Օր 7-րդ.Ազատ Արցախը Կ’ողջունէ «Իմ Հայաստան» Համահայկական 2-րդ Փառատօնի Մասնակիցները

Ազատ Արցախը կ’ողջունէ «Իմ Հայաստան» համահայկական 2-րդ փառատօնի մասնակիցները: Այս խօսքերով Արցախը յուլիս 7-ին դիմաւորեց «Իմ Հայաստան» համահայկական 2-րդ փառատօնի մասնակիցները` Ստեփանակերտի Մշակոյթի տան մէջ կայացած համերգին ժամանակ: Ձեռնարկին ներկայ էր նաեւ ԼՂՀ մշակոյթի, երիտասարդութեան հարցերու նախարար Նարինէ Աղաբալեան:

Մշակոյթի տան դահլիճը լեփ-լեցուն էր, հանդիսատեսի շարքերուն մէջ մասնակիցներուն առանձնակի ջերմութեամբ կը դիմաւորէին ԼՂՀ պաշտպանութեան բանակի զինուորները:

Տանտիրոջ իրաւունքով մասնակիցներուն ողջունեց Արցախի «Մենք ենք մեր սարերը» երգի-պարի համոյթը:

Չդադրող ծափահարութիւններու ներքոյ մօտ երկու ժամ տեւած համերգին ելոյթ ունեցան Քոււէյթի «Շաքէ», Ախալքալաքի «Վաչիան», Վոլգոգրադի «Արտոյտ», Գրասնոտարի «Արմաւիր», Ուքրանիոյ «Արմէնիա», Սոչիի «Նաիրի», Փեատիգորսկի «Անի», Ռոստովի «Արփի», Լիպեցկի «Կռունկ» պարախումբերը:

Ձեռնարկին աւարտին բեմ բարձրացաւ ԼՂՀ մշակոյթի, երիտասարդութեան հարցերու նախարար Նարինէ Աղաբալեան եւ շնորհակալութիւն յայտնեց սփիւռքահայ պարախումբերուն, որոնք երկար ու դժուարին ճանապարհ յաղթահարելէ ետք այնպիսի ոգիով պարեցին, այնպիսի տրամադրութիւն հաղորդեցին, որ յոգնածութեան նշոյլ անգամ չերեւցաւ անոնց դէմքին: Նախարարը խնդրեց մէկ անգամ եւս բարձր ծափահարել մասնակիցներուն:

«Շնորհակալ ենք Ձեզ, որ եկաք Արցախ եւ աւետիս բերեցիք մեզ: Եկաք վկայելու, որ հայ ոգին արթուն է, աննկուն, որ Արցախի ազատագրական պայքարն ի զուր չի եղել, եւ հազարաւոր քաջորդիների արիւնն ի զուր չի հեղուել, որ արցախեան ոգու կրակը հասել է Սփիւռքի համայնքներ, տարածուել է ափէ ափ եւ հայի մէջ նորից արթնացրել ազգային ինքնութիւնը եւ իրաւունք տուել հպարտանալու իր ազգային ինքնութեամբ»,-նշեց նախարարը եւ աւելցուց, որ մեզ բաժնած է ճակատագիրը, բաժնած են պատերազմները, արհաւիրքները, բայց մեզ միշտ միացեալ պահողը եղած է մեր հաւատքը, լեզուն եւ մշակոյթը:

«Շնորհակալութիւն Ձեզ, որ ամուր կառչած էք Ձեր արմատներին եւ կենդանի էք պահում հայ մշակոյթը: Քանի դեռ Սփիւռքի գաղթօջախներում, օտար ափերում հնչում է հայկական երաժշտութիւն, մեր երիտասարդները պարում են հայկական ազգագրական, ժողովրդական պարեր` այս ազգն անպարտելի է: Սա լաւագոյն պատասխանն է եւ լաւագոյն ուղերձը` Հայոց ցեղասպանութեան 100-րդ տարելիցին ընդառաջ»,- իր խօսքը եզրափակեց Նարինէ Աղաբալեան:

Ձեռնարկին աւարտին  պարախումբերը պարգեւատրուեցան ԼՂՀ մշակոյթի, երիտասարդութեան հարցերու նախարարութեան շնորհակալագիրներով եւ փոքրիկ նուէրներով:

Գեղեցիկ համերգն ու փառատօնային հերթական օրը աւարտեց Արցախի գլխաւոր խորհրդանիշներէն մէկը համարուող «Մենք ենք մեր լեռները» յուշարձանի այցելութեամբ:

Լուսինէ Աբրահամեան, Արցախ

Scroll Up