ԼՂ Հակամարտութեան Հրադադարի Հաստատման 25-ամեակին Նուիրուած Ձեռնարկ ԱՄՆ Քոնկրէսին Մէջ

Մայիս 16-ին ԱՄՆ Քոնկրէսին մէջ տեղի ունեցաւ ԼՂ հակամարտութեան հրադադարի հաստատման 25-ամեակի առիթով ձեռնարկ, որ կազմակերպուած էր Հայկական հարցերու յանձնախումբի եւ Ականազերծման հարցերու յանձնախումբին կողմէ:

Ինչպէս «Հայերն այսօր»-ին կը յայտնեն ԱԳՆ մամլոյ ծառայութենէն, ձեռնարկին խօսքով հանդէս եկաւ Հայկական հարցերու յանձնախումբի համանախագահ եւ Ականազերծման հարցերու յանձնախումբի հիմնադիր համանախագահ քոնկրէսական Ճեքի Սփիրը, որ անդրադարձաւ Արցախի մէջ ականազերծման գործընթացքի կարեւորութեան` նշելով, որ պիտի շարունակէ Յանձնախումբերու ծիրէն ներս աջակցիլ վերոնշեալ առաքելութիւններուն Արցախի  եւ ամբողջ աշխարհի մէջ:

Դեսպան Ներսէսեան իր ելոյթին մէջ շնորհակալութիւն յայտնեց քոնկրէսական Սփիրին ձեռնարկը կազմակերպելու համար, ինչպէս նաեւ բարձր գնահատեց Հայկական հարցերու եւ Ականազերծման հարցերու յանձնախումբերու գործունէութիւնը: Դեսպան Ներսէսեան ընդգծեց հակամարտութեան տեւական կարգաւորման նպատակով Լեռնային Ղարաբաղի լիարժէք ներգրաւուածութեան անհրաժեշտութիւնը` կարեւորելով նաեւ ԵԱՀԿ Մինսքի խումբի համանախագահութեան ծիրէն ներս ԱՄՆ միջնորդական ջանքերն` ուղղուած հիմնախնդիրի խաղաղ կարգաւորման: Դեսպանն իր երախտագիտութիւնը յայտնեց նաեւ Արցախի մէջ ականազերծում իրականացնող «Հալօ Թրաստ» կազմակերպութեան ներկայացուցիչներուն:

Ձեռնարկը  ուղեկցուեցաւ Արցախի մէջ «Հալօ Թրաստ» (Halo Trust) կազմակերպութեան գործունէութեան նուիրուած նկարներու ցուցահանդէսով:

Scroll Up