ԱՄՆ «Փոքրիկ Հրեշտակներ» Շաբաթօրեայ Դպրոցի 2018-2019 Ուսումնական Տարին

«Հայերն այսօր»Ամերիկայի Միացեալ Նահանգներու մէջ hայապահպանութեան ու ազգային ինքնութեան կարեւոր դերակատարներէն են հայկական դպրոցները, որոնք  նաեւ կարեւոր օղակն են աշխարհասփիւռ հայութեան եւ հայրենիքի միջեւ: Այս կարեւոր առաքելութեան հիմնասիւնը մշտապէս եղած է եւ կը մնայ Հայ Առաքելական Սուրբ Եկեղեցին` իր թեմերով եւ եկեղեցական կառոյցներով:

Շուրջ ինը տասնամեակ այս սրբազան ծառայութեան ջահակիրներէն է Հիւսիսային Ամերիկայի Արեւմտեան  թեմը, որուն կրթական, հոգեւոր ու ազգային կեանքն ալ աւելի աշխուժացաւ թեմի բարեխնամ առաջնորդ,  գերաշնորհ Տ. Յովնան արքեպիսկոպոս Տէրտէրեանի անբասիր ու հայրենաշէն ջանքներով: Այն հոգածութիւնը, ուշադրութիւնն ու հետեւողականութիւնը, որ կը ցուցաբերէ Սրբազան հայրը հայ մանուկներու կրթութեան, հոգեւոր ու հայեցի դաստիարակութեան անհերքելի իրողութիւնը է: Եւ նման հոգեւոր հօր հայրական հովանիի ներքոյ ծառայելն ու սորվիլը պատիւ է եւ բախտաւորութիւն:

Առաջնորդ Սբազան հօր օրհնութեամբ Արեւմտեան թեմէն ներս կը գործեն բազմաթիւ շաբաթօրեայ եւ կիրակնօրեայ վարժարաններ, որոնցմէ ամենամեծն առաջնորդանիստ Սրբոց Ղեւոնդեանց մայր տաճարի «Փոքրիկ հրեշտակներ» շաբաթօրեայ դպրոցն է, ուր կը սորվին տարբեր տարիքի շուրջ երեք հարիւր աշակերտ: Այն աշխարհի միօրեայ ամենամեծ հայկական կրթական հաստատութիւնն է: Դպրոցը որդեգրած է Հայաստանի Հանրապետութեան հանրակրթական դպրոցներու դասագիրքերը եւ ծրագիրները պատշաճեցուած են Քալիֆորնիոյ կողմէ  սահմանուած լեզուներու ուսուցման հիմնական չափորոշիչներուն: Կրթօճախն ունի վեց դասարան, ուր յաճախող երեխաները բաշխուած են ըստ լեզուի իմացութեան:  Ուսումնական տարուայ տեւողութիւնը տաս ամիս է: Դպրոցը 2015-ին Համաշխարհային հայկական կոնգրէսի  եւ Հայաստանի Հանրապետութեան սփիւռքի նախարարութեան կողմէ ճանչցուած է որպէս Մայրենի լեզուի պահպանման լաւագոյն հաստատութիւն եւ արժանացած գլխաւոր մրցանակի եւ տիպլոմի: Վարժարանի աւարտական վկայականը ամերիկեան հաստատութիւններու կողմէ կը ճանչցուի   որպէս երկրորդ օտար լեզուի վկայագիր:

Վերջին տարիներուն ուսումնական մակարդակի միօրինականացման ու զարգացման նպատակով Առաջնորդարանի գիտակրթական յանձնախումբը` գլխաւորութեամբ դոկտոր  Էլլի Անդրէասեանի, կը համակարգէ թեմապատկան դպրոցներու գիտական ծրագիրները, կը կազմակերպէ եւ կ՛իրականացնէ ուսուցիչներու ամէնամեայ վերապատրաստման դասընթացներ: Վերջիներս նպատակ ունին մանկավարժներուն մատուցելու վերջին գիտական ու կրթական նորութիւնները եւ ատոնք աշակերտներուն փոխանցելու վարպետութիւնը:

«Փոքրիկ հրեշտակներ» շաբաթօրեայ դպրոցը եկեղեցւոյ ապահով ու լուսասփիւռ յարկին  ներքոյ կ՛իրականացնէ հետեւողական, լուրջ ծրագիր, որ միտում ունի պատշաճ կազմակերպելու եւ կեանքի կոչելու  ազգային արժէքներու եւ  ոսկեղինիկ մայրենիի պահպանման ու տարածման պատասխանատու առաքելութիւնը: Այս չափազանց կարեւոր աշխատանքին իրենց մեծ նուիրումը կը բերեն նաեւ դպրոցի բազմափորձ եւ արհեստավարժ ուսուցիչներն ու ողջ աշխատակազմը` գլխաւորութեամբ դպրոցի տնօրէն, բարեշնորհ Յովհաննէս սարկաւագ Գումրույեանի, որուն  անմիջական հսկողութեամբ, անձնուէր ու անսպառ նուիրուածութեամբ դպրոցի առօրեան կը դառնայ հետաքրքիր ու բովանդակալից:

Օրը կը սկսի Ս. Ղեւոնդեանց մայր տաճարի հովիւ, արժանապատիւ տէր Խաժակ քահանայ Շահբազեանի հետաքրքիր ու խրատական հոգեւոր զրոյցով ու  աղօթքով: Դասերու ընթացքին աշակերտները մասնակից կ՛ըլլան խօսքի կառուցման, մայրենիի  բառապաշարի հարուստ հնչեղութեան, որ իւրօրինակ փորձ է հնչեցնելու եւ տարածելու մեր սուրբ մայրենին:  Հարկ է նշել նաեւ, որ հաստատութիւնն իր առջեւ  նպատակ  դրած է ոչ միայն հայոց լեզուի իմացութեան , այլեւ հայոց պատմութեան, մշակոյթի եւ ազգային երաժշտութեան նիւթերու ուսուցման ու զարգացման: Ատոր վառ վկայութիւնն են գրական, կրթական  եւ համայնքային ձեռնարկներու, ինչպէս նաեւ հանդէսներու  պատշաճ մակարդակով կազմակերպումն ու իրականացումը:

Ողջ ուսումնական տարուան ընթացքին աշակերտները կը պատրաստուին եւ կը ներկայացնեն տարբեր թեմաներով  անհատական եւ խմբակային աշխատանքներ` նուիրուած Հայաստանին, հայ մշակոյթին,  հայոց պատմութեան: Ատոնք մանուկներու ձեռքով պատրաստուած ու ձեւաւորուած պաստառներ, համակարգչային յղումներ են, որոնք մեծ հետաքրքրութիւն ու աշխուժութիւն կը մտցնեն դպրոցական առօրեային մէջ:

Անցնող ուսումնական տարուան ընթացքին տեղի ունեցան  շարք մը ներդասարանային եւ համայնքային ձեռնարկներ ` նուիրուած Երեւանի 2800 ամեակին, աշնան ու գարնան, անոնց գոյներուն, Զատկուան, Յովհաննէս Թումանեանի եւ Կոմիտասի ծննդեան 150-ամեակներուն, Երեւանի մատենադարանին, եղան նաեւ անհատական արուեստի աշխատանքներ ու ազգային աւանդական տարազներու վերաբերեալ ցուցադրումներ:

2018-ի դեկտեմբեր 22-ին տեղի ունեցաւ Ս. Ծննդեան եւ Ամանորի հանդէսը, որուն կը մասնակցէին բոլոր դասարաններու աշակերտները: Ներկաները ունկնդրեցին աշակերտներու գեղեցիկ արտասանութիւնները, երգերը ` նուիրուած օրուան խորհուրդին: Երեխաներուն այցելեց  Ձմեռ պապը եւ իր հետ բերաւ այնքան սպասուած նուէրներ: Ապա Առաջնորդարանի «Թրբանջեան» հրապարակին վրայ տօնական եղեւնիին շուրջ կազմակերպուած հիւրասիրութիւնն ուղեկցուեցաւ երգ ու երաժշտութեամբ`  շարունակելով բարձր տրամադրութիւն հաղորդել ներկաներուն:

Աշակերտները տարին  քանի մը անգամ կը մասնակցին նաեւ կիրակնօրեայ պատարագներուն, որնոցմէ յիշատակելի է Ծակազարդի թափօրը եւ Մանուկներու օրհնութեան կարգին մասնակցիլը:

Աւանդութեան համաձայն, ապրիլ 24-ի մերձակայ շաբաթ օրն աշակերտները կը հաւաքուին Տաճարին  կից Սրբոց Նահատակաց խաչքար յուշարձանին շուրջ, ուր ծաղիկներ կը խոնարհեն եւ յարգանքի տուրք կը մատուցեն անմեղ ու սուրբ նահատակներուն:

Աշակերտներու գիտելիքները կ՛ամփոփուին տարեկան աւարտական քննութիւններով, որոնք աշակերտները կը յանձնեն փայլուն յառաջադիմութեամբ, որուն կը հետեւի ամավերջին հանդէսը: Այս տարի այն տեղի ունեցաւ մայիս 18 – ին եւ բաղկացած էր երկու մասէ: Բացման խօսքով հանդէս եկաւ տնօրէն, բարեշնորհ Յովհաննէս սարկաւագ Գումրույեան, որ իր շնորհակալական խօսքն ուղղեց Առաջնորդ սրբազանին, եկեղեցւոյ հովիւին, ծնողներուն, աշակերտներուն, ուսուցիչներուն ու դպրոցի անձնակազմին:

Առաջին դասարանցիներն իրենց մանկական շրթունքներէն հնչեցուցին քաղցրիկ մայրենին եւ խոստացան հաւատարիմ մնալ Մաշտոցի պատգամներուն: Ապա եկեղեցւոյ մէջ տարածուեցաւ անոնց  երգն ու երաժշտութիւնը` ներկաներուն պարգեւելով մեծ  յուզականութիւն եւ ոգեւորութիւն: Հանդիսութեան աւարտին փոքրիկներուն յանձնուեցաւ «Տառաճանաչութեան վկայականներ: 2-5-րդ դասարանի աշակերտներն իրենց անհատական եւ խմբակային հայրենասիրական երգերով գունաւորեցին ձեռնարկի երկրորդ մասը, իսկ  6-րդ դասարանի աշակերտները ոգեկոչեցին հայութեան եօթ հրաշալիքները` սիրով ու ջերմութեամբ խօսելով մայրութեան, հայոց լեզուի, հայրենասէր հերոսներու ու  հայրենիքի մասին: Յայտագիրը յագեցած էր ճոխ գեղարուեստական կատարումներով: Ապա արժանաշնորհ տէր Խաժակ քահանայ Շահբազեան, ներկաներուն ընթերցեց առաջնորդ Տ․ Յովնան սրբազանի գնահատանքի եւ օրհնութեան գիրը եւ փոխանցեց նաեւ իր ջերմ բարեմաղթանքները:

Աւարտին 6-րդ դասարանի աշակերտներն ստացան աւարտական վկայականներ, որմէ յետոյ բալորը մասնակցեցան տօնական հիւրասիրութեան:

Օրուան խորհուրդն ամփոփուեցաւ «Թրբանջեան»հրապարակին վրայ , ուր  շրջանաւարտները գունաւոր փուչիկներ արձակեցին եւ իրենց գլխարկները օդին մէջ պտտելով` ազդարարեցին իրենց շրջանաւարտ ըլլալը:

Ետեւ մնացին հանդիսութեան յուզականութիւնն ու հանդիսաւորութիւնը, բայց բոլորին աչքերուն մէջ կար թաքուն ու խորհրդաւոր լռութիւն, որ հրաժեշտ էր հարազատ դարձած դպրոցին ու ուսուցիչներուն` միեւնոյն ժամանակ յոյսով ու հաւատքով, որ նոր ուսումնական տարին, որ պիտի մենկարկէ օգոստոս 17-ին, պիտի ըլլայ նոյնքան յաջողակ եւ արգասաբեր:

Ռիմա Եսայեան, ուսուցչուհի

Լոս Անճելըս

Աղբիւրը` «Հայերն այսօր»

Scroll Up