Բերիոյ Հայոց Թեմի Քահանաներէն Տէր Եզնիկ Քահանայ Զղջանեանի Մարմինը Հողին Յանձնուեցաւ

«Գանձասար»- 16 Մարտին, առաւօտեան ժամը 11:00-ին, Ս. Աստուածածին եկեղեցւոյ մէջ տեղի ունեցաւ Բերիոյ Հայոց Թեմի Երեսփոխանական եւ Կրօնական ժողովներու անդամ, հոգելոյս արժանապատիւ Տէր Եզնիկ Քահանայ Զղջանեանի յուղարկաւորութեան արարողութիւնը։

Ս. եւ Անմահ Պատարագի ընթացքին խօսք առաւ Առաջնորդ Սրբազան Հայրը՝ վեր առնելով անոր ծառայանուէր աշխատանքը, ապա ցաւակցութիւններ յայտնեց երէցկինին, վախճանեալ քահանայ հօր զաւակներուն, ընտանեկան պարագաներուն եւ Բերիոյ Հայոց Թեմի Ազգ. մարմիններուն։ Այնուհետեւ Սրբազան Հօր ձեռամբ օծուեցաւ վախճանեալ քահանայ հօր մարմինը։

Յուղարկաւորութեան ներկայ էին՝ Բերիոյ Հայոց Թեմի ազգային մարմինները, Հայ Կաթողիկէ Համայնքի առաջնորդը, Սուրիոյ խորհրդարանի հայազգի Հալէպի երեսփոխանը, Հայ Կաթողիկէ Համայնքի ներկայացուցիչը, Հայ Աւետարանական Համայնքի պետը, քոյր համայնքներու ներկայացուցիչներ ու ազգայիններ։

Յետ յուղարկաւորութեան ու թաղմանական կարգին, Առաջնորդ Սրբազան Հայրը վախճանեալ քահանայ հօր ընտանիքին հետ ցաւակցութիւններ ընդունեց եկեղեցւոյ ներքնասրահին մէջ։

 
Scroll Up