Ցեղասպանութեան Ոգեկոչում Պաղտատի Ազգային Վարժարանին ՄԷջ

Մեր  ազգի  իրաւունքներուն վերատիրանալու Արդար պահանջը ամուր պահելու,    նաեւ  վայրագ Թուրքին ձեռամբ զոհուած մէկ ու կէս միլիոն անմեղ նահատակներու անմար յիշատակը յարգելու սուրբ պարտականութեամբ՝  Պաղտատի Ազգային Տարրական Երկսեռ  Վարժարանը  գրական-գեղարուեստական յայտագիր մը գործադրեց,  1915  թուականի Հայոց Ցեղասպանութեան  102-րդ տարելիցին առիթով:   Հայերն այսօր-ին կը տեղեկացնէ  Պաղտատէն հայերէն լեզուի վարժապետ` Արամ սրկ. Քէթէնճեան:

Հանդիսութիւնը կատարուեցաւ Ապրիլ 29ին, վարժարանի Կիւլպէնկեան սրահին մէջ, Հոգեւորականաց դասի,  Ազգային կեդրոնական վարչութեան. Ուսումնական խորհուրդի, ուսուցչական կազմի եւ ծնողներու մասնակցութեամբ:

 Աշակերտները ելոյթ ունեցան քանի մը ազգագրական երգերով,  արտասանութիւններով,  Զապէլ Եսայեանի «Աւերակներուն մէջ» գիրքէն հատուածի մը ընթերցանութեամբ, Յ. Շիրազի  «Ամենայն սրտով» բողոքի եւ մեր իրաւունքներն ետ բերելու համար, մինչեւ մահ պայքարելու եռանդ ներշնչող բանաստեղծութեան  կատարումով:

Ուսուցչական կազմէն ոմանք օրուան  պատշաճ խօսքերով ելոյթ ունեցան, իսկ  փակման խօսքը կատարեց Կեդրոնական վարչութեան ատենադպիր՝ պարոն Ս. Գոթունեան:

Յիշենք, որ ոգեկոչման հանդիսութեան աւարտին, քաջալերական յուշանուէրներ բաժնուեցան դպրոցին մէջ  վերջերս կազմակերպուած գեղագրութեան  մրցոյթի լաւագոյն աշակերտներուն:

2 3 4

5 8

Սուրիոյ Հայութեան Վերականգնումի Համագումար Անթիլիաս Մայրավանքին Մէջ

Հրաւէրով ու նախագահութեամբ Ն.Ս.Օ.Տ.Տ. Արամ Ա. Կաթողիկոսին, Սուրիոյ հայութեան վերականգնումի համագումար տեղի ունեցաւ այսօր՝ Շաբաթ 29 Ապրիլ 2017-ին, Անթիլիասի Մայրավանքին մէջ։ Այս մասին Հայերն այսօր-ը կը տեղեկանայ Մեծի Տանն Կիլիկիոյ Կաթողիկոսութեան ֆէյսպուքեան էջէն:

Վեհափառ Հայրապետին կողքին համագումարին ներկայ էին Կաթողիկէ Հայոց Ամենապատիւ եւ Գերերջանիկ Պատրիարքը՝ Տ. Գրիգոր-Պետրոս Ի. եւ Մերձաւոր Արեւելքի Հայ Աւետարանական Եկեղեցիներու Խորհուրդի Նախագահ՝ Վերապատուելի Մկրտիչ Գարակէօզեան։ Համագումարին իրենց մասնակցութիւնը բերին Ազգային Կեդրոնական Վարչութեան ներկայացուցիչները, Սուրիոյ հայութեան Շտապ Մարմինի անդամները՝ առաջնորդութեամբ Բերիոյ Հայոց Թեմի Առաջնորդ՝ Գերշ. Տ. Շահան Արք. Սարգիսեանի, Գերպծ. Պետրոս Արք. Միրիաթեան, Վերապատուելի Յարութիւն Սէլիմեան, Գերշ. Տ. Արմաշ Եպս. Նալպանտեան, ինչպէս նաեւ Սուրիոյ երեք կուսակցութեանց, Բարեգործականի, եւ ՍՕԽ-ի ներկայացուցիչներ: Համագումարին կը մասնակցէին նաեւ, «Հայաստան» համահայկական հիմնադրամի տնօրէնը, Ֆրանսայի, Լիբանանի եւ Միացեալ Նահանգներու «Հայաստան» համահայկական հիմնադրամի ատենապետները։ Լիբանանէն կը մասնակցէին ԱՖԷՏ-ի ու Հ.Յ.Դ.-ի ներկայացուցիչները եւ Հայկազեան Համալսարանի Նախագահը։

Համագումարը, առաջին հերթին, առիթ մը եղաւ լսելու Նորին Սրբութեան պատկերացումը, Սուրիոյ հայութեան վերականգնումի գծով, հոգեւոր պետերուն ողջոյնի ու քաջալերանքի խօսքերը, ինչպէս նաեւ Սուրիոյ հայութեան վերականգնումի յանձնախումբին կողմէ վերջին չորս ամիսներուն ընթացքին կատարուած նախապատրաստական աշխատանքներուն մասին։ Ապա, տեղի ունեցաւ ընդհանուր քննարկում ու արժեւորում եւ ճշդուեցան յառաջիկայ ամիսներուն կատարուելիք աշխատանքին առաջնահերթութիւնները, ընթացքն ու հանգրուանները։

Համագումարը ողջունելով անցնող շուրջ հինգ տարիներու ընթացքին համահայկական տարողութեամբ Սուրիոյ հայութեան կատարուած օժանդակութիւնը, մաղթեց որ նո՛յն ոգիով ու մօտեցումով շարունակուի համահայկական զօրակցութիւնը Սուրիոյ հայութեան վերականգնումի աշխատանքներուն։ Հետեւելով Նորին Սրբութեան պատկերացումին, համագումարը չորս բնագաւառները նկատեց հիմնական առաջնահերթութիւններ վերականգնումի գործընթացի ծիրէն ներս.- 1) Միջին «պիզնըս»ներու օժանդակութիւն ու փոխատուութիւն կատարելու ծրագիրի մշակում եւ անմիջական գործադրութիւն. 2) Ազգային կառոյցներու վերակազմակերպման ու վերաշխուժացման աջակցութիւն. 3) Վնասուած շէնքերու վերանորոգում. 4) Կարիքաւոր ընտանիքներու օժանդակութիւն։

Համագումարը առաջարկեց, որ յիշեալ չորս մարզերէն ներս ցարդ կատարուած նախապատրաստական աշխատանքները երկրէն ներս տիրող պայմաններու լոյսին տակ ամբողջացուին՝ մասնագիտական ու իրապաշտ մօտեցումով։ Համագումարը նաեւ կարեւորութեամբ շեշտեց, որ վերականգնումի աշխատանքները համադրող ու հետապնդող յատուկ գրասենեակ մը հաստատուի Հալէպէն ներս՝ կեդրոնական ու մասնագիտական յանձնախումբերու կողքին։

