Եռատօնն Ախալքալաքի ՄԷջ

Եռատօնն ամէն տարի աւանդաբար կը նշուի Ախալքալաքի երիտասարդական կրթամշակութային  (ԱԵԿ) կեդրոնին մէջ: Իսկ այս տարի մայիս 9-ը Ջաւախքի երիտասարդական կեդրոններու մանկավարժներէն 3-ին համար դարձաւ Քառատօն, քանի որ իրենց հայրենանուէր աշխատանքին համար արժանացան ՀՀ սփիւռքի նախարարութեան կողմէ պարգեւատրման: Ախալքալաքի երիտասարդական կեդրոնի պատասխանատու Կարինէ Թադեւոսեան պարգեւատրուեցաւ ՀՀ սփիւռքի նախարարութեան ոսկէ մետալով եւ ստացաւ պատուոգիր, Նինոծմինտայի երիտասարդական կեդրոնի (ՆԵԿ) մանկավարժ Լալա Շահբեկեան արժանացաւ «Մայրենիի դեսպան» մետալի եւ պատուոգիրի, իսկ Ախալցխայի երիտասարդական կեդրոնի մանկավարժ Տիրուհի Համբարձումեան` պատուոգիրի: Պարգեւատրումը կատարեց Սամցխէ-Ջաւախքի եւ Քուեմօ Քարթլիի հայկական հասարակական կազմակերպութիւններու խորհուրդի համակարգող Արտակ Գաբրիէլեան: Ան շնորհակալութիւն յայտնեց մանկավարժներուն տարածաշրջանին մէջ հայրենանուէր եւ հայապահպան գործունէութիւն ծաւալելու համար, մաղթեց անոնց քաջառողջութիւն եւ վարձքերնին ի կատար:

Պարգեւատրման արարողութեան յաջորդեց տօնական ձեռնարկը, որ բացուեցաւ Վրաստանի եւ ՀՀ-ի օրհներգներով եւ Տէրունական Աղօթքի հնչեցմամբ: Մեծ հպարտութեամբ խօսուեցաւ Շուշիի ազատագրման, Հայրենական պատերազմին յաղթանակի եւ Արցախի զինուած ուժերու ստեղծման` Եռատօնի մասին:

Ախալքալաքի եւ Նինոծմինտայի երիտասարդական կրթամշակութային կեդրոնները հանդէս եկան համատեղ համերգային ծրագիրով․ հնչեցին ասմունքներ, հայրենասիրական երգեր թէ՛ խմբակային, թէ՛ մենակատարումներով եւ ներկայացուեցաւ ազգային տարատեսակ պարեր:

Ձեռնարկին իր մասնակցութիւնը բերաւ նաեւ Ջաւախքի Պատանեկան միութիւնը «Պատերազմ էք գնում» երգի կատարմամբ: Ձեռնարկն աւարտուեցաւ ԱԵԿ-ի եւ ՆԵԿ-ի սաներու ու հանդիսատեսի Կարնոյ քոչարիի միասնական կատարումով:

Իրենց ներկայութեամբ ձեռնարկը պատուեցին Ջաւախքի եւ Ծալկայի ընդհանուր առաջնորդական փոխանորդ Հոգեշնորհ Տէր Մաղաքիա վարդապետ Ամիրեան, Ախալքալաքի քաղաքապետարանի երիտասարդութեան, մշակոյթի եւ մարմնամարզութեան բաժինի պետ Վալերի Ստելմաշովը, Մշակոյթի տան ղեկավար աշուղ Ալիք Քսպոյեան եւ Անահիտ Ստելմաշովան, որ հանդէս եկաւ Ա․ Բաբաջանեանի մշակմամբ «Վաղարշապատ» դաշնամուրային կատարմամբ, Ախալքալաքի գաւառագիտական թանգարանի տնօրէն Սեդա Համբարեան, Ապագայի տան տնօրէն Սաթենիկ Պետրոսեան, Ախալքալաքի թիւ 2 մանկապարտէզի տնօրէն Մարինէ Ասլանեան, ինչպէս նաեւ մանկավարժներ տարբեր դպրոցներէ եւ ծնողներ:

Մայիս 9-ը նաեւ Անահիտ Ստելմաշովայի ծննդեան օրն էր. շնորհաւորելով անոր ծննդեան օրուան կապակցութեամբ` Կարինէ Թադեւոսեան կեդրոնին կողմէ անոր յանձնեց յուշանուէր եւ ծաղկեփունջ:

Ձեռնարկին աւարտին շնորհաւորական խօսքով հանդէս եկան ԱԵԿ-ի պատասխանատու Կարինէ Թադեւոսեան, Ջաւախքի եւ Ծալկայի ընդհանուր առաջնորդական փոխանորդ Հոգեշնորհ Տէր Մաղաքիա վարդապետ Ամիրեան եւ աշուղ Ալիք Քսպոյեան, որն իր «Ջաւախքի կանչը 5» նոր ձայնասկաւառակը նուիրեց կեդրոնին:

Աւելցնենք նաեւ, որ նախքան ձեռնարկին սկսիլը ԱԵԿ-ը Նինոծմինտայի երիտասարդական կեդրոնի սաներուն համար կազմակերպած էր շրջագայութիւն դէպի Ախալքալաքի գաւառագիտական թանգարան, իսկ Սամցխէ-Ջաւախքի առաջնորդական փոխանորդութեան մէջ հանդիպեցան Հոգեշնորհ Տէր Մաղաքիա վարդապետ Ամիրեանին:

Scroll Up