Վիեննայի Մէջ Տեղի Ունեցած է Հայոց Ցեղասպանութեան 104-րդ Տարելիցին Նուիրուած Արարողութիւն

Հայոց Ցեղասպանութեան 104-րդ տարելիցի առիթով Ապրիլ 24-ին Վիեննայի կեդրոնին մէջ` Ֆրիտրիխ Շիլլէրի հրապարակին վրայ տեղադրուած աւստրիացի գրող եւ մեծ հայասէր Ֆրանց Վերֆելի յուշարձանին մօտ, տեղի ունեցաւ Հայոց Ցեղասպանութեան զոհերու յիշատակին նուիրուած արարողութիւն:

Ինչպէս կը յայտնեն ՀՀ ԱԳՆ լրատուութեան վարչութենէն, ձեռնարկին ներկայ եղած են Աւստրիոյ մէջ ՀՀ դեսպան Արմէն Պապիկեան, դեսպանութեան աշխատակազմը, Աւստրիոյ Հայ առաքելական եկեղեցւոյ եւ Մխիթարեան միաբանութեան հոգեւոր հայրերը, Աւստրիոյ հայկական կազմակերպութիւններու, հայ համայնքի ներկայացուցիչներ, Աւստրիոյ Ազգային խորհուրդի պատգամաւոր, Աւստրիա-Հայաստան խորհրդարանական բարեկամութեան խումբի ղեկավար Կուտրուն Քուգլեր:

Համատեղ աղօթքէն ետք, ելոյթներ ունեցան դեսպան Արմէն Պապիկեան, Աւստրիոյ Հայ առաքելական եկեղեցական համայնքի ատենապետ Վահագն Ամիրջանեան եւ տիկն․ Գուտրուն Քուգլեր:

Դեսպան Պապիկեան իր ելոյթին մէջ անդրադարձաւ առաջադէմ երկիրներու եւ միջազգային հանրութեան կողմէ Հայոց Ցեղասպանութեան ճանաչման կարեւորութեան: Ան նաեւ ընդգծեց ժխտողականութեան անընդունելիութիւնը, յատկապէս ցեղասպանութիւններու կանխարգիլման եւ ապագային անոնց կրկնութիւնը բացառելու համար։

Ձեռնարկին երաժշտական եւ ասմունքային կատարումներով հանդէս եկան Աւստրիոյ Հայ մարմնակրթական ընդհանուր միութեան եւ «Յովհաննէս Շիրազ» հայկական դպրոցի սաները:

Արարողութեան աւարտին տեղի ունեցաւ ծաղկեպսակներու եւ ծաղիկներու զետեղում Ֆրանց Վերֆելի յուշարձանին մօտ:

Scroll Up