Որոշուեցաւ Օգոստոս 2017-ի առաջին կիսուն համահայկական տարողութեամբ համագումար մը կազմակերպել՝ մասնակցութեամբ Հայաստանի Պետութեան, հայկական գաղութներու, թեմերու, կազմակերպութիւններու ու բարերարներու։ Սոյն համագումարին նպատակը պիտի ըլլայ ընդհանուր զեկոյց մը ներկայացնել կատարուած նախապատրաստական աշխատանքներուն մասին ու ներկայացնել պատրաստուած ծրագիրները, որպէսզի անոնք որդեգրուին ներկաներուն կողմէ։

Յիշեալ սկզբունքները ճշդելով ու անհրաժեշտ թելադրութիւնները կատարելով, համագումարը նաեւ կարեւորութեամբ անդրադարձաւ, թէ անհրաժեշտ է միշտ նկատի ունենալ Սուրիայէն ներս տիրող քաղաքական ու ապահովական պայմաններուն հոլովոյթը։

Փորթուկալ Բնակող Հայերը Մեծ Աշխատանք Կը Տանին Երկու Երկիրներու Միջեւ Կապերու Ստեղծման Համար. Լիա Խաչիկեան

Ապրիլ 5-ին «Փորթուկալ -Հայաստան բարեկամութեան միութեան» նախաձեռնութեամբ Լիզպոնի համալսարանի գիրերու բաժանմունքին մէջ (Faculdade de Letras de Universidade de Lisboa) կայացած է «Հայոց լեզուի օր» խորագիրով համաժողով, որ վարած է «Փորթուկալ-Հայաստան բարեկամութեան միութեան» հիմնադիր անդամ Լիա Խաչիկեան, որ Լիզպոնի մէջ փորթուկալերէն լեզուի ու մշակոյթի ուսումնասիրութեամբ կը զբաղուի եւ այսօր «Հայերն այսօր»-ի զրուցակիցն է:

Լիա՛, ի՞նչը քեզի Փորթուկալ բերաւ:

– Մասնագիտութեամբ ճարտարապետ եմ: Հէնց իմ մասնագիտութիւնս ալ 2014 թուականին ինծի բերաւ Փորթուկալ. եկայ որպէս ճարտարապետութեան ասպիրանտ: Շուտով հասկցայ, որ փորթուկալերէնի հանդէպ շատ մեծ հետաքրքրութիւն ու սէր ունիմ: Ուսումս աւարտելէ յետոյ որոշեցի անպայման վերադառնալ ու շարունակել փորթուկալերէն լեզուի ու մշակոյթի ուսումնասիրութիւնը: Այսօր արդէն ողջ գործունէութիւնս կապուած է փորթուկալերէնի ուսումնասիրութեան հետ:

Առաջի՞ն համագործակցութիւնդ է «Փորթուկալ –Հայաստան բարեկամութեան միութեան» հետ:

– Ո՛չ: Ես միութեան հիմնադիր անդամներուն խումբին մէջ  ընդգրկուած եմ: Սա ինծի համար համագործակցութիւն չէ, այլ մեր աշխատանքին մէկ մասը կը կազմէ: Աշխատանք, որն այս պարագային ուղղուած է  հայ-փորթուկալական մշակութային կապերուն, ինչպէս նաեւ` քաղաքական, գիտական, տնտեսական, մարզական եւ այլ կապերու զարգացման: Կրնանք փաստել, որ ներկայիս երկու երկիրներուն միջեւ կապն ու համագործակցութիւնը գրեթէ կը բացակային: Այս պատասխանատու գործի կրողն ալ հէնց «Փորթուկալ -Հայաստան բարեկամութեան միութիւնն» է` ի դէմս անոր բոլոր անդամներուն:

Ին՞չ եղանակով ներկայացուցիր հայերէնի մասին տեղեկութիւնները «Հայոց լեզուի օր» խորագիրով համաժողովին ժամանակ:

-Բաւականաչափ ընդհանրական ու հնարաւորինս ամփոփ:
Փորթուկալացի դիտողը առաջին անգամ  ներկայ կ’ըլլար հայերէնին նուիրուած ձեռնարկի: Խնդիրը անոնց մեր  լեզուին ու մշակոյթին ծանօթացնելն էր: Խօսուեցաւ հայերէնի աշխարհագրական տարածման մասին, լեզուի պատմութեան եւ զարգացման փուլերուն,  գիրերու ստեղծման, այբուբենի կազմութեան եւ յետագայ փոփոխութիւններուն, արեւմտահայերէնի եւ արեւելահայերէնի հիմնական հնչիւնաբանական եւ բառապաշարի տարբերութիւններուն մասին: Հայաստանի Հանրապետութեան եւ Պատմական Հայաստանի տարածքին առկայ բարբառներուն եւս կարճ անդրադարձ եղաւ, ընդհանուր տեղեկութիւններ տրուեցան նաեւ լեզուի քերականական կառուցուածքին վերաբերեալ: Կրցանք նաեւ փորթուկալացի հանդիսատեսին ծանօթացնել հայ ժամանակակից բանաստեղծութեան հետ: Հնչեցին Յովհ. Թումանեանի, Յովհ. Շիրազի, Հ. Սահեանի եւ Պ. Սեւակի բանաստեղծութիւններէն:

Մատուցուող թեման ամբողջական ներկայացնելու համար ամէն ինչէ  քիչ մը խօսեցանք, որովհետեւ հանդիսատեսը փոքրիկ խաղերու միջոցով եւս մասնակցութիւն կ’ունենար. որոշ մասնակիցներ անգամ փորձ ունեցան հայերէն բառեր սորվելու եւ արտասանելու:

Հասկնալի է, որ նիւթը բաւականաչափ դժուարամարս էր օտարերկրացիներուն համար, այդ իսկ պատճառով փորձած էի հնարաւորինս ազդեցիկ  եւ թեթեւ դարձնել ներկայացումը: Այդ գործին մէջ այնչափ օգնեց նաեւ «Կոնսոնանսիա»  լարային նուագախումբի մենակատարներէ կազմուած քառեակը, որ փայլուն կերպով եզրափակեցին իմ ելոյթս` հանդիսատեսին ներկայացնելով հայ երաժշտութեան գլուխգործոցներ:

Լիա, քու կարծիքովդ կրցա՞ր հայերէնի մասին տեղեկութիւնները մասնակիցներուն փոխանցել:

-Դատելով յետագայ արձագանքներէն` շնորհաւորանքներ, շնորհակալութիւններ, ստացուած նամակներ, տպաւորութիւնը, իսկապէս, մեծ էր: Շատերը մօտեցան ու շնորհակալական խօսքեր ըսին, որ իրենց համար բացարձակապէս անծանօթ  աշխարհի մը մասին հետաքրքիր փաստեր իմացան, որոշ բաներ սորվեցան ու որ կարեւորն էր, հաճոյքով ու հետաքրքրութեամբ անցուցին իրենց աշխատանքային օրուան աւարտը:

