Արուսեակ Բարսեղեան. «Մեր Դպրոցին Մէջ Ամէն Ինչ Կ’ընենք, Որպէսզի Սուրիահայ Աշակերտները Լաւ Զգան…»

Օրերս Երեւանի Նար-Դոսի անուան թիւ 14 հիմնական դպրոցին մէջ, ուր կը յաճախէ Սուրիոյ քաղաքացիական պատերազմի հետեւանքով Հայաստան տեղափոխուած շուրջ 100 սուրիահայ աշակերտ, կայացաւ Քուէյթի Պետութեան ֆինանսական աջակցութեամբ վերազինուած համակարգչային դասարանի բացման հանդիսաւոր արարողութիւնը` ՀՀ սփիւռքի նախարար Հրանոյշ Յակոբեանի, ՀՀ-ի մէջ Քուէյթի Պետութեան արտակարգ եւ լիազօր դեսպան Պասսամ Մուհամմատ Ալ Քապանտիի, Երեւանի քաղաքապետարանի հանրակրթութեան վարչութեան պետ Գայեանէ  Սողոմոնեանի մասնակցութեամբ:

«Հայերն այսօրի» թղթակիցին հետ  զրոյցին դպրոցի տնօրէն Արուսեակ Բարսեղեան ջերմօրէն խօսեցաւ սուրիահայ երեխաներուն մասին, եւ ըսաւ, որ անոնք հեշտութեամբ  մերուած են շրջապատին, բարիդրացիական յարաբերութիւններու մէջ են հայաստանցի աշակերտներուն հետ, ոչ մէկ խնդիրներ չեն յառաջացներ, աչքի կ’իյնան կարգապահութեամբ:

Տնօրէնի խօսքով` սկզբնական շրջանին երեխաներուն մօտ լարուածութիւն  նկատուած է, բայց հիմա խաղաղ հոգեվիճակի մէջ կը գտնուին, սիրով կը յաճախեն դասերուն: Այս ամէնը պայմանաւորուած է նաեւ տնօրէնի եւ ուսուցիչներու բարեհամբոյր վերաբերմունքով:

Ուսուցիչներու ամէնօրեայ սրտացաւ աշխատանքի շնորհիւ հասած են այն արդիւնքին, որ այժմ սուրիահայ երեխաները  առանց դժուարութեան արեւելահայերէնով կը սորվին դասերը: Իրենց հասակակից հայաստանցի երեխաներն ալ խտրականութիւն չեն դներ եւ բարեկամական սիրով  լեցուած են իրարու հանդէպ: Արուսեակ Բարսեղեան տեղեկացուց , որ դասալսումներու  երթալուն կը նկատուի, թէ ինչպէս սուրիահայ երեխաները կը խնդրեն ուսուցիչներէն, որ իրենց իբրեւ սուրիահայ չառանձնացնեն, այլ ընդունեն Հայաստանի Հանրապետութեան քաղաքացի եւ աշակերտ: Ատիկա, անշուշտ, կը խօսի այն մասին, որ երեխաները այստեղ իրենց օտարի պէս չեն զգար եւ լիովին ներգրաւուած են հայկական միջավայրին:

Ուսման ընթացքին հիմնական դժուարութիւնները երեխաներուն համար ռուսաց լեզուի դասերը  կը հանդիսանան, սակայն աշխատասիրութեան շնորհիւ կը փորձեն այդ առարկան ալ իւրացնել: Մաթեմատիկական գիտելիքներով  աչքի կ’իյնան. նոյնիսկ երկու սուրիահայ աշակերտ մասնակցած են «կենգուրու» մաթեմատիկական միջազգային մրցոյթին, ուր երկրորդ դասարանցի Տոշողլալեան Լիլիթը երկրորդ տեղը գրաւած է, իսկ երրորդ դասարանցի Պազարճեան Սագոն` յատուկ մրցանակ ստացած:

Դպրոցին մէջ կը գործեն արտադասարանական տարբեր խմբակներ, ուր աշխուժօրէն կը մասնակցին նաեւ սուրիահայ աշակերտները: ՀՀ սփիւռքի նախարարի առաջարկութեամբ աշակերտները 2-րդ տարին անընդմէջ այս դպրոցին մէջ կ’անցնին խորացուած արաբերէն,  իսկ այս տարի ՀՀ կրթութեան եւ գիտութեան նախարար Արմէն Աշոտեանի որոշմամբ` դպրոցի առաջին դասարանցիները  շաբաթական երկու ժամ տեւողութեամբ արաբերէն կը սորվին:

Տիկին Բարսեղեան շեշտեց, որ բոլոր սուրիահայ աշակերտները ամէնօրեայ ուշադրութեան կեդրոնին կը  գտնուին, անոնց մօտ յառաջացած խնդիրներուն հրատապ լուծումներ կու տան.  Դպրոցին մէջ ամէն ինչ կ’ընեն, որպէսզի անոնք իրենց լաւ զգան:

 Զրոյցի վերջաւորութեան դպրոցի տնօրէնը իր խորին շնորհակալութիւնն ու երախտագիտութեան խօսքը ըսաւ ՀՀ սփիւռքի նախարար Հրանոյշ Յակոբեանին եւ ՀՀ-ի մէջ Քուէյթի Պետութեան արտակարգ եւ լիազօր դեսպան Պասսամ Մուհամմատ Ալ Քապանտիին`  Քուէյթի Պետութեան ֆինանսական աջակցութեամբ վերազինուած համակարգչային դասարանի բացման համար: Տնօրէնի կարծիքով` նման ժամանակակից, յագեցուած արհեստագիտական  միջոցներու առկայութեամբ աշակերտները առաւել հաճոյքով պիտի յաճախեն համակարգչային դասընթացներուն եւ զարգացնեն մտահորիզոնը:

Ձեռնարկին հանդիսաւոր արարողութեան սուրիահայ աշակերտները մեծ ոգեւորութեամբ ելոյթ ունեցած են` արաբերէնով եւ հայերէնով բանաստեղծութիւններ արտասանելով, երգեր կատարելով, որոնք արժանացած են բարձրաստիճան հիւրերու հաւանութեանն ու  բարձր գնահատանքին:

  Աւելցնենք, որ աջակցութիւնը ցուցաբերուած էր 2013 թուականի սեպտեմբեր 27-ին ՀՀ սփիւռքի նախարարութեան նախաձեռնութեամբ «Սուրիահայերու հիմնախնդիրները համակարգող կեդրոն» ՀԿ-ի եւ ՀՀ-ի մէջ Քուէյթի Պետութեան դեսպանութեան միջեւ կնքուած յուշագիրին համաձայն` «Աջակցութիւն Հայաստան բնակող սուրիահայերու կրթական հիմնախնդիրներու լուծման» ծրագիրի ծիրէն ներս:

Պատրաստեց  Գէորգ  Չիչեան

Scroll Up