթացքին, վանական համալիրի եկեղեցիներէն մեկուն խորանին տակ գտնուեցան Ս. Դադ առաքեալի մասունքները: Ս. Դադը Թադէոս առաքեալի 70 աշակերտներէն մեկն էր, որ քրոստոնէութիւնը քարոցած ու նահատակուած է Արցախի մէջ Ա. դարուն:

Ապա, գանատահայերը պիտի այցելեն ջերմաջուր, կամ տաք ջուրեր: Այստեղ բնութեան ստեղծած ժայռափոր աւազաններուն մէջ հանքային առողջարար տաք ջուրերուն մէջ սուզուելու առիթ պիտի ունենան խումբին անդամները:

Արցախեան շրջապտոյտի վերջին կայանը Հանդիվանքն է, որ գտնուած է 2001 թուականին եւ հայոց աղուանից կաթողիկոսութեան նստավայրը եղած է: Վանքի շրջափակին մէջ թաղուած են երկու աղուանից կաթողիկոսներ:

Շրջապտոյտի հայաստանեան հատուածը նոյնպէս հետաքրքրական է, ուր ընդգրկուած են այցելութիւններ Մակարավանք, Գառնի, Գեղարդ եւ Էջմիածին: Յիշեցնեմ, որ մէկ օր ամբողջ Սեւանի ափին հանգիստի օր է:

Երեւանի մեր ծրագիրը այս անգամ կ՚ընդգրկէ նաեւ հայկական ժողովրդային եւ ճազ երաժշտութեան համերգներ։

Պատ.- Արձանագրութեանց ժամկէտը ե՞րբ է:

Պատ.- Այս շրջապտոյտին համար յատուկ գիներ դասաւորած ենք, որոնց ժամկէտն է Ապրիլ 25-ը: Այսինքն, Մոնթրէալէն օդանաւի երթ ու դարձի տոմսը, օրական երեք անգամուան սնունդը, ճոպանուղիի տոմսերը, պանդոկի կեցութիւնը եւ շրջագայութեանց փոխադրամիջոցներու ծախսը ներառեալ՝ յատուկ եւ աննախընթաց սակագին է 3450 (double) եւ 3650 (single) գանատական տոլարը: Թորոնթոյէն եւ այլ շրջաններէ մասնակիցները յաւելեալ կը վճարեն մինչեւ Մոնթրէալ ճամբորդութեան ծախսը: Վերջաւորութեան նշեմ, որ Երեւանի Aviatrans կը գտնուի Երեւանի Հանրապետութեան հրապարակէն մէկ վայրկեան հեռաւորութեան վրայ։

ՀԱՐՑԱԶՐՈՅՑԸ ՎԱՐԵՑ ՍՈՆԱ ԹԻԹԻԶԵԱՆ ԿԷՏԻԿԵԱՆ

134

Թուրքիոյ Մէջ 1000 Տոլարով Վաճառքի Հանուած է Հայ Վարպետներու Պատրաստած Հազուագիւտ Գորգ Մը

Թուրքիոյ մէջ վաճառքի հանուած է սեբաստացի հայ վարպետներու ձեռագործ գորգ մը, որ ունի առնուազն 160 տարուան պատմութիւն:

Անշարժ գոյքի վաճառքով զբաղող թրքական ամենախոշոր կայքին մէջ գորգին «տէրը» հազուագիւտ գորգին համար կը պահանջէ մօտ 1000 ԱՄՆ տոլար: Գորգի գովազդին մէջ ան զայն անուանած է «թագաւորական»:

Բուրդէ աշխատցուած եւ տորոն ներկաբոյսի արմատէն պատրաստուած ներկով ներկուած հազուագիւտ գորգին վրայ առկայ են հայկական նախշազարդեր եւ խաչաձեւ նշաններ:

Յայտնի է, որ Սեբաստիոյ մէջ (այժմեան Թուրքիոյ Սվազի նահանգ – Tert.am) պատրաստուած ու երկար ճանապարհ անցած գորգը այժմ կը գտնուի Սթամպուլ, «տէր» զայն աւելի առաջ գնած է հին իրերու խանութէ մը` Արեւմտեան Հայաստանի տարածքէն:

Լոս Անճելըսի ՄԷջ Տեղի Ունեցած Են Հայ-Մեքսիքական Գործարար Շփումներ

Լոս Անճելըսի մէջ ՀՀ գլխաւոր հիւպատոսութեան նախաձեռնութեամբ Լոս Անճելըսի մէջ Մեքսիքայի գլխաւոր հիւպատոս Գառլոս Իուճինիօ տէ Ալպա Զեպետան հանդիպեցաւ ամերիկահայ երկու տասնեակ գործարարներու հետ:

Այս մասին կը տեղեկացնեն ՀՀ արտաքին գործոց նախարարութեան մամուլի, տեղեկատուութեան եւ հասարակայնութեան հետ կապի վարչութենէն:

