Հայոց Ցեղասպանութեան Զոհերու Յիշատակը Ոգեկոչող Ձեռնարկ Իտալիոյ Բարի Քաղաքին ՄԷջ

Ապրիլ 24-ին Իտալիոյ Բարի քաղաքի «Պուլիոյ հայկական միութիւն»-ը յարգանքի տուրք  մատուցած է Հայոց ցեղասպանութեան զոհերու յիշատակին: Ձեռնարկը բազմամարդ  եղած է: Ներկայ եղած են տարբեր ազգերու ներկայացուցիչներ` իտալացիներ, հայեր, սուրիացիներ, ռումանացիներ:

Ինչպէս «Հայերն այսօր»-ին կը յայտնեն կազմակերպիչները, ձեռնարկը տեղի ունեցած է Բարի քաղաքի հայկական խորհրդանիշ համարուող Խաչքարին մօտ, որ 2003 թուականին քանդակած է փրոֆէսոր Աշոտ Գրիգորեան` Երեւանի Ալեքսանդր Թամանեանի անուան ճարտարապետութեան ազգային թանգարան-հիմնարկի  հիմնադիր տնօրէնը:

Ձեռնարկին ժամանակ իտալերէն եւ հայերէն աղօթքներ հնչած են եւ ընթերցուած Համօ Սահեանի, Պարոյր Սեւակի բանաստեղծութիւններէն: Կատարուած են Կոմիտասի երգերէն եւ Երեւանի «Երեւան-էրեբունի» օրհներգը:

Ձեռնարկին աւարտին բանաստեղծ Հրանդ Նազարեանցի գրուածքներէն որոշ հատուածներ  ընթերցուած են: Վերջինս գրականութեան Նոբելեան մրցանակի թեկնածու եղած է եւ 1913-1962 թուականներուն ապրած է Բարիի մէջ:

Աւելցնենք, որ «Պուլիոյ հայկական միութիւն»-ը  կը ղեկավարէ բարիահայ գործարար Ռուբէն Թիմուրեան, փոխնախագահն է Լեչչէի մէջ գտնուող Սալենտոյի համալսարանի արաբերէն լեզուի եւ գրականութեան դասախօս Գեղամ Ջ. Բոլոյեան, քարտուղարն է` իտալերէնի ուսուցիչ, Իտալիոյ եւ Հայաստանի քաղաքացիութիւն ունեցող Գարլօ Գոպպոլան:

Միութեան նախագահ Ռուբէն Թիմուրեան

Միութեան կանանց ներկայացուցչութիւնը

 

Scroll Up