Կայացած Է Օդեսայի Մեսրոպ Մաշտոցի Անուան Հայկական Դպրոցի 15-ամեակին Նուիրուած Ձեռնարկ

Մարտ 10-ին Օդեսայի Հայկական մշակոյթի կեդրոնին մէջ տեղի ունեցաւ Օդեսայի Մեսրոպ Մաշտոցի անուան երկօրեայ դպրոցի 15-ամեակին եւ Յովհաննէս Թումանեանի 150-ամեակին նուիրուած ձեռնարկը, որուն ներկայ էին Ուքրանիոյ մէջ ՀՀ Տիգրան Սէյրանեան, Օդեսայի Փրիմորսկի վարչական շրջանի ղեկավար Մարատ Քորոլեովը, Ուքրանիոյ ԱԳՆ եւ այլ պետական հաստատութիւններու եւ տեղի հայ համայնքի բազմաթիւ ներկայացուցիչներ:

Ինչպէս «Հայերն այսօր»-ին կը յայտնեն ԱԳՆ մամուլի ծառայութենէն, իր շնորհաւորական խօսքին մէջ դեսպան Սէյրանեան վստահեցուց, որ Ուքրանիոյ մէջ ՀՀ դեսպանութիւնը եւ Օդեսայի մէջ  ՀՀ գլխաւոր հիւպատոսութիւնը կը շարունակեն ընդլայնել եւ խորացնել կրթօճախի հետ կապերն ու համագործակցութիւնը: ՀՀ դեսպանը շնորհակալութիւն յայտնեց Օդեսայի հայ համայնքի ղեկավարութեան, ուսուցիչներուն, ծնողներուն, հայ երեխաներու հայեցի կրթութեան եւ դաստիարակութեան գործին մէջ անմնացորդ նուիրումի համար: Հայ դիւանագէտը բարձր գնահատեց Օդեսայի մարզային եւ քաղաքային իշխանութիւններու բարեհաճութիւնը տարածաշրջանի հայութեան հանդէպ:

Օդեսայի հայ համայնքի նախագահ Սամուէլ Տիգրանեան Ուքրանիոյ Հայերու միութեան կողմէ պատուոգիրներ յանձնեց կիրակնօրեայ դպրոցի տնօրէն Էլէն Պօղոսեանին, դպրոցի ուսուցչական կազմին, համայնքի այլ անդամներու: Այնուհետեւ հանդէսատեսը դիտեց Ալեքսանտր Սպենդիարեանի «Ալմաստ» օփերայի հիման վրայ բեմադրուած թատերական ներկայացումը` մշակոյթի կեդրոնի «Դրական ստուդիա»-ի սաներու կատարմամբ:

Scroll Up