Կոմիտասի 150-ամեակին Եւ Հայոց Ցեղասպանութեան 104-րդ Տարելիցին Նուիրուած Հայկական Մշակութային Շաբաթ` Պալթեան Երկիրներուն Մէջ

Ապրիլ 20-ին Լիթուանիոյ Իկնալինայի շրջանի «Փալիեսիաուս տուարա» պատմական համալիրին մէջ տեղի ունեցաւ մշակութային ձեռնարկ` նուիրուած Կոմիտասի 150-ամեակին, որ ՀՀ մշակոյթի նախարարութեան աջակցութեամբ նախաձեռնած եւ կազմակերպած էր Լիթուանիոյ մէջ ՀՀ դեսպանութիւնը:

Ինչպէս «Հայերն այսօր»-ին կը յայտնեն ԱԳՆ մամլոյ ծառայութենէն, ձեռնարկին ողջոյնի խօսքով հանդէս եկաւ Լիթուանիոյ մէջ ՀՀ դեսպան Տիգրան Մկրտչեան, որ, շնորհակալութիւն յայտնելով համալիրի ղեկավարութեան ձեռնարկը հիւրընկալելու համար, նշեց, թէ այս համերգով Պալթեան երկիրներուն մէջ կը սկսի հայկական մշակութային շաբաթը` նուիրուած Կոմիտասի 150-ամեակին եւ Հայոց ցեղասպանութեան զոհերու յիշատակի 104-րդ տարելիցին:

Հանդիսութեան դաշնամուրային կատարումներով հանդէս եկաւ Երեւանի Կոմիտասի անուան պետական երաժշտանոցի փրոֆէսոր, Արամ Խաչատրեանի տուն-թանգարանի տնօրէն Արմինէ Գրիգորեան` կատարելով Կոմիտասի, Արամ Խաչատրեանի, Ալան Յովհաննէսի եւ այլոց ստեղծագործութիւնները:

Համերգային ծրագիրի երկրորդ հատուածին մէջ Արմինէ Գրիգորեան եւ Լատվիոյ երգահաններու միութեան անդամ, Լատվիոյ մէջ վաստակաւոր արուեստագէտ Րաֆֆի Խարաջանեան դաշնամուրային զուգերգով կատարեցին հայ եւ լիտվացի ականաւոր երգահաններու գործերը, որոնք բարձր գնահատականի արժանացան հանդիսատեսին կողմէ:

Ձեռնարկին  աւարտին տեղի ունեցաւ հայկական գինիներու ներկայացման եւ համտեսման արարողութիւն:

Scroll Up