«Զուարթնոց» Կեդրոն. Ուտեստեղէնի Եւ Ձեռային Աշխատանքներու Տօնավաճառ

Հովանաւորութեամբ Մկրտիչ Յ. Պուլտուքեանի եւ կազմակերպութեամբ հայ համայնքի ընկերային ծառայողներու միութեան եւ մտքով թերաճ հայ մանուկներու «Զուարթնոց» կեդրոնին, երէկ` հինգշաբթի, 18 դեկտեմբեր 2014-ին, առաւօտեան ժամը 10:00-ին, տեղի ունեցաւ աւանդական դարձած ուտեստեղէնի եւ ձեռային աշխատանքներու տօնավաճառը ` «Զուարթնոց» կեդրոնին մէջ, Պուրճ Համուտ: Այս մասին կը հաղորդէ «Ազդակը»:

Տօնավաճառին բացումը կատարուեցաւ Լիբանանի եւ Հայաստանի քայլերգներով:  Հաստատութեան տնօրէն Արաքսի Տապաղեան փոխանցեց իր սրտի խօսքը: Ան բարի գալուստ մաղթելով ներկաներուն, իր երախտագիտութիւնը  յայտնեց սաներու ծնողներուն եւ անոնց վստահութեան` ըսելով. «Ձեր զաւակները օրհնութիւն են ձեր տուներուն»: Ապա ան խօսքը ուղղեց հոգեւոր հայրերուն. «Դուք այս հրեշտակներուն հայրերն էք:  Դուք կը պատուէք զանոնք ձեր ներկայութեամբ եւ քաջալերանքով»: Ան նշեց, որ այս տօնավաճառը կը տարբերի այլ տօնավաճառներէ, նպատակ ունենալով` տալ, ուրախացնել, ուրախանալ եւ օրհնուիլ, իսկ այնտեղ զետեղուած ձեռային աշխատանքները «Զուարթնոց» կեդրոնի աշակերտներուն գործերն էին, զորս արտադրած են անցնող ամրան ընթացքին:

Ան իր խօսքին աւարտին յատուկ շնորհակալութիւն յայտնեց Մկրտիչ Պուլտուքեանին, որ Լիբանանի Կեդրոնական դրամատան նախկին փոխկառավարիչը եղած է. ան սիրայօժար ստանձնած էր ձեռնարկին հովանաւորութիւնը:

Հետեւաբար գեղարուեստական յայտագիր մը ներկայացուեցաւ` կեդրոնի սաներուն կողմէ պատրաստուած: Աշակերտները իրենց խմբային երգերով ու պարերով կրցան Ս. Ծնունդի ոգին բաշխել ներկայ հանդիսատեսին:

Լիբանանի Հայոց թեմի առաջնորդ Շահէ եպս. Փանոսեան, առաջին անգամ գտնուելով կեդրոնին մէջ, արտասանեց իր սրտի խօսքը` բարձր գնահատելով «Զուարթնոց» կեդրոնի ծառայողները, որոնք ոչ մէկ ճիգ խնայած են յաջողցնելու համար այս աշխատանքը: Ան նաեւ ընդգծեց ըսելով, որ «այս տօնավաճառ չէ, այլ տօնախմբութիւն»: Ապա պահպանիչով փակեց իր խօսքը:

Նշենք, որ տօնավաճառը շարունակուեցաւ մինչեւ կէսօրէ ետք ժամը 5:00:

Scroll Up