Յակոբ Պալեան Հիւրընկալուեցաւ ՀՀ Սփիւռքի Նախարարութեան Մէջ

Յունիս 3-ին ՀՀ սփիւռքի նախարար Հրանոյշ Յակոբեան ընդունեց Համազգային հայ կրթական մշակութային միութեան «Բագին» պաշտօնաթերթի գլխաւոր խմբագիր, ազգային գործիչ Յակոբ Պալեանը:

Յակոբ Պալեան ծնած է Լիբանան, այժմ իր գործունէութիւնը կը ծաւալէ Ֆրանսայի մէջ: Ան Մարսէլի մէջ հիմնադրած է Համազգային ամենօրեայ հայկական վարժարանը, ուր հայեցի կրթութիւն կը ստանան բազմաթիւ հայ աշակերտներ:

Յակոբ Պալեան տասներեք վէպի հեղինակ է:

Հանդիպման ընթացքին քննարկուեցաւ արեւմտահայերէնի պահպանման,տարածման եւ սերունդներուն փոխանցելու, ոսկեղենիկ մայրենիի անաղարտ պահպանութեան վերաբերող հարցեր: Նախարար Հրանոյշ Յակոբեան մտահոգութիւն յայտնեց, որ ԵՈՒՆԵՍԿՕ-ի կողմէ արեւմտահայերէնը դասուած է վտանգուած լեզուներու շարքին:

Նախարարը նշեց լեզուի կորուստը` որպէս ազգի գոյութեան սպառնացող լուրջ մարտահրաւէր: Կարեւոր համարուեցաւ սփիւռքի մէջ մայրենի լեզուի ուսուցման ազդեցութիւնը դեռահասներու լեզուամտածողութեան ձեւաւորման վրայ:

Նախարար Հրանոյշ Յակոբեան կարեւոր համարեց արեւմտահայերէնի դասաւանդման անհրաժեշտութիւնը Հայաստանի այն դպրոցներուն մէջ, ուր կը յաճախեն սուրիահայ երեխաներ:

Նախարարը ներկայացուց լեզուի պահպանման ուղղուած ՀՀ սփիւռքի նախարարութեան ուսուցիչներու վերապատրաստման, լեզուի արագացուած դասընթացներու ծրագիրները, ինչպէս նաեւ նախարարութեան պատուէրով հրատարակուած արեւմտահայերէն այբբենարաններու եւ ընթերցարաններու փորձնական նմուշները:

Հանդիպման աւարտին նախարար Հ.Յակոբեան մայրենի լեզուի պահպանման ու զարգացման գործին մէջ նուիրաբերած ջանքերուն, հայապահպանութեան ոլորտին մէջ ունեցած ներդրման համար Յակոբ Պալեանին պարգեւատրեց սփիւռքի նախարարութեան «Մայրենիի դեսպան» մետալով:

Յակոբ Պալեան շնորհակալութիւն յայտնեց սփիւռքի նախարարութեան իր գործունէութիւնը բարձր գնահատելու համար եւ նշեց, որ յառաջիկային եւս
պիտի շարունակէ աշխոյժ համագործակցութիւնը նախարարութեան հետ:

Scroll Up