Արցախի Մէջ Հայոց Ցեղասպանութեան Զոհերու Յիշատակին Նուիրուած Ձեռնարկներ Կ՛իրականացուին

Հայոց ցեղասպանութեան զոհերու յիշատակին նուիրուած ապրիլ 23-ին, ժամը` 20:00-ին, Ստեփանակերտի մէջ տեղի կ՛ունենայ ջահերթ, որ կը մեկնարկէ Սուրբ Յակոբ եկեղեցւոյ բակէն եւ կ՛ուղղուի դէպի Ստեփանակերտի յուշահամալիր:

Այս մասին «Արցախփրես»-ին տեղեկացուցին ՀՅԴ Արցախի երիտասարդական միութենէն` մանրամասնելով, որ ջահերթը կը կազմակերպուի ՀՅԴ Արցախի երիտասարդական ու Արամ Մանուկեան ուսանողական միութիւններու նախաձեռնութեամբ:

Իսկ ապրիլ 24-ին, ժամը` 12:00-ին, Շուշիի «Նարեկացի» արուեստի միութեան մէջ տեղի պիտի ունենայ «Ոգեկոչում արուեստի շունչով» ամէնամեայ ձեռնարկը, որ նուիրուած է Հայոց ցեղասպանութեան անմեղ զոհերու յիշատակին:

Մեզի հետ զրոյցին Շուշիի «Նարեկացի» արուեստի միութեան տնօրէն Մարիամ Անդրէասեան ըսած է, որ ձեռնարկին ընթացքին պիտի հնչեն հակառակորդի դեմ  կռուած  ու  պայքարած  ֆիտայիներու մասին հիւսուած երգեր ու պատմութիւններ:

«Ձեռնարկին հանդէս կու գայ «Տնջրէ» աւանդական երգի ու պարի խումբը: 2003 թուականէն ի վեր ամէն տարի` ապրիլ 24-ին, «Նարեկացի» արուեստի միութիւնն իր արուեստագէտ բարեկամներունհետ կը նշէ յիշատակի եւ ոգեկոչման համահայկական օրը`  կոչ ընելով  աշխարհին յարգելու Հայոց ցեղասպանութեան զոհերու յիշատակը, հայ ազգի  վերածնունդը եւ ատոր ճանաչման միջոցով այլեւս թոյլ չտալու նոր ցեղասպանութիւններու  կրկնումը»,-  նշած է Մ. Անդրէասեան` տեղեկացնելով, որ մուտքն ազատ է բոլոր ցանկացողներուն համար:

Նշենք, որ Հայոց Ցեղասպանութեան զոհերու յիշատակին նուիրուած ձեռնարկներ կը կազմակերպուին Արցախի բոլոր շրջաններուն մէջ:

Scroll Up