Սթամպուլի ՄԷջ Տեղի Ունեցած Է Հրանդ Տինքի Սպանութեան Գործով Հերթական Դատական Նիստը

Սթամպուլի առանձնակի ծանր յանցագործութիւններու թիւ 14 դատարանին մէջ այսօր տեղի  ունեցած է պոլսահայ լրագրող եւ մտաւորական, Սթամպուլի մէջ հրատարակուող «Ակօս» պարբերականի հիմնադիր եւ նախկին գլխաւոր խմբագիր Հրանդ Տինքի սպանութեան գործով հերթական դատական նիստը:

Ինչպէս կը փոխանցէ «Ակօս»-ը, դատական նիստին ներկայ  եղած են մեղադրեալներու շարքին գտնուող Տրապիզոնի Ոստիկանութեան նախկին գլխաւոր հրամանատար Ալի Օզը, Տրապիզոնի նախկին ոստիկանապետ Ռեշաթ Ալթայը, Հետախուզական կոմիտէի Սթամպուլի վարչութեան նախկին տնօրէն Ահմետ Իլհան Կիւլերն ու այլ նախկին բարձրաստիճան պաշտօնեաներ:

Նիստի ժամանակ վկայութիւն  տուած են Սամսուն քաղաքի ներկայի ոստիկանապետ Վեդաթ Եաւուզը, որ Տինքի սպանութեան ժամանակ եղած է տեղի ոստիկանութեան հետախուզական բաժինի փոխտնօրէնը, ինչպէս նաեւ Սթամպուլի ոստիկանութեան ահաբեկչութեան դէմ պայքարի բաժինի նախկին փոխտնօրէն Ճելալ Սելը:

Սելը դատարանին պատմած է, որ Տինքի սպանութեան լուրը լսած է հեռուստացոյցէն ու միանգամէն շտապած դէպքի վայր: Այնտեղ մօտակայ տարածքին մէջ գտնուող խանութներէն մէկուն մէջ քաղաքացիները զինք տեղեկացուցած են, որ տարածքին մէջ կան անվտանգութեան տեսախցիկներ:

«Գացի ձայնագրութիւնները դիտելու: Կասկածեալը կ՛երեւէր: Մեր բաժինի տնօրէնը ցանկացաւ, որ դէպքի մասին աւելի բարձր մարմիններուն զեկուցելու համար զեկոյց պատրաստեմ: Օգիւն Սամասթի ձերբակալութենէն յետոյ հարցով չեմ զբաղուած», – tert.am-ի փոխանցմամբ, ըսած է Սելը:

Վեդաթ Եաւուզն իր հերթին յայտնած է, որ համապատասխան մարմիններն իրեն ժամանակին տեղեակ չեն պահած Տինքի սպանութեան նախապատրաստման մասին:

Հրանդ Տինքը սպաննուած է 2007թ.-ի յունուար 19-ին` Սթամպուլի Շիշլի թաղամասին մէջ գտնուող «Ակօս» թերթի խմբագրատան առջեւ`16-ամեայ թուրք ազգայնական Օգիւն Սամասթի կրակոցէն: Հրանդ Տինքի սպանութեան վերաբերեալ դատավարութիւնը կը շարունակուի  աւելի քան 10 տարի եւ դեռեւս չէ գտած իր հանգուցալուծումը:

Scroll Up