Հայոց Ցեղասպանութեան Ճանաչումը Բարոյական Անհրաժեշտութիւն Է Հրեաներուն Համար. Քնէսէթի Մէջ Քննարկուած Է Ցեղասպանութեան Ճանաչման Հարցը

Իսրայէլի խորհրդարանի` Քնէսէթի խօսնակ Եուլի Էտելշտէյնը լիագումար նիստին ընթացքին Հայոց ցեղասպանութեան ճանաչման հարցի քննարկման ժամանակ նշած է, որ «Որպէս հրեաներ` իրենք պէտք է ճանչնան հայ ժողովուրդի կրած տառապանքները, անգամ, եթէ իրենք ոեւէ մէկուն ատոր համար չմեղադրեն»:

Ինչպէս կը  յայտնէ The Jerusalem Post-ը, խօսնակն ընդգծած է, որ այդ քննարկումը չի դատապարտեր որեւէ ժամանակակից երկիր:

«Մենք ոեւէ մէկուն չենք մեղադրեր, այլ կը գործենք որպէս հրեաներ` հաւատարիմ մնալով ճշմարտութեան: Մենք չենք կրնար մերժել պատմութիւնն ու մարդկային արժէքները` ելլելով դիւանագիտական կամ քաղաքական զգուշութենէ»,-շարունակած է Էտելշտէյնը:

Աղբիւրը կ’աւելցնէ, որ Քնեսէթի մէջ Ցեղասպանութեան ճանաչման առաջարկով  ներկայացուցած է Իսրայէլի «Մերեց» սոցիալ-դեմոկրատական կուսակցութեան նախագահ Զեհաւա Գալ-Օնը, որ կոչ ըրած է հրէական կառավարութեան մինչ Հայոց ցեղասպանութեան 100-րդ տարելիցը ճանչնալ այն:

«Կառավարութիւնը պէտք չէ զոհաբերէ Ցեղասպանութեան ճանաչումը յանուն ժամանակաւոր շահերու: Ամէն անգամ դիւանագիտական իրավիճակը տարբեր է: Երբ մենք ցանկանք լաւ յարաբերութիւններ ունենալ Թուրքիոյ հետ, չենք ճանչնար Ցեղասպանութիւնը, սակայն, երբ ի յայտ կու գայ Մարմարայի հարցը, մենք կը մտափոխուինք»,- շարունակած է կուսակցութեան նախագահը: Անոր խօսքով` որպէս Հոլոքոստ տեսած ազգ իրենք չեն կրնար շարունակել անտեսել Հայոց ցեղասպանութեան հարցը:

Քննարկման ծիրէն ներս ելոյթ  ունեցած է նաեւ Likud Beytenu (§Իսրայէլը մեր տունն է¦) քաղաքական միաւորման անդամ Ռեւէն Ռիւլինը` յիշեցնելով, որ աշխարհը կը շարունակէ լռել հայերու հարցով:

«Ինծի համար ծանր է ներել այն ազգերուն, որոնք կ’անտեսեն մեր ողբերգութիւնը, ուստի մենք չենք կրնար անտարբեր ըլլալ այլ ազգի ողբերգութեան հանդէպ: Ատիկա մեր բարոյական պարտականութիւնն է` որպէս ժողովուրդ եւ որպէս հրեայ»,- նշած է Ռիւլինը:

Այնուհետ Իսրայէլի արտաքին քաղաքական գերատեսչութեան ղեկավար Աւիկտոր Լիպերմանի փոխարէն առաջարկին պատասխանած է Զբօսաշրջութեան նախարար Ուզի Լանտաուն, որ եւս համակարծիք է Քնեսէթի միւս պատգամաւորներուն հետ այն հարցով, որ Ցեղասպանութեան ճանաչումը հրեաներու բարոյական պարտաւորութիւնն է:

Քննարկման աւարտէն ետք Հայոց ցեղասպանութեան ճանաչման վերաբերեալ առաջարկը ուղարկուած է Քնեսէթի արտաքին գործերու եւ պաշտպանութեան հարցերով յանձնաժողով:

 tert.am

Scroll Up