Ան ներկայացուց հայ-մեքսիքական գործարար ոլորտի հեռանկարային ուղղութիւնները, ինչպէս նաեւ Մեքսիքայի տնտեսութեան յառաջատար ուղղութիւնները, ուր իրականացուելիք գործարար-ծրագիրներով հնարաւոր կ’ըլլայ կամրջել հայկական եւ մեքսիքական համայնքներն ու գործարար կապեր ստեղծել նաեւ երկու պետութիւններուն միջեւ:

Քննարկման կը մասնակցէր նաեւ Հայ-ամերիկեան գործարար խորհուրդի նախագահ Ալէք Պաղտասարեան, որ իր ելոյթին մէջ շեշտեց հայ-մեքսիքական գործարար կապերու միջոցով երկու երկիրներուն միջեւ յարաբերութիւններու աշխուժացման կարեւորութիւնը:

Հանդիպման աւարտին պայմանաւորուածութիւն ձեռք բերուեցաւ նման ձեւաչափով հանդիպումներն աւելի պարբերական դարձնել:

 

 

 

«Ներառական Կրթութիւն Ստացող Երեխաներուն Համար Պէտք Է Գրուին Յատուկ Դասագիրքեր». Մելսիդա Քարդումեան, Արցախցի Մանկավարժ

Մեր օրերուն ներառական կրթութեան առումով բաւականին դրական տեղաշարժեր կ’արձանագրուին եւ, այնուամենայնիւ, այսօրինակ կրթութեան դասաւանդման ոլորտին մէջ դեռեւս լուրջ խնդիրներ կան. այս եւ նման այլ հարցերու շուրջ «Հայերն այսօր»-ի խմբագրութեան մէջ ծաւալեցաւ իմ զրոյցս Արցախի Մարտակերտի Վարդան Մինասեանի անուան ներառական կրթութեամբ համալրուած թիւ 2 հիմնական դպրոցի  տնօրէն Մելսիդա Քարդումեանի եւ ուսուցչուհիներ Ռուզան Աւետիսեանի, Լուսինէ Սաիյեանի հետ, որոնք, ՀՀ սփիւռքի նախարարութեան աջակցութեամբ, «Դուն ի՞նչ կ’ընես Արցախի համար» շարժման ծիրէն ներս կը  պատրաստուին մեկնիլ Պէյրութ` Սուրբ Խաչ-Հարպոյեան վարժարանին մէջ մասնակցելու  ներառական ուսուցման դասընթացքին:

Մելսիդա Քարդումեան-ես դպրոցի տնօրէնն եմ, կը դասաւանդեմ կենսաբանութիւն: Աշխատելով ներառական կրթութեամբ համալրուած դպրոցի մէջ` ունիմ իմ մանկավարժական դիտարկումներն այդօրինակ կրթութեան առնչութեամբ: Մեր դպրոցը 2011 թուականէն կ’իրականացնէ ներառական կրթութեան ուսուցումը, ուր մեր նուիրեալ մանկավարժները սիրով ու համբերատարութեամբ կ’աշխատին նման կրթութեան կարիք ունեցող երեխաներու հետ: Մենք ներառական կրթութիւն իրականացնող ընդամէնը երեք ուսուցչուհի ունինք դպրոցին մէջ` աշխարհագրութեան ուսուցչուհի, ընկերաբան Ռուզան Աւետիսեան, յատուկ մանկավարժ Լուսինէ Սաիյեան եւ հոգեբան, որ հանգամանքներու բերումով մեզի հետ չէ եկած Երեւան: Աշխատանքը, անշուշտ, դիւրին չէ հէնց միայն հոգեբանական առումով, սակայն մենք կրնանք հաշտ ու համերշախ, մէկս միւսին օգնելով, աջակցելով`աշխատիլ:    Ես անջրպետ չեմ դներ իմ եւ ուսուցչուհիներուն միջեւ. մենք մէկ ընտանիք ենք եւ ունինք առողջ ու անառողջ երեխաներ, որոնց խնամք ու հոգատարութիւն, գիտելիքներ  անհրաժեշտ են. բնականաբար, վերջիններուն աւելի շատ ուշադրութիւն եւ առանձնայատուկ վերաբերմունք կը ցուցաբերենք` դրսեւորելով նրբանկատութիւն: Կը համագործակցինք Ստեփանակերտի մեր նախարարութեան բժշկահոգեբանական կեդրոնին հետ: Մենք նիւթականի կարիք այնքան ալ չունինք. մեզի համար առաջնային են շէնքային պայմանները, ուր այդ երեխաներուն հետ սովորական դասաժամերէն դուրս պարապելու համար չունինք գեղեցիկ, հետաքրքիր, յատուկ դասասենեակներ, խաղահրապարակ. իմ ներառական կրթութեան դասասենեակս ես տեղաւորած եմ 6քմ. տարածք ունեցող բժշկական կէտին մէջ: Սնունդի հարցով դեռեւս խնդիրներ չունինք: Կ’ըսեն` ներառական կրթութիւն ստացող երեխաներուն համար 30 վայրկեանով քննութեան ժամանակը կ’երկարացուի, սակայն եթէ այդ երեխային գիտակցութեան ատիկա չի հասնիր, որքան կ’ուզես, ժամանակը երկարացուր, ատիկա նոյն թեստն է: Ներառական կրթութիւն ստացող երեխաներուն համար պէտք է մշակուին ու գրուին յատուկ դասագիրքեր, յատուկ ծրագիրներ պէտք է ըլլան: Խնդիրը ներառական կրթութեան դասագիրքերու, ծրագիրներու բացակայութիւնն է. ի հարկէ, մեր ուսուցչուհիները ունին անհատական ուսումնական ծրագիրներ, որոնց հիման վրայ ալ կը կազմենք մեր ծրագիրները, սակայն ցանկալի է, որ նման կրթութիւն ապահովող դպրոցներուն մէջ ըլլան յատուկ կազմուած դասագիրքեր: Մեր դպրոց կը յաճախեն  17 այդպիսի երեխաներ առաջինէն մինչեւ իններորդ դասարաններուն մէջ: Մեր ամբողջ դպրոցի ուսուցչական կազմի համախմբուածութիւնը կ’օգնէ` շօշափելի արդիւնքներու հասնելու: Կը կարծեմ` այս ուղեւորութիւնը Պէյրութի Սուրբ Խաչ-Հարպոյեան վարժարան եւ մեր մասնակցութիւնը դասընթացքին, անպայման պիտի նպաստէ մասնագիտական հմտութիւններ ձեռք բերելուն: Մենք կը սորվինք, կը խորհրդակցինք, փորձի փոխանակում կ’ընենք. ափսոս, որ ժամանակը շատ կարճ է:

