Քրտական Հարցի Լուծման Գործընթացի Ձախողութիւնը Թուրքիոյ Համար Աղէտ Մը Կրնայ Դառնալ. Աճէմօղլու

ՊՈԼԻՍ, «Մարմարա».- Տարօն Աճէմօղլու, որ աշխարհի ամէնէն նշանաւոր տնտեսագէտներէն մէկը կը նկատուի, Թուրքիոյ տնտեսական ու քաղաքական այժմու վիճակին մասին «Անատոլու» գործակալութեան հարցումներուն պատասխանեց եւ մասնաւոր կերպով ընդգծեց, թէ քրտական հարցի լուծման գործընթացի ձախողիլն ու կանգ առնելը Թուրքիոյ համար քաղաքական ու տնտեսական աղէտ մը կրնայ դառնալ։

Տարօն Աճէմօղլու կողմնակից է, որ քրտական հարցի լուծման գործընթացը շարունակուի ամէն գնով։ Ան պաշտպանեց նաեւ Թուրքիոյ Կեդրոնական դրամատան անկախութիւնը, Թուրքիոյ համար նոր վտանգ մը նկատեց «Իսլամական պետութիւն» կազմակերպութիւնը։

Ըստ Տարօն Աճէմօղլուի՝ Թուրքիա պէտք է վերանորոգէ ինքզինք՝ կարգ մը փոփոխութիւններ իրականացնելով։

Ատրպէյճանցիները փորձած են հրդեհել Խաչիկի արօտավայրերը, բայց իրենք իրենց ծուղակը ինկած են (Լուսանկարներ)

Yrkir.am-ի տեղեկութիւններով` երէկ հակառակորդը Նախիջեւանի սահմանագօտիին  կրակ  բացած է Խաչիկ գիւղի արօտավայրերու ուղղութեամբ` հաւանաբար հրդեհ յառաջացնելու նպատակով: Մեր տեղեկութիւններով` գիւղացիները յաջողած են  հէնց սահմանագօտիին վրայ կրակը մարել, փոխարէնը հրդեհը տարածուած է ատրպէյճանական կողմի խոտածածկ տարածքները` դառնալով մօտ 200 Հա խոտածածկի այրման պատճառ:

Yerkir.am-ի հետ զրոյցին Խաչիկի գիւղապետ Վարդան Ներսիսեան պատմեց , որ 30-35 գիւղացիներով անմիջապէս հանգեցուցած են կրակը: «Չցգեցինք իջնէ մեր սահման, իրենք ալ  փորձեցին հանգցնլ, բայց չհասցուցին` տարածուեցաւ իրենց կողմը: Սահմանի բերանին կանգնած` մեզի կը նայէին»,-պատմեց գիւղապետը եւ աւելցուց, որ , եթէ կրակը տարածուէր գիւղի ուղղութեամբ` կը վնասէր խաղողի այգիներն ու ցանքատարածութիւնները:

Փաստօրէն ատրպէյճանցիները իրենք իրենց  ծուղակը ինկած են:

image (1) image (2) image

Յակոբ Պալեան. « Եթէ խայծ տաս, մարդիկ կը հակազդեն»

Օրերս ՀՀ Գիտութիւններու ազգային ակադեմիոյ մէջ  ՀՀ սփիւռքի նախարարութեան եւ  ՀՀ ԳԱԱ Հր. Աճառեանի անուան լեզուի ինստիտուտի նախաձեռնութեամբ կայացաւ «Արեւմտահայերէնի եւ արեւելահայերէնի մերձեցման խնդիրներ» թեմայով համաժողովը: Հայերէնի երկու ճիւղերու մերձեցման նպաստող քայլերուն շուրջ էր Համազգային հայ կրթական մշակութային միութեան «Բագին» պաշտօնաթերթի գլխաւոր խմբագիր, ազգային գործիչ Յակոբ Պալեանի զեկոյցը, որուն հետ եւ զրուցած է «Հայերն այսօրը»:

– Պարո՛ն Պալեան, գաղտնիք չէ, որ մայրենին Սփիւռքի մէջ նահանջ կ’ապրի: Ձեր կարծիքով, ի՞նչ է գլխաւոր պատճառը:

– Լեզուի պաշտպանութիւնը ղեկավարման հարց է, բայց ո՛չ անհատ ղեկավարի: Պէտք է  ռազմավարութիւն մշակել` նկատի ունենալով, որ լեզուն ազգի գոյատեւման հիմնական ազդակն է: Եթէ լեզուն կորսնցնենք, հաւաքականութիւնը եւս կը կորսուի: Պատմական փաստեր կան, օրինակ` Լեհաստանի հայութիւնը, որ շուրջ 200 հազար էր, անհետ կորած է: Կ’ըսեն, որ Ֆրանսայի մէջ Կիլիկիոյ շրջանէն եկած հայեր կան, բայց… լեզուն կորսուած է, իրենք ալ կորսուած են:

Լեզուով կը ժառանգուին գաղափարները, լեզուն բառերու միջոցով իմաստը կը փոխանցէ: Օրինակ մը բերեմ. Ֆրանսայի մէջ դասախօսութիւն պէտք է կարդայի, ուսանողներուն հարցուցի` ֆրանսերէ՞ն պիտի խօսինք, թէ՞ հայերէն: Ըսին` երկու երիտասարդ հայերէն չեն հասկնար, ֆրանսերէն խօսէք: Լաւ` ըսի ու հարցուցի` ֆրանսացիները թռչուն ունին, որ կը կոչուի «Կռուէ» (grue), գիտէ՞ք ինչ է: Բոլորը իրար երես նայեցան: Ետեւի շարքէն մէկը ըսաւ` կռունկ: Ամբողջ սրահը բացականչեց` ահ, կռունկը: Այդ «ահ»-ն է լեզուի ուժը:

Ինչպէս ֆրանսացի իմաստասէրը կ’ըսէ` բառերու ժառանգութիւնը, գաղափարներու ժառանգութիւն է: Մենք ի՞նչ պէտք է ժառանգենք առանց լեզուի: Եւ ինչպէս Ռաֆայէլ Իշխանեան կ’ըսէր` առանց լեզուի, ի՞նչ ազգ:

Լեզուն լեզուամտածողութիւն է, ապրում: Շատերուն կ’ըսեմ` վերցուցէք Նարեկացիի գիրքն ու բարձրաձայն կարդացէք, ոչի՛նչ եթէ իմաստը չկարենաք ըմբռնել, ատիկա տաք գինի խմելու պէս  բան մըն է: Ու մենք այսօր, այդ լեզուի ուժը կորսնցնելու վտանգի առջեւ ենք.Սփիւռքի ամենամեծ խնդիրն է սա:

 1915 թուականէն յետոյ Ցեղասպանութեան ճանաչման հարցը, Հայ դատը հետապնդելով մենք հիմնականը մոռցանք:

– Ին՞չ  պէտք է ընել:

– Դպրոցին մէջ լեզուն սորվեցնելու համար յատուկ մանկավարժութիւն  պէտք է: Իսկ երբ այդ լեզուն սեփական հողիդ վրայ չես սորվեցներ, երբ փոքրիկդ Էջմիածինի գմբէթը տեսնելով չէ, որ լեզու կը սորվի, յատուկ մանկավարժութիւն  պէտք է` երկլեզուանի մանկավարժութիւն: Երկլեզուանի մանկավարժութեան ամենամեծ մասնագէտներէն մէկն ալ հայ է` Ժիլպերթ Պարգարեան, որ ճանչցուած մասնագէտ է:

Լեզուն հեռագիր է, աշխարհաճանաչողութեան միջոց: Այդ աշխարհաճանաչողութիւնն է, որ այսօր Սփիւռքը չունի: Սփիւռքեան դպրոցներուն մէջ լեզու չէ, որ կը սորվին, հաղորդակցուելու միջոցներ կը սորվին:

Սփիւռքի մէջ այսօր լեզուի ուսուցումը հիմնականին մէջ պատահականութեան ձգուած է:

1974 թուականին նոր  Ֆրանսա գացած էի: Այցելեցի Վիէն անունով քաղաք, ուր մէկօրեայ դպրոց կը գործէր: Ըսին, որ անցեալին 42 աշակերտ ունեցող դպրոցին մէջ, հիմա միայն 12  ուսանող ունի: Հարցուցին, թէ իմ կարծիքով` ի՞նչ է պատճառը: Ըսի` ո՞վ կը դասաւանդէ: Պատասխանեցին, թէ Ամմանէն եկած  աղջիկ մը, որ նախակրթարանի 5-րդ դասարան  աւարտած է:

Ահա եւ գլխաւոր պատճառներէն մէկը, որ շատ յաճախ մենք կ’անտեսենք: Ուսուցիչը պէտք է պատրաստուած ըլլայ: Եթէ ոչ` գործը չի յաջողիր: Գաղտնիք չէ, որ աշակերտները 5 վայրկանի մէջ կրնան մարդուն «կշռել»: Միթէ՞ ան կրնայ յարգել միջնակարգ կրթութեամբ իր ուսուցիչը այն պարագային, երբ ֆրանսական դպրոցին մէջ իր ուսուցիչը համալսարանական կրթութիւն ունի, աւելի զարգացած է:

Ուսուցիչներու ընտրութեան հարցով պէտք է շատ բծախնդիր ըլլալ: Հայերէնի ուսուցիչներուն պէտք է շատ բարձր վարձատրել,  որ վերջերս Պէյրութի ճեմարանը սկսաւ ընել: Հայերէնի ուսուցիչին աւելի շատ կը վճարէ, որ շատերը ցանկան հայերէնի ուսուցիչ դառնալ:

Ժողովուրդին պէտք է հպարտութիւն ներշնչել, անոր ըսել, որ հայերէնը այնքան հարուստ լեզու է, որ ամէն բան հայերէնով կարելի է ըսել: Բոլոր բառերու հայերէնը կայ, ինչու գործածել օտար բառեր:

– Պարո՛ն Պալեան, անդրադառնանք համաժողովին: Ձեր կարծիքով, որո՞նք են արեւելահայերէնի եւ արեւմտահայերնի մերձեցման ուղիները:

– Հեռանկար պէտք է ունենալ, բայց նախ եւ առաջ միասին աշխատելուն պէտք է վարժուինք: Պէտք է մասնագիտական խումբ ստեղծել, որ եւ պէտք է առանձնացնէ այն հարցերը, որոնց ուղղութեամբ եւ պէտք է աշխատիլ:

Պէտք է պայքարիլ ո՛չ միայն արեւելահայերէնի եւ արեւմտահայերէնի մերձեցման ուղղութեամբ, այլեւ օտարաբանութիւններու:

Իսկ այս նախ եւ առաջ հպարտութեան հարց է, քաջութեան, ինչ որ  մեզի կը պակսի:

Իսկ օտարամոլութիւնը անցեալէն կու գայ: Ռուսաստանի մէջ որքան արագ կը կորսնցնենք (կորսնցուցած) մեր լեզուն, Պոլսոյ մէջ ժամանակին շատերը ֆրանսերէն կը խօսէին իրենց ընտանիքներէն ներս:

20-րդ դարու ամենամեծ հայերէն մէկը` Շնորք պատրիարքը, որուն մայրենին թրքերէնն էր, որուն ընտանիքին մէջ իսլամացածներ ալ կային, թրքական հեռուստատեսութեամբ կը խօսէր հայերէն, նախագահին հետ կը խօսէր միայն հայերէն:

Այս է ազգային կեցուածքը, հպարտութիւնը, որ կորսնցուցած ենք եւ պէտք  ունինք վերականգնելու:

– Պարո՛ն Պալեան, լրատուամիջոցները ի՞նչ կրնան ընել:

– Մամուլը այս հարցերուն մասին անդադար պէտք է խօսի: Մեր ազգային գաղափարախօսութիւնը մշակման պէտք ունի: Եւ այս հարցին մէջ մեծ է լրատուամիջոցներու դերը:

Մեզի հոգեկան, մտայնութեան յեղափոխութիւն  պէտք է եւ՛ լեզուի հարցով եւ՛ մարդկային փոխյարաբերութիւններու:

Կրթական հարցերը աւելի բարդ են, քան կը կարծենք: Մէկ շէնք աւելի կառուցելու փոխարէն, պէտք է այդ հարցերով զբաղուիլ: Ինչպէս Օշականը ըսած է` Մագաղաթը աւելի երկար կ’ապրի, քան մարմարը:

Հայրենադարձութեան քաղաքականութիւն պէտք է մշակել, որ մարդիկ ընտանիքներով վերադառնան, ո՛չ թէ արտագաղթեն:

Լրատուամիջոցները յաճախ այս թեմաներու մասին պէտք  է խօսին եւ ժողովուրդին մասնակից ընեն այդ խօսակցութիւններուն: Այլապէս շատ յաճախ այդ խօսակցութիւնները մենախօսութեան կը վերածուին: Իսկ երբ ժողովուրդը մասնակից կը դառնայ, ան կը  տեսնէ իր թերութիւնները ու կը փորձէ շտկել ատոնք, վերականգնել: Պէտք է խօսիլ ժողովուրդին հետ: Եթէ խայծը տաս, մարդիկ կը հակազդեն:

– Պարո՛ն Պալեան, միշտ ալ լաւագոյն օրինակը սեփական փորձառութիւնն է: Ազգային հպարտութեան Ձեր ակունքը ի՞նչ է:

– Ընտանիքէս, հասկնալի պատճառներով, շատ քիչ բան  փոխանցուած է: Մայրս Ջարդի սերունդէն էր, միայն մանկապարտէզ  գացած է, հայրս…

Մայրս ամառները ինծի աշխատանքի կ’ուղարկէր: Ամառ մըն ալ ուղարկեց կօշկակարներու մօտ: Օր մը անոնք ինծի ըսին` գիրք բերենք, մեզի համար կարդայ. ռատիօ չկար այն ժամանակ: Մէկ շունչով կը կարդայի անոնց բերած գիրքերը: Օր  ալ կ’ըլլար` մօտ 10 ժամ կը կարդայի, իրենք ալ կ’աշխատէին:

Ըսածս ինչ է` հաղորդակցութեան հարց է: Հայ գիրին, գրականութեան, հայ մթնոլորտին պիտի հաղորդակցիս: Մարդիկ այսօր չեն կարդար, ինչպէ՞ս պէտք է հաղորդակից ըլլան այդ ամէնուն…

Զրուցեց Լուսինէ Աբրահամեան

Օֆելեայ Ծատուրեան.«Հայաստան գալը ինծի համար ամենալաւ ճամփորդութիւնն է»

«Հայերն այսօրի»  զրուցակիցը ԱՄՆ Կլենտէլ քաղաքի «Դաւթեան եւ Մարիամեան»  կրթական հաստատութեան տնօրէն  Օֆելեայ Ծատուրեանն է:

Տիկին Օֆելեան միայն Հայաստան աշխարհի մէջ  կրնայ լիարժէք հանգստանալ եւ կտրուիլ առօրեայ հոգերէն: Իսկ այս տարուան ճամփորդութիւնը դեռեւս երկար կը մնայ Ծատուրեաններու յիշողութեան մէջ…

 

-Տիկի՛ն Օֆելեայ, որքան նկատած եմ ամրան միշտ  Հայաստան կու գաք:

-Այո՛, շատ ճիշդ էք: Ամառնային արձակուրդս ընտանիքիս  հետ Հայաստանի մէջ կը եմ կազմակերպեմ. Բազմիցս հնարաւորութիւն  ունեցած եմ գեղեցիկ երկիրներ ճամփորդել, սակայն հրաժարած եմ եւ որոշած իմ Հայրենիքիս մէջ օրերս անցնել:

 Հայաստան գալը ինծի համար ամենալաւ ճամփորդութիւնն է: Օտար որեւէ երկիր երթալուս   այդպէս չեմ յագենար եւ հաճոյք ստանար,  ինչպէս Հայաստանի մէջ, վայելքի մէջ կ’ըլլամ: Սոսկ ճամփորդելու նպատակով չեմ գար, այլեւ Հայաստանի մէջ ինքզինքս կը զգամ ինչպէս իմ տան մէջ` հարազատներով շրջապատուած: Հայրենի հողէն ուժ կը ստանամ, կը լիցքաւորուիմ ամէն մէկ քարէն ու թուփէն, բնութենէն, նոյնիսկ քաղցրանուշ միրգերու ու բանջարեղէններու բոյրէն,  ժողովուրդիս բարի ժպիտներէն:

Իսկ երբ վերադառնամ Ամերիկայի Միացեալ Նահանգներ` միանգամէն կը սկսիմ կարօտնալ Հայրենիքս եւ կ’արօտախտի մէջ կիյնամ:

Այս  տարուան  այցելութիւնը առաւել արդիւնաւէտ դարձաւ. փոքր տղաս` Քրիստոֆերը, մասնակցեցաւ ՀՀ սփիւռքի նախարարութեան  «Արի տուն»  ծրագիրին: Հպարտութիւնս մեծ է, որ վերջապէս որդիս ծրագիրի մաս կազմեց, ատիկա մեր ընտանիքին համար կարեւոր ձեռքբերում էր, խանդավառուած ենք բոլորս:

Պէտք է ըսեմ, որ Քրիստոֆերը շատ գոհ  մնացած է ծրագիրէն: Ես նոյնպէս իբրեւ ծնող մասնակցութենէն յետոյ դրական տեղաշարժեր  նկատած եմ անոր մօտ:

-Ըստ Ձեզի «Արի տուն»  ծրագիրը ի՞նչ կու տայ սփիւռքահայ երիտասարդին:

-Նախ ըսեմ, որ ես եւ ամուսինս`Վահիկ Ծատուրեանը, Դաւթեան եւ Մարիամեան կրթական հաստատութեան միջոցով ամէն առիթի  Կլենտէլի հայութեան կ’իրազեկենք «Արի տուն» ծրագիրի մասին եւ աշակերտներու ծնողներուն կը յորդորենք, որ երեխաներուն այս կարեւոր ծրագիրին մասնակցելու ուղարկեն:

Շատ գոհ եմ «Արի տուն»  ծրագիրէն: ՀՀ սփիւռքի նախարարութիւնը իսկապէս Հայաստանը Սփիւռքին կապելու գործին մէջ մեծ աշխատանք կը կատարէ: Անուրանալի են իմ սիրելի Հրանոյշ Յակոբեանի անսպառ ջանքերն ու անմնացորդ նուիրումը առհասարակ Սփիւռքի նկատմամբ, ան մեծ գովասանքի արժանի է: Տիկին Յակոբեան իսկապէս ինծի համար շատ յարգուած մարդոցմէ մէկն է, որուն գործունէութիւնն ու մարդկային որակները բարձր կը գնահատեմ:

Անդրադառնալով Ձեր հարցին` նշեմ, որ «Արի տուն» ծրագիրը աշխարհասփիւռ հայորդիներուն աննախադէպ հնարաւորութիւն կու տայ Հայրենի երկրի եզերքները տեսնելու, աւելի մօտիկէն Հայաստանը զգալու հարցին մէջ:

Իսկ խօսքերը քիչ են արտայայտելու հիացումս Ծաղկաձորի «Արի տուն» ճամբարին մասին, ուր «Հրաժեշտի խարոյկին»  ներկայ գտնուեցայ: Կը յուզուէի անընդհատ, երբ կը տեսնէի  երեխաներու ջերմ ու անկեղծ շփումը, իսկ ոգեւորութիւնս այնքա՜ն շատ էր, որ անոնց պարելու միացայ: Կարծես` երիտասարդացայ անոնց շարքերուն մէջ:

Պէտք է փաստեմ, որ «Արի տուն»  ծրագիրը հայապահպանութեան, ազգային խնդիրներու լուծման ուղղուած հայրենասիրական գլխաւոր ծրագիրն է:

-Տիկի՛ն Օֆելեայ, իսկ Դուք մասնակցեցաք «Սփիւռք» ամառնային դպրոցի  «Սփիւռքի համայնքային գործի կազմակերպիչներ» դասընթացքին: Ին՞չ տպաւորութիւններ ունիք  դասընթացքէն:

-Ծրագիրի ծիրէն ներս  արդիւնաւէտ դասընթացներ ունեցանք: Մանրակրկիտ ծանօթացանք ՀՀ սփիւռքի նախարարութեան կողմէ իրականացուող ծրագիրներուն, Սփիւռքի հետ տարուող աշխատանքներուն մէջ նախարարութեան ռազմավարութեան  ու մօտեցումներուն:

Նախարարութեան աշխատակիցները համայնքային գործի կազմակերպիչներուն համար համայնքային խնդիրներու լայն քննարկում կազմակերպեցին, որ, անշուշտ, հրատապ հարց էր:

Ապա մեզի հնարաւորութիւն տրուեցաւ ներկայացնելու համայնքային կառոյցներու, կազմակերպութիւններու խնդիրները եւ հայապահպանութեան ուղղութեամբ կատարուող քայլերը: Ինչպէս նաեւ քննարկեցինք յետագայ  համագործակցութեան ծրագիրները:

Ուրախութիւնս մեծ էր, որ  ծանօթացայ տարբեր երկիրներէ ժամանած գործընկերներուս հետ: Խօսելով հայապահպանութեան ուղղուած տարաբնոյթ խնդիրներու շուրջ` հասկցանք, որ բոլորիս դժուարութիւններն ու ցաւը Սփիւռքի մէջ մէկն է ` օգտակար ըլլալ Հայաստանին: Օտար ափերու վրայ ապրողներս վստահաբար կրնամ ըսել, որ կը փորձենք հնարաւորութեան սահմաններուն մէջ ձեռք մեկնել Հայրենիքին:

Ակամայ յիշեցի Զօրավար Անդրանիկի խօսքերը, ուր կ’ըսուի. «Ամէն գիշեր գլուխդ բարձին դնելէ առաջ  քիչ մը մտածէ՛, թէ ինչ ըրած ես  ազգիդ համար»:

Այս անգին խօսքերը պէտք է ուղենիշ ըլլան բոլորիս համար:

 -Ձեր ընտանիքի այցը Հայաստան կարեւորուեցաւ նաեւ ՀՀ սփիւռքի նախարարութեան եւ «Դաւթեան–Մարիամեան» կրթական հաստատութեան միջեւ համագործակցութեան յուշագիրի կնքումով: Կը խնդրէի քիչ մը մանրամասնէք այս կարեւոր իրադարձութիւնը:

-Նախ ըսեմ, որ Սփիւռքի նախարարութեան ստեղծման առաջին տարիներէն հասցուցած ենք բարեկամական յարաբերութիւններ ձեւաւորել նախարարութեան հետ եւ երկուստեք սերտ համագործակցիլ: Միշտ զգացած ենք ՀՀ սփիւռքի նախարարութեան սրտցաւ, հոգատար վերաբերմունքը մեր նկատմամբ:

Այնուամենայնիւ ուրախ եմ, որ «Դաւթեան–Մարիամեան» կրթական հաստատութեան եւ ՀՀ սփիւռքի նախարարութեան հետ կապերը այս յուշագիրի կնքումով  աւելի կ’ամրապնդուին եւ համագործակցութեան նոր ուղիներ կը նշմարուին: Անխօս, պիտի շարունակենք հետամուտ ըլլալ Հայաստան-Սփիւռք գործակցութեան զարգացման, մշակութային, կրթական, դաստիարկչական եւ քարոզչական ծրագիրերու իրականացման, Սփիւռքի մէջ հայոց լեզուի պահպանման եւ հայապահպանութեան խնդիրներու լուծման ուղղուած ազգանպաստ գործունէութիւնը:

Զրուցեց Գէորգ Չիչեան

a2a3 a4a1a5a6a7a8

 

Նշուեցաւ ԱՍԱԼԱ-ի ստեղծման 40-րդ տարեդարձը. լուսանկարներ

Հայաստանի ազատագրութեան հայ գաղտնի բանակի (ԱՍԱԼԱ) հիմնադրման 40-րդ եւ  «Կարին» գործողութեան 33-րդ տարեդարձներուն այսօր` Օգոստոս 7-ին,  ԱՍԱԼԱ-ի նախկին ազատամարտիկները, երիտասարդները եւ բազմաթիւ այլ քաղաքացիներ Եռաբլուրին մէջ յարգանքի տուրք մատուցեցին ԱՍԱԼԱ-ի նահատակներու յիշատակին:

Անոնք ծաղիկներ տեղադրեցին ԱՍԱԼԱ-ի նահատակներու յիշատակին կառուցուած յուշարձանին, կը յայտնէ News.am-ը:

«Քանի Արեւմտեան Հայաստանը դեռ գրաւուած է, 40, 50, 60 տարին որեւէ  բան չի փոխեր մեր մէջ, պայքարը կը շարունակուի նոյն հոգիով: Ինչպէս 30 տարի առաջ, երբ ես կատարեցի «Վան» գործողութիւնը ու կը հաւատայի այդ պայքարին, հիմա ալ նոյն մտքին եմ»,- լրագրողներուն ըսաւ ԱՍԱԼԱ-ի «Վան» գործողութեան հրամանատար Վազգէն Սիսլեան:

Վազգէն Սիսլեան վստահութիւն յայտնեց, որ այսօրուան երիտասարդութիւնը օր մը կը վերադարձնէ իր հայրենիքը:

Նշենք, որ 1975թ. Յունուար 20-ին Հայաստանի ազատագրութեան հայ գաղտնի բանակը Պէյրութի մէջ Համաշխարհային եկեղեցիներու խորհուրդի գրասենեակին դիմացը կատարեց իր առաջին գործողութիւնը: Այդ գործողութեան արդիւնքով ոչ մէկը չտուժեց:

Ընդհանուր առմամբ` մինչեւ 1997 թուական ASALA-ի կողմէ աշխարհի տարբեր երկրներու մէջ կազմակերպուած է աւելի քան 200 յարձակում, որոնց ընթացքին սպաննուած են 42 թուրք դիւանագէտներ: Գործողութիւններուն նպատակն էր ստիպել Թուրքիոյ կառավարութեան հրապարակաւ ճանչնալ 1,5 մլն հայերու սպանութեան պատասխանատուութիւնը, փոխհատուցել եւ զիջել պատմական Հայաստանի տարածքները:

ԱՍԱԼԱ-ի գործունէութեան ընթացքին զոհուած է կազմակերպութեան աւելի քան 30 մարտիկ, եւս  քանի մը տասնեակ անդամներ կալանաւորուած եւ դատապարտուած էին:

0203 0405 06 Asala

Արամ Ա. կաթողիկոսին այցելեցին Ե.Հ.Խ-ի և Մ.Ա.Ե.Խ.-ի ներկայացուցիչները

 Օգոստոս  7-ին Ն.Ս.Օ.Տ.Տ. Արամ Ա. Կաթողիկոս ընդունեց այցելութիւնը, Եկեղեցիներու Համաշխարհային Խորհուրդի (Ե.Հ.Խ.) Միջին Արեւելքի Եկեղեցիներու Խորհուրդի (Մ.Ա.Ե.Խ.) առնչուած հարցերու պատասխանատուներէն, Դոկտ. Միշէլ Նսէյրի և Մ.Ա.Ե.Խ.-ի ընդհանուր քարտուղար՝ Դոկտ. Միշէլ Ժալըխի։

Աշխատանքային հանդիպումը առիթ մը հանդիսացաւ ընդհանուր քննարկումի ենթարկելու Մ.Ա.Ե.Խ.-ի և Ե.Հ.Խ.-ի գործակցութիւնը աւելի ամրապնդելու կարելիութիւնները և այդ ծիրէն ներս յատուկ անդրադարձ եղաւ կարգ մը միացեալ ծրագիրներու իրագործման։

Հանդիպման ընթացքին, լայնօրէն քննարկուեցան հոգեւոր պետերու հանդիպում մը կայացնելու ծրագիրը, ինչպէս նաեւ յառաջիկայ Մ.Ա.Ե.Խ.-ի Գործադիր Վարչութեան ժողովին օրակարգերը։ Վերոնշեալ հարցերուն շուրջ Նորին Սրբութիւնը ներկայացուց իր պատկերացումը, միաժամանակ կատարելով անհրաժեշտ թելադրանքները։

Վեհափառ Հայրապետը յատկապէս ընդգծեց եկեղեցիներու միջեւ գործակցութեան ծիրը աւելի ընդլայնելու հրամայականը՝ առաւելագոյն չափով հեռու մնալով քաղաքական ու միջ-կրօնական բնոյթ ունեցող զգայնութիւններէ, յատկապէս Միջին Արեւելքէն ներս։

«Քամփ Արմէնը» կառուցուած է 8-12 տարեկան աւելի քան 1500 երեխայի ջանքերով

Թուրքիոյ մէջ խորհրդարանական ընտրութիւններէն առաջ որոշ գործիչներու յայտարարութիւնները «Քամփ Արմէն» որբանոցը հայ համայնքին վերադարձնելու մասին ընդամէնը մարդոց մոլորեցնելու նպատակ կը հետապնդէին: Ատոր մասին ըստ News.am-ի`  Օգոստոս 7-ին Երեւանի մէջ տեղի ունեցած ասուլիսին յայտարարած է «Նոր Զարթօնք» կազմակերպութեան համանախագահ Անոյշ Կազան Ասատրեան:

Ան պատմած է, որ «Քամփ Արմէն» որբանոցի տարածքը գնուած է Հայ բողոքական եկեղեցւոյ «Կետիկփաշա» հիմնադրամին կողմէ 1962 թ.ի  Նոյեմբեր 15-ին: «Որբանոցի շէնքը կառուցուած է երեք ամսուան ընթացքին` 8-12 տարեկան երեխաներու ջանքերով: Ինչպէս կ’ըսէր Հրանդ Տինքը, որբ եւ աղքատ երեխաները նախ իրենց համար տուն կառուցեցին, իսկ յետոյ`  ամբողջ քաղաքակրթութիւն մը: Որբանոցի քանդման աշխատանքները, որոնք սկսած էին Մայիս 6-ին, դադրեցուեցան Տուզլայի ժողովրդավար բնակիչներու,  շարք մը քաղաքական կուսակցութիւններու եւ հասարակական կազմակերպութիւններու ջանքերով,- նշած է Անոյշ Կազան Ասատրեան: Ներկայիս,-շարունակած է ան,- աւելի քան 1500 երեխայի ջանքերով կառուցուած որբանոցը, որուն ամէն քարը, ամէն ծառը հայ մանուկներու հմուտ ձեռքերու արդիւնքն է, կանգնած է քանդող մեքենաներուն դէմ-յանդիման»:

 

Ամուսնութեան առաջարկ` Արարատի գագաթին

Օգոստոս 6-ին Արարատ լերան գագաթին ամուսնութեան առաջարկ  եղած է:

Այդ մասին ընկերային ցանցի միջոցով  տեղեկացուցած է առաջարկի երջանիկ հասցէատէրը` Պերճուհի Կաժոյեանը: Ան լերան գագաթ  բարձրացած է իր ապագայ ամուսնու` Աարոն Քամինկսի հետ:

Պերճուհին տեղեկացուցած է, որ «այո» ըսած է իր ապագայ ամուսնուն հետ սիրով եւ արկածներով լի կեանքին:

Նախարարները այցելեցին Հալէպ

Սուր­իոյ ելեկտ­րա­կա­նու­թեան, ջու­րի եւ խորհր­դա­րա­նի հար­ցե­րու պե­տա­կան նա­խա­րար­նե­րը այ­ցե­լե­ցին Հա­լէպ եւ հան­դի­պում­ներ ու­նե­ցան տեղ­ւոյն պե­տա­կան մար­մին­նե­րուն հետ` շտապ եւ եր­կա­րա­ժամ­կէտ լու­ծում­ներ որո­նե­լու Հա­լէ­պի ջու­րի, ելեկտ­րա­կա­նու­թեան հետ կապ­ուած հար­ցե­րուն, ապա­հո­վե­լու համար բնակ­չու­թեան կեն­սա­կան կա­րիք­նե­րը: Այս մասին կը հայտնէ «Գանձասար»-ը:

Ելեկտ­րա­կա­նու­թեան նա­խա­րա­րը յայտ­նեց, թէ տուեալ մար­զի ծա­ռա­յո­ղա­կան պաշ­տօ­նէ­ու­թեան զո­հո­ղու­թեան շնոր­հիւ Սուր­իոյ աշ­խար­հագ­րա­կան զա­նա­զան տա­րածք­նե­րու վրայ ելեկտ­րա­կա­նու­թիւնը տակաւին հա­սա­նե­լի կը մնայ, հա­կա­ռակ զին­եալ խմ­բա­ւո­րում­նե­րու խա­փա­նա­րար աշ­խա­տանք­նե­րուն: «Մինչ օրս տըւ­եալ մար­զի ծա­ռա­յող­նե­րէն նա­հա­տակ­ուած են 800 պաշ­տօն­եա­ներ, հիմ­նա­կան դժ­ուա­րու­թիւնը վա­ռե­լա­նիւ­թի պա­կասն է, ինչ­պէս նա­եւ կարգ մը ելեկտ­րա­կա­յան­նե­րու զին­եալ ահա­բեկ­չա­կան խմ­բա­ւո­րում­նե­րուն գե­րիշ­խա­նու­թեան տակ ըլ­լա­լը, որուն պատ­ճա­ռով եր­բեմն աշ­խա­տան­քէ կը դադ­րին ելեկտ­րա­կա­յան­նե­րը»:

Ինչ կը վե­րա­բե­րի Հա­լէպ քա­ղա­քին, խն­դի­րը զին­եալ խմ­բա­ւո­րում­նե­րուն կող­մէ ելեկտ­րա­կա­յա­նի ու ելեկտ­րա­կա­նու­թեան հայ­թայթ­ման Զէր­պէ­յի կա­յա­նին գրա­ւումն է: Հա­կա­ռակ այս դժ­ուա­րու­թիւն­նե­րուն` նա­խա­րա­րու­թիւնը այս տա­րի ելեկտ­րա­կա­նու­թիւն հայ­թայ­թող 2 կեդ­րոն պի­տի հաս­տա­տէ Հա­լէ­պի մէջ, որոնք պի­տի ար­ժեն շուրջ 15 միլ­ի­առ ս.ո. եւ պի­տի բա­ւա­րա­րեն քաղաքի ելեկտ­րա­կա­նու­թեան կա­րի­քը:

Իր կար­գին, ջու­րի հար­ցե­րու նա­խա­րա­րը յայտ­նեց, որ ներ­կայ դրութ­եամբ Հա­լէպ քա­ղա­քը կա­րի­քը ու­նի 150 յա­ւել­եալ ջր­հոր­նե­րու. նա­խա­րա­րու­թիւնը ամ­սա­կան 20 ջր­հոր փո­րել պի­տի տայ, ինչ­պէս նա­եւ նիւ­թա­պէս նե­ցուկ պիտի կանգ­նի Հա­լէ­պին` բա­ւա­րա­րե­լու բնակ­չու­թեան ջու­րի պա­հանջ­քը: Քուէյք գե­տին շուրջ պի­տի զե­տեղ­ուին 20 ջրազտ­ման գոր­ծիք­ներ, իսկ օրա­կան դրու­թեամբ 10 հա­զար մեթր խորա­նարդ ջուր պի­տի հասց­ուի ջու­րի ըն­կե­րու­թիւն, ջրա­յին ցան­ցի բա­նեց­ման հա­մար:

Յունահայ համայնքի ներկայացուցիչները կրթութեան պատասխանատուին հետ քննարկած են հայկական դպրոցներու խնդիրը

Յունահայ համայնքի ներկայացուցիչները երկրի կրթութեան եւ կրօնի հարցերով նախարարի տեղակալ Թասուս Կուրակիսի հետ քննարկած են հայկական դպրոցներուն մէջ հայ ուսուցիչներուն պետական պիւտճէյէն աշխատավարձ տրամադրելու եւ դպրոցներուն առջեւ ծառացած այլ կենսական խնդիրները:

«Արմէնփրէս»­-ի հետ զրոյցին համայնքէն ըսին, որ Կուրակիսը շեշտած է, որ նախարարութիւնը պատրաստակամ է հոգալու հայկական դպրոցներու կարիքները, սակայն երկրէն ներս տնտեսական ճգնաժամի պայմաններուն մէջ շատ դպրոցներու մէջ կրճատուած է ուսուցիչներու թիւը, ու այժմ նախարարութիւնը դժուար կացութեան մէջ է: Փոխնախարարը շեշտած է, որ Յունաստանի եւ ԵՄ­ի միջեւ ընթացող բանակցութիւններու հետեւանքով մինչեւ օրս հազարաւոր ուսուցիչներու աշխատավարձը վճարուած չէ, եւ հարցը օդին մէջ է:

Կողմերը որոշած են անընդհատ կապի մէջ մնալ, որպէսզի խնդիրին տրուի լուծում մինչեւ նոր ուսումնական տարուան մեկնարկը: «Արմէնփրէս»­ը դեռեւս Յուլիս 4-­ին ներկայացուցած էր յունահայ համայնքի մտահոգութիւնը առ այն, որ տնտեսական խնդիրներու պատճառով հնարաւոր է կրճատուին նաեւ հայկական դպրոցներուն տրամադրուելիք ֆինանսական յատկացումները: Տասնամեակներ շարունակ դպրոցներու մէջ հայերէնի ուսուցիչները իրենց աշխատավարձը ստացած են Յունաստանի կառավարութենէն, որուն շնորհիւ յունահայ դպրոցները կրցած են գոյատեւել, իսկ յունահայ երեխաները սորված են հայերէն: Այժմ երկրին մէջ համատարած կրճատումներու հետեւանքով համայնքէն ներս մտավախութիւն ունին, որ հայ ուսուցիչներու տրամադրուելիք գումարն ալ կը կրճատուի:

Էլիզապեթ Մարքսի «Զաւէնին Ճակատագիրը» Հատորին Ներկայացումը

Երեքշաբթի, Օգոստոս 18-ին, երեկոյեան ժամը 7։30-ին, «Ապրիլ» գրատան մէջ տեղի պիտի ունենայ Էլիզապեթ Մարքսի (Մարկոսեան) հեղինակած «Զաւէնին Ճակատագիրը» հատորին ներկայացումը։

ԱՄՆ-ի «Ասպարէզ» օրաթերթի փոխանցած տեղեկութիւններով՝ «Զաւէնին Ճակատագիրը» պատմութիւնն է Հայոց Ցեղասպանութենէն վերապրած հեղինակի հօր եւ հիմնուած է անոր կողմէ գրի առնուան ինքնակենասագրութեան վրայ, որ հեղինակին կողմէ գտնուած է վերապողին մահէն ետք միայն։

Հատորը պիտի ներկայացուի հեղինակին կողմէ, իսկ հեղինակը պիտի ներկայացնէ Լու Սթօուըրզ։
Մուտքը ազատ է եւ տեղի պիտի ունենայ հիւրասիրութիւն։ «Ապրիլ» գրատան հասցէն է՝ 415 E. Broadway, Glendale, CA 91205։

Յաւելեալ տեղեկութեանց համար դիմել՝ (818) 243-4112 թիւին կամ noor@abrilbooks.com հասցէին։

Հայ Դատը Ատրպէյճան Այցելած Քոնկրեսականներու Գայթակղութեան Մասին Տեղեկութեանց Հրապարակումը Կը Պահանջէ

ՈՒԱՇԻԿԹԸՆ.- Ամերիկայի Հայ Դատի յանձնախումբը Ներկայացուցիչներու տան Բարոյականութեան յանձնախումբին յղուած նամակով մը կոչ ըրած է բացայայտելու Ատրպէյճանի քարիւղի պետական ընկերութեան կողմէ գաղտնաբար վճարուած գումարներով Պաքու այցելած ամերիկացի 10 քոնկրեսականներու եւ անոնց անձնակազմի 32 անդամներուն այցելութեան շուրջ ծագած գայթակղութեան մանրամասնութիւնները։

Նամակին մէջ կը շեշտուի, որ պետական կառոյցներուն վրայ ազդեցութիւն բանեցնելու օտար կառավարութեան որեւէ փորձի մանրամասնութիւնները պէտք է ամբողջութեամբ հրապարակուին։
Յիշեցնենք, որ նշեալները 2013ին Ատրպէյճանի մէջ կայացած եւ Կասպից ծովու հարցերուն նուիրուած միջազգային գիտաժողովին մասնակցելու համար կատարած էին խնդրայարոյց այս այցելութիւնը:

Քոնկրեսի անկախ քննչական ճիւղը հանդիսացող Քոնկրեսական բարոյականութեան գրասենեակին կողմէ պատրաստուած 70 էջնոց զեկոյցին ոչ ամբողջական հրապարակումին համաձայն՝ Ատրպէյճանի քարիւղի «Սոքար» պետական ընկերութիւնը Ամերիկայի մէջ գործող ոչ-շահութաբեր ընկերութիւններու միջոցով առնուաղն 750,000 տոլար յատկացուցած է նշեալ գիտաժողովին ծախսերը վճարող կողմին աղբիւրը ծածկելու համար:

Նշենք, որ Ներկայացուցիչներու տան Բարոյականութեան յանձնախումբը այս շաբաթ անմեղ հռչակած էր 10 քոնկրեսականները եւ անոնց անձնակազմի անդամները, պնդելով, որ անոնք տեղեկութիւն չունէին, թէ ո՛վ վճարած է ճամբորդութեան ծախսերը։

Այս հարցին շուրջ վերջնական վճիռը պիտի արձակուի Միացեալ Նահանգներու արդարադատութեան նախարարութեան կողմէ։

Ըստ «Ուաշինկթըն Փոսթ»ի՝ օրէնսդիրները եւ անոնց անձնակազմի անդամները հարիւր հազարաւոր տոլար ստացած են ճամբորդական ծախսերուն համար, ինչպէս նաեւ՝ մետաքսեայ վզնոցներ, բիւրեղապակեայ սպասներ եւ ատրպէյճանական գորգեր՝ 2500-10,000 տոլար արժողութեամբ:
Հաշիւները ցոյց կու տան, որ քոնկրեսականներու ուղեւորութիւնը արժած է առնուազն 112,899 տոլար:

Ներկայացուցիչներու տան Բարոյականութեան յանձնախումբին յղուած նամակը աւելի ազդու դարձնելու նպատակով, Ամերիկայի Հայ Դատի յանձնախումբը կոչ կ՛ընէ՝ (202) 225-7103 թիւով կապ հաստատելու Ներկայացուցիչներու տան Բարոյականութեան յանձնախումբին հետ, պահանջելով գայթակղութեան մանրամասնութիւններուն հրապարակումը։

Հայոց ցեղասպանութեան 100-րդ տարելիցի ձեռնարկները հայութեան զարթօնքն էին. ցեղասպանութեան զոհի ժառանգ

Շաւարշ Քրիսեան, որ մասնագիտութեամբ բժիշկ է, կ’ապրի Ամերիկայի Միացեալ Նահանգներուն մէջ, Օսմանեան Թուրքիոյ մէջ յայտնի մարզիկ, «Մարմնամարզ» թերթի խմբագիր Շաւարշ Քրիսեանի եղբօր որդին է: Շաւարշ Քրիսեան աւագը  այն մտաւորականներէն մէկն էր, որուն Հայոց ցեղասպանութիւնը իրագործողները աքսորեցին, ապա դաժանաբար սպաննեցին:

Ըլլալով Հայոց ցեղասպանութեան զոհի ընտանիքի ժառանգ` Շաւարշ Քրիսեան կրտսերը կը կարծէ, որ Թուրքիան վաղ թէ ուշ պիտի ճանչնայ իր գործած ոճիրը: «Անժխտելի է, որ մենք շատ մեծ պահանջ ունինք, մեր դէմ ոճիր գործուած է, որ պէտք է տակաւին փոխհատուցուի թէ բարոյապէս, եւ թէ նիւթապէս: Ինչու բարոյապէս. այնքան ժամանակ, քանի դեռ Թուրքիան Հայոց ցեղասպանութիւնը չէ ճանչցած, վտանգի տակ է Հայաստանը»,­ըսաւ Շաւարշ Քրիսեան: Անոր դիտարկմամբ` առաջնահերթը Թուրքիոյ կողմէ իր յանցանքի ընդունումն է, որ անոնց համար շատ դժուար չէ:

«Հաւանաբար, կը վախնան հատուցումէն: Անոնք կրնան ըսել` մենք չէինք, մեր նախահայրերը սխալ գործեցին, հազար ներողութիւն, այլեւս չի պատահիր: Ասիկա է մեր ամենամեծ պահանջն ու մարդկային ակնկալիքը: Երբ գիշերը քնանաք, հանգիստ եղէք, որ վտանգ սպառնացող թշնամի գոյութիւն չունի Արեւմտեան սահմանի կողմը»,­ աւելցուց «Արմէնփրէս»-­ի զրուցակիցը:

Շաւարշ Քրիսեանի խօսքով` չդատապարտելով Թուրքիոյ` մարդկութիւնը թոյլ կու տայ , որ նոյնը կրկնուի նաեւ այսօր: «Ինչ մեզի պատահեցաւ 100 տարի առաջ, այսօր մեր աչքին առջեւ կը կրկնուի Սուրիոյ, Իրաքի մէջ, միայն այն տարբերութեամբ, որ Թուրքիան այսօր թաքնուած է իսլամական ծայրահեղականներու յետին, իբր թէ անոնց հետ կապ չունի: Անհնարին է, որ այդ բանակը այդքան յաղթանակներ տանի` առանց աւելի մեծ պետութեան` այս պարագային Թուրքիոյ կողմէ չֆինանսաւորուելու»,-ըսաւ Շաւարշ Քրիսեան :

Անդրադառնալով Հայոց ցեղասպանութեան 100­-րդ տարելիցի ձեռնարկներուն եւ հայութեան յետագայ քայլերուն` Շաւարշ Քրիսեան նշեց, որ մեծ գոհունակութիւն ապրեցաւ` տեսնելով ապրիլիքսանչորսեան ձեռնարկները Հայաստանի եւ աշխարհի տարբեր երկիրներու մէջ: «Բան մը յստակ էր, աշխարհի բոլոր կողմերու հայութիւնը ոտքի  ելած էր` անգլիախօսը, ֆրանսախօսը, հայախօսը, կաթոլիկն ու առաքելականը, բոլորը: Անոնք մէկ ձայնով պահանջատէր դարձան: Մենք Լոս Անճելըսի մէջ 130 հազար հոգիով 8­10 քիլոմեթր քալած ենք: Զարմացանք, թէ ուրկէ այսքան հայութիւն: Երիտասարդ, միջին տարիքի, ծեր մարդիկ, բոլորն ալ այնտեղ էին: Այնպէս չէր, որ ծերերը  միայն այնտեղ էին, միայն անոնք կը յիշեն, ոչ` երիտասարդութիւն կար այնտեղ, անոնք կը գոռային, որ մենք պահանջներ ունինք: Ատիկա անկասկած վերազարթօնք էր»,­տպաւորութիւններով կիսուեցաւ Շաւարշ Քրիսեան: Ան կարեւոր համարեց նաեւ Հռոմի պապի մատուցած պատարագն ու անոր հնչեցուցած խօսքին մէջ երկու կարեւոր շեշտադրում: «Երկու բան կայ` մէկը, որ ան, որ մէկ միլիարի չափ հետեւորդ ունի, «ցեղասանութիւն» բառը կիրառեց: Միւսն ալ` դուք գիտէք, որ Կաթոլիկ եկեղեցին միշտ յաւակնած է, որ աշխահի թիւ մէկ եկեղեցին է, իրենց նման եկեղեցի չկայ: Առաջին անգամ Պապը ըսաւ` Առաջին քրիստոնեայ եկեղեցին հայկական է: Ասիկա մեզի համար մեծ յաղթանակ է ու շահ»,­ընդգծեց ան: Շաւարշ Քրիսեանի խօսքով` եւրոպական շատ երկիրներ արդէն սկսած են խօսիլ Հայոց ցեղասպանութեան ճանաչման մասին,  որուն հետեւանքով,  օր մը Թուրքիան կը մնայ միայնակ` չընդունելով ցեղասպանութիւնը:

«Մօտաւորապէս կը պատկերացնեմ, թէ ինչպէս պէտք է Թուրքիան ճանչնայ Հայոց ցեղասպանութիւնը: Անոր ընդդիմադիր կուսակցութիւնը պէտք է ունենայ աւելի մեծ քանակով ձայներ, անոնք պէտք է որդեգրեն մեր հարցը, որ քուէ շահին: Ժողովուրդին մէջ ալ նոր մտածելակերպ կ’ըլլայ, անոնք կը մտածեն պատմութեան մասին, անոնք կը դառնան մեր կողմը, կ’ըսեն, որ իրենց ստած են պատմութեան հարցով: Այս ամէնէն յետոյ Թուրքիան քաղաքական ձեւով կը  ճանչնայ Հայոց ցեղասպանութիւնը»,­ նկատեց զրուցակիցը:

Ինչ կը վերաբերի Հայաստանի ապագային, ապա, Շաւարշ Քրիսեանի դիտարկմամբ` Հայաստանն ու հայերը պէտք է կարենան աշխարհին ներկայանալ որպէս հարուստ մշակոյթի եւ քաղաքակրթութեան կրողներ: Իսկ ատիկա իրագործելու համար պէտք է հասու ըլլալ լայն զանգուածներուն: «Մենք մեծ ժառանգութիւն ունինք` Եգիպտոսի, Յունաստանի չափ, ճիշդ է, բուրգեր չունինք, բայց կարասներ ունինք, հնագոյն շրջանի իրեր: Մենք ատով կրնանք աշխարհին ցոյց տալ, որ իրաւատէր ենք: Ամերիկան 200 տարուան պատմութիւն ունի, այն հարուստ երկիր է, բայց անոնք չեն կրնար ըսել, որ քաղաքակրթութեան առաջամարտիկ են, իսկ հայութիւնը կրնայ ըսել: Ունինք սքանչելի նկարիչներ, բանաստեղծներ, բայց ատոնք միայն փոքրամասնութիւններուն հասու են, քիչ մարդոց: Ինչպէս լայն զանգուածներուն մեր ունեցածը ներկայացնենք. պէտք է ունենալ համաշխարհային չափանիշով ֆութպոլի խումբ, ողիմպիական մարզիկներ, թենիս խաղցողներ, գիտէք ինչու` ողիմպիական խաղերը աշխարհի մէջ 2 միլիար մարդ կը դիտէ, դրօշակները, բոլոր մարզիկներու զգեստներուն վրայ գրուած «Հայաստան» բառերը կը տեսնեն այդքան մարդիկ: Անոնք կը սկսին հետաքրքրուիլ, թէ ովքեր են այդ հայերը ու օր մըն ալ  կու գան Հայաստան ու կը հասկնան, որ մենք ունինք այդքան մեծ ժառանգութիւն»,-­շեշտեց Շաւարշ Քրիսեան:

Գիւմրիի մէջ ֆութպոլային մրցաշարը ընդմիջուեցաւ Սասնոյ պարերով (լուսանկարներ)

Գիւմրիի մէջ Համահայկական 6- րդ խաղերու ծիրէն ներս կը մրցին Գիւմրիի, Սասունի,  թեհրանի, Մոսկուայի, Քէօլնի, Կիեւի, Թոկոնրոկի, Սիտնէյի, Լա Փլատայի եւ Անթիլիասի ֆութպոլային խումբերը, կը գրէ armradio.am-ը:

Հայաստանի 2-րդ քաղաքին մէջ ջանք չեն խնայեր, որ համահայկական խաղերը իրականացնեն պատշաճ մակարդակով:   Գիւմրիի մէջ իրականացուող ֆուտզալի եւ ֆութպոլի մրցումները Օգոստոս 3-էն մեծ աշխուժութիւն մտցուցած են քաղաքի կեանքէն ներս, իսկ Օգոստոս 6-ին` Սասուն-Թեհրան խաղէն առաջ սասունցի երիտասարդները հայկական տհոլ- զուռնայի կանչը լսելով` մարզումները ձգեցին եւ շտապեցին շուրջպար բռնելու:

12 34 56 78 910

Scroll Up