Հալէպի Հայաշատ Թաղամասերուն Մէջ Իրավիճակը Հանգիստ Է, Բնակիչները Կը Պատրաստուին Ձմրան

Հալէպի մէջ, մասնաւորապէս հայաշատ թաղամասերուն մէջ իրավիճակը աւելի հանդարտ է, սակայն անկայուն վիճակը կը շարունակուի: Այս մասին «Արմէնփրէս»-ին կը տեղեկացնէ Հալէպի մեր աղբիւրը` աւելցնելով, որ կենցաղային եւ այլ դժուարութիւնները մշտապէս առկայ են: Ջրամատակարարման վերաբերեալ աղբիւրը տեղեկացուց, որ ջուրը ոչ երկար ժամանակով կը կտրուի, սակայն այժմ ջուրի սուր տագնապ քաղաքին մէջ չի նկատուիր, իսկ ելեկտրական հոսանք օրուան ընթացքին քանի մը ժամ կ’ունենան:

Աղբիւրը նաեւ նշեց, որ եղանակը Հալէպի մէջ սկսած է ցրտելու: Կառավարութիւնը 200-ական լիթր վառելանիւթ  բաժնած է բնակիչներուն` չնայած շատերը ի վիճակի չեն եղած վճարելու վառելանիւթի գինը:

Աւելի առաջ` Նոյեմբեր 3-ի ուշ գիշերին, Հալէպի հայաշատ Ճալաա թաղամասը հրթիռակոծութիւններու թիրախ դարձած էր:   Հրթիռակոծութեան հետեւանքով նիւթական լուրջ վնասներ  արձանագրուած էին:

Աղբիւրի տեղեկացմամբ, Նոյեմբեր 3-ի երեկոյեան Հալէպի տարածքին մէջ 6 օրուան ընդհատումէն ետք համացանցը վերսկսած է գործելու:

Սուրիոյ մէջ 3,5 տարի շարունակուող բախումներու զոհ  դարձած է մօտ 200 հազար մարդ, զոհուած հայերու թիւը գերազանցած է 100-ը:

Scroll Up