Հայաստան Համահայկական Հիմնադրամի Յունաստանի մասնաճիւղի 2014ի Թելեթոնը կը կայանայ 22-23 Նոյեմբերին

Նոյեմբեր ամսու սկիզբը կը նշանաւորէ Հայաստան Համահայկական Հիմնադրամի աշխատանքը Հայաստանի եւ Սփիւռքի մէջ: Այս տարուայ ծրագիրը արդէն հրապարակուած է, ըստ որու Նոյեմբեր 27ին տեղի կ’ունենայ «Հեռուստամարաթոնը» ԱՄՆի եւ Հայաստանի մէջ: Այս մասին կը հաղորդէ «Ազատ օրը»:

Եւրոպայի տարածքին ապրող հայութիւնը հեռախօսային մարաթոնը պիտի իրականացնէ Նոյեմբեր 19-23ի միջեւ:

Իսկ 22-23 Նոյեմբերի շաբաթավերջին՝ տեղի պիտի ունենայ Յունաստանի տարածքին կազմակերպուող Թելեթոնը:

Համաեւրոպական Թելեթոնը ծաւալուն ձեռնարկ է, որ կը տեւէ ընդհանուր չորս օր, 12 ժամ շարունակ, կամաւորներու մեծ թիւի մը օժանդակութեամբ, որոնք հեռաձայնով կապ կը հաստատեն մեր հայրենակիցներուն հետ, խնդրելով իրենց մասնակցութիւնը Հայաստանի եւ Արցախի ի նպաստ տարուող ծրագիրներու իրագործման համար: Վերջին տարիներուն ընթացքին համաեւրոպական Թելեթոնը կը կազմակերպուի Ֆրանսայի, Գերմանիոյ, Պելճիքայի, Հոլանտայի, Զուիցերիոյ, Շուէտի հայ համայնքներուն մօտ, ուր արդէն 5 տարիէ ի վեր իր մասնակցութիւնը կը բերէ նաեւ Յունաստանը:

Այս տարի հանգանակուած գումարները պիտի ուղղուին դարձեալ Վարդենիս-Մարտակերտ ինքնաշարժներու ճանապարհի կառուցման աշխատանքներուն:

Նախորդ տարի հաւաքագրուած գումարներով իրագործուեցան ջրամատակարարման ծրագիրներ Արցախի ու Հայաստանի (Տաւուշի մարզ) 10 գիւղերու մէջ, հիմնանորոգուեցաւ եւ սարքաւորումներով համալրուեցաւ Երեւանի Չայկովսկիի անուան երաժշտական դպրոցի audio-visual կեդրոնը, հիմնանորոգուեցաւ Գիւմրիի մանկատունը, կառուցուեցաւ ջրամատակարարման համակարգ Շուշիի շրջանի Քարին Տակ գիւղին մէջ, եւ ընդհանրապէս իրագործուեցան Տաւուշի մարզի գիւղատնտեսութիւնը խթանող շարք մը ծրագիրներ:

Նշենք, որ Վարդենիս-Մարտակերտ ճանապարհի առաջին 22 քիլոմեթրը արդէն պատրաստ է ու յանձնուած է ինքնաշարժներու շրջագայութեան: Հանգիստ եւ արագ կÿանցնին ինքնաշարժները այդ ճամբայէն, շնորհիւ իր ասֆալտապատ նոր ծածկոյթին, որ իրականացաւ համահայկական ջանքերով: Յաջորդող շուրջ 96 քիլոմեթր երկարութեամբ ճանապարհահատուածն ալ ընդարձակ է ու բարեկարգ, թէեւ դեռ պատուած է միայն հողային պաստառով:

Այս տարուայ հանգանակուած գումարներով կը նախատեսուի ամբողջացնել ասֆալտապատման աշխատանքները:

vartenis-mardagerd grafic_6-11-14 vartenis-mardagerd4_6-11-14

Scroll Up