Լիզպոնի Համալսարանի գիրերու բաժանմունքի (Faculdade de Letras de Universidade de Lisboa)  քանի մը ամբիոններու կողմէ անգամ յետագայ համագործակցութեան առաջարկներ եղան, որոնք անպայման պիտի քննարկենք:

Քանի մը փորթուկալացի լեզուաբաններ խնդրեցին տեղեկութիւններ` լեզուն ուսումնասիրելու հնարաւորութիւններու մասին: Սա անոնց համար, եւ ինչու՞ ոչ` մեզի համար, հետազօտութիւններու նոր հարթակ է, նոր հնարաւորութիւններու սկիզբ:
Այս ամէնէն կարելի է եզրակացնել, որ մեկնարկը կայացած է. մէկ քայլ առաջ դրինք, հաստատապէս` մշակութային ու գիտական կապերու ստեղծման ու խորացման ճանապարհին:

Լիա՛, քու խօսքերդ կը փաստեն, որ նման ձեռնարկները համագործակցութեան նոր հեռանկարներ կը բանան երկու երկիրներուն միջեւ:

-Ինչպէս արդէն նշեցի, մենք` թէ «Փորթուկալ-Հայաստա՛ն բարեկամութեան միութիւնը», եւ թէ՛ Փորթուկալ  բնակող հայ անհատները, մեծ աշխատանք կը տանինք երկու երկիրներու միջեւ կապերու ստեղծման համար: Բացի այդ, այս երկու ազգերը չափազանց շատ նմանութիւններ ունին. Ատիկա կը փաստեն եւ՛ փորթուկալացիներուն, Փորթուկալ ճանչցող հայերը, եւ՛ հայերուն ու Հայաստան ճանչցող փորթուկալացիները: Այս տեսանկիւնէն նման ձեռնարկները կը նպաստեն իրարու  հանդէպ հետաքրքրութեան խորացմանն ու յետագայ համագործակցութիւններու կայացման: Չէ՞ որ յաջող համագործակցութեան համար առաջին հերթին կարեւոր է ճանաչողութիւնն ու հետաքրքրութիւնը: Ինչպէս ալ պտտինք, նման ձեռնարկներն ուղղակի անհրաժեշտութիւն են:

Եզրափակոլով խօսքս` իմ եւ «Փորթուկալ -Հայաստան բարեկամութեան միութեան» անունէն կ’ուզեմ շնորհակալութիւն յայտնել Ձեր կողմէ ցուցաբերուած հետաքրքրութեան եւ հաճելի հարցազրոյցին համար:

Լուսինէ Աբրահամեան

%d5%bd%d5%a5%d5%b4%d5%ab%d5%b6%d5%a1%d6%803

Կը Շարունակուի «Մաքուր Եւ Կանաչ Հայաստան» Շարժումը

Ապրիլ 25-ին` մեր կազմակերպած «Մաքրութեան արշաւ»-էն 3 օր անց, մենք կրկին գացինք Յաղթանակի զբօսայգի, ուր այս անգամ ալ մեզի համար բաւականին գործ  հաւաքուած էր:

«Մայր-Հայաստան» յուշարձանի տարածքին այս գարնան մենք 4 «աշխատան­քային արշաւ»  իրականացուցած ենք, եւ մեր նախագիծն այս վայրին եւ այս փուլին կը համարենք աւարտուած:
Յոյսով ենք, որ զբօսայգիի այցելուները կը սորվին աղբը նետել մօտակայ աղբամանները, եւ մենք ստիպուած չենք ըլլար դարձեալ գալու այստեղ:
Երեւանի մէջ բաւականին տեղեր կան, ուր մենք կ’ուզենք հասնիլ:

Նախաձեռնութեան հեղինակ` Նայիրա Աւետիսեան

%d5%b4%d5%a1%d6%84%d5%b8%d6%82%d6%80%d5%b4%d5%a1%d6%84%d5%b8%d6%82%d6%801%d5%b4%d5%a1%d6%84%d5%b8%d6%82%d6%802%d5%b4%d5%a1%d6%84%d5%b8%d6%82%d6%803%d5%b4%d5%a1%d6%84%d5%b8%d6%82%d6%804 %d5%b4%d5%a1%d6%84%d5%b8%d6%82%d6%805 %d5%b4%d5%a1%d6%84%d5%b8%d6%82%d6%806 %d5%b4%d5%a1%d6%84%d5%b8%d6%82%d6%807

 

Աւստրիոյ ԱԳ Նախարարն Ընդունած Է Հայկական Համայնքի Ներկայացուցիչները

Աւստրիոյ Մէջ Հայ Առաքելական եկեղեցական համայնքի ձեւաւորման աւելի քան 100 տարիներւ եւ Վիեննայի Սուրբ Հռիփսիմէ եկեղեցւոյ հիմնադրման 50 ամեակի զուգահեռներով Aպրիլ 24-ին Աւստրիոյ ԱԳ նախարար պարոն Սեբաստիան Քուրցը ընդունեց Աւստրիոյ Հայ Առաքելական համայնքի վարչութեան ատենապետի գլխաւորած պատուիրակութիւնը: Ինչպէս «Հայերն այսօր»-ին կը յայտնեն համայնքէն, հանդիպման ընթացքին ԱԳ նախարարը յայտնեց իր խորին երախտագիտութիւնն ու շնորհակալութիւնը Աւստրիոյ մէջ Հայ Առաքելական եկեղեցական համայնքին երկկողմ յարաբերութիւններու ամրապնդման եւ խորացման համար:

Կը ցանկանք իւրայատուկ նշել երջանկայիշատակ Մեսրոպ արքեպիսկոպոս Գրիգորեանի եւ ներկայիս մեր հոգեւոր առաջնորդ Հայրապետական պատուիրակ Տէր Տիրան Վարդապետ Պետրոսեանի դերը հայ-աւստրիական յարաբերութիւններու զարգացման եւ մեր ժողովուրդներու միջեւ բարեկամական յարաբերութիւններու ձեւաւորման գործին մէջ: Այս օրերուն Տէր Տիրան Վարդապետ Պետրոսեան աւստրիական  շարք մը յառաջատար լրատուամիջոցներու ներկայացուցիչներուն հետ միասին կը գտնուի Հայաստանի մէջ, Հայաստանի եւ Հայոց ցեղասպանութեան զոհերու յիշատակի ձեռնարկներուն մասին աւստրիական պետական հեռուստատեսութեան եւ ձայնասփիւռի  համար յատուկ հաղորդաշար պատրաստելու նպատակով: ՀԱԵՒ կողմէ Աւստրիոյ մէջ կազմակերպուած եւ իրականացուած բազմաթիւ ձեռնարկներու շնորհիւ մեծ թիւով աւստրիացիներ հնարաւորութիւն  ստացած են ծանօթանալու հայ մշակութային, եկեղեցական եւ ազգային արժէքներու հետ:

