Հանդիպում Եւրոպայի ՄԷջ Ծառայող Հայ Հոգեւորականներու Հետ

Մարտ 8-ին Պուլկարիոյ ՀՀ դեսպանութեան մէջ դեսպան Արմէն Սարգսեան հանդիպեցաւ Հայ Առաքելական եկեղեցւոյ` Եւրոպայի մէջ ծառայող հայրապետական պատուիրակներու, առաջնորդներու եւ առաջնորդական տեղապահներու հետ, որոնք Պուլկարիա կ՛այցելեն  ՀԱԵ Եւրոպական թեմերու առաջին ժողովին մասնակցելու նպատակով:

Ինչպէս «Հայերն այսօր»-ին կը յայտնեն ԱԳՆ մամլոյ ծառայութենէն, ողջունելով հիւրերը, դեսպան Սարգսեան բարձր գնահատեց ժողովի կազմակերպման գաղափարը` կարեւորելով հայապահպանման ուղղուած Եւրոպայի մէջ ՀՀ դեսպանութիւններու եւ ՀԱԵ թեմերու միջեւ սերտ համագործակցութեան յետագայ զարգացման անհրաժեշտութիւնը:

Արեւմտեան Եւրոպայի Հայրապետական պատուիրակ, Վատիկանի մէջ Մայր Աթոռ Ս. Էջմիածնի պաշտօնական ներկայացուցիչ Խաժակ արքեպիսկոպոս Պարսամեան ներկայացուց ժողովի հիմնական նպատակներն ու քննարկուելիք շրջանակը: Ան կարեւոր համարեց Եւրոպական թեմերու միջեւ համագործակցութեան սերտացման անհրաժեշտութիւնը` հաշուի առնելով հայ եկեղեցւոյ առջեւ ծառացած խնդիրներն ու մարտահրաւէրները:

Այս ծիրէն ներս ան կարեւորեց Եւրոպայի թեմերու առաջնորդներու եւ եւրոպական երկիրներուն մէջ հաւատարմագրուած ՀՀ դեսպաններու համատեղ հաւաքի կազմակերպման անհրաժեշտութիւնը:

Հանդիպման ընթացքին քննարկուեցան պուլկարահայ համայնքին առնչուող հարցեր, կապուած, մասնաւորապէս, հայապահպանման, Հայաստանի հետ կապերու ամրապնդման եւ այլ խնդիրներու հետ:

Scroll Up