Լիբանանի Հայկական Երեսփոխանական Պլոքի Երկար Տարիներու Անդամ Սուրէն Խանամիրեան Ոչ Եւս Է

Երէկ իր մահկանացուն կնքեց Հայկական երեսփոխանական պլոքի երկար տարիներու անդամ, նախկին երեսփոխան եւ Ազգային բարերար Սուրէն Խանամիրեան: Այս մասին կը հաղորդէ Լիբանանի “Ազդակ” օրաթերթը:

Ստորեւ կու տանք նախկին երեսփոխանին կենսագրական հակիրճ գիծերը:

Ծնած է Պէյրութ, 28 փետրուար 1924-ին: Նախակրթութիւնը ստացած է Ազգային Ս. Նշան վարժարանին մէջ. համալսարանական ուսումը ստացած է Սեն Ժոզեֆ համալսարանի իրաւաբանութեան բաժանմունքին մէջ:

1950-ականներուն ուսուցիչ եղած է Ս. Նշան վարժարանին մէջ: 1960-1996 եղած է Լիբանանի խորհրդարանի անդամ` Հայկական երեսփոխանական պլոքին կողմէ: Խանամիրեան երկար տարիներ եղած է Ազգային գաւառական ժողովի անդամ: Ան 1972-1974 Լիբանանի զբօսաշրջութեան նախարար եղած է, իսկ 1989-1990` ուժանիւթի նախարար: Մասնակցած է Լիբանանեան տագնապի լուծման միտող Ժընեւի խորհրդաժողովին, որուն ընթացքին լիբանանահայ համայնքը ընդունուած է իբրեւ Լիբանանի 7 մեծագոյն համայնքներէն մէկը: Դերակատարութիւն ունեցած է Լիբանանի քաղաքացիական պատերազմի օրերուն Պուրճ Համուտի մէջ հակամարտ կողմերուն միջեւ հարցերու լուծման մէջ: Ան Համազգայինի Կեդրոնական վարչութեան անդամ եղած է: 1950-ականներուն սկիզբէն անդամ եղած է ՀԲԸՄ-ի: Հիմնադիր անդամ եղած է Լիբանանի ձիավարութեան առաջին ակումբին (Լ՛էփերոն): 1950-ականներուն վերջը անդամ եղած է «Հայկ Քլապ»-ի: Խանամիրեան Լիբանանեան-հայկական բարեկամութեան ընկերակցութեան անդամ եղած է, ինչպէս նաեւ «Միտըլ Իսթ» օդանաւային ընկերութեան տնօրէն խորհուրդի նախկին անդամ: Պարգեւատրուած է Ազգային բարերարի եւ «Կիլիկոյ իշխան» շքանշաններով` Մեծի Տանն Կիլիկիոյ Խորէն Ա. կաթողիկոսին կողմէ: 1962-ին պարգեւատրուած է Լիբանանի նախագահ Ֆուատ Շեհապի կողմէ` Մայրիներու Ասպետի կարգի շքանշանով: Մեծի Տանն Կիլիկիոյ կաթողիկոսութեան Ազգային Կեդրոնական վարչութեան անդամ եղած է:

Scroll Up