«Աւտրիահայ համայնքի ձեւաւորման եւ զարգացման գործին մէջ իրենց ուրոյն դերն ունեցած են նաեւ ՀԱԵ ներկայացնող մեր բարձրաստիճան հոգեւոր առաջնորդները, որոնց շնորհիւ յաջողած է Աւստրիոյ մէջ բնակող  հայերու սրտին մէջ ոչ միայն վառ պահել քրիստոնէական հաւատքի սուրբ  ճրագը, այլ նաեւ դաստիարակել համամարդկային արժէքներուն հաւատարիմ հայ զաւակներ ( ոչ մէկ սերունդ)», – ըսաւ Աւստրիոյ Հայ Առաքելական եկեղեցական համայնքի ատենապետ Վահագն Ամիրջանեան:

ՀԱԵՒ Աւստրիոյ մէջ Հայաստանի Հանրապետութեան դեսպանատան հետ համատեղ կ’իրականացնէ զանազան ձեռնարկներ, որոնք կոչուած են նպաստելու հայ եւ Աւստրիացի գործարարներու, կրթական, բժշկական, մշակութային, տնտեսական եւ քաղաքական ոլորտներու պատասխանատուներուն միջեւ սերտ կապեր եւ յարաբերութիւններու յետագայ զարգացման համար անհրաժեշտ նախադրեալներ ստեղծելուն:

Վահագն Ամիրջանեան յայտնեց հայ ազգի անունէն իր խորին շնորհակալութիւնը Աւստրիական կառավարութեան Սուրիայէն փախստականներու  ընդունման եւ աջակցման համար: Անոնց մէջ  բազմաթիւ հայեր կան,  որոնց  նախնիները  քսաներորդ դարասկիզբին Հայոց  ցեղասպանութեան օրերուն Պատմական Հայաստանի տարածքէն գաղթած էին Սուրիա եւ ապաստան գտած այնտեղ: Ցաւօք, այսօր եւս անոնց զաւակները ստիպուած են արտագաղթելու, եւ կը ցանկամ նշել, որ Աւստրիոյ հայ համայնքը եւս քայլեր կը ձեռնարկէ սուրիահայերու ընդելուզման գործընթացքին` ապահովելով ներգաղթեալներու բժշկական, սոցիալական եւ իրաւաբանական անվճար խորհրդատուութիւններ, գերմաներէն լեզուի անվճար դասընթացներ եւ այլն:

Հայ Առաքելական եկեղեցական համայնքի ատենապետ Վահագն Ամիրջանեան առանձնայատուկ շնորհակալութիւն յայտնեց Աւստրիոյ խորհրդարանի պատգամաւորներուն, որոնք 2015թ.ապրիլ 23-ին` Հայոց ցեղասպանութեան 100-րդ տարելիցի շեմին,  ճանչցան Օսմանեան Թուրքիոյ մէջ 1915թ. տեղի ունեցած ցեղասպանութեան փաստը` դատապարտելով Օսմանեան Թուրքիոյ կողմէ հայ ժողովուրդի նկատմամբ իրականացուած ոճրագործութիւնը եւ անով իսկ մէկ անգամ եւս ապացուցելով Աւստրիական Հանրապետութեան նուիրուածութիւնը համամարդային, եւրոպական եւ մարդասիրական արժէքներուն, ինչպէս նաեւ պետութեան կառավարման դեմոկրատական եւ արդար սկզբունքներուն:

Մօտ ապագային կը սպասուի Աւստրիոյ ԱԳ նախարար պարոն Սեբաստիան Քուրցի այցը Վիեննայի Սուրբ Հռիփսիմէ եկեղեցի, որուն պաշտօնական հրաւէր  ուղարկած է Կեդրոնական Եւրոպայի եւ Սկանտինաւիոյ երկիրներու մէջ Հայրապետական պատուիրակ, Հոգեշնորհ Տ. Տիրան վարդապետ Պետրոսեանը:

12456 7891011 12

 

Հայկական Գորգի Ճամփան. Հայաստանի Համայնքներէն` Աշխարհին. լուսանկարներ

Հայաստանի մանուկներ հիմնադրամը (COAF) եւ «Մէգերեան Կարպետ» ընկերութիւնը մեկնարկ տուին նոր  բարեգործական ծրագիրի` նուիրուած Մէգերեան ընկերութեան 100-ամեայ յոբելեանին:

Ինչպէս «Հայերն այսօր»-ին կը յայտնեն հիմնադրամէն, «Մէգերեան կարպետ» ընկերութեան հմուտ գորգագործներու օգնութեամբ Հայաստանի մանուկներ հիմնադրամի շահառու Վանանդ համայնքի երիտասարդները  քանի մը ամսուան ընթացքին միասին կ’աշխատին յոբելենական գորգի ստեղծման վրայ:

«Շատ ուրախ եմ այս համագործակցութեան համար, որ հնարաւորութիւն կու տայ երիտասարդ սերունդին ծանօթացնելու հայկական հնագոյն մշակոյթի ճիւղերէն մէկուն`գորգագործութեան հետ, եւ հիանալի է,որ այս ծրագիրը կ’իրագործենք իմ շատ վաղեմի բարեկամ Կարօ Արմէնի կողմէ հիմնադրուած Հայաստանի մանուկներու հիմնադրամին հետ»,- ողջոյնի խօսքին մէջ նշեց «Մէգերեան» ընկերութեան սեփականատէր Րաֆֆի Մէգերեան:

Արդէն դեկտեմբերին եզակի այս գորգը կը ցուցադրուի ԱՄՆ-ի մէջ` Նիւ Եորքի մէջ իրականացուող COAF-ի ամէնամեայ դրամահաւաք-երեկոյի ընթացքին: Գորգը կը վաճառուի բարեգործական ձեռնարկին աճուրդի ժամանակ, ու հասոյթը ամբողջովին կը ծառայէ Հայաստանի մանուկներ հիմնադրամի ծրագիրներուն:

«Այս համագործակցութիւնը  նոր որակ կը  հաղորդէ Հիմնադրամին ու «Մէգերեան» ընկերութեան վաղեմի բարեկամութեան: Հայաստանի երիտասարդները կը ծանօթանան հայկական հնագոյն արհեստներէն մէկուն` գորգագործութեան: Աւելին, անոնց բացառիկ հնարաւորութիւն կը տրուի սորվելու այդ արուեստը Հայաստանի ամենահեղինակաւոր ու հմուտ կառոյցներէն մէկուն մէջ»,- ընդգծեց Հայաստանի մանուկներ հիմնադրամի խորհուրդի ատենապետ դոկտոր Կարօ Արմէնը:

Համատեղ ծրագիրի մեկնարկը տուող ձեռնարկին ընթացքին Հիմնադրամի շահառու համայքներու արտադասարանային խմբակներու 80 սաներ` ազգագրութիւն, ձեռագործութիւն, գորգագործութիւն, անգլերէն, այցելեցին Մէգերեան Կարպետ: Անոնց համար իրականացուեցաւ ուսուցողական շրջայց Յովհաննէս եւ Նոեմի Մէգերեաններու անուան թանգարանին մէջ, ինչպէս նաեւ ընկերութեան արտադրամասին մէջ, ուր անոնք ծանօթացան հայկական գորգագործութեան աւանդոյթներուն:

