Բաբգէն Տէր Գրիգորեան Հիւրընկալուած է «Sputnik Արմենիա»-ի Մէջ. տեսանիւթ

Հայաստան-սփիւռք համագործակցութեան մակարդակը բարձրացնելու նպատակով նոր տրամաբանութիւն կը դրուի յարաբերութիւններու մէջ: ««Հայերն այսօր»-ի փոխանցմամբ, այս մասին Sputnik Արմենիայի եթերով ըսած է սփիւռքի նախարարի պարտականութիւնները կատարող Բաբգէն Տէր Գրիգորեանը:

«Գլխաւոր յանձնակատարը եզակի պաշտօն է, մեր երկրին մէջ չըլլար ատոր նման երկրորդ մը, եւ ան ուղղակիօրէն պիտի աշխատի վարչապետի աշխատակազմին մէջ, վարչապետին անունով եւ վարչապետին կողմէ լիազօրուած, պիտի աշխատի ուղղակիօրէն համայնքներուն մէջ: Մենք այստեղ առաջին անգամ առաջ կը տանինք, որ Հայաստանը պատրաստ է աջակցելու սփիւռքին եւ ոչ թէ ակնկալել միայն օգնութիւն: Մենք պիտի աջակցինք համայնքներուն տարբեր հարցերով»,- ըսած է սփիւռքի նախարարի պաշտօնակատարը: Ըստ Տէր Գրիգորեանի` օգնութիւնը սփիւռքի հետ պիտի ըլլայ փոխադարձ, պիտի դիտարկուի որպէս հաւասար գործընկերութիւն, եւ բացի ֆինանսականէն շեշտը պիտի դրուի աւելի շատ մարդկային ներուժի վրայ:

«Անով նոր հիմնարկ կ՛առաջարկենք եւ կը ստեղծենք, որ հիմնականին մէջ կ’աշխատի 4 ուղղութիւններով. հայրենադարձութիւն եւ ընդելուզում, հայապահպանում եւ համայնքներու աջակցութիւն, համահայկական օրակարգի ձեւաւորում եւ սփիւռքի ներուժի ներգրաւում երկրի զարգացման համար: Գրասենեակը պիտի տարբերի նախարարութէնէն այնքանով, որ այլեւս հանդէս չի գար որպէս ծրագիր իրականացնող: Ատոր փոխարէն ծրագիրները պիտի իրականացնեն բոլոր 12 նախարարութիւնները եւ այլ գերատեսչութիւններ: Եւ այս գրասենեակը համարգող մարմինը պիտի ըլլայ այդ գերատեսչութիւններուն միջեւ»,- ըսած է Տէր Գրիգորեան:

Սփիւռքի նախարարի պաշտօնակատարի խօսքով` սփիւռքի նախարարութիւնը պիտի միաւորուի վարչապետի աշխատակազմին, ուր պիտի հիմնուի սփիւռքի գործերու գլխաւոր յանձնակատարի գրասենեակ: Միեւնոյն ժամանակ վարչապետի աշխատակազմին մէջ պիտի ստեղծուի սփիւռքի գործերու գլխաւոր յանձնակատարի հայեցողական պաշտօն, որ կ’իրականացնէ վարչապետի` սփիւռքի հետ կապուած քաղաքականութեան ապահովման եւ սփիւռքի հետ տարուող աշխատանքներու միասնականութեան ապահովման լիազօրութիւններու իրականացման աշխատանքներու կազմակերպումը:

Scroll Up