Կը Մեկնարկեն Տիարպեքիրի Սուրբ Կիրակոս Հայկական Եկեղեցւոյ Վերականգնման Աշխատանքները

Այժմեան Թուրքիոյ Տիարպեքիր քաղաքի Սուրբ Կիրակոս հայկական եկեղեցին, որ լուրջ վնասներ  կրած էր 2015 թուականին քաղաքի պատմական Սուր թաղամասին մէջ թուրք-քրտական բախումներու հետեւանքով, կը վերակառուցուի: «Հայերն այսօր»-ը, յղում կատարելով Dailysabah-ին, կը յայտնէ, որ  Միջին Արեւելքի մէջ գտնուող հայկական ամենամեծ եկեղեցին կը վերականգնուի Թուրքիոյ Շրջակայ միջավայրի եւ քաղաքաշինութեան նախարարութեան կողմէ: Այս նպատակով կառավարութիւնն նախարարութեան յատկացուցած է 15 մլն թրքական լիրա:

Սուրբ Կիրակոս եկեղեցին կառուցուած է 1376 թուականին: 2012 թուականի նոյեմբերին 32 տարուայ ընդմիջումէն ետք  այստեղ կատարուեցաւ վերանորոգման յաջորդած առաջին եկեղեցական արարողութիւնը, ինչպէս նաեւ առաջին պսակադրութիւնը: Եկեղեցւոյ զանգերը 97 տարի անց կրկին ղօղանջեցին: Վերանորոգման աշխատանքները կատարուած էին Պոլսոյ Հայոց պատրիարքարանի ֆինանսական աջակցութեամբ եւ հայկական սփիւռքի նուիրատուութիւններու շնորհիւ: Աշխատանքներուն աջակցութիւն  ցուցաբերած էր նաեւ Տիարպեքիրի քաղաքապետարանը:

 

Scroll Up