«Թումօ»-ն Դարձած Է Եւրոմիութեան Հեղինակաւոր Մրցանակաբաշխութեան Յաղթող

2019 թուականի մայիս 21-ին Հաագայի մէջ տեղի ունեցաւ եւրոպական ժառանգութեան մրցանակաբաշխութիւն /«Եւրոպա Նոստրա» մրցանակաբաշխութիւն 2019-ը, որուն ընթացքին «Թումօ»-ն յաղթող ճանչցուեցաւ Կրթութեան, վերապատրաստման եւ իրազեկման բարձրացման անուանակարգին մէջ: Ոլորտի Եւրոպայի ամենահեղինակաւոր այս մրցանակաբաշխութիւնը կը կազմակերպուի Եւրոպական յանձնաժողովի ու Եւրոպայի ժառանգութեան պահպանման յառաջատար ցանցի` Եւրոպա Նոստրայի եւ կը ֆինանսաւորուի Եւրապեկան միութեան (ԵՄ) «Ստեղծարար Եւրոպա» ծրագիրին կողմէ:

«Թումոն յստակ կը պատկերացնէ կրթական գործընթացքը եւ համակողմանի մօտեցում կը ցուցաբերէ` ժամանակակից արհեստագիտութիւններու միջոցով  խոցելի խումբերու պատանիներուն ներգրաւելով կրթութեան տարբեր ծրագիրներու մէջ: Կրթական ծրագիրները կը նպաստեն նաեւ թուայնացման միջոցով նիւթական եւ ոչ նիւթական ժառանգութեան պահպանման»,- tumo.org-ի փոխանցմամբ, իր խօսքին մէջ ըսած է ժիւրին:

«Լաւ օրինակ է Սմիթսոնեան հիմնարկի եւ CyArk-ի հետ միասին իրականացուցած նախագիծը, որուն ընթացքին  խումբ մը ուսանողներ իրականացուցին Հայաստանի ժառանգութեան կարեւոր նմուշներու` Նորավանքի եւ Արենիի քարանձաւային համալիրի թուայնացումը»,- նշած է Եւրոպա Նոստրան:

Այս մրցանակը կը տրուի պահպանման, հետազօտութեան, նուիրուած ծառայութեան, կրթութեան, վերապատրաստման եւ իրազեկման բարձրացման ոլորտներուն մէջ նշանակալի աւանդ ունեցող կազմակերպութիւններու եւ անհատներու: Այս տարի 16 երկրէ 25 մրցանակակիր  ընտրուած է: Յաղթողներուն մէջ են «Նորվեկիոյ ազգային վստահութիւն» ՀԿ-ն, որ արդէն 175 տարի կը զբաղի Նորվեկիոյ մէջ ժառանգութեան պահպանմամբ, Թուրինի Սբ. Պատանքի մատուռի վերականգնման նախաձեռնութիւնը, գնչուներու մշակոյթի եւ պատմութեան թուային արխիւի զարգացման նախաձեռնութիւնը եւ այլն: Յատուկ մրցանակի  արժանացած են Փարիզի հրշէջները, որոնք ապրիլ 15-ին կրցած են ոչնչացումէն փրկել Փարիզի Աստուածամօր տաճարի հիմնական կառոյցն ու ներսը գտնուող նմուշները:

«Ես չափազանց հպարտ եմ եւրոպական ժառանգութեան մրցանակաբաշխութիւն/ «Եւրոպա Նոստրա» մրցանակաբաշխութիւն 2019-ի բոլոր յաղթողները շնորհաւորելու համար: Ժառանգութեան պահպանման այս հերոսները` արհեստավարժներ են ու կամաւորներ ամբողջ Եւրոպայէն, իրապէս անգնահատելի աշխատանք  կատարած են»,- ըսած է օփերայի աշխարհահռչակ երգիչ եւ Եւրոպա Նոստրայի նախագահ Փլաչիտօ Տոմինկոն:

Յաղթողները պիտի պարգեւատրուին հոկտեմբեր 29-ին Փարիզի մէջ տեղի ունենալիք Եւրոպական ժառանգութեան մրցանակաբաշխութեան արարողութեան ժամանակ:

Scroll Up