Շրջայցէն յետոյ մասնակիցներուն համար գեղեցիկ անակնկալով հանդէս եկան «Մեր Տուն» ՀԿ-ի սաներն ու Վանանդի ազգագրութեան խմբակի անդամները` ներկայացնելով հայկական հարսանեկան ծէսը:

img_1119 img_1147 img_1181 img_1290 img_1346 img_1388 img_1403 img_1455 img_1477 img_1583

Խրիմեան Հայրիկին Նուիրուած Յիշատակի Հանդիսութիւն Լիբանանի ՄԷջ

Մայիս 3-ին, ժամը` 20:00-ին, Լիբանանի Ազգային առաջնորդարանի «Երջօ Սամուէլեան-Եռագոյն» սրահին մէջ պիտի կայանայ յիշատակի հանդիսութիւն` Խրիմեան Հայրիկի կաթողիկոս ընտրուելու 125 եւ մահուան 110-ամեակին առիթով:

«Հայերն այսօր»-ի փոխանցմամբ` ձեռնարկը պիտի  նախագահէ Լիբանանի Հայոց թեմի առաջնորդ գերաշնորհ տէր Շահէ եպիսկոպոս Փանոսեան: Օրուան բանախօսն է Լ. եւ Ս. Յակոբեան ազգային քոլեջի տնօրէն Վիգէն Աւագեան:

Երեկոյի գեղարուեստական մասին մէջ ելոյթ կ’ունենայ Համազգայինի «Այգ» երգչախումբը (խմբավար` Զաքար Քեշիշեան):

 

 

Նամակ Հայ Զինուորին. Կը Գրեն Ֆրանսայի Ամիէն Քաղաքի Հայ Փոքրիկները

«Հայերն այսօր»-ն իր ընթերցողներուն է կը ներկայացնէ Ֆրանսայի Ամիէն քաղաքի «Արաթա» հայկական մէկօրեայ դպրոցի աշակերտներու նամակ-բացիկները` ուղղուած Հայոց բանակի զինուորներուն:

%d5%a1%d6%80%d5%a1%d5%bf%d5%bf%d5%a1 %d5%a1%d6%80%d5%a1%d5%bf%d5%bf%d5%a11 %d5%a1%d6%80%d5%a1%d5%bf%d5%bf%d5%a12 %d5%a1%d6%80%d5%a1%d5%bf%d5%bf%d5%a13 %d5%a1%d6%80%d5%a1%d5%bf%d5%bf%d5%a14 %d5%a1%d6%80%d5%a1%d5%bf%d5%bf%d5%a15 %d5%a1%d6%80%d5%a1%d5%bf%d5%bf%d5%a16 %d5%a1%d6%80%d5%a1%d5%bf%d5%bf%d5%a17 %d5%a1%d6%80%d5%a1%d5%bf%d5%bf%d5%a18 %d5%a1%d6%80%d5%a1%d5%bf%d5%bf%d5%a19 %d5%a1%d6%80%d5%a1%d5%bf%d5%bf%d5%a110 %d5%a1%d6%80%d5%a1%d5%bf%d5%bf%d5%a111 %d5%a1%d6%80%d5%a1%d5%bf%d5%bf%d5%a112 %d5%a1%d6%80%d5%a1%d5%bf%d5%bf%d5%a113 %d5%a1%d6%80%d5%a1%d5%bf%d5%bf%d5%a114 %d5%a1%d6%80%d5%a1%d5%bf%d5%bf%d5%a115

Լռութեան Երթ Վարշաւայի ՄԷջ` Նուիրուած Հայոց Ցեղասպանութեան 102-րդ Տարելիցին

2017 թուականի Ապրիլ 24-ին Լեհաստանի տարբեր քաղաքներու մէջ գործող հայկական կազմակերպութիւնները` Հայ-լեհական հասարակական կոմիտէն, Հայկական հիմնադրամը, Լեհ-հայկական հիմնադրամը, Հայկական կոնգրէսը, Լոձ քաղաքի հայկական ընկերակցութիւնը, Էլպլոնկ քաղաքի հայկական ընկերակցութիւնը, «Մուսա Լեռ» հայկական մշակութային կեդրոնը,Փլոցկ քաղաքի հայկական համայնքը, Շլոնսկ քաղաքի հայկական միութիւնը, Վարշաւայի մէջ կազմակերպեցին ամէնամեայ Լռութեան երթ` նուիրուած Հայոց ցեղասպանութեան 102-րդ տարելիցին:

«Հայերն այսօր»-ի փոխանցմամբ` երթի բազմաթիւ մասնակիցներ հայկական դրօշներով, ցեղասպանութեան ենթարկուածերու տանջանքները ներկայացնող ցուցանակներով, մոմերով եւ ծաղիկներով իրենց քայլերն ուղղեցին դէպի Թրքական դեսպանատուն:

Լռութեան երթի իր բացման խօսքը յղեց Հայ-լեհական հասարակական կոմիտէի նախագահ Հրաչեայ Պոյաճեան: Ելոյթ ունեցան նաեւ Հայկական հիմնադրամի ներկայացուցիչ Մացիէյ Պոհոսեւիչը, Փլոցկ քաղաքի հայկական համայնքի ներկայացուցիչ Հրաչ Ղադիմեան եւ այլ ներկաներ:

Մասնակիցները եւ ելոյթ ունեցողները կը դատապարտէին ցեղասպանութեան ոճրագործներն ու կը պահանջէին ցեղասպանութեան ընդունումը:

Լեհական Առաջին ալիքը, Փոլոնիա, Քիելցէ քաղաքի հեռուստաընկերութիւնները անդրադարձած եւ մեկնաբանած են Վարշաւայի մէջ կայացած Լռութեան երթի մանրամասնութիւնները:

Աւելցնենք, որ 2005 թուականին Լեհաստան ճանչցած եւ դատապարտած է Հայոց ցեղասպանութիւնը: Լեհաստանի մէջ կը բնակի մօտ 40 հազարէ աւելի հայ:

%d5%ac%d5%a5%d5%b0%d5%a1%d5%bd%d5%bf%d5%a1%d5%b6%d5%ac%d5%a5%d5%b0%d5%a1%d5%bd%d5%bf%d5%a1%d5%b6%d5%ac%d5%a5%d5%b0%d5%a1%d5%bd%d5%bf%d5%a1%d5%b61%d5%ac%d5%a5%d5%b0%d5%a1%d5%bd%d5%bf%d5%a1%d5%b62%d5%ac%d5%a5%d5%b0%d5%a1%d5%bd%d5%bf%d5%a1%d5%b63 %d5%ac%d5%a5%d5%b0%d5%a1%d5%bd%d5%bf%d5%a1%d5%b64 %d5%ac%d5%a5%d5%b0%d5%a1%d5%bd%d5%bf%d5%a1%d5%b65

