Զուիցերիացի Լրագրողները Յօդուածներ Կը Տպագրեն Եւ Ֆիլմ Կը Նկարահանեն Հայաստանի Մասին

Զուիցերիոյ ճամբորդական լրագրողներու միութեան 16 ներկայացուցիչ ժամանած է Հայաստան` ծանօթանալու երկրի զբօսաշրջային գրաւչութեան:

«Արմէնպրես»-ի հաղորդմամբ` մօտ 1 շաբթուան ընթացքին անոնք պիտի բաժնուին 3 խումբի եւ պիտի ըլլան Հայաստանի տարբեր տեսարժան վայրերու մէջ` Սեւանայ լիճի, Տաւուշի, Լոռիի, Շիրակի մարզերու տարբեր գիւղերու ու քաղաքներու մէջ:

Ձեռնարկն իրականացուած է ՀՀ տնտեսական զարգացման եւ ներդրումներու նախարարութեան աջակցութեամբ եւ Զուիցերիոյ մէջ Հայաստանի առեւտրային ներկայացուցիչ Հայկ Յովհաննիսեանի նախաձեռնութեամբ:

Զուիցերիոյ ճամբորդական լրագրողներու միութեան ղեկավար Ալէք Տեքոթն ըսաւ, որ շատ  ճամբորդած է, այցելած տարբեր երկիրներ, սակայն Հայաստանի մասին չէր լսած:

«Հայաստանի մասին տեղեկացած եմ Ֆրանքոֆոնիայի գագաթնաժողովի ժամանակ, սկսայ ուսումնասիրել երկիրը եւ որոշեցի, որ սա այն 5-6 պարտադիր այցելութեան երկիրներէն է, որ ես կը պատրաստուի ըլլալ: Արդէն իսկ սիրահարուած եմ Հայաստանին»,- ընդգծեց Տեքոթը:

Խօսելով սպասուող շրջագայութիւններու մասին` ան շեշտեց, որ ատոնք շատ յագեցած պիտի ըլլան եւ պէտք է հասցնեն հնարաւորինս  շատ բան տեսնել:

«Երեւանի մէջ պիտի այցելենք Մատենադարան, «Թումօ» ստեղծագործական կեդրոն, Հայոց ցեղասպանութեան զոհերուն նուիրուած յուշահամալիր եւ  շարք մը այլ տարբեր վայրեր: Մենք կ՛ուզենք մեր ընթերցողներուն մօտ ցանկութիւն յառաջացնել գալ եւ տեսնել Հայաստանը` բացայայտելու երկրի պատմական հարստութիւնը»,- ըսաւ միութեան ղեկավարը:

Զուիցերիացի լրագրողները կը նախատեսեն Մատենադարանի եւ «Թումօ» ստեղծագործական կեդրոնի մասին ֆիլմ նկարահանել ֆրանսական հեռուստաընկերութիւններէն մէկուն համար` ներկայացնելով  անցեալն ու ներկան:

«Մենք կը մտածենք, թէ ինչ համ ու հոտ տանք մեր նիւթին, որով հնարաւոր կ՛ըլլայ հետաքրքրել մեր ընթերցողին եւ հեռուստադիտողին: Ծովերով, շքեղ հիւրանոցներով չըլլար, լեռներով նոյնպէս, մեր երկրին մէջ ալ ատոնք շատ են ու գեղեցիկ: Կը ցանկանք շեշտը դնել Հայաստանի հոգիի եւ խղճի վրայ»,- շեշտեց Տաքոթը եւ աւելցուց, որ Հայաստանն արժանի է  սիրուած ըլլալու:

Լրագրողներու հետ զրոյցին Զուիցերիոյ մէջ Հայաստանի առեւտրային ներկայացուցիչ Հայկ Յովհաննիսեան ըսաւ, որ լրագրողները Հայաստան հրաւիրելու գլխաւոր նպատակն այն է, որպէսզի անոնք դրական տպաւորութիւններով վերադառնան իրենց երկիր:

«Մեր հիւրերը տասնեակէ աւելի յօդուածներ պիտի պատրաստեն եւ տպագրեն Հայաստանի զբօսաշրջային գրաւչութեան մասին: Զուիցերիացի զբօսաշրջիկներուն համար մեր երկիրը շատ հետաքրքիր է, քանի որ անոնք իւրայատուկ ճաշակ ունին: Անոնց շատ բաներով չենք կրնար զարմացնել, պէտք է հետաքրքրենք արկածային շրջագայութիւններով: Շատ կը սիրեմ հեծանուային արշաւներ, քայլարշաւներ,  լեռներու մէջ քալել: Միջինէն աւելի բարձր տարիքի զուիցերիացի մեր հիւրերուն աւելի շատ կը հետաքրքրէ մեր պատմամշակութային ժառանգութիւնը»,- նշեց Յովհաննիսեան:

Scroll Up