ՀՀ Սփիւռքի Նախարարն Ընդունեց Աստուածաշնչեան Ընկերութեան Արաբական Ծոցի Տարածաշրջանի Ընդհանուր Քարտուղար Դոկտոր Հրայր Ճէպէճեանը

Յուլիս 15-ին ՀՀ սփիւռքի նախարար Հրանոյշ Յակոբեան ընդունեց Աստուածաշնչեան ընկերութեան Արաբական ծոցի տարածաշրջանի ընդհանուր քարտուղար, Միջին Արեւելքի Աստուածաշնչեան ընկերութեան խորհուրդի ատենապետ դոկտոր Հրայր Ճէպէճեանը եւ իր տիկնոջ Կիպրոսի «Նիկոսիայի համալսարանի» բանասիրութեան, սոցիոլոգիայի եւ իրաւագիտութեան բաժինի դասախօս, սոցիոլոգ լեզուաբան դոկտոր Արտա Պոյնէրեան ճէպէճեանը:

Հրայր Ճէպէճեան Մերձաւոր Արեւելքի Հայ Աւետարանական եկեղեցիներու միութեան (ՄԱՀԱԵՄ) կեդրոնական մարմինի, Էշրէֆիէի Հայ Աւետարանական Եկեղեցւոյ, Հայկազեան համալսարանի խնամակալութեան, Ազունիէի ազգային բուժարանի, Հայ Աւետարանական կեդրոնական բարձրագոյն վարժարանի հոգաբարձութեան, «Հայաստան» համահայկական հիմնադրամի Կիպրոսի տեղական մարմինի, ցեղասպանութեան ոգեկոչման 90-րդ տարելիցի Լիբանանահայ կեդրոնական վարչական մարմինի անդամ է:

Ներկայիս Հայ Աւետարանական «Արմիս» մշակութային յանձնախումբի ատենապետն է: ՀՀ սփիւռքի նախարարը կարեւոր համարեց դոկտոր Ճէպէճեանի դերակատարութիւնը հայապահպանութեան գործին մէջ, ինչպէս նաեւ անոր իրականացուցած միջեկեղեցական մեծածաւալ գործունէութիւնը` ի սպաս Սփիւռքի զօրացման:

Հանդիպման ընթացքին քննարկուեցան Հայոց ցեղասպանութեան միջազգային ճանաչման ուղղութեամբ տարուող աշխատանքներու աշխուժացման հնարաւորութիւնները, սուրիահայերու խնդիրներու լուծման օժանդակելու կարեւորութիւնը, ինչպէս նաեւ արեւմտահայերէնի պահպանման ուղղուած խնդիրներն ու դասական եւ նոր Սփիւռքի մերձեցման ուղղուած հարցերը:

Հաշուի առնելով անոր ազգային, միութենական եւ համայնքային կեանքին մէջ իրականացուցած գործունէութիւնը, ինչպէս նաեւ Սփիւռքի մէջ մայրենի լեզուի անաղարտութեան պահպանման գործին ունեցած աւանդը, ՀՀ սփիւռքի նախարար Հրանոյշ Յակոբեան դոկտոր Հրայր Ճէպէճեանին պարգեւատրեց «Մայրենիի դեսպան» մետալով:

Շնորհակալութիւն յայտնելով ՀՀ սփիւռքի նախարարութեան, ան բարձր գնահատեց գերատեսչութեան դերակատարութիւնը Հայրենիք-Սփիւռք կապերու զարգացման գործին մէջ, նշեց որ Հայրենիքէն ստացած իւրաքանչիւր ազդակ ոգեւորիչ է, եւ սփիւռքահայուն գործելու նոր ուժ ու եռանդ կու տայ: Պարոն ճէպէճեան աւելցուց. «Ապրելով Սփիւռքի մէջ, մենք մշտապէս կը զգանք Ձեր ուշադրութիւնն ու հոգածութիւնը մեր ու մեր կատարած աշխատանքին նկատմամբ: Փոքր համայնքները կաշկանդուած են եւ պէտք է ոգեշնչել անոնց»:

Scroll Up