Ռուզաննա Աւետիսեան, ներառական կրթութեան աշխարհագրութեան եւ մանկավարժութեան ուսուցչուհի

– Դուք կը հարցնէք, թէ ինչ է այդ երեխաներուն համար առաջնայինը` մանկավարժի էութիւնը թէ՞ դասաւանդուող առարկան: Անկեղծօրէն ըսեմ` առաջինը, որմէ յետոյ` մասնագիտական հմտութիւնը, կարողութիւնները: Իւրաքանչիւր աշակերտ կրնայ դրսեւորուիլ իր ուժերուն ներածին չափով, եւ մենք պարտաւոր ենք ատիկա դիտարկել ըմբռնումով, անհատական մօտեցում ցուցաբերելով:

Լուսինէ Սաիյեան, ներառական կրթութեան յատուկ մանկավարժ

-Ես յատուկ մանկավարժ եմ, որ կ’աշխատիմ միայն ներառական կրթութեան ուսուցման մէջ ընդգրկուած երեխաներու հետ: Մասնագիտութեամբ հայոց լեզուի եւ գրականութեան ուսուցչուհի եմ. ցաւօք, իմ ուսման տարիներուս ներառական կրթութեան մասնագէտներ չէին պատրաստեր. հիմա ալ նոյնն է: Հմտութիւն ձեռք  բերած եմ վերապատրաստման դասընթացներուն ընթացքին: Այսօր այդպիսի մասնագիտական բաժիններու կարիքը շատ կը զգացուի: Ներառական ուսուցում ստացող երեխաները շատ տարբեր են իրենց մտաւոր ունակութիւններով. 5-րդ դասարան յաճախող երեխաներէն մէկը կրնայ ունենալ 1-ին դասարանցիի կարողութիւններ, միւսը` աւելի բարձր կամ ալ ` իր տարիքին բնորոշ, երեխաներ կան, որոնք անգամ մկրատն ինքնուրոյն չեն կրնար բռնել ու գործածել: Յատուկ մանկավարժի, ընկերաբան-մանկավարժի, հոգեբանի առկայութիւնն ու մասնագիտական հմտութիւնները, մարդկային լաւագոյն որակներն այնչափ կարեւոր են այս գործին մէջ:

Աւարտելով զրոյցս նուիրեալ արցախուհիներուն, մանկավարժներուն հետ`  կը ցանկամ յուսալ, որ ՀՀ սփիւռքի նախարարութեան «Դուն ի՞նչ կ’ընես Արցախի համար» համահայկական շարժման ծիրէն ներս մեր հայրենակիցներէն մէկը ձեռք կը մեկնէ Մարտակերտի Վլադիմիր Մինասեանի անուան թիւ 2 հիմնական դպրոցին` ներառական կրթութիւն ստացող երեխաներուն համար ստեղծելով յատուկ դասասենեակներ, խաղահրապարակ, իսկ մօտ ապագային կը լուծուի նաեւ ծրագիրներու եւ դասագիրքերու խնդիրը:

Կարինէ Աւագեան

img_0458