Համահայկական 7-րդ Ամառնային Խաղերը Տեղի Պիտի Ունենան Արցախի Մէջ

Արցախի Հանրապետութեան պետական նախարար Գրիգորի Մարտիրոսեան ապրիլ 17-ին ընդունած է Համահայկական խաղերու համաշխարհային կոմիտէի նախագահ Իշխան Զաքարեանի գլխաւորած պատուիրակութիւնը, որուն կազմին մէջ էին ՀԽՀԿ գործադիր կոմիտէի անդամներ, եւ Համահայկական խաղերու կազմակերպման ու իրականացման աշխատանքները համակարգող պատասխանատուներ:

Ինչպէս այս մասին կը յայտնեն ԱՀ պետական նախարարի աշխատակազմի տեղեկատուութեան եւ հասարակայնութեան հետ կապերու բաժինէն, պետական նախարարը ողջունած է Համահայկական խաղերու գործադիր կոմիտէի որոշումը օգոստոս 5-8 Արցախի մէջ Համահայկական 7-րդ ամառնային խաղերը իրականացնելու համար` նշելով որ այն առաջին անգամ կը կազմակերպուի: «Այս որոշումը լաւ առիթ է եւս մէկ անգամ աննախադէպ ձեռնարկով համալրելու Արցախի Հանրապետութեան մարզական կեանքը, որ լաւ խթան պիտի ըլլայ հանրապետութան մէջ ինչպէս մարմնամարզութեան զարգացման, այնպէս ալ զբօսաշրջային գրաւչութիւնը աշխարհին ներկայացնելու համար»,- իր խօսքին մէջ ըսած է Գ. Մարտիրոսեան:

Շնորհակալութիւն յայտնելով ջերմ ընդունելութեան համար` ՀԽՀԿ նախագահ Իշխան Զաքարեան նշած է, որ աշխատանքային խումբին մէջ հանդիպման ընդգրկուած են մարզական եւ գեղարուեստական ուղղութիւններու պատասխանատուները: «Կը նախատեսուի 17 մարզաձեւէ 11-ը անցնել Արցախի մէջ: Ուստի մեր այցին նպատակն է, որպէսզի քննարկենք այն տեխնիկական հարցերը, որոնք կապուած են մարզադահլիճներու կահաւորման եւ մրցաշարերու պատշաճ մակարդակով կազմակերպման վերաբերող բոլոր հարցերը»,- ըսած է Ի. Զաքարեան:

Հանդիպման ընթացքին ծրագիրներու վերաբերեալ մանրամասն զեկուցմամբ հանդէս  եկած են ձեռնարկի գլխաւոր մրցավարն ու գլխաւոր համակարգողը:

Խօսելով ձեռնարկի գեղարուեստական ուղղութեան մասին` գլխաւոր բեմադրիչ Ռուբէն Յովհաննիսեան նշած է, որ բացման օրը` օգոստոս 6-ին, Ստեփանակերտի Ստեփան Շահումեանի անուան մարզադաշտին մէջ  նախատեսուած է 8 մասէ եւ 42 տեսարանէ կազմուած ձեռնարկ: Պիտի ըլլայ եռաչափ լազերային շոու, որ պիտի տեւէ չորս ժամ, եւ ատոր միջոցով պիտի ներկայացուի պատմական Հայաստանէն մինչեւ մեր օրերը ինկած կարեւոր դրուագներ:

Հանդիպման աւարտին պետական նախարարը համապատասխան յանձնարարականներ  տուած է շահագրգիռ բոլոր կողմերու ներկայացուցիչներուն, նշած, որ կառավարութիւնը պիտի գործադրէ բոլոր ջանքերը ձեռնարկը Արցախի մէջ յաւուր պատշաճի կազմակերպելու համար:

Հանդիպման ներկայ էին ԱՀ մշակոյթի, երիտասարդութեան հարցերու եւ զբօսաշրջութեան նախարար Լեռնիկ Յովհաննիսեան, ԱՀ կրթութեան, գիտութեան եւ մարմնակրթութեան նախարար Նարինէ Աղաբելեան, ԱՀ քաղաքաշինութեան նախարար Կարէն Շահրամանեան, Ստեփանակերտի քաղաքապետ Սուրէն Գրիգորեան եւ այլ պատասխանատու պաշտօնատար անձիք:

Scroll Up