Արցախի ԱԳ Նախարարը Հանդիպում Մը Ունեցած Է Ուրուկուէյի Հայկական Կառոյցներու Ներկայացուցիչներուն Հետ

Ուրուկուէյ կատարած աշխատանքային այցի վերջին օրը Արցախի պատուիրակութիւնը հանդիպում մը ունեցած է տեղի հայկական կառոյցներու ղեկավար կազմին հետ:

Ինչպէս «Հայերն այսօր»-ին կը յայտնեն ԱՀ ԱԳՆ մամլոյ ծառայութենէն, հանդիպման մասնակցած է Հայ Առաքելական եկեղեցւոյ Ուրուկուէյի Հայոց թեմի առաջնորդ Տէր Յակոբ Արքեպիսկոպոս Գլնճեան:

Հանդիպման ընթացքին պատուիրակութեան ղեկավար ԱԳ նախարար Մասիս Մայիլեան ներկայացուցած է Արցախի ներքին եւ արտաքին քաղաքականութեան օրակարգը: Կարեւորելով Արցախի եւ սփիւռքի մէջ ապրող հայրենակիցներու հետ բազմակողմանի կապերը` ԱԳ նախարարը յայտնած է Արցախի կառավարութեան պատրաստակամութիւնը` իր մասնակցութիւնը բերելու Ուրուկուէյի մէջ հայկական ինքնութեան պահպանման գործին մէջ:

Պատասխանելով ներկաներու հարցերուն` նախարարն անդրադարձած է Արցախի անվտանգութեան, միջազգային ճանաչման, տնտեսական զարգացման եւ ներդրումային քաղաքականութեան թեմաներուն:

Պատուիրակութեան անդամ, ՀՅԴ Կեդրոնական Կոմիտէի Արցախի ներկայացուցիչ, Արցախի ԱԺ պատգամաւոր Դաւիթ Իշխանեան տեղեկացուցած է 2010 թուականէն Արցախի մէջ իրականացուող «Արի» («Artsakh  Roots Investment») յաջողութեամբ շարունակուող ներդրումային ծրագիրին մասին:

Հանդիպման ներկայ Ուրուկուէյի խորհրդարանի ազգութեամբ հայ պատգամաւորներուն հետաքրքրած են Ուրուկուէյի մէջ աւարտուող Արցախի պատուիրակութեան այցի արդիւնքները, յատկապէս երկրի փոխնախագահ Թոպոլանսկիի նստավայրի գրասենեակին մէջ տեղի ունեցած մօտ մէկ ժամ տեւած հանդիպման:

Նոյն օրը պատուիրակութիւնը հիւրընկալուած է Մոնթեւիտէոյի ՀՅԴ «Վռամեան» ակումբին մէջ: Մասիս Մայիլեան եւ Դաւիթ Իշխանեան ելոյթներ  ունեցած են եւ պատասխանած համայնքի անդամները յուզող հարցերուն:

Scroll Up