Սոչիի հայ համայնք. Նոր հեռանկարներ

Օրերս պաշտօնական այցով Սոչիի մէջ կը գտնուէր ԵՊՀ կից Հայագիտական հետազօտութիւններու հիմնարկի փոխտնօրէն, պատմական գիտութիւններու թեկնածու, ԵՊՀ դոկտոր Մհեր Յովհաննիսեան: Այցի նպատակը Ռուսաստանի ժողովուրդներու բարեկամութեան պետական Համալսարանի (РУДН) Սոչիի մասնաճիւղին մէջ հայագիտական կեդրոնի հիմնադրումն էր:

Նման առաջարկով ԵՊՀ ղեկավարութեան դիմած էր նախագիծի հեղինակն ու գլխաւոր նախաձեռնողը`  Սոչիի հայկական համայնքի նախագահ Հրաչ Մակէյեան: Ստանալով դրական պատասխան իր նախաձեռնութեան` պարոն Մակէյեան համայնքի ներկայացուցիչներուն հետ  դեռեւս Սեպտեմբերի վերջը մեկնեցաւ Երեւան, ուր ԵՊՀ տնօրէն Արամ Սիմոնեանի մօտ  տեղի ունեցաւ համապատասխան մասնագէտներու հետ հանդիպում: Սոչիի պատուիրակութեան կազմին մէջ էր նաեւ РУДН Սոչիի մասնաճիւղի տնօրէն Նատեժտա Կոզլովան: Հանդիպման արդիւնքով երկուստեք կայացաւ որոշում` հիմնել հայագիտական կեդրոն  РУДН համալսարանի Սոչիի մասնաճիւղին մէջ եւ սերտօրէն համագործակցիլ ԵՊՀ-ի հետ:

Սոչիի հայկական համայնքի ղեկավարութեան ու Սոչիի համալսարանէն ստանալով պատասխան հրաւէրք` ԵՊՀ պատուիրակութիւնը մեկնեցաւ Սոչի`  ուսումնասիրելու РУДН -ի ուսումնական ընթացքը, ուսանողներու ու դասխօսական կազմի ընդհանուր մակարդակն ու հետաքրքրութիւններու սահմանները:

Պաշտօնական այցի ծիրէն ներս տեղի ունեցան շարք մը կարեւոր հանդիպումներ Ռուսաստանի ժողովուրդներու բարեկամութեան համալսարանի Սոչիի մասնաճիւղի ղեկավարութեան, ամպիոններու վարիչներու, պատմութեան, հնագիտութեան ու ազգագրութեան մասնագէտներու հետ: Համալսարանի Սոչիի մասնաճիւղին մէջ հայագիտական կեդրոնի հիմնադրման գաղափարը ողջունեցին բոլորը` թէ՛ դասախօսները, թէ՛ ուսանողները:

Տեղի ունեցան նաեւ մասնագիտական քննարկումներ կլոր սեղանի շուրջ: Մհեր Յովհաննիսեան գոհունակութեան ու երախտագիտութեան խօսքեր ըսաւ  ինչպէս համայնքին, այնպէս ալ համալսարանի ղեկավարներուն.

«Հայագիտական հետազօտութիւնների մեր ինստիտուտն արդէն ունի նման փորձ` Սփիւռքում հիմնադրել հայագիտական կենտրոններ, որտեղ սովորողները կը ստանան մասնագիտական գիտելիքներ հայ ժողովրդի պատմութեան, հայոց լեզուի, գրականութեան, արուեստի, մշակոյթի պատմութեան վերաբերեալ:   Մի ուսանողի  մէջ կրթել այս բոլոր մասնագիտութիւնները`  սա է մեր հիմնական նպատակը:»

Սոչիի մասնաճիւղի տնօրէն Նատեժտա Կոզլովան իր խօսքին մէջ մասնաւորապէս նշեց. «Ես անկեղծօրէն զարմացած եմ հայ ժողովուրդի գրքասիրութեան,  գիրի, գրականութեան, մտաւոր աշխատանքի նկատմամբ յարգանքի, ակնածանքի, մեծարման գերագոյն զգացումին վրայ:

Ես շատ շնորհակալ եմ Սոչիի հայկական համայնքի ղեկավարութեան, մասնաւորապէս համայնքի նախագահ Հրաչ Մակէյեանին, որ կը  հանդիսանայ այս նախագիծի հեղինակն ու գլխաւոր դերակատարը: Ապագայ հայագիտական կեդրոնը պիտի գտնուի հայ ազգի նուիրեալ զաւակին` Յովհաննէս Մակէյեանի  յուսալի ձեռքերուն մէջ»:

« Ամէն  հայ` ապրելով արտերկրի մէջ, պէտք է իր առջեւ նպատակ ունենայ հնարաւորինս պահպանել դարերու խորքէն մեզի հասած ազգային արժէքները, ժողովուրդի հոգեւոր գանձերը: Ստեղծելով նիւթական հարստութիւն, կառուցելով քաղաքներ ու պողոտաներ ուրիշ երկիրներու մէջ, մենք պէտք չէ մոռնանք մեր հիմնական առաքելութեան մասին մեր ժողովուրդին, մեր պապերուն ու նախնիներուն հանդէպ: Մենք պէտք է կարենանք անխաթար պահել մեր հոգիի տաճարի սուրբ խորանը, որուն յենասիւներն են հայերէնը, հայ մանուկի հայեցի դաստիարակութիւնը, հայկական կրթութիւնը, մշակոյթը,  հայ դպրանոցներու ստեղծումը: Մտքիս մէջ հայագիտական կեդրոնի հիմնադրումն է Սոչիի մէջ: Ինչ գինով ալ ըլլայ հարկաւոր է այս մտայղացումը կեանքի կոչել, քանզի հայ սերունդները` մեծնալով տարբեր ազգերու ու ազգութիւններու մշակութային միջավայրի մէջ, կ’ենթարկուին ուծացման ու կը կտրուին արմատներէն: Մեր պարտքն է համապատասխան հող ստեղծել անոնց հայեցի դաստիարակելու ու մասնագիտական մակարդակով հայագիտական առարկաներուն ծանօթացնելու համար», – ըսաւ   Հրաչ Մակէյեան:

Նշենք, որ Սոչիի մէջ Ռուսաստանի ժողովուրդներու բարեկամութեան  համալսարանին մէջ հայագիտական կեդրոնի հիմնադրման նախապատրաստական աշխատանքներն արդէն սկսած են:  Այս մասին «Հայերն այսօրին» կը տեղեկացնէ Անահիտ Անտոնեան Սոչիէն:

 

Scroll Up