«ԱՐԱՄ» ընկերակցութիւնը Ներքին գործոց նախարարէն կը պահանջէ լուծել թրքական «COJEP France» ընկերակցութիւնը

Նոր Յառաջ- Մարսիլիոյ մէջ գործող հայկական յուշագրութեան հետազօտութեան եւ տոմարագրութեան «ԱՐԱՄ» ընկերակցութիւնը իր նախագահ Ժագ Ուլուսեանի ստորագրութիւնը կրող խնդրագիր մը յղած է Ֆրանսայի Ներքին գործոց նախարար Քրիսթոֆ Քասթանէրին, անկէ պահանջելով լուծել Ֆրանսայի մէջ գործող թրքական « COJEP France » ընկերակցութիւնը։
Դիմումին մէջ կը բացատրուի, թէ Ապրիլ 24-ը Ֆրանսայի մէջ Հայոց ցեղասպանութեան ոգեկոչման ազգային օր հռչակող հրամանագրին՝ նախագահ Մաքրոնի կողմէ Ապրիլ 10-ին ստորագրումէն ետք Հայոց ցեղասպանութիւնը ժխտող բազմաթիւ ձայներ բարձրացած են ամէն կողմէ, բայց ամենէն անընդունելին Ֆրանսայի հողին վրայ գործող թրքական « COJEP Fance » ընկերակցութեան պարագան է, որ իր նախագահ՝ Քատիր Կիւզլէի միջոցաւ դատապարտած է նախագահ Մաքրոնի նշեալ քայլը, Հայոց ցեղասպանութիւնը որակելով «ենթադրեալ»։
«ԱՐԱՄ», այս կեցուածքը համարելով Ֆրանսայի հողին վրայ՝ Հայոց ցեղասպանութեան ժխտումի բացայայտ արտայայտութիւն, որ ատելութիւն կը սերմանէ, ինչպէս նաեւ կը վիրաւորէ Ցեղասպանութեան զոհերու շառաւիղները, Ֆրանսայի պատկան մարմիններէն կը պահանջէ լուծել խնդրոյ առարկայ թրքական ընկերակցութիւնը։
Scroll Up