Տեսակապով Ասուլիս Եւրոպայի Հայկական Լրատուամիջոցներու ներկայացուցիչներուն Հետ

Մարտի 21–ին սփիւռքի նախարարի պարտականութիւնները կատարող Բաբգէն Տէ ր Գրիգորեան տեսակապով հանդիպում ունեցաւ Եւրոպայի հայկական լրատուամիջոցներու ներկայացուցիչներուն հետ:

Հանդիպման կը մասնակցէին Հունգարիոյ «Արմենիա» ամսագրի խմբագիր Սօսի Սուսանին, Աթէնքի «Հայ կեանք» պարբերաթերթի գլխաւոր խմբագիր Տիգրան Աբասեան,  Աթէնքի Հայ-յունական ուսումնասիրութիւններու կեդրոնի քարտուղար, «Թեթրադիա» յունարէն հայկական ամսագրի հրատարակիչ Յովսէփ Քասեսեան, Յունաստանի «Նոր աշխարհ» շաբաթաթերթի խմբագիր Զաւէն Գրիգորեան, «Հայաստան» մշակոյթի կեդրոնի «Հայաստան» շաբաթաթերթի հիմնադիր Մինաս Յովհաննիսեան, Լաթվիոյ «Հաւատք» հայկական միութեան խորհուրդի «Հաւատք» ամսագրի գլխաւոր խմբագիր Սպարտակ Տէր–Աւետիսեան, Կիպրոսի հայկական ռատիօժամի խօսնակ Նայիրի Մուրատեան, Չեխիոյ «Օրեր» ամսագրի գլխաւոր խմբագիր Յակոբ Ասատրեան եւ կայքի գլխաւոր խմբագիր Աննա Կարապետեան, Պուլկարիոյ «Երեւան» շաբաթաթերթի գլխաւոր խմբագիր Վարդանուշ Թոփաքպաշեան, ՍԴՀԿ Յունաստանի ներկայացուցիչ Մհեր Քոսակեան, Ֆրանսայի «Հայկական նորութիւններ» լրատուական կայքի փոխխմբագիր Գրիգոր Ամիրզայեան, Ֆրանսայի «Նոր Յառաջ» օրաթերթի գլխաւոր խմբագիր Ժիրայր Չօլաքեան, Վատիկանի ռատիոյի հայկական մասի տնօրէն Ռոպերթ Աթթարեան, Հոլանտայի «Նիտերլանտական օրագիր» լրատուական կայքի գլխաւոր խմբագիր Աշոտ Կնեազեան,  Պելճիգայի «Լրագիր» թերթի գլխաւոր խմբագիր Գէորգ Մինասեան,  Փարիզի  «InfoArmenie» հեռուստատեսային կայքի խմբագիր Նարէ Թադեւոսեան, «Ռատիօ Արմէնի» լրատուամիջոցի վարչութեան ներկայացուցիչ  Հիլտա Չոպոյեան, «Եւրոպայի հայերու համագումար»-ի նախագահ, կառոյցի տեղեկատուական կայքի խմբագիր Կարօ Յակոբեան, Սպանիոյ «Լոս Արմէնիոս» կայքի պատասխանատու, Քաթալոնիոյ «Արարատ» միութեան փոխնախագահ Սարգիս Յակոբեան:

Ողջունելով Եւրոպայի մէջ գործող հայկական լրատուամիջոցներու ներկայացուցիչները` Բաբգէն Տէր Գրիգորեան համառօտ ներկայացուց նախարարութեան յետագայ կարգավիճակը, անդրադարձաւ Սփիւռքի գործերու յատուկ յանձնակատարին եւ անոր գրասենեակի ապագայ գործունէութեան, կարեւորեց գրասենեակի եւ սփիւռքի լրատուամիջոցներու միջեւ համագործակցութեան շարունակականութիւնն ու արդիւնաւէտ աշխատանքը:

Սփիւռքի նախարարի պաշտօնակատարը նշեց,  որ «Կառավարութեան կառուցուածքի եւ գործունէութեան մասին» Հայաստանի Հանրապետութեան օրէնքին մէջ փոփոխութիւններ եւ լրացումներ կատարելու մասին» օրէնքի նախագծով` սփիւռքի նախարարութիւնը միացման ձեւով կը վերակազմակերպուի` վարչապետի աշխատակազմին մէջ ստեղծելով Սփիւռքի գործերու գլխաւոր յանձնակատարի գրասենեակ:

«Գրասենեակը հիմնականին մէջ պիտի աշխատի 4 ուղղութեամբ` հայրենադարձութիւն եւ ընդելուզում, հայապահպանութիւն եւ համայնքներուն աջակցութիւն, համահայկական օրակարգի ձեւաւորում եւ սփիւռքի ներուժի նպատակային օգտագործում Հայաստանի զարգացման գործին մէջ: Գրասենեակը պիտի համակարգէ միւս 12 նախարարութիւններու սփիւռքի հետ տարուող աշխատանքը, պիտի մշակենք հայապահպանութեան համապարփակ ռազմավարութիւն:  Սփիւռքի գործերու յատուկ յանձնակատարի պաշտօնը եզակի պաշտօն պիտի ըլլայ: Գրասենեակն առաջին անգամ պատմութեան մէջ պիտի դառնայ կամուրջ Հայաստանի եւ համայնքներու միջեւ: Այս փոփոխութիւնները կատարուած են հաշուի առնելով նաեւ սփիւռքի նախարարութեան բացթողումները, թերութիւնները: Փորձ եղած է ձեւաւորել կառավարման գործիք: Բովանդակային առումով` օրակարգը մենք պիտի չթելադրենք, այն պիտի ձեւաւորուի քննարկումներու միջոցով: Պիտի պահպանեն նախարարութեան դրական փորձը: Նոր ձեւաւորուող գրասենեակի հիմնական գործառոյթը  սփիւռքի հետ աշխատանքի ռազմավարութեան մշակումն է, ի հարկէ, քննարկելով սփիւռքի ներկայացուցիչներու, փորձագէտներու, մասնագէտներու հետ», – նշեց Տէր Գրիգորեան եւ աւելցուց, որ գրասենեակի հայեցակարգը մշակման փուլի մէջ է, եւ հէնց հայեցակարգէն ալ կը բխին կառոյցի ռազմավարութիւնն ու օրէնսդրական բարեփոխումներու նախաձեռնութիւնները:

Լրագրողներու այն մտահոգութեան, որ սփիւռքահայերու մեծամասնութիւնը կազմակերպուած համայնքային կեանքին չի մասնակցիր, ընդգրկուած չէ կառոյցներու մէջ, Բաբգէն Տէր Գրիգորեան պատասխանեց, որ գրասենեակը նպատակ ունի եւ պատրաստ է աշխատելու բոլորին հետ հաւասար ու աւելցուց. «Սփիւռքը բազմազան եւ բազմաշերտ է, այն համաշխարհային ցանց է, որ բաղկացած է կազմակերպութիւններէ եւ անհատներէ, որոնք պէտք է թիրախաւորուին եւ անոնց հետ աշխատինք: Սփիւռքի ներուժը ներկայացուած է նաեւ անհատներով, որոնք պիտի ըլլան մեր գործունէութեան տիրոյթին մէջ: Սփիւռքի հետ աշխատանքին մէջ մենք կարեւոր կը համարենք արդիւնաւէտ համագործակցութիւնը, բայց ոչ միջամտութիւնը: Յանձնակատարի գործառոյթներէն մէկն ալ մօտէն ծանօթանալն է համայնքէն ներս առկայ խնդիրներուն ու փորձել աջակցիլ ատոնց լուծման: Եւ աւարտին կ՛ուզեմ շեշտել, որ գրասենեակը պիտի շարունակէ  մնալ սփիւռքահայուն տունը Հայաստանի մէջ, եւ կայ հասցէ, որ պիտի պահպանուի: Յոյս ունիմ, որ ձեզ կը տեսնենք արդէն գրասենեակին մէջ»:

Scroll Up