Արմէն Սարգսեանը Հանդիպած Է Ղազախստանի Հայ Համայնքին Հետ

Աշխատանքային այցով Ղազախստանի մէջ գտնուող Հայաստանի Հանրապետութեան նախագահ Արմէն Սարգսեան մայիս 18-ին Նուր-Սուլթանի մէջ հանդիպած է հայ համայնքի ներկայացուցիչներու հետ: Հանդիպման մասնակցած են նաեւ Ուզպեկստանէն ժամանած մեր հայրենակիցներ:

Ինչպէս ««Հայերն այսօր» -ին կը յայտնեն ՀՀ նախագահի մամլոյ ծառայութենէն, նախագահ Արմէն Սարգսեան նշանակալի  համարած է հայ համայնքի ներդրումը Ղազախստանի զարգացման գործին մէջ: «Շատ կարեւոր է, որ դուք Ղազախստանի լաւ քաղաքացի ըլլաք: Սակայն միեւնոյն ժամանակ պէտք չէ մոռնաք, թէ ինչ կրօն ու մշակոյթ կը ներկայացնէք, պէտք է հպարտութեամբ ներկայացնէք հայ ազգը»,- նշած է Հանրապետութեան նախագահը:

Արմէն Սարգսեան ընդգծած է, որ 21-րդ դարուն ամենակարեւոր պաշարը ոչ թէ բնական պաշարներն են, այլ մարդկային պաշարը: Այս առումով, ան մեծապէս կարեւորած է սփիւռքի ներուժի օգտագործումն ու հայ ժողովուրդի միասնական ըլլալը: «Մեր ուժը մեր միասնական ըլլալու մէջ է: Պէտք է սորվինք միասին ապրիլ ու աջակցիլ իրար: Մենք քիչ ենք, սակայն մէկ ազգ ենք եւ պարտաւոր ենք իրար աջակցիլ: Առաջնայինը մեր ազգային միասնութիւնն է: Յաջողութեան հասնելու այլ ուղի չկայ: Սա յաջողութեան գրաւականներէն մէկն է»,– ըսած է նախագահ Սարգսեան:

Որպէս յաջողութեան միւս գրաւական` Հանրապետութեան նախագահն առանձնացուցած է ազնիւ ու նուիրուած աշխատանքը:

Միեւնոյն ժամանակ, Արմէն Սարգսեան կարեւորած է նոր սերունդին բարձրակարգ կրթութեամբ ապահովելը` որպէս աւելի ամուր ու վստահելի ապագայի երաշխիք: «Մենք ունինք հարստութիւն, ատիկա մարդկային հարստութիւն է, ատիկա դուք էք եւ ձեր երեխաները: Ինծի համար շատ էական է յաջորդ սերունդը: Մենք դպրոցէն սկսած պէտք է կարենանք երեխաները ճիշդ կրթել: Որպէս նախագահ` իմ պարտականութիւնը կը համարեմ առաջնորդել ժողովուրդն որոշակի յստակ տեսլականներով: Եւ տեսլականներէն առաջինն այն է, որ երկրին մէջ երեխաներուն նկատմամբ ուշադրութիւնը պէտք է ըլլայ ամենաառաջնայինը: Վաղը հայրենիքը պաշտպանող զինուորն այսօրուան երեխան է: Որպէսզի ան կարենայ վաղը երկիրը պաշտպանել, պէտք է ունենայ ամենավերջին արհեստագիտութիւնը, քանի որ հրացանով պիտի չի պաշտպանէ, այլ դրոններով: Ու ատոր համար պէտք է ճիշդ կրթութիւն ստացած ըլլայ: Հայաստան ինք պէտք է արտադրէ իր դրոնը: Իսկ որպէսզի դրոն արտադրէ, պէտք է ունենայ բարձրորակ կրթական համակարգ` մանկապարտէզէն մինչեւ համալսարան»,- նշած է ան:

Հանրապետութեան նախագահը յայտարարած է, որ 21-րդ դարը հայերու դարն է, եւ մենք ունինք հնարաւորութիւն ու ներուժ` դառնալու յաջողակ ազգ:

Ելոյթի աւարտին նախագահ Արմէն Սարգսեան լսած է հայ համայնքի ներկայացուցիչներուն, ինչպէս նաեւ պատասխանած անոնց հարցերուն:

Scroll Up