Ժընեւի Մէջ Կայացած Է Ժան Պօղոսեանի Ստեղծագործութիւններու Ցուցադրութեան Բացման Արարողութիւնը

Մայիս 23-ին Ժընեւի մէջ Միաւորուած ազգերու կազմակերպութեան գրասենեակի Ազգերու պալատին մէջ տեղի ունեցաւ անուանի արուեստագէտ, «Պօղոսեան հիմնադրամի» համանախագահ Ժան Պօղոսեանի ստեղծագործութիւններու ցուցադրութեան բացման արարողութիւնը:

Ինչպէս «Հայերն այսօր»-ին կը յայտնեն ԱԳՆ մամլոյ ծառայութենէն, «Հրադադար» խորագիրը կրող այս ցուցադրութիւնը կազմակերպուած էր Ժընեւի մէջ ՄԱԿ-ի գրասենեակէն ներս Հայաստանի, Լիբանանի, Պելճիգայի եւ Ֆրանքոֆոնիայի մշտական ներկայացուցչութիւններու համատեղ ջանքերով:

Մասնակիցներուն ուղղուած իր ողջոյնի խօսքին մէջ Ժընեւի  ՄԱԿ-ի գրասենեակին մէջ Հայաստանի մշտական ներկայացուցիչ Անդրանիկ Յովհաննիսեան մասնաւորապէս նշեց, որ Ժան Պօղոսեանն, իր արուեստին մէջ օգտագործելով կրակն ու ծուխը, ի ցոյց կը դնէ, որ ատոնք կրնան խորհրդանշել ոչ միայն պատերազմն ու աւերածութիւնը, այլեւ` ծառայել ստեղծագործելու ու գեղեցիկն արարելու արուեստին: Ան ընդգծեց, որ արուեստն ու մշակոյթը` որպէս համամարդկային արժէքներ, լաւագոյն հնարաւորութիւն կ՛ընձեռեն խաղաղութեան ու համակեցութեան ուղերձով հանդէս գալու համար: Դեսպան Յովհաննիսեան բարձր գնահատեց տարիներ շարունակ «Պօղոսեան հիմնադրամ»-ի կողմէ Հայաստանի մէջ իրականացուող բարեգործական գործունէութիւնն` ուղղուած, մասնաւորապէս, արուեստի, մշակոյթի ու կրթութեան զարգացման:

Ցուցադրութիւնը հանրութեան համար բաց պիտի ըլլայ երկու շաբաթ:

Scroll Up