Մոսկուայի Մէջ Տեղի Ունեցաւ Քեսապի Հայերուն Աջակցութեան Ձեռնարկ

Ռուսական հասարակայնութեան ձեռնարկը, որ զօրակցութիւն յայտնեց Քեսապի հայերուն եւ սուրիացի ժողովուրդին, տեղի ունեցաւ ապրիլ 4-ին, Մոսկուայի Գորկիի զբօսայգիի «Հայդ փարքին» մէջ: Ձեռնարկի կազմակերպիչներն էին «Ռուս-Հայկական համագործակցութիւն» կազմակերպութիւնը եւ Մոսկուայի հայ երիտասարդութեան ընկերակցութիւնը:

Ձեռնարկին ժամանակ ելոյթ ունեցած հասարակական եւ քաղաքական գործիչները դատապարտեցին Սուրիոյ մէջ միջազգային ահաբեկչութիւնը եւ անօրինական զինուած խմբաւորումներուն Թուրքիոյ աջակցութիւնը:

«Երիտասարդ Ռուսաստան» համառուսական շարժման նախագահ Մաքսիմ Միշչենկոյի խօսքերով` հայ ժողովուրդը, որ քսաներորդ դարուն ցեղասպանութիւն  տեսած է, Քեսապի մէջ դարձեալ բռնութեան ենթարկուեցաւ, իսկ Սուրիոյ մէջ իրավիճակի յետագայ ապակայունացումը պիտի վտանգէ  ողջ տարածաշրջանի քրիստոնէական բնակչութեան:

Ելոյթ ունեցողները աջակցութիւն յայտնեցին Ռուսիոյ, Հայաստանի եւ այլ երկիրներու ջանքերուն, որոնք ուղղուած են սուրիական խնդիրի խաղաղ կարգաւորման:

«Ռուս-հայկական համագործակցութիւն» կազմակերպութեան նախագահ Եուրի Նաւոյեան նշեց, որ ՄԱԿ-ը եւ այլ միջազգային կազմակերպութիւններ պէտք է հետաքննութիւն սկսին խաղաղ բնակչութեան նկատմամբ յանցագործութիւններու վերաբերեալ եւ միջոցներ ստեղծեն, որոնք կ’երաշխաւորեն իրենց պատմական բնակութեան վայրեր Քեսապի բնակչութեան վերադարձը:

Ձեռնարկին  մասնակիցները ընդունեցին դիմում, ուր կը դատապարտուի միջազգային ահաբեկչութիւնը եւ հակամարտող կողմերուն կոչ կ’ընեն բոլոր հարցերը լուծել խաղաղ միջոցներով:

Scroll Up