Կարելի Չէ Կեանքի Ճշմարտութիւնը Թաքցնել

ԴՈԿՏ. ՀՐԱՅՐ ՃԷՊԷՃԵԱՆ

22 մարտ 2017. Ուիթընպերկ` այսպէս ըսած նախկին արեւելեան Գերմանիոյ գեղեցիկ քաղաքներէն մէկը: Հոն, ուր Մարթին Լուտեր ապրեցաւ եւ ստեղծագործեց, հիմը դնելով նաեւ եկեղեցւոյ ու ընդհանրական կեանքի բարեկարգումի գործընթացին: Այս տարի կը զուգադիպի այս բարեկարգումի շարժումին հինգ հարիւր ամեակին: Գերմանիան եւ շարք մը այլ երկիրներ մեծ հանդիսութիւններով պիտի յիշատակեն այս տարեդարձը: Գերմանիան այս իմաստով ծրագրած է ձեռնարկներու շարք մը` ոգեկոչելու համար այս իրադարձութիւնը:

Քաղաքին տարբեր շրջանները ու տակաւին պատմական հիմք ունեցող ամէն կոթող ու թանգարան այցելելով կարելի էր տեսնել բարեկարգումի շարժումին բերած հոգեւոր մեծ նպաստը` եկեղեցական, կրթական ու ընկերային շատ մը ոլորտներու մէջ: Բարեկարգումի շարժումը սկսաւ գլխաւորաբար Աստուածաշունչի թարգմանութեամբ եւ զայն ժողովուրդին տրամադրելի դարձնելու միտումով: Ան նաեւ կրթական-ակադեմական մեծ վերելք մը ստեղծեց` վերածուելով ներշնչումի եւ մարդկային, ընկերային ու հաւաքական կեանքերուն տուաւ մեծ սլացք: Այս սլացքն էր, որ շատ յստակ կերպով սկսայ տեսնել երբ կը շրջագայէի պատմական այս քաղաքին մէջ:

Բայց այս քաղաքին ու բարեկարգումի «լուսաւոր» կեանքին մէջ կար «տխուր» եւ «խաւար» երես մը: Ուիթընպերկ քաղաքին կեդրոնական եկեղեցիներէն մէկուն պատին վրայ զետեղուած էր միջին դարերէն մնացած «խոզի» նկար մը ու հրեայ պզտիկներ, որոնք նոյն խոզին կաթէն կը խմէին: Նկարը տեսնողը կը հասկնար, թէ պզտիկները դասուած էին համահաւասար սերունդ եւ պատկանելիութիւն` նոյնինքն խոզին:

Հակասեմական տրամադրութիւնները, բայց նաեւ ատելութիւնը ու անոր մթնոլորտը Գերմանիոյ հաւաքական կեանքին մէջ տիրական դարձած են միջին դարերէն սկսեալ, եւ ըստ երեւոյթին բարեկարգումի շարժումն ալ որեւէ ձեւով չէ կրցած «բարեկարգել» այս մթնոլորտը: Իսկ պատմութեան տուեալները աւելիով կ՛ապացուցէին, թէ բարեկարգման շարժումը նաեւ «հրահրած» է այս զգացումները, հասնելով մինչեւ քսաներորդ դարու ողջակիզումին:

Նոյն եկեղեցւոյ կից գտնուող յուշակոթող մը գրաւեց ուշադրութիւնս: Երբ գերմանական պետութիւնը ընդունած է իր գործած քստմնելի ոճիրները` առաջարկուած է անոր  եկեղեցիի ճակատէն վերցնել այդ նկարը: Տեղւոյն հրեայ հաւաքականութիւնը մերժած է այդ առաջարկը եւ որոշած է այդ նոյն նկարին կողքին զետեղել այլ յուշարձան մը` նոյն եկեղեցիին կից, բայց գետինը: Այս պարագային գետինը ունի խորհրդանշական իր պատգամը: Կոթողը կը ներկայացնէր` խորհրդանշական ձեւով` կիսով բացուած գետինը` եւ կարծես գերբնական ուժով մը կը փորձէր դուրս ժայթքեցնել ճշմարտութիւնը: Կոթողին միտք բանիին մէջ չեն մոռցած յիշատակելու թէ` «կարելի չէ կեանքի ճշմարտութիւնը թաքցնել»:

Մարդկային կեանքին ու անոր պատմութեան մէջ գործադրուած քստմնելի մէկ ոճիրին ու  ողջակիզումի իրականութիւնն էր, որուն դէմ յանդիման կանգնած էի: Կանգնած էի յուզումով եւ յուսախաբութեամբ: Հարց կու տայի, թէ ինչպէ՞ս մարդկային միտքն ու բանականութիւնը կրնան այսքան ոճիր հանդուրժել: Այս երկու կոթողներուն մօտ` նաեւ ցանած էին Մայրիի ծառ մը: Անզգալաբար անցայ Մայրիի ծառին տակը, որովհետեւ զգացի հարազատ. վերջապէս իմս էր` լիբանանեանը: Ուիթընպերկի մէջ Մայրիի ծառը իր կարգին ունէր խորհրդանշական այլ պատգամ: Կեանքին պատգամն էր այդ. անիկա կեանքին շարունակականութեան հաւատալու եւ անոր վերապրելու իրականութեան ամուր կառչելու գրաւականն էր: Իբրեւ լիբանանահայ ապրած էի կեանքին ու անոր շարունակականութեան նկատմամբ հաւատքը, որովհետեւ Լիբանանի երկար տարիներու պատերազմին արհաւիրքն ու անոր դժուար փորձարութիւնները առկայ էին, ինչպէս որ այդ դժուար փորձարութեան մէջ վերապրելու հրամայականը ինքզինք կը փաստէր:

Ճիշդ է, որ Մայրիի ծառին տակ հանգիստ զգացի եւ ապահով` բայց անպայմանօրէն սկսայ ապրիլ իմ` հայուն ցաւը: Հայոց ցեղասպանութեան ցաւը ու այդ ահաւոր ատելութիւնը (իմա` խոզի կերպարը), որ օսմանեան Թուրքիան գործադրեց հայուն դէմ: Մէկ կողմէ հայուն նահատակութիւնն ու տեղահանումը, իսկ միւս կողմէ` հայոց լեզուին, մշակոյթին եւ հաւատքին դէմ գործուած չարիքն ու ամբողջ ժողովուրդի մը արմատախիլ ըլլալը` իր պապենական հողերէն. այս բոլորը օսմանեան կայսրութիւնը գործեց հայոց ժողովուրդին դէմ ու տակաւին ան ցայսօր կը փորձէ թաքցնել, իր` Թուրքիոյ եւ մեր` հայուն կեանքերուն ճշմարտութիւնը:

7 ապրիլ 2017. Նիկոսիոյ խորհրդարան: Կիպրահայ պետական ներկայացուցիչ Վարդգէս Մահտեսեան` կը խօսի Կիպրոսի խորհրդարանին եւ Հայոց ցեղասպանութեան յիշատակին մասին: Մինչ կը լսէի Վարդգէսը, մտքիս մէջ կը փորձէի Նիկոսիոյ մէջ ունեցած այս իր ելոյթը կամրջել այն պահուն, որ ապրեցայ Ուիթընպերկի մէջ: Վ. Մահտեսեան խօսեցաւ քսաներորդ դարու առաջին ցեղասպանութեան համար. ան անդրադարձաւ հայուն նահատակութեան, չարչարանքին, հայոց ինչքերուն եւ  կալուածներուն կողոպուտին, անոր ենթարկուած թալանին, կրած ահաւոր տանջանքին եւ տեղահան դառնալուն: Վ. Մահտեսեան իր երախտագիտական խօսքը յայտնեց նաեւ կիպրական կառավարութեան, որ աշխարհի երկրորդ երկիրն էր` հայուն այս «կեանքի ճշմարտութիւնը» ճանչցող, ինչպէս նաեւ Ցեղասպանութեան ժխտումը իբրեւ քրէական օրէնք հաստատող պետութիւն:

Վ. Մահտեսեանի երախտագիտական խօսքին անմիջապէս յաջորդեց եզրափակիչ խօսք մը, որ անոր սրտին ու մտքին արտայայտութիւնն էր: Ինչպէս ամէն հայ Վ. Մահտեսեան եւս սորված էր կեանքին պատմութիւնը կամրջել սրտով ու մտքով:

Ճիշդ է, որ Հայոց ցեղասպանութենէն մէկ դար անցած է, սակայն հայը կը շարունակէ պայքարը` հասնելու համար իր պատմութեան ճշմարտութեան, կառչած մնալով իր իրաւունքներուն եւ  պահանջատիրութեան:

Վարդգէսին խօսքը ունեցաւ իր համոզիչ գրաւականը, այն իմաստով, որ հայը պիտի շարունակէ պայքարիլ, առանց թաքցնելու կեանքի ճշմարտութիւնները:

Ճշմարտութիւնն է, որ պիտի ճեղքէ պատմութեան բոլոր հոլովոյթները (իմա գետինները) եւ ճշմարտութեան ուժով է, որ պիտի ժայթքեցնէ իր արդար պահանջը` իրաւունքը:

Ուիթընպերկէն մինչեւ Նիկոսիա ապրեցայ ցաւը, բայց նաեւ ճշմարտութիւնը եւ այն իրականութիւնը, թէ կեանքի մէջ ճշմարտութիւնը կարելի չէ թաքցնել:

Մինչեւ օրս հայուն պատմութիւնը կը  շարունակեն խեղաթիւրել, բայց անոր դիմաց կայ պատմութեան ճշմարտութիւնը եւ ճշմարտացիութիւնը:

Հայը ունի իր այսօրը եւ այսօրէն կը նայի դէպի վաղուան:

Հայը չէ յուսահատած իր իրաւունքը պահանջելէ, որովհետեւ հաւատացած է ու տակաւին կը հաւատայ, թէ «կարելի չէ կեանքի ճշմարտութիւնը թաքցնել»: Եւ իբրեւ այդպիսին, հայը կը յիշէ ու կը պահանջէ. ան պիտի շարունակէ յիշել եւ պահանջել, որովհետեւ հաւատացած է, թէ իր «կեանքին ճշմարտութիւնը» անպայման պիտի պարտադրուի:

Այս ճշմարտութեան եւ արդարացիութեան նկատմամբ հայուն հաւատքն է, որ կը ծառայէ պատմութիւնը նենգափոխելու եւ խեղաթիւրելու բոլոր փորձերուն դէմ պայքարելու իբրեւ իւրայատուկ ուժ: Այդ հաւատքը երբեք կարելի չէ հարուածել կամ պարտութեան մատնել:

Հայը պիտի շարունակէ հաւատալ, թէ այսօր կեանքի ճշմարտութեան ուժը պիտի հաստատուի, իբրեւ արդար ու ապրող իրաւունք: Ահա այս հաւատքով է, որ հայը պիտի շարունակէ աշխատիլ` կերտելու համար այս արդար ու ապրող իրաւունքը:

1 2

 

«Արցախի (Ղարաբաղի) Հիմնահարցը». Պատմական-Փաստագրական Յօդուածներու Ժողովածու Պարսկերէնով

Թեհրանի «Հեզար-է Քերման» հրատարակչութիւնը  1500 օրինակ տպաքանակով եւ գունաւոր տպագրութեամբ հրատարակած է Կովկասի եւ Թուրքիոյ հարցերու հետազօտող Իսակ Եունանէսեանի աշխատասիրած «Արցախի (Ղարաբաղի) հիմնահարցը» յօդուածներու պարսկերէն 399 էջէ բաղկացած ժողովածուն:

Ինչպէս կը հաղորդէ «Հայերն այսօր»-ը, տաս գլուխներէ կազմուած պատմա-փաստագրական յօդուածներու ժողովածուն կը ներառէ թէ՛ կազմողի եւ թէ՛ հայ ու պարսիկ այլ փորձագէտներու յօդուածները:

Ժողովածուի յօդուածներու ցայտուն եւ ակնառու թեմաներն են` Հայաստանի պատմութիւնը, Արցախի Հանրապետութեան (Ղարաբաղի) պատմութիւնը, Նախիջեւանի տարածաշրջանի պատմութիւնը, Ատրպէյճանի կազմաւորման գործընթացքը, հայ-ատրպէյճանական հակամարտութիւններու, Ղարաբաղեան  պատերազմի, Խոջալուի եւ յարանման դէպքերու արմատներու վերլուծումը, Թուրքիոյ ստանձնած դերակատարութիւնն այդ խնդիրներուն մէջ եւ Ատրպէյճանի ղեկավարներու հակահայ քաղաքականութիւնը:

Արծարծուած միւս կարեւորագոյն նիւթերն են` Ղարաբաղը Հայաստանին պատկանելու մասին խօսող իրանական եւ օսմանական աղբիւրներու քննարկումները: Գիրքի աւարտական գլուխներուն մէջ հեղինակը կը քննարկէ այդ հիմնահարցին մաս կազմող եւ չլուծուած հակամարտութիւնները, որ Ատրպէյճան կը շարունակէ իրականացնել տարածաշրջանին մէջ ԶԼՄ-ներու պայքարին միջոցով, որ կը բովանդակէ պատմութեան յօրինում եւ արհեստական շինծու ինքնութեան ստեղծում: Հեղինակին տեսակէտէն` Ղարաբաղեան հիմնահարցին չլուծուած այդ կողմերը պատճառ  դարձած են, որ Ղարաբաղի տարածքին մէջ գոյութիւն ունեցող եւ պաշտօնապէս գրանցուած աւելի քան 1600  քրիստոնէական պատմամշակութային կառոյցներով, վիմագիր արձանագրութիւններով, եկեղեցիներով, խաչքարերով ու գերեզմանատուներով, պահպանուած բազմաթիւ պատմական քարտէզներով, նշանաւոր պատմաբաններու գրութիւններով, Կովկասի տարածաշրջանին մէջ Իրանի հարիւրամեակներով գերիշխանութեան փաստերու առկայութեամբ  հանդերձ, Ատրպէյճանի ղեկավար այրերն ու պատմաբանները անտեսելով կամ հերքելով ատոնք, զբաղուած են միլիարներ ծախսելով պատմութեան խեղաթիւրման ծաւալուն աշխատանքին վրայ, նպատակ ունենալով` գլխիվայր ներկայացնել բոլոր այն փաստագրութիւնները, վկայութիւնները եւ քարտէզները, որոնք պահպանուած են իրանցի, ռուս, եւրոպացի եւ հայ նշանուոր պատմագիրներու ու աշխարհագրագէտներու` Իրանի, Հայաստանի ու Ղարաբաղի պատմութեան մասին:

Հեղինակը լիայոյս է, որ սոյն աշխատասիրութեամբ հնարաւոր կ’ըլլայ պարսկալեզու ընթերցողին լուսաբանել Կովկասի տարածաշրջանի պատմութեան վերաբերող որոշ ճշմարտութիւններ եւ գիրքի հրատարակումով  քայլ մը կատարել ընդդէմ Իրանի ու Հայաստանի պէս պատմական հնամեայ ժողովուրդներու պատմութեան խեղաթիւրման:

Գիրքին մէջ յօդուածներ հրապարակած են` դոկտ. Կարէն Խանլարեան, Շահէն Յովսէփեան, Ռուբէն Գալիճեան, Անուշիկ Մելիքեան, Հայկ Դեմոյեան, Ռոբերտ Մարգարեան եւ գիրքը կազմող Իսակ Եունանէսեան: Ներառուած են նաեւ Թեհրանի «Փեյման» (Պայման) հայագիտական պարսկերէն եռամսեայ հանդէսին մէջ տպագրուած յօդուածներ` դոկտ. Էնայաթոլլահ-է Ռեզայէն, Քավեհ-է Պայաթէն եւ Թաթուլ Յակոբեանէն:

%d5%ab%d5%bd%d5%a1%d5%af-%d5%b5%d5%b8%d6%82%d5%b6%d5%a1%d5%b6%d5%a5%d5%bd%d5%b5%d5%a1%d5%b6

Հայոց Ցեղասպանութեան 102-րդ Տարելիցին Նուիրուած Համերգ Պէյրութի ՄԷջ

Ապրիլ 28-ին Լիբանանի մէջ ՀՀ դեսպանութեան կողմէ Պէյրութի ամերիկեան համալսարանի երաժշտասրահին մէջ կազմակերպուած էր «Մէկ դարաշրջանի հայկական ժառանգութիւն» վերտառութեամբ համերգ` նուիրուած Հայոց ցեղասպանութեան 102-րդ տարելիցին: Համերգին հանդէս եկան դաշնակահար Արմէն Քեչէկ եւ լիբանանցի սոփրանօ Քարոլին Սօլաժ: Այս մասին «Հայերն այսօր»-ին կը յայտնեն ԱԳՆ մամլոյ ծառայութենէն:

Համերգին ներկայ էին Լիբանանի մէջ հաւատարմագրուած դիւանագիտական մարմնի, պետական, մշակութային, կրթական հաստատութիւններու, հայ համայնքի ներկայացուցիչներ:

Իր բացման խօսքին մէջ դեսպան Մկրտչեան անդրադարձաւ Հայոց ցեղասպանութեան ճանաչման եւ դատապարտման ներկայ հանգրուանին, ցեղասպանութեան յանցագործութեան պատժելիութեան եւ կանխարգելման ու այդ ուղղութեամբ տարուող Հայաստանի ու միջազգային հանրութեան ջանքերու շարունակականութեան խնդիրներուն:

Դեսպան Մկրտչեան նաեւ խօսեցաւ միջմշակութային փոխանակումներու եւ համագործակցութեան առանձնայատուկ կարեւորութեան մասին` այս ծիրէն ներս օրինակելի համարելով հայ եւ լիբանանցի ժողովուրդներու հարուստ ժառանգութիւնը:

Համերգի ծրագիրին մէջ ընդգրկուած էին Կոմիտասի, Ռոմանոս Մելիքեանի, Գէորգի Սարաջեանի, Բարսեղ Կանաչեանի, Առնօ Բաբաջանեանի, Պօղոս Ջելալեանի ստեղծագործութիւնները:

%d5%a2%d5%a5%d5%b5%d6%80%d5%b8%d6%82%d5%a91

Լիբանանի Արդարադատութեան Նախարարը Ցանկութիւն Յայտնած Է Այցելելու Հայաստան

Ապրիլ 28-ին Լիբանանի մէջ ՀՀ դեսպան Սամուէլ Մկրտչեան հանդիպեցաւ Լիբանանի արդարադատութեան նախարար Սալիմ Ժրէյսատիին: Այս մասին «Հայերն այսօր»-ին կը յայտնեն ԱԳՆ մամլոյ ծառայութենէն:

Հանդիպման ընթացքին քննարկուեցան Հայաստանի եւ Լիբանանի միջեւ իրաւական ոլորտին մէջ համագործակցութեան առնչուող հարցեր: Կարեւոր համարուեցաւ համապատասխան փաստաթուղթերու համաձայնեցումն ու ստորագրումը:

Անդրադարձ կատարուեցաւ երկու երկիրներու իրաւական համակարգերու բարեփոխումներուն, դատական իշխանութիւններու ամրապնդման ուղղուած քայլերուն:

Մտքեր փոխանակուեցան Հայոց ցեղասպանութեան ճանաչման եւ անոր հետեւանքներու վերացման միջազգային իրաւական խնդիրներուն շուրջ:

Նախարար Սալիմ Ժրէյսատին ցանկութիւն յայտնեց յառաջիկային այցելել Հայաստան:

«Սէյնթ Ճուտ» Հիւանդանոցին Ի Նպաստ Անի Քերոբեանի Դաշնակի Համերգը՝ Ապրիլ 29ին

Ասպարէզ-Դաշնակահար, «Սետըլպեք» համալսարանին մէջ դաշնակի դասախօս փրոֆ. Անի Քերոբեան համերգ մը կազմակերպած է ի նպաստ երեխաներու «Սէյնթ Ճուտ» ուսումնասիրական կեդրոն-հիւանդանոցին։

Համերգը տեղի պիտի ունենայ Շաբաթ, Ապրիլ 29ին, երեկոյեան ժամը 7։30էն սկսեալ, վերոնշեալ համալսարանի «ՄըքՔինի» համերգասրահին մէջ։

Ընթացքին պիտի ներկայացուին Պրամզէն, Բաբաջանեանէն, Լիսթէն, Ճելալեանէն, Յարութիւնեանէն եւ այլ յօրինողներէ ստեղծագործութիւններ: Իբրեւ հիւր կատարող, ձեռնարկին պիտի մասնակցի նաեւ թաւջութակահար Եաու Ուենկ:

Մասնակցութեան սակը 15 տոլար է, իսկ տարեցներու եւ աշակերտներու համար, յաջորդաբար՝ 12 եւ 10 տոլար: Տեղեր ապահովելու համար, դիմել (949) 582-4656 թիւին կամ այցելել www.saddleback.edu/arts կայքէջը։