«Կեցցէ Հայաստան» Ծրագիրը Պրազիլական Դիմակահանդէսին 3-րդ Տեղը Գրաւած Է

Պրազիլիոյ Սան Փաուլօ քաղաքի հանրահռչակ շքերթին մարտ 2-ին տեղի ունեցած Պրազիլի ազգային դիմակահանդէսին ելոյթ  ունեցած է նաեւ Սան Փաուլոյի «Rosas de Ouro» («Ոսկէ վարդեր») սամպայի դպրոցը` «Կեցցէ Հայաստան» ծրագիրով:

Ծրագիրը բաղկացած  եղած է 5 մասէ: Իւրաքանչիւր մաս ներկայացուցած է հայկական մշակոյթի եւ պատմութեան որեւէ դրուագ` սկսած Նոյ նահապետէն մինչեւ մերօրեայ Հայաստան: Անդրադարձ  կատարուած է քրիստոնէութեան, հայոց գիրերուն, Հայոց ցեղասպանութեան, Հայաստանի Առաջին Հանրապետութեան եւ այլն: Այդ ամէնը մանրամասն մեկնաբանուած է Պրազիլի խոշորագոյն «Globo» հեռուստաընկերութեան միջոցով: Որպէս յատուկ հիւր` դիմակահանդէսին մասնակցած է նաեւ պոլսահայ երգչուհի Սիպիլը:

«Դիմակահանդէսին մասնակից 14 դպրոցները բաժնուած էին երկու խումբի: «Rosas de Ouro»-ն իր ««Կեցցէ Հայաստան» ծրագիրով ելոյթ ունեցաւ մարտ 2-ին: Մինչեւ դիմակահանդէսի սկիզբը յորդառատ անձրեւ կը տեղար, որ մեզի շատ մտահոգած էր: Բարեբախտաբար, դիմակահանդէսին ժամանակ այն դադրեցաւ: Չնայած մեր ելոյթը կէսգիշերն անց էր, ժամը` 02:45-ին, այնուամենայնիւ, մենք մեր տեղերը գրաւած էինք ժամեր առաջ: Երբ ներս մտաւ մեր շքեղ զարդարուած կառքը, յուզմունքս կրկնապատկուեցաւ: Դիմակահանդէսին մասնակցելու հրաւէրը ստացած ժամանակէն` այդ օրուան, այդ պահի մասին կը մտածէի: Աննկարագրելի յուզուած եւ ուրախ էի,- «Հայերն այսօր»-ի հետ զրոյցին ըսաւ Սիպիլը եւ աւելցուց,- ամէն ինչ այնքան հեքիաթային էր, տպաւորիչ: Ինծի համար մեծ պատիւ էր հայկական մշակոյթին (Արամ Խաչատրեանին, Շառլ Ազնաւուրին եւ շատ-շատերուն) նուիրուած կառքի մէջ ըլլալ ու այդ ամէնուն  մասնիկը զգալ: Երբ յայտարարուեցաւ, որ կը սկսի «Վիւա Հայաստան» խորագիրով երաժշտական շոուն, բոլորս խաչակնքեցնք ու իրար յաջողութիւն մաղթեցինք»:

«Rosas de Ouro» սամպայի դպրոցի` դիմակահանդէսի շքերթին մասնակից 2300 մարդոցմէ շուրջ 500-ը հայեր  եղած են: Հազարաւոր մարդոց ձեռքերուն ծածանած է Հայոց եռագոյնը:

Մարտ 5-ին տեղի ունեցած է քուէարկութիւնը: «Rosas de Ouro» սամպայի դպրոցն իր հայկական թեմաներով ծրագիրով 14 սամպայի խումբերու մէջ գրաւած է 3-րդ տեղը:

«Այս ամէնը շատ յուզիչ էր: Մարդիկ շատ տպաւորուած էին, բայց կարեւորը ժիւրիի կողմէ լաւ գնահատական ստանալն էր: Շատ լաւ եւ ուժեղ մրցակիցներ կային, եւ 3-րդ տեղը գրաւելը մեզի համար մեծ ուրախութիւն է: Մարտ 8-ին յաղթողները կրկին ելոյթ պէտք է ունենան: Եւ մենք նոյն ուրախութեան ու պատուին պէտք է արժանանանք:  Ասիկա բոլորիս յաղթանակն է»,-նշեց Սիպիլը:


Scroll Up