Արարատ Միրզոյեանի Գլխաւորած Պատուիրակութիւնը Հանդիպած Է Սան Փեթերսպուրկի Հայ Համայնքի Ներկայացուցիչներուն Հետ

Աշխատանքային այցով Սան Փեթերսպուրկ գտնուող ՀՀ Ազգային ժողովի նախագահ Արարատ Միրզոյեանի գլխաւորած պատուիրակութիւնն ապրիլ 19-ին այցելած է Սան Փեթերսպուրկի Սբ. Կատարինէ եկեղեցի, այնուհետեւ շրջայց կատարած հայկական կիրակնօրեայ դպրոցին մէջ եւ ջերմ հանդիպում ունեցած համայնքի ներկայացուցիչներուն հետ:

Ինչպէս «Հայերն այսօր»-ին կը յայտնեն ՀՀ ԱԺ լրատուութեան եւ հանրութեան հետ կապերու վարչութենէն,Արարատ Միրզոյեան համայնքին ներկայացուցած է թաւշեայ յեղափոխութեան սկզբունքներն ու արժէքները, որոնց հաւատարիմ է իշխանութեան եկած քաղաքական ուժը, երկրի առաջնահերթութիւնները, կիսուած առկայ խնդիրներով: Անդրադառնալով Սփիւռքի հետ յարաբերութիւններուն` Արարատ Միրզոյեան նշած է, որ այդ յարաբերութիւնները չափազանց կարեւոր են իրենց համար եւ տարիներ ի վեր Սփիւռքին միայն օգնութեան հասնող ձեռք դիտարկելու դիրքորոշումը պէտք է փոխարինուի հաւասար համագործակցութեան մօտեցմամբ:

Ազգային ժողովի նախագահն ու պատուիրակութեան անդամները պատասխանած են համայնքի ներկայացուցիչներու` կրթութեան, առողջապահութեան, տնտեսութեան, դատական համակարգին, արտաքին քաղաքականութեան ու հասարակական կեանքի այլ ոլորտներուն վերաբերող ամենատարբեր հարցերուն:

Յաջորդ օրը խորհրդարանի ղեկավարի գլխաւորած պատուիրակութիւնը ծաղիկներ  խոնարհած է Կոմիտասի յուշարձանին եւ շրջայց կատարած Սան Փեթերսպուրկի Գլխաւոր հիւպատոսութեան մէջ:

Պատուիրակութեան կազմին  եղած են Ազգային ժողովի արտաքին յարաբերութիւններու մշտական յանձնաժողովի նախագահ Ռուբէն Ռուբինեան, պետական-իրաւական հարցերու մշտական յանձնաժողովի նախագահ Վլատիմիր Վարդանեան, տարածքային կառավարման, տեղական ինքնակառավարման, գիւղատնտեսութեան եւ բնապահպանութեան հարցերու մշտական յանձնաժողովի նախագահ Վարազդատ Կարապետեան, Ազգային ժողովի պատգամաւորներ Գոռ Գէորգեան եւ Անոյշ Բեղլոյեան:

Scroll Up