Յովհաննէս Թումանեանի 150-ամեակին Նուիրուած Ձեռնարկ Իրաքի ՀՀ Դեսպանութեան ՄԷջ

Ապրիլ 11-ին Իրաքի մէջ ՀՀ դեսպանութենէն ներս տեղի ունեցաւ Յովհաննէս Թումանեանի 150-ամեակին նուիրուած ձեռնարկ, որուն ծիրէն ներս դեսպանութիւնը հիւրընկալած էր Պաղտատի հայ համայնքի` տարբեր կրթահամալիրներ յաճախող 11-15 տարեկան շուրջ 30 բարձր դասարաններու աշակերտներն ու ուսուցիչները:

Ինչպէս «Հայերն այսօր»-ին կը յայտնեն ԱԳՆ մամլոյ ծառայութենէն, յոբելենական  ձեռնարկին ընթացքին իրաքահայ դպրոցականները հանդէս եկան տօնական երգուպարով, թումանեանական արտասանութեամբ, թատերական ներկայացումներով եւ պարգեւատրուեցան նուէրներով, պատուոգիրներով եւ շնորհակալագիրներով: Իրաքի մէջ ՀՀ դեսպան Հրաչեայ Փոլադեան ներկաներուն ուղղուած իր խօսքին մէջ ընդգծեց նման ձեռնարկներու կարեւորութիւնը, որ կը նպաստէ Մայր Հայրենիքի հետ կապի ամրապնդման:

Տօնական ձեռնարկին ընթացքին Պաղտատի Հայոց Ազգային երկսեռ վարժարանի սան Մինաս Սերայտարեանին յանձնուեցաւ ՀՀ կրթութեան եւ գիտութեան նախարար Արայիկ Յարութիւնեանի կողմէ` 2018թ. Երեւանի մէջ կայացած նկարչական մրցոյքին յաղթողի վկայականը:

Ձեռնարկին ներկայ էին Պաղտատի Սբ. Գր. Լուսաւորիչ եկեղեցւոյ հոգեւոր հովիւ Տ. Գաբրիէլ վարդապետ Սարգսեան, ինչպէս նաեւ` Իրաքի Հայ ազգային կեդրոնական վարչութեան անդամներ, հայ համայնքի ներկայացուցիչներ:

Scroll Up