Եւրոպական Միութիւնը 12.5 Միլիոն Եուրօ Տրամադրեց ԹՈՒՄՕ-ին

«Եւրոպական Միութեան ԹՈՒՄՕ ճարտարագիտական եւ կիրառական գիտութիւններու համալիր» հիմնելու նպատակով, Եւրոպական Միութիւնը 12.5 միլիոն եուրօ դրամաշնորհ յատկացուց ԹՈՒՄՕ-ին: Համալիրը պիտի ըլլայ հետազօտութիւններու, կրթութեան եւ «սթարթափ»ներու հանգոյց, որ իր շուրջ  պիտի հաւաքէ տեղական եւ միջազգային գործընկերներ՝ Հայաստանի մէջ բարձրագոյն կրթութեան եւ արդիւնաբերութեան միջեւ բացը լրացնող կամուրջ ստեղծելու համար։ Այս մասին կը հաղորդէ “Արմենփրես”-ը:

Սոյն նախագիծին մեկնարկը տրուեցաւ Երեքշաբթի, 19 Մարտին, ԹՈՒՄՕ-ի կեդրոնին մէջ:

Եւրոպական Միութեան (ԵՄ) պատուիրակութեան ղեկավար, դեսպան Փիոթր Սուիթալսքի շեշտեց, որ այս նախաձեռնութեան միջոցաւ կը փորձեն ամրապնդել կապը արդիւնաբերութեան եւ գիտութեան միջեւ:

«Տասը օր առաջ Հայաստանի վարչապետ Նիկոլ Փաշինեան շատ յաջող այցելութիւն մը ունեցաւ Պրիւքսէլ, ուր ան հանդիպեցաւ Եւրոպական Միութեան ղեկավարներու հետ: Ես այստեղ եկած եմ, որպէսզի իրականութիւն դարձնենք այն բոլոր համաձայնութիւնները, որոնք ձեռք բերուեցան Պրիւքսէլի մէջ եւ դրամաշնորհ կը տրամադրենք այդ նպատակով», նշեց Եւրոպական յանձնաժողովի Հարեւանութեան եւ ընդլայնման բանակցութիւններու գլխաւոր տնօրէնութեան Արեւելեան հարեւանութեան հարցերու տնօրէն Լորենս Մերետիթ:

Ան շեշտեց, որ Մարտ 18-ին միջազգային հանրութեան հեղինակաւոր ներկայացուցիչներու հետ այցելեց  ԹՈՒՄՕ եւ քննարկեց բազմաթիւ հարցեր:

ԹՈՒՄՕ-ի զարգացման գծով տնօրէն Բեկոր Փափազեան ներկայացուց նախագիծը, որուն հետեւեցաւ համագործակցութեան մասին համաձայնագիրի խորհրդանշական ստորագրութիւնը:

«Շատ ոգեւորուած ենք, որ Հայաստանի մէջ պիտի ստեղծենք համաշխարհային կարգի STEM էկոհամակարգ (բնապահպանական համակարգ-Խմբ.), ուր բարձր արհեստագիտութիւններու (ճարտարարուեստներու-Խմբ.) ոլորտի մասնագէտներու յաջորդ սերունդը կրնայ սորվիլ եւ նորարարութեամբ զբաղիլ», ըսաւ Փափազեան:

Scroll Up