Հալէպի Հայ Ծերանոցի Մեծ Ընտանիքը Մեծ Շուքով Տօնեց Մայրերու Տօնը

PERIO NEWS- Չորեքշաբթի, 13 Մարտ 2019-ի, յետմիջօրէի ժամը 3:00-ին, Հայ Ծերանոցի (Հանգստեան Տուն) Մեծ Ընտանիքը համախմուած էր Ս. Երրորդութիւն եկեղեցւոյ Աղաճանեան սրահը, ուր տեղի ունեցաւ Հայ Ծերանոցի Մայրերու Օրուան տօնականտարութիւնը:

Ձեռնարկը կազմակերպած էր Հայ Ծերանոցի Տիկնանց օժանդակ յանձնախումբը: Ներկայ էին քաղաքի երէք յարանուանութիւններու եկեղեցական, բարեսիրական, ընկերային ծառայութիւններու, ինչպէս նաեւ հայկական զանազան մշակութային, հայրենակցական, մարզական եւ այլ Տիկնանցներու եւ միութիւններու ներկայացուցիչները եւ մարդասէր նուիրեալնեալներ:
Բացման խօսքով հանդէս եկաւ Հայ Ծերանոցի Տիկնանց օժանդակ յանձնախումբի ատենապետուհի տիկ. Մարալ Ժամկոչեան-Ազարիկեանը:
Տիկ. Ազարիկեան, ներկաներուն բարի գալուստ մաղթելէ ետք օրուան Խորհուրդին մասին գեղեցիկ ակնարկութիւններ կատարեց, ապա ներկաներուն շնորհակալութիւն յայտնեց իրենց ներկայութեան համար:
Բացման խօսքէն ետք Պատուելի Սիմոն Տէր Սահակեան աղօթքով օրհնեց սեղանները եւ սեղանակիցներուն:
Այնուհետեւ, սրտի խօսքով հանդէս եկաւ Հայ Ծերանոցի Խնամակալութեան Ատենապետ Արժանապատիւ Տէր Զարեհ քահանայ Շաքարեանը: Տէր հայրը հանգամանօրէն ներկայացուց Հայ Ծերանոցի աւանդութիւն դարձած Մայրերու Օրուան տօնականտարութեան գաղափարը: Ան շնորհակալական ջերմ խօսքեր ուղղեց Հալէպի մէջ գործող բոլոր ազգանուէր միութիւններուն եւ անձերուն: Քահանայ հայրը յատուկ շնորհակալութիւն յայտնեց Հայ Ծերանոցի Տիկնանց յանձնախումբին, տնօրէնին եւ պաշտօնէութեան, դրուատիքով արտայայտուեցաւ անոնց նուիրումին եւ ծառայութեան մասին:
Ապա, բեմ հրաւիրուեցաւ Հայ Ծերանոցի տնօրէն տիար Աւօ Գաթրճեանը, որպէսզի Ծերանոցի մասին զեկոյց փոխանցէ ներկաներուն:
Տնօրէն Գաթրճեան, խօսքի սկիզբը նախ շնորհաւորեց ներկաները Կանանց եւ Մայրերու զոյգ տօնին առթիւ: Ապա՝ որդիական երախտագիտական եւ շնորհակալական յատուկ խօսք ուղղեց Հայ երեք համայնքապետերուն, որոնք իրենց հովանաւուրութեամբ եւ յորդորներով կանգուն կը պահեն այս մեծ մարդասիրական ու Աստուածահաճոյ հաստատութիւնը: Ծերանոցի տնօրէնը շնորհակալութիւն յայտնեց Հայ Ծերանոցի անձնակազմին իրենց տարած բծախնդիր հոգատարութեան համար: Գաթրճեան, Հայ Ծերանոցի վերջին շրջանի գործունէութեան մասին համառօտ զեկոյցով փակեց իր խօսքերը:
Մինչ, մերթ ընթ մերթ ելոյթ կ՛ունենար Հալէպահայ սիրուած երգիչ Կարօ Պերէճիքլեան, որ մերթ յուզիչ, մերթ խանդավառ երգերով մթնոլորտ ստեղծեց մեկնաբանելով ժողովրդային եւ քնարական երգեր, ստեղնաշարային գործիքով կ’ընկերակցէր բժիշկ Րաֆֆի Ապէճեանը:
Մայրերու Տօնին առիթով տեղի ունեցած հացկերոյթի ջերմ եւ հայաշունչ մթնոլորտը՝ մերթ յուզիչ, մերթ ուրախ յաճախ կ՛ընդհատուէր՝ Հալէպի միութիւններու ներկայացուցիչներու եւ գթասիրտ ու արատաձեռն զոհաբերողներու նուիրատուութիւնները Հայ Ծերանոցին յայտարարուելու համար:
Տիկին Կարինէ Ֆերմանեան տպաւորիչ կերպով ասմունքեց Յովհաննէս Շիրազէն կտոր մը:
Ձեռնարկին քանի մը պարով իր բաժինը բերաւ Համազգայինի «Ն.Աղբալեան» մասնաճիւղի «Շուշի» պարախումբը:
Նշենք, թէ ձեռնարկին բաժնուեցան յատուկ պրոշիւրներ «Մայրերու Օր»ուան խորհուրդը ներկայացնող: Տեղի ունեցաւ նաեւ վիճակահանութիւն:
Ձեռնարկը ուրախ եւ հաճելի ժամերով վերջ գտաւ:

Scroll Up