Ամերիկայի Հայ Աւետարանչական Ընկերակցութեան 95-րդ Տարեժողովը եւ Ճաշկերոյթը

Ամերիկայի Հայ Աւետարանչական Ընկերակցութեան (ԱՀԱԸ) 95րդ Տարեժողովը տեղի ունեցաւ ԱՀԱԸ-ի Կեդրոնատեղիին մէջ՝ Բըրէմըս, Նիւ Ճըրզի, Շաբաթ Հոկտեմբեր 18-ին։ Համաժողովին մասնակցեցան աւելի քան 60 անձիք՝ ԱՀԱԸ-ի Վարչական Խորհուրդի անդամներ, հովիւներ, ինչպէս նաեւ ներկայացուցիչներ Հայ Աւետարանական եկեղեցիներէ, միութիւններէ եւ ԱՀԱԸ-ի տարբեր յանձնախումբերէ։ Ներկայացուեցան տեղեկագիրներ եկեղեցիներէ եւ յանձնախումբերէ, ԱՀԱԸ-ի աւետարանչական ծառայութեանց մասին։  ԱՀԱԸ-ի Ելեւմտական Յանձնախումբին ներկայացուցած տեղեկագրին համաձայն, անցնող տարեշրջանին շուրջ ինը միլիոն տոլար յատկացուած էր ԱՀԱԸ-ի շուրջ 140 տարբեր ծրագիրներուն, աշխարհի 24 երկիրներու մէջ։

Տարեկան ժողովի աւարտին կարդացուեցան անունները ԱՀԱԸ-ը Վարչութեան նորընտիր անդամներուն, որոնք ընտրուած էին երեք տարուան ծառայութեան համար.- Պրայըն Պետրոսեան, Անիթա Փիլիպոսեան Պուչագճեան, Տօքթ. Նազարէթ Տարագճեան, Լուիզ Քիւրքճեան, Վահէ Նալպանտեան, Արսինէ Պետրոսեան Ֆիլիփս, Դոկտ Անն Գարակէօզեան Սարաֆեան, Հրաչ Սարգիս եւ Դոկտ. Այլին Չոփուրեան Սթէֆի։

ԱՀԱԸ-ի Տարեժողովին առընթեր, տեղի ունեցաւ նաեւ Հայ Աւետարանական Համաշխարհային Խորհուրդի ժողովը՝ Հոկտ. 16-17 օրերուն։ Նիստերու ընթացքին աղօթքներ բարձրացան առ Աստուած Խորհուրդի այն անդամներուն համար, որոնք Մերձաւոր Արեւելքի քաղաքական կացութեան պատճառով չէին կրցած մասնակցիլ։

Շաբաթ օր երեկոյեան տեղի ունեցաւ ԱՀԱԸ-ի 95-րդ տարեժողովի ճաշկերոյթը Double Tree by Hilton պանդոկի սրահին մէջ, Ֆորթ Լի, Նիու Ճըրզի։ Շուրջ 150 հոգիներ ներկայ էին ճաշկերոյթին, որու նիւթն էր «Շարունակէ Պատմել Պատմութիւնը»։ ԱՀԱԸ-ի Վարչական Խորհուրդի նախկին հինգ նախագահներ՝ Տօքթ. Հ. Ստիվըն Ահարոնեան, Տօքթ. Ճօրճ Պեզիրկանեան, Սամուէլ Հէքէմեան, Ալպերթ Մոմճեան, Էնտրու Թորիկեան, ինչպէս նաեւ ներկայ նախագահ՝ Ճոզէֆ Ծերոնեան, որոնք ներկայ էին ճաշկերոյթին, յատուկ յիշատակութեան արժանացան։ Յատուկ յիշատակութեան արժանացան նաեւ մեզմէ առ յաւէտ բաժնուած նախագահներ՝ Ճորճ Փիլիպոսեան եւ Տօքթ, Ճան Քէօհնէլեան, որոնց տիկինները՝ Ալիս եւ Կլէտիս ներկայ էին Ճաշկերոյթին։

Գեղարուեստական յայտագրի աստղն էր երգչուհի Շուշիկ Պարսումեան, որ 2010-էն  իվեր իր օպերադիկ եւ համոյթային երգացանկով հանդէս եկած է Միացեալ Նահանգներու եւ Եւրոպայի բեմերէն եւ հմայած հազարաւոր երաժշտասէր հանդիսականներ։  Օրուան պատգամաբերն էր Վեր. Ճօրճ Ր. Քէրի՝ Երիցական Աւետարանական Եկեղեցիներու World Outreach Բաժանմունքի Ընդհանուր Տնօրէն։ Իր պատգամով ան քաջալերեց ներկաները շարունակել պատմելու մեր Տէրոջ Յիսուս Քրիստոսի պատմութիւնը։

ԱՀԱԸ-ի նորընտիր Գործադիր Տնօրէն Զաւէն Խանճեան, անդրադարձաւ թէ ինչպէս 95 տարիներէ իվեր Ընկերակցութիւնը կը շարունակէ հաւատարմաբար տարածել Աստուածաշունչի բարի լուրը ամբողջ աշխարհի մէջ, եւ թէ ինչպես հաւատքի ռահվիրաները քալած են մեզմէ առաջ գտնուող  ուղիէն, դրապէս պատասխանելով Տէրոջ կոչին՝ «Քանի իմ եղբայրներուս փոքրագոյններէն մէկուն ըրիք՝ ինծի ըրիք։» (Մատթէոս 25. 40)

Պրն. Խանճեան ըսաւ.- «ԱՀԱԸ-ը համաշխարհային առաջնահերթ կազմակերպութիւն մըն է, որ հաւատարմօրէն կը շարունակէ իր նուիրական ծառայութիւնը մատուցանել մեր ազգի աշխարհացրիւ զաւակներուն, հոգալով անոնց հոգեւոր եւ ֆիզիքական կարիքները։ Հարկ է գիտակցիլ սակայն թէ Մեծ Եղեռնի հարիւրամեակի նախօրեակին, հայ ժողովուրդը այսօր ամենուրեք, կը դիմագրաւէ իր հարիւրամեայ պատմութեան ամէնածանր մարտահրաւերները:»

Պրն. Խանճեան կոչ ուղղեց ըսելով։ «Աստուած մեզ բեռնաւորած է կոչ ուղղելու արտերկրի առաջնորդներուն, որպէսզի միասնաբար, գիտակցելով ծանր կացութեան եւ վերլուծելով ներկայ  իրավիճակը,  կարենանք մեր հաւաքական ուժերով պահպանել այն ինչ որ կարելի է, երբ տակաւին ուշ չէ։ Նման փորձ մը պիտի ըլլայ Հայոց Ցեպասպանութեան հարիւրամեակի ոգոկոչման մեր լաւագոյն նուէրը։ Աստուած կը հրաւիրէ Հայ Աւետարանչական Ընկերակցութիւնը դիմակայելու այս ազգային եւ մարդասիրական մարտահրաւէրը, եւ ես կը յուսամ որ, մենք պատրաստ ենք դրականապէս պատասխանելու Աստուածային այս կոչին»։

Կիրակի, Հոկտեմբեր 19-ին տեղի ունեցաւ ԱՀԱԸ-ի տարեժողովի պաշտամունքը Բըրէմըսի Հայ Աւետարանական Եկեղեցիին մէջ։ Օրուան պատգամաբերներն էին Վեր. Մկրտիչ Մելքոնեան, ԱՀԱԸ-ի ժամանակաւոր Գործադիր Տնօրէնը, եւ Վեր. Լ. Նշան Պագալեան, Հովիւը Հէվըրթաունի (Բէնսիլվէնիա) Հայ Աւետարանական Նահատակաց Եկեղեցիին։ Պաշտամունքի աւարտին Վեր. Վահան Թութիկեան կատարեց ԱՀԱԸ-ի Վարչական Խորհուրդի նորընտիր անդամներուն եւ Գործադիր Տնօրնին պաշտօնակոչութեան արարողութիւնը:

unnamed (1) unnamed (2) unnamed (3) unnamed

Scroll Up