Ամերիկահայ Աշակերտները Ծառ Կը Տնկեն Եւ Արմատ Կ՛ունենան Հայաստանի Մէջ

Մայիս 11, 2019, Շաբաթ օր, Փասատենա քաղաքի Ս. Գրիգոր Լուսաւորիչ շաբաթօրեայ վարժարանը հիւրասիրեց «Հայկական ծառատունկի ծրագիր» (ՀԾԾ) կազմակերպութեան ներկայացուցիչ Տիկին Անահիտ Ղարիպեանը: Վարժարանը եւ այդ կազմակերպութիւնը համագործակցելու երկարամեայ պատմութիւն ունին:

Ինչպէս Հայերն այսօր-ին կը տեղեկացնէ Ս.Գրիգոր Լուսաւորիչ շաբաթօրեայ վարժարանի տնօրէն Նորայր Տատուրեան, Անահիտ Ղարիպեանը աշակերտներուն ներկայացուց Հայաստանի մէջ ծառ տնկելու կարեւորութեան մասին ու աշակերտներուն հասկնալի լեզուով տուաւ տնտեսական, ընկերային եւ բնապահպանման, ինչպէս նաեւ՝ գեղագիտական պատճառներ: Ապա, աշակերտները դիտեցին վաւերագրական շարժանկար մը, ուր 1991էն մինչեւ այսօր Հայաստանի մէջ ՀԾԾ-ի կատարած գործունէութիւնները կը ցուցադրուէին:

Այս առիթով վարժարանի աշակերտները հանգանակութիւն մը ըրին: Անոնք դպրոցի պատմական գանձանակի մէջ տոլարիկներ հաւաքեցին, որ Հայաստանի մէջ ծառ մը ունենան եւ արմատ դնեն հայրենի հողի մէջ: Աւարտին աշակերտները ստացան ՀԾԾ-ի կողմէ հրատարակուած դաստիարակչական գրքոյկ եւ իւրայատուկ շապիկներ:

 

Scroll Up