«Ապրելով Հայրենիքի Մէջ` Կը Զգաս Իրական Արժէքդ». Հայրենադարձ Սուրիահայ

Սուրիահայ 18-ամեայ Վարգիս Կերճիկեան, որ ընտանիքի հետ 2014 թուականին  Հայաստան տեղափոխուած է, կ՛ուսանի Երեւանի պետական համալսարանի միջազգային յարաբերութիւններու բաժանմուքնին մէջ, միաժամանակ կ՛աշխատի առեւտրային գրասենեակի մէջ: Հայրենիք վերադառնալու դրդապատճառներէն եղած է նաեւ Սուրիոյ մէջ պատերազմի ահագնացումը: Վարգիսի նախնիները Վանէն գաղթած են Քեսապ, Լաթաքիա, ինչպէս նաեւ Արաբական աշխարհի տարբեր երկիրներ` հիմնականին մէջ զբաղուելով առեւտուրով  եւ հողագործութեամբ:

«Մինչեւ հայրենադարձուիլս չէի այցելած Հայաստան: Բարդ է պատասխանել, արդեօք հեշտ յարմարեցայ այստեղի կեանքին, քանի որ հեռուէն Հայաստանի մէջ ամէն ինչ անթերի կը թուի: Բայց երբ կու գաս ու աստիճանաբար կ՛ընտելանաս այստեղի կեանքին, արդէն կամաց-կամաց կը հասկնաս յետագայ քայլերդ»,-«Հայերն այսօր»-ի հետ զրոյցին ըսաւ Վարգիսը:

Վարգիս կը յիշէ, որ Հայաստան գալու օրը շատ ուրախ եղած է, օդակայանէն դուրս գալուն նոյնիսկ աչքերն արցունքոտած են: Թէեւ լուսանկարներով հասցուցած էր ամէն ինչ ուսումնասիրելու, սակայն իրականութեան մէջ անբացատրելի զգացողութիւններով  պատուած է` սեփական աչքերով տեսնելով այդ ամէնը:

«Ապրելով Հայրենիքի մէջ` կը զգաս իրական արժէքդ: Հայրենիքն ինձ գրկաբաց  ընդունած է, ճիշդ է, դժուարութիւններու բախուած եմ, սակայն չեմ վհատած, իմ մէջ ուժ գտնելով` առաջ ընթացած եմ: Յատկապէս լեզուական` արեւելահայերէնի եւ արեւմտահայերէնի տարբերութիւնները դժուար եղած են յաղթահարել: Յաճախ մարդոց հետ հաղորդակցուելուս` իրար չենք հասկցած: Անխոչընդոտ չէ անցած նաեւ աշխատանք գտնելու ընթացքը»,-նշեց Վարգիսը:

Խօսելով Հայաստանի ապագայի մասին` Վարգիս յոյս յայտնեց, որ ժամանակի ընթացքին ամէն ինչ լաւ կ՛ըլլայ, մեր երկիրը յառաջընթաց պիտի ունենայ, իսկ հայ ժողովուրդն պիտի ապրի աւելի  բարեկեցիկ կեանքով:

Հրանոյշ Կարապետեան, Մերի Բրսոյեան

ԵՊՀ միջազգային յարաբերութիւններու բաժանմունքի  4-րդ կարգի ուսանողուհիներ